" الانخداع وراء دعايات جنرال موتورز.. مأساة مع لومينا.."

[دكتور / مجنون]

اول شيء انا مو دكتور مجنون .. انا واحد من اصدقائه و بس حبيت اشرح لكم معاناتي الي ودي افضفضها لكم :help:
السلام عليكم جميعا..
اشتريت سيارة شيفرولية لومينا إل تي زد قبل سنتين و نصف..وبالتحديد في شوال 1421 ( 2001 ) .. وبصراحة كانت من أمرّ التجارب الي مرّت علي في حياتي و نكدت علي مستقبلي

في البداية.....

1- بعد ماسوالي غسيل مخ مندوب المبيعات الي بشركة الجميح.. توكلت على الله و اشتريت اول دفعة من السيارة, وبعد مادفعت الفلوس و استلمت السيارة حسيت ان المندوب مايعطيني وجه ولا كنه يعرفني !!

2 - عندما بلغت السيارة 700 كيلومتر ( توها تحبي ) لقيت احد لمبات الطبلون اشتغلت ( لمبه تشتغل في جميع الكوابرس القديمة عرفتوها ؟؟ ) .. و السيارة مافيها عزم !!!! على طول بدون تفاهم اخذت السياره بسطحه و وديتها لم الصيانه بالجميح.. طبعا ماقصرت مع الرجاجيل الي هناك ببعض الالفاظ الي ماتطلع الا بهذي المواقف .. وعطوني كاديلاك ماقصروا قالو مش فيها حالك.. ( ورببيييي عزم و جلنطاته شي ) جلست السيارة عندهم يومين ومارضوا يقولونلي العلّة بس لقافتي خلتني اوصل الى داخل الورشة و اسأل العامل الي يشتغل عليها وقالللللي الطاممممة الكبرى " كمبيوتــــــر القير عطلان بالكامل " .

3 - مشت الامور زي الحلاوة لما وصلت 10 آلاف كيلو لكن قلت خلني بسويلها صيانة في التوكيلات العالمية للسيارات.. ( ممكن انك تسوي صيانه ويشملك الضمان لاي وكيل GM اينما كان..) دخلتها هناك.. ماشا الله ترحيب و تهليل وش السالفة؟؟!؟ قلت هذا الناس السنعة الي مافي زيهم.. وين الجميح ووينهم.. هذا الناس ولا بلاش.... كان بالسياره مشكله بسيطه بالمكيف انه مايبرد اذا كانت السيارة واقفه.. وماقصروا صلحلولياها على الضمان و مايقصرون.. وشيكولي السيارة مثل الحلاوة..
4 - 16.000 كيلو... وديتها الوكالة فيها صوت وانا ادوس فرامل... وديتها.. قالوا يبغالها فرامل امامية و خلفيه و هذي مايشملها الضمان... ابتسمت زي هذا بالضبط وقلت أمري لله.. ماقصروا تجملو فيني و صكوني 1347 ريال ينطح ريال...

5 - 20.000 كيلو... تشييك ال20 و رجة في السيارة غير طبيبعية! يعني كنك راكب عراااوي و ماشي على خط ابوحدرية .. ماقصروا صلحوها و شيكوا عليها مضبطوط بس اضطريت اني ادفع 30 % من قيمة الكفرات الي غيروها ( ليش مادري ).

6- بنفس اليوم الي استلمت منه سيارتي متجه على خط الظهران الى الدمام و ماشي في أمان الله .. فجأة سمعت صوت قوي في المقدمة و دخان طلع..قلت بس شكلي فرمت قطو ( من أحب الهوايات عندي ) .. وطفت السيارة بنفس الوقت .. بس غريبة مو لذا الدرجه القطو يسوي كذا.. و اصفط على جنب الا السيارة تنقط و كل ماحاول اشغها اسمع صوت اشياء تتكسر... نزلت.. الا السيارة تنقط تنقط تنقط تنقط... بس تنقط ايش؟ تنقط زييييييييت !! يعني المكينه بح !!! يا عالم بح !! ماعليكم جا الونش وسحبها لما الوكالة
ودخلت على مديرهم الاقليمي المسكين و سفلت فيه اليوم الثاني.. وقالي هذي الحالة اول مره تصير في تاريخ اللومينا كلها.. وجابو ناس تصور السيارة.. وصارت سيارتي مشهورة.. بس مشكلتي طيب..
.. ركبوا ماكينه جديدة على حسابهم طبعا و قالولي مرّنـــها و بعد الالف كيلو جيبها!!!!!
http://www.geocities.com/lover_280/lum2.jpg


