ماذا تفعل..عندما تصبح ألفيونير؟؟

[علي الشمري]

السلام عليكم ورحمة الله وبركاته..

عندنا..في كويتنا الحبيبه..
إذا اردت ان تودع آخر أيام (( العافيه ))..وتتزوج..
تقوم الحكومه..الله يكثر فلوسها..
بإقراضك 4 آلاف دينار..
الفين هبه..وألفين (( يتلونها من شواربك))..
لذلك..فالفرصه الوحيد في ان تكون الفيونير..
هي عندما تتزوج فقط
خصوصا اذا كنت من اصحاب معاش 700 دينار وانت نازل.

فماعليك الا ان تقوم بالتالي :-
تذهب الى الديوانيه وانت رافع خشمك..وسو نفسك قرفان من الشباب..
واذا حاول بعض الموجودين..سؤالك عن هذه الحاله الغريبه..
اعبس بوجهه وقل له (( بخياسة نفس )):-
جب لا أصكك بألف دينار

واذا جاء (( الموعد المحتوم ))--------->(( يصلح اسم مسلسل لفجر السعيد))
وحانة ساعة الصفر..
لتستيقظ قبل ان تدق ساعة المنبه..بنصف ساعه..
وتستلم شيك السعاده..ابو اربعه

عليك ان تستنفر (( إعيال جيرانك )) كلهم..
يمكن احد يسرق الشيك..وانت رايح تستلمه..ماندري

البس البشت..واركب افخم افخم سياره عند معارفك..
مكسيما 98 مثلا
واخرج من الشارع بموكب اميري..من بزارين شارعكم..
موزعين بين وانيتات..وقواري..وركض..
ولا تنسى ان تركب في الخلف..
وتنظر يمين ويسار..وترفع يدك ملوحا..لكل من تقابله..

عند البنك..
ستجد باقي إعيال شارعكم..بإنتظارك
موزعين على اسطح البنايات..المجاوره للبنك..
ومسلحين بأحدث الاسلحه..
مقاليع..ونبابيط ام اربع اسيور الثقيله..
والذخيره..حصى اهداه لك جاركم الذي يعمل ترميمات بمنزله..
وذخيرة النبابيط...حبوب سبحه..الصفره ام دينار..

عندما تصل الى البنك..
يتقدمك خمسه من ربعك..الخاصين جدا..
بس لازم ينظفون (( إنعالهم )) أول..
ادخل البنك..بنظارتك الشمسيه..
وقدم الشيك..بعد ان تضع (( لزقه ))..
لكي تغطي على كلمة (( بنك التسليف))
في هذه الاثناء..دع ربعك يتفقدون المكان..
ويفتشون الموجودين..حذرا من كمين يحاولون به ..اغتيالك
خذ المبلغ..وقل في نفسك..
(( الحين انا الفيونير...مابغيت))..

ارجع الى بيتكم بنفس الموكب..
عندما ستدخل الشارع..ستجد كل شارعكم..والشوارع المجاوره..بإنتظارك
ارفع يدك لتحييهم..وطمنهم..بان حصتهم من المبلغ..محفوظه

عندما تطرق باب بيتكم..
ستفتح الباب سيلانيتكم..وهي صاكه حلجها..
لأنك مهددها قبل هالمره..
بأنها ان فتحت حلجها بوجهك..
سترميها من الدور الارضي اذا كنت بالشعبيات..
ومن الدور الاول اذا كنت ساكن خارجها..

عند باب الصاله..ستقابلك أمك بكل عبارات الترحيب..
التى كانت تقولها لأبوك..في اول شهر من عرسهم..
طبعا..طنش..كأنك ماتسمع

اما ابوك..فسينقسم وجه الى نصفين..
النصف الأول (( مكشر ))..والنصف الثاني (( يضحك))..
لانه متردد..
هل ياخذ الفلوس بالقوه...(( النصف المكشر ))..
أو يأخذها باللين...(( النصف الضاحك))..
طبعا ما يبيله..عطه أبو لابس

اما اختك فستنتظرك بالبخور..والعطور..
بعد ان كانت (( تخشهم عنك))..
وعندها حانة ساعة الثأر منها ومن اخوانك..
واذا كانت تريد ان يكون لها نصيب من الفلوس..
كلفها باعمال شاقه..أتسوي عيش أبيض مثلا

اما اخوك..الكبير..اضحك بوجه ضحكة الخبيث..
وقل له..السياره تبيلها سفايف الله لا يهينك..
وعبها بنزين بطريقك..ولا تنسى تجيب معاك كرت انترنت..ودور لك على غرفه تنام فيها الليله..واذا اراد تنفيذ المطلوب..عطه (( فنقر )) عالماشي..

عندما تصعد الى غرفتك..
افتح النافذه..وستجد شارعكم ممتلئ بالناس..
وهم يرفعون بعض اللوحات مكتوب عليها..مثل
(( تكفى يا ولد لا اتخلينا))..(( يخسي بوش عندك))..
لوح بيدك لهم..وقل لهم..ابشروا يا مال الفقر اللى يفقركم..

عندها نم قرير العين..وانت تحتضن الفلوس..
واكتب عليها ذكرى..
لانك من يوم صباح غد..سترجع فقيريونير..
وستذهب الفلوس كلها..لأبو الحرمه..
وستشتري الحرمه بهذه الفلوس ذهب..
وتقوم انت بدفع زكاته...حتى توارى تحت الثرى.



















هذه قصه خياليه..
فكويتنا الحبيبه مو مخليه علينا عايز..
هي فقط..دعوه للضحك

تقبلوا تحياتي

هيرو:banana: