قصة خيانه ابكتني...(واقعيه)

[بنت العين]

كنت راكبه ويا اخوي السياره...و جان يشغل شريط شعر...و ليته ما سواها...تدرون ليش؟ لاني حسيت اني بختنق...جنه مشاعر الشاعر انتقلت لي..لوعته وحزنه ...شاف اخويه عيوني..و درى اني متأثره
بند الشريط..و قالي هذي قصه واقعيه...(فيه واحد يعرف بنت من سنتين(كيف مدري) المهم حبها حب ما شفت شكله,,,,و آخر شي اكتشف انها تخونه....فكتب مشاعره فقالب شعري...و سجله فشريط) يالله اسمعوا...(اقروا)



لا ردج الله لا و لا اطلب تردين…………….ادعي عليج بعثرة قي صلاتي
عثره تشلج ما بعدها تقومين…………………ياللي نقضتي عهودنا الماضياتي
خدان لج فالقلب كانت بساتين………………وريحان و غصون بها يانعاتي
كانت تروح الروح ساعة تروحين………….و تعاف نفسي شربها والمقاتي
كنتي منتات القلب و الروح و العين………….و اليوم عينج يعلها ما تباتي
كنت احسبج للعهد و الروح توفين………….قلتي الغدر بالحب ما هو سواتي
وبان الغدر سم جرى بالشرايين………………الله عسى يسقيج سم الفعاتي

[بنت العين]

كل سقيتج حب و اليوم تنسين……………...تقولين حلم ايام واليوم فاتي
و خذتي الهوى لعبه على ما تحبين……………..الين عصفت بالهوى عاصفاتي
و صرتي بشعري فالعذارى تباهين…………….تقولين انا شمس العصر فحلاتي
و بالشعر صورتج خزام ورياحين……………….و اثرج هضاب و شوك مابه هداتي
و بالشعر غليتج على كل غالين……………….و اثرج دنيه تتبعين الدناتي
رسمتج سحابه خير قطر تنفين…………………فزت لج الصحرا زهور و نباتي
رسمتج مهاة للجميله تقودين…………………و اثرج (……)ضيعتها الرعاتي

[بنت العين]

توسلتلج على حب عامين……………………عامين لكن في حسابي مئاتي
ناديت لكن لي ابد ما تسمعين………………..عمري و روحي و الفكر في شتاتي
خنتي و بعتي كل عهد ويمين………………….ما عاد يفرق بين ماضي و آتي
وصرتي مثل غيرج برخص تيبعين…………….ياما رخصتي ما بقى لج غلاتي
تحسبين انج بالمهافاتي ترقين………………….كيف الصعود يكون للهاوياتي
و النوق من تخرس فلا يفيد تمرين……………مايفيدها قلص و ضرب العصاتي
و مع ناقة خرسا تكلفت سنتين………………فلا لانت بشده و لا بالهداتي

[بنت العين]

أسبوع فدوامي و لا أي غير يومين…………..ويوم اوصل الدار اتصل و احاتي
صبري نفذ و اليوم ثارت براكين……………مظلوم انا و باجر تحل دعواتي
سمعي عسى من بعدها ما تسمعين……………سمعي دعا من صار قلبه حصاتي
عساج عوق ما عاد منه تبرين……………….عوق تشافق له قلوب العداتي
ادعي عسى من ناظرج ما تشوفين…………….و تطحن بج الايام طحن الرحاتي

[البحاري]

ذكرى المواجع .. تعيد للقلب جرحه :(:(

تحياتي لك ..

[بنت العين]

ويالله عسى يحتار فيج المداوين………………تبين الممات و لا يجيج المماتي
ويالله عسى كف الندامه تعضين…………….تندمين يوم انه يفوت الفواتي
وتبكين دم يسيل من مقلة العين.……………و يحتار قلبج من عناج و تعاني
وعسى ما تلاقي من القلب تهدين.………….وان هو حصل ادعي عساج الشتاتي
يا بلوة اللي وسط بيته تعيشين…………….غافي وحوله شب جمر الغضاتي
عسى بعمرج ساعة ما تهنين………………..و تمضي حياتج بين هم و شقاتي
يا بنت قلبي وين مثله تلاقين……………قلب عطاج الحب ما قال هاتي
ييتج وروحي شلتها لج بكفين……………وفي التاليه رمح الخيانه جزاتي

[بنت العين]

ويالله عسى تلبسج جن وشياطين……….وتكونين مدعاة الحكي والشماتي
والله ماني منتظر قلبج يلين………………و المجبلات اكثر من الفايتاتي
وما عادتي اتبع ضعون المقفين……………ريح تشل ضعونج المقفياتي
يا ليله ظلمه على الله تزولين…………….و تاتي ليالي سعدنا مشرقاتي
ويا حيه رقطه تقود الثعابين……………..باجر تحل ايامج المعتماتي
يا ظالمه نفسج ترى الدهر يومين…………يوم النجاة ويوم مابه نجاتي
بيني وبينج تحكم ايام و سنين…………….وانا شاهدي قلب من الغدر ماتي

[بنت العين]

لوكان غدرج في كفوف الموازين…………لكان ربح كل غدر البناتي
و يا دمعة التمساح لا تذرفين……………العيون رغم دموعها كاذباتي
لا ما عرفتي الحب لا ما تحسي……………وغدرج تعدى غدر ذيب الفلاتي
الذيب يعوي قبل يغدر بمسك……………وانتي غدرتي خافقي في سباتي
وانتي السبب لا لا تلومين…….…………وان ياج باجر شوفي شلون ياتي
والله لاكتب وافضحج في دواوين……….وارزف واغني يوم خبر الوفاتي

[بنت العين]

وارسم لاهل العشق قلب وسهمين………وقصة خيانه ما روتها الرواتي
ويمين لانشر فوق اسمج عناوين………….واشهرج من قاصي اليمن للفراتي
ومن غرب هالدنيا لقاصي الصين…………و ديوان شعر فيه كل اللغاتي
و البادي اظلم سنة العين بالعين….………و لا هذي لا عادتي و لا صفاتي
ويا شبه انسانه براس ورجلين….………..اعوذ بالرحمن منج فصلاتي


و الله لو تسمعونه...لازم الواحد على الاقل يدمع...يقوله من خاطره....يقولي اخويه 3 مرات عاد التسجيل لانه يتاثر..:(


شبيه الريح

[بنت العين]

السموحه من الشاعر

و السموحه منكم...طولت عليكم

بحاري....اشكر تواصلك...و سوري على اثارة المواجع



:) شبيه الريح :)

[ahied]

مرحبااااااا

آه من الخيانة

كل شيء إلا الخيانة

خاصة من الحبيب

والله كل شيء يؤلم بس الخيانة تؤلم واااااايد ويظل ألمها شديد لأن الحب اللي كان لهالشخص الخائن يتحول فجأة إلى كره مرة واحد شيء وااااايد صعب فعلا

الله يعين هالشخص والله

أعرف قصة واحد نفس الشيء خانته حبيبته رح أحكي لكم إياها بإختصار فإعذروني اذا طولت عليكم شوية

إلتقى هالولد مع بنت وااااايد حلوة وحبها حب صادق فعلا وكانت غير محجبة وقعد يحاول فيها لين ما خلاها تتحجب فإعتقد ان استجابتها له معناتها انه تحبه خاصه إنها كانت تبادله نفس كلمات الحب بس المسكين كان ما يعرف انها ما تبادله نفس مشاعر الحب , وكذا مرة جاءه عدد من الشباب يخبرونه ان البنت موب زينه ولها علاقات مع شباب بس هو ما كان يصدقهم ويقول لهم لا تشككوني فيها .. في احد المرات شاءت الظروف انها تعاملة بطريقه تخلية يشك غصبا عنه .. وسبحااااان الله يمهل ولا يهمل .. شاءت الأقدار إنه يروح للمكان اللي هيه فيه عشان يشوفها في موضع شبه مع رجل غريب تخونه وهو ما يدري .. إتصوروا حب دام خمسة سنوات يضيع بهالمنظر آآآآآآآآآه المسكين ما سوى أي شيء وطلع من هذاك المكان محطم تمامااااااا وتركها بعد ما خبرها انه عرف كل شيء عنها وكان الولد يقدر يفضحها قدام أهلها واهله بعد خاصة أنهم كانوا شبه مخطوبين بس هو ما سوى هالشيء لأنه ما يردي يضرها مثل ما ضرته هيه .. وظل كابت لشيطان غضبه وكابت جرح الخيانة بدااااااخله لين يومنا هذا

عذرا أطلت عليكم


بس أختي بنت العين

كيف نقدر نحصل على هالشريط

شوقتينا لسمااااعه

وعاااااد انا مرة مغرمة بسماع الأشعار

ممكن تخبريني ؟؟؟


لك تحياتي :

أختك ahied

حبيبة حبيبي

[BMW 320i]

آآآآآآآه على هذه الكلمات المعبرة عاشت ايدج و صح لسان الشاعر بس يا ريت اتقولي لي مين هو الشاعر و شو اسم كاسيته عشان اييبه اسمعه للخاينة عندي .

الله على الظالم الله على الخاين

:(

[بنت العين]

ما عرف اسم الشاعر..
و الشريط خاص....بس اللي اعرفه انه من الشارجه
و الشريط منتشر بين ربع الشاعر

:) شبيه الريح :)

[الناقد]

وااااو

هذا حب والا ارهاب ؟! :) :)

لكن لو كان من جد نساها كان ماكتب فيها و لا بيت ... لا سب ولا مدح

هو لم ينسها و لازال حبه لها في قلبه و لكن الان وصل لنقطة اللا رجعة .... منها في البداية و منه الآن .... لذلك هو يتألم .

الله يكفينا الشر.

[العسلي]

احسنتي على اختيار هالقصيد
يابنت العين
الخيانه
محرمه من الحين
الى يوم الدين

الله يصبر اي خاطر مفجوع ان شاء الله

[هند]

" بنت العين .. "

قصة مؤثرة ..

و أبيات تقطر حزن و ضيق

لكن عسى قلب الشاعر ما يسكنه الكره .. او الانتقام ..

الخيانة .. دواها النسيان ..

و الي يخونك .. ما يستحق حتى دمعة حزن ..

او لحظة يطرى فيها على البال .. خسارة فيه الذكرى ..

تسلمين على الاختيار الحلوة

يا حبوبة .. :)

الله يسلمنا و ياكم من الخيانة ..

[بنت العين]

شرفني حضورج...انتي و الناقد..و اشكر ردودكم :)

العسلي....اشكر تواصلك....و اسم مستعار مميز :)