هذي احدى الاشياء الي استوليت عليها من احد مصادري الخاصة بالوكالة... تاريخ السيارة.. يبدأ من الاسفل بمشكلة كهربائية و الي فوقها بالضبط تشييك العشرين الف لاحظ الفترة الوجيزة الي يبنه وبين المشكلة الي فوقها الي هي ( انفجار المكينة !! ).

7- مشت الامور حلوه... وفجأة عند بلوغها الثلاثون الف عقد من الكيلومترات.. حسيت السيارة صارت عراوي بمعنى الكلمة.. لا اتزان على أي مطب خفيف يواجه السيارة.. اصوات الهواء بعد ماتمشي فوق ال 60 كيلو من كل مكان بالسياره تسمعها.. اصوات غريبة و عجيبة تشبه اصوات ( عمّال قاعدين يكسرون جدار ) ... ماقصرت التوكيلات و دفعتني مبلغ بحدود ال 2000 ريال بس هذا خارج الضمان غير اني غيرت الكفرات مره ثانيه عندهم ..

8- الامور كويسه ولله الحمد لكن الاصوات لسا ماتختفي الا يومين و بعدين تظهر وباقوى ماعندها تقولك ترا رقبتي سداده لحوووول...وتبقى و اضطر اني ارفع صوت المسجل تجنبا لسماع صوت اي تسرب هواء واني اخش جو مع الاغنيه عشان انسى الخضخضه .

9- من بعد الـ، 40.000 الى 60.000استمرت نفس مشاكل الخضخضه و الهواء و المكيف و ماقصروا استنزفوا مني مرتين تصفيه ماكينه ناهيك عن البريكات الي مادري وش ربي خلاني اغيرها عندهم.. يعني بالعربي صار للسياره مصرف محترم لما انتهى الضمان.. وبعدها ...اعلنت التوكيلاات العالمية للسيارات حربها عليّ ..

10- بعدها قلت خلني اجرب اوديها الصناعية.. وديتها مره الصناعيه على امل اني اسوي تصفيه ماكينة .. وماقصر بالباكستاني راجو.. سوالي توصيخ مكينة.. وراجو طبعا من اكثر الناس شهرة في صناعية الدمام بتصليح السيارات.. بس مادري البلا من ايش!!

11- أمري لله ورجعت للتوكيلات قتلهم عندي شويه هزه بالماكينه قالوا ابشر نصلحها... وماقصروا صكوني ب3700 ريال !!! وجع.. 3700 هذي اافرّ فيها ربوع بلادي بباصات سابتكو!!!
واخذ لي عمره بعد

12- واكبــــر طامـــّة الطامّة الكبرى الاخيره..... القير بدأ يرجع لاصله..قام يقطّع.. ويتأخر في التبديل.. ويطلع صوت قوي ومروّع اذا جا يبدل من نمره لاخرى..
فريت الصناعية كلها ماحد عرف لها...
رجعت للتوكيلات قالو خل السياره ونسويلها تسعيره سوولها الطيبين تسعيره بعد الخصم ب 4900 ريال الا وهي تغيير كمبيوتر القير الي غيروه الجميح في أول عثرة للسيارة ... انظر رقم ( 2 ) ...لكن في النهاية



اقول بالبنط العريض:-
البلا مو مني ولا من التوكيلات.. البلا من سيارة .. استراليه الصنع.. رديئة الجودة.. تستتر خلف شعار شيفرولية ولا تمت له بصلة.. من شركة هولدن ذات الخسارة الفادحة و الي ماخلاها تنجح الا بعد ماشرتها جنرال موتورز و خلت الكابرس و اللومينا على طراز هولدن كومودوور و برلينا و ستاتيسمان... نحن ايضا نتحمل جزءا كبيرا من الخطأ في انسياقنا ورا الاعلانات..

