سؤال عن العكوس والمقصات

[majed350]

شباب ممكن احد يشرحلي الفرق بين ( العكوس و المقصات و الاكس )
هل فيه فرق بينهم او انهم كلهم نفس الشيء ؟؟؟ وايش مهمتهم

و استفسار بسيط ايضا لمن يطلع صوت طقطقه عند ما الف الدركسون على الاخير و امشي بسرعه بطيئه يا ترى ايش المشكله بتكون مع العلم ان السيارة دفع امامي فورد سيبل 98
وهل هناك خطر لو بقي هذا الصوت ؟؟

واسف على الاطاله بس اخوكم معلوماته الميكانيكيه على قده:rolleyes: :rolleyes: :confused:

[M5]

مرحبا أخوي majed350

الفرق بين العكوس والمقص والاكس ..

أول شيء يالحبيب العكوس والاكس هخم نفسهم :)
اللي هي " Axel " وبالعربي معناها " محور "

وهذا الـ " Axel " أو المحور هو اللي يقوم بنقل الحركه من الدفرنس الى عجلات السياره ..

طبعاً مستحيل يكون فيه سياره في العالم تمشي بدون عكوس :)

مشكلة العكوس الأزليه هي :

انه سيارات السحب الأمامي .. يكون العكس في الأمام ........ ( لاياشيخ ؟! :D )
ومشكلة هذا العكس انه يتحرك ثلاث حركات .. في آن واحد :(

1- يدور عشان يمشي السياره .
2- يلف يمين ويسار عشان المنعطفات .
3- يتحرك فوق وتحت بسبب المطبات .

لذلك العكس لازم يكون مرن عشان ينقل الحركه الى العجلات الأماميه وفي نفس الوقت يتحرك الحركات الثلاثه اللي ذكرتها ..

عشان كذا العكس الأمامي يكون فيه ( مفصلات ) عشان الالتفاف .. وطبعاً ومش موجوده في العكس الخلفي ..

هذي المفصلات تحتاج الى " الشحم " باستمرار عشان تدور بسلاسه ..
وعشان لا يطلع الشحم من المفصلات .. تكون المفصلات مغطاه بجلد .. اللي هي " جلد العكوس " .

اش اللي يصير بعد كذا ؟!!

اللي يصير بعد فتره من الزمن ( سنه أو سنتين ) تتقطع جلد العكوس ويخرج الشحم .. وتسير المفصلات تدور بدون شحم ( يعني احتكاك حديد × حديد ) عشان كذا يطلع صوت طقطقة العكوس عند الالتفاف ..

لذلك من الضروري انك تغير ( راس العكس الخارجي ) أو اذا ما يجي لحاله .. الله يعينك غير عكس كامل :eek:



بالنسبه للمقص ..
هو الجزء اللي يربط العجلة بجسم السياره ( الشاسيه ) .. ويكون مثبت جهة الشاسيه ، والطرف الثاني يتحرك مع العجلة .. ويحتوي على جلده أو ربر ( Rubber ) .. تسمى أحياناً ( جوزه) واذا تلفت لازم تتغير ..




آسف على الإطاله :) وان شاء الله تكون الصوره واضحه :)






تحياتي لك :)

[majed350]

ما شالله عليك يا خوي والله انا فهمت الحين مزبوط وفعلا كلامك صحيح ميه بالميه طلعت المشكله عندي بالعكوس وان شالله راح اغيرها ، وفعلا مثل ما قلت شكل الشحم نشف داخل العكس وهو سبب المشكله لاني انا ما اكلت مطب او حفره يعني ما في سبب يخرب العكوس الا هذاك السبب

بس في سوال صغير العكس اليسار طلع خربان في حاجه اني اغير العكس اليمين ؟؟ بصراحه انا خايف يخرب معي اليمين بعد فتره .حتى الوكاله قالو ما في داعي بس انا مو مرتاح وابغى اغيره
ايش رايك في داعي ولا لا ؟ عشان اكيد اليمين راح يخرب زي اليسار وانا راعي سفرات وابغى اكون مرتاح نفسيا . ومافي طريقه مثلا انه يشحم العكس ؟ حتى يعيش فتره اطول

ومشكووووور على ردك المفصل الجميل والله يكثر من امثالك
بس تعال هنا انت من فينلك هاالمعلومات>>>>> ملقوف:D :rolleyes:

[MAD MAX]

يا اخ majed350 اذا سعر العكس رخيص بدلة اذا غالى ما يحتاج بس يبي لك تشيك على نفس الجلدة تقريبا كل 6 شهور مش متششققة او شئ من هذا القبيل عشان تضمن انة تكون في السليم واذا سويت كذا راح تدوم مع العكوس لفترة طويلة جدا وما دام العكس الثانى الربلة مش متشققة ما يحتاج يبدلون الشحم

[majed350]

اوكي ان راح ابدل العكسين سعر الواحد 500 ريال يعني الاثنين 1000
و اصير اتفقد الربله كله مده مثل ما تفضلت ،لكن الحق علي في خراب العكوس عشان لي حوالي 4 سنوات ولا عمري شحمت ولا تفقدت الربلات

طيب بالنسبه للمساعدات هل لها تشحيم كمان ما دام العمليه كلها شحم في شحم ابشحم كل شي في السياره :D :D :D


ومشكر جدددددددددا على ردك الجميل و باذن الله ما دام فيه ناس زيكم في هذا المنتدى سيبقى دائما ناجحا :o
وشكرا:) :o :o

[M5]

مرحبا أخوي majed350

المساعدات سلمك الله ما يبغالهم تشحيم :)

خلاص انت ماصدقت تبغا تشحم السياره كلها ؟؟ :D

شوف يالحبيب ..

في طريقه سهلة جداً عشان تختبر المساعدات اذا يحتاجوا تغيير والا لا :

هز السياره بقوة ( من الخلف أو الأمام ) عدة هزات .. أول ما ترفع يدك راح توقف السياره عن الاهتزازا .. هذا يعني ان المساعدات سليمه :)

اذا رفعت يدك واستمرت السياره في الاهتزاز ( هزتين أو ثلاثه ) يعني المساعد يحتاج تغيير ..

في طريقه ثانيه .. انه لما تدخل مطب صغير وحاد شويه .. تحس ان الكفرات تتأرجح وترتج بسرعه .. ( مثل كرة السلة :) ) .. يعني المساعد منتهي :(




تحياتي لك :)