* السيارة غير ثابتة في المنعطفات ( زحفتها و القبر )
* قطع الديكور الداخلي تتكسر بسرعه و اذا رحت تبي تصلحها قالولك ادفع ولو هي مو على الضمان.
* استهلاكها للبنزين غريب جدا!! و ايضا استهلاكها لاقمشة الفرامل.
* نظام الامان ( المزعوم فيها ) غريب و دايم يخبط يعني عادي تجي السيارة و هي واقفه تلقاها تدق بواري و فلشر واصلا محد جاها!!!!!!



والسلام ختام.. واستروا على ماواجهتوا

[PT Cruiser]

الحمد لله يا رب اني بعددت عن اللومينا
اول ما نزلت اللومينا اس اس البرتقاليه عرفتوها يا شباب
كانت شي فظيع المهم وراسي مليون عفريت الا اني اشريها
المهم رحت اناو يا الوالد للوكاله وخلاص مابقى الا شوي ونوقع الاوراق واطلع السياره
بدون اي مقدمات تغيرت الاحوال وصرفت نظر عنها كليا
الله يعنيك يا قريب دكتور مجنون
بعها يا رجال وافتك من اذاها

[HaKeM]

نصيحة أخوي دكتور / مجنون بيعها وطلعلك كورولا ولا أفالون وريح دماغك بلامصاريف زايدة تتعبك طول عمرك.

أنا كنت حا أوقع في الومينا ولكن ربي رحمني وخلاني اخذ افالون.

تحياتي

[ACCORD-V6]

قل للشباب اللي مزعجينا عند اللومينا

لكن صحيح حنا اغبياء وينلعب علينا

مالك الا الياباني والالماني ثم الكوري في اسؤا الحالات

اما امريكي استرالي:( :( :( :( :( :( :( :( :( :( :( :( :( :( :(



شوف الهوندا تنسى ان فيها فرامل تنسى متى اخر مره عبيتها بنزين


ليتعض الجميع من هالموضوع

اخوي احسن احسن لك بعها وارتح

وشكرا....

[الارهابي]

بعها و افتك منها و من همها و مشاكلها

اصلا اللومينا عربه حمار مركبين عليها مكينه و بدي
:D :D :D

الله العالم كيف بتصير لومينات الحكومه بعد كم سنه :D :D :D
على عشره على عشره على عشره :D :D :D
اشتري 3 و الرابعه :D :D مجانا

بعد كم سنه اتوقع اللومينا اس اس 2003 بيبيعوها في الحراج ب 6000
و بيكون عليها اقبال منقطع النظير
ركب عليها قير عادي حق ونيت :D :D :D و خلها للتفحيط :D :D هذا قدرها و اذا خرف الكمبيوتر ركب عليها مكينه كابرس 79 :D :D :D
اريح
يمكن تصرف اقل من مكينتها الاصليه :D :D :D



هذي اللومينا ( و مثلها الكابرس )
و اصبروا جايتنكم
الاوبل اوميجا بعدها
ما بتطلع عيوبها الا عندنا



اعذروني على التخاريف
نعسان :D :D :D

[الارهابي]

رد مقتبس من دكتور / مجنون
12- واكبــــر طامـــّة الطامّة الكبرى الاخيره..... القير بدأ يرجع لاصله..قام يقطّع.. ويتأخر في التبديل.. ويطلع صوت قوي ومروّع اذا جا يبدل من نمره لاخرى..
فريت الصناعية كلها ماحد عرف لها...
رجعت للتوكيلات قالو خل السياره ونسويلها تسعيره سوولها الطيبين تسعيره بعد الخصم ب 4900 ريال الا وهي تغيير كمبيوتر القير الي غيروه الجميح في أول عثرة للسيارة ... انظر رقم ( 2 ) ...لكن في النهاية


في قطعه او سموها كمبيوتر صغير
تبيعه شركه لتعديل القيور
تمكنك من تركيب قير جديد ( من النوع اللي يتحكم بهم الكمبيوتر ) على سياره بدون كمبيوتر او على سياره مختلفه بشكل عام

الطريقه
هو فيش
توصله من جهه في القير مكان الفيش الاصلي
و من الجهه الثانيه توصله بالكهربا ( يمكن يحتاج توصيلات ثانيه مو متأكد )
و لا هو غالي
يمكن ينفع للومينا تحطه بدل كمبيوتر القير اذا احترق :D :D

هذا كمبيوتر و ظفيره كامله للقير
غالي شوي
http://store.summitracing.com/partdetail.asp?part=TCI%2D377000&view=1

اما هذا هو اللي يمكنك من تركيب قير جديد lockup على سياره قديمه non lockup
http://store.summitracing.com/partdetail.asp?part=BMM%2D70244

:D :D :D

[760IL]

الله يأجرك في هذي المصيبه ياأخ دكتور / مجنون ويخلفك خير منها
.....وانا والله ماقصرت والشباب يعرفوني كل ماواحد يطلب مشوره في شراء اللومينا ...اقوله البلاوي الي حصلتلي معاها...

[Faisal20o0]

والله ياشباب أستغرب كلام الناس عن اللومينا لأنه كانت عندي وحده LTZ موديل 2000 وكانت ماشيه معي زي الحلاوه

انا ماأقول ان السياره كامله لكن ماكان يطلع فيها مثل هاللكلام اللي يقولونه الناس

ونفس الكلام على اللومينا أس أس والكابرس أعرف أشخاص معهم ولا طلع فيها شي من هالكلام اللي يقولونه الناس

:confused: :confused: :confused: :confused: :confused: :confused: :confused:

[®Lumina ss 2002]

الحمدلله انا عندي لومينا اس اس من سنة موديل 2002 والله ما غيرت فيها غير سفايف. وماشية عندي تمام لا علة ولاخراب. اللهم لا حسد:p وهذا يرجع على حسب سواقة سيارة

[دكتور / مجنون]

مشكور ياشباب على العموم على تفاعلكم هذا.. ويجزاكم الله الف خير.....لكن الحين لو ابغى ابيعها كم تتوقعون تسوى؟! :OO:

والاخوان فيصل 2000 و Lumina 2002 ss يا شباب ترا مو بالضروره السواقة لها دور.. ولد عمي عنده لومينا ال اس مسوي فيها رالي.. ولا قالت اح موديل 2000.... وانا الي مدلعها شوف ايش سوت فيني :banana:

الارهابي ودي اركب ذا القطع لكن خايف تفرقع فيني السيارة
===> :laugh: تعقد و صدقني مافي امل تركب على شي وارد هولدن Holden و على فكرة ترا الاوبل اهون من اللومينا بشوي الا الي مخربه ان وكيله الجميح..

اكورد ياخي سيارتك عسل تبيع :damp: ؟؟ و سعر 2003 على مواصافته خيالي.. بس ما أدري هلى نزلت اسعار قطع الغيار ولا لسا نار؟

حاكم العدل الظاهر ان نهايتها على سيكل :shock2: عشان تحس انك عايش ..

افالون : انا صار فيني عكسك !! :cry: انا كنت ناوي اشتري هوندا اكورد بس مدري وش الي قردني كان معاي واحد من الشباب مسوي لي صجه.. كل ماوديته معاي وكاله طلعلي الف عيب بالسياره لدرجه يوم مرينا عند بي إم قالي ( شدعوه تشتري الماني ) :black: وش يبي هذا؟ بالنهايه وديته بيتهم و رحت لشفر و دفعت العربون ونا مغمض..!


والسلام ختام

[Lamborghini]

الله يعينك .. ويصبرك .. تعرف أنا عندي سيارة موديل 86 من يوم ما طلعتها لين الحين ما سارت عندي عشر الماشكل اللي سارت معك ( الحمد لله عالنعمـة ) :damp:

[gs300_2003]

ايش هذي السيارات انت و حظك يا ماتخرب ابد او تقعد في الوكالة اكثر من انها تقعد معاك...
الله يعينك و يعوضك كل ما راح هدر على هذه السيارة و يعوضك لكزس كوبيه...

:) :) :)

[560SEL]

الله يعينيك يا أخووي على هالمصيبه

لكن وش نقول غير : اصبر ان الله مع الصابرين

و حاول تتخلص منها بأي وسيله و بأي سعر

انا يا ما حذرت الشباب من هاللومينا و الكابرس (صممت خصيصا للخليج) لكن في البدايه ما أحد سمع كلامي و اليوم كل الشباب اللي قلت لهم هالكلام تذكروا كلامي ... و الله ما أدري وش أقولك يا أخوي لأنك مو انت أول واحد يطيح في هالمطب .. و الله ثم والله اني كنت أبفقد واحد من الشباب بسبب هالومينا SS لكن الحمد لله ربك ستر عليه و كتب له عمر جديد

كل اللي لازم تسويه الان هو انك تبيعها و تشوفلك موتر ياباني صح مثل ما قالوا الشباب (ماكسيما أو هوندا أو ... الخ ) و ان كنت يا أخوي مصر على الامريكي فعندك عدة خيارات أخرى .. على سبيل المثال :

سيارات فورد بجميع أنواعها (كراون فيكتوريا - ميركوري - لينكون - مونديو ...الخ )

سيارات كرايسلر ( M300 - كونكورد - سبرينغ )

سيارات دودج (انتيربيد )

و غيرها كثير


تحياتي

[دمدم]

شكل الدعوه حظوظ ..

لانو نسيبي وياه كابريس LTZ2000...ماشيه معاه حوالي التسعين..

ومابعد اشتكى منها..يعرفها العضو S8...

الله يعينك ومالك الاتويوتا...

[E_TYPE]

مرااحب
هلا شباب احنه كان عدنه كابريس ltzموديل 93 على ايامها وكل شهر من يطلع الراتب تخترب وتالي بعنيها وله بقرش واحد من اصاحبي عند ابوه كابريس LTZ2000 او 2001 كله تخترب وتالي باعها.وفي واحد ثاني عند ابوه كابرس 20001 ltz لاعب فيه لاعب مااشوفها اختربت باين انها حظوظ هااادي السيارت .
زي ماقال اخوي 560SEL عندك انواع جيده نصيحتي خد لك كرايسلر m300احنه عدنه وحده موديل 2001 ماشيه زي الحلاوه لا يخترب وله شئ وثبات عند المنعطفاات بس عندك قطعه اشوي غاليه .
وشكرآ

[دكتور / مجنون]

شباب هذا مو انا .. هذا صاحبي يكتب باسمي :D ..

و في واحد ثاني اشتري لومينا SS موديل 2002 و ان شاء الله اخليه يكتب معاناته مع السياره ..

اعتقد انها عين يا عياااال ... :cry:

[SKYLINE GTR]

يارجال بعها وخذ لك ماكسيما

سيارة يابانية 100% ولا احلى

شبابية وفخمة و سعرها مناسب جدا لمواصفاتها

[ACCORD-V6]

هلا بك اخوي صديق دكتور مجنون

اذكر الله:D :D :D

الاسعار على ماهي عليه لكن الهوندا اعيد واكرر ماتحتاج قطع غيار ماتستهلك تصبر
الخلاصه:
كمثال اللومينا قطعها رخيصه وجودتها زفت 0%
الاكورد اغلى شوي وجودتها تمام100%



يليت يفهمونها الناس

[شرخشين2000]

ههههههههههههههههههههههههههههه

الله يعينك على دنياك بس...

على فكرة...
اذا سارت الامور كما ينبغي <<<< شعنده !!
ماشي استراليا في غضون شهرين ...
طبعاً رايح أدرس انشالله..
وبصير أنقل لكم وعبر الهواء مباشرة أحدث ما توصلت اليه التقنية الاسترالية في صناعة السيارات...

على فكرة....
الكامري و الكورولا في أستراليا تصنـّع في مصانع هولدن...
أستراليا تعتمد اعتماد كلي على مصنع هولدن للسيارات في كل شي..

http://holden2001.jeeran.com/17.JPG

لكم خالص تحياتــــ رقصني يا شفر ـــــي

[الارهابي]

هي كدا السيارات الامريكيه
خاصه الجي ام
اما تطلع وياك من الوكاله تمام
او من اول شهر تبدى تخترب
بعضها حتى ما تكمل شهر و تطلع خراباتها
لانها تلفيق
:D :D :D :D :D :D :D