قصة غيابي والمشكله اللي صارتلي

[HAMANN.de]

السلام عليكم ورحمة الله

كيف حالكم ....... والله لكم وحشه كلكم مع اني رجعت وماشفت ولا حد منزل موضوع يسأل عني وعن سبب غيابي :bomb: :bomb:

أحب اوضح لكم سبب غيابي لفتره دامت 9 ايام وهي من ثاني ايام عيد الفطر المبارك اللي يوم امس الموافق 12 - 11 -2005

يمكن هذا الموضوع يسبب حساسيه بيني وبين بعض اعضاء المنتدى لكن انا احب اذكر اللي صارلي بالتفصيل لمعرفة سبب ماحصل ولتحذير الشباب انهم مايصير لهم اللي صارلي!!!!!!

في اواخر شهر رمضان فكرت اني ابحث عن لانسر افليوشن بعد ماحن قلبي عليها وفراق دام حوالي 11 شهر من بعد مابعت اخر ايفو كانت عندي .

اجريت بعض الاتصالات لشباب وتجار سيارات اعرفم في الامارات الشقيقه وبالفعل جاني اتصال وانا في الامارات في يوم السبت الموافق 3 ايام العيد

وبالفعل رحت يوم الأحد وشفت السياره وعجبتني وقررت اني اشتريها واستغرقت الاجرائات من اداره المرور حوالي يومين اللى ان انتهينا في يوم الثلاثاء وبدأت في صيانه السياره لاني نويت اجي فيها عن طريق البر مثل اخواتها السابقات .

ويوم الاربعاء ظهرا متعت الاحزمه وجهزت نفسي للعوده اللى قطر الحبيبه وانا فرحان اني انتهيت من جميع الأجرائات الازمه واخيرا سأعود اللي بلدي واهلي .

وحوالي الساعه ال5 وصلت اللى مركز الأمارات (الغويفات) واخذت مني الأجرائات حوالي نصف ساعه والسبب هو اجرائات التصدير والحصول على (البيان) وبعدها دخلت مركز السعوديه واقول في نفسي هانت مابقى غير 3 ساعات واوصل البيت .

ختمت في الجوازات وبعدها جيت على الجمارك وبما اني اعرف الأجرائات ومررت فيها من قبل واعرف انها لاتأخذ الا من ربع ساعه اللى 20 دقيقه.

فجأه قال لي موظف الجمارك : اذا سيارتك محوله (المقود من اليمين اللى اليسار) ممنوع انها تدخل السعوديه. وبالفعل جا وشيك وعرف انها محوله وقالي مستحيل تدخل السعوديه

قتله انا قطري ورايح قطر يعني بس بامر في السعوديه وماراح اسجلها عندكم

قالي اعرف وبعد ممنوع :corsair:

حاولت معاه وقعدت اشرح له اني جاي من دبي شلون ارجع المسافه هاذي كلها

بكل سهوله رد علي اذا ماتبغي ترجع وقف السياره على الجنب واركب مع اي قطري خله يوصلك قطر معاه

استغربت من كلامه واسلوبه الجاف وفي النهايه قال : لاحول الله ياخي ازعجتني والله السياره ماتطوف وحتى لو جاء مدير المركز ماراح اطوفك

قتله زين وين المدير باكلمه قالي انا المدير ليش مب مالي عينك (مع انه موظف جمارك عادي لكن انتحل شخصيه المدير )

وحالوت معاهم اني اطلع السياره حتى ولو بسطحه (ريكفري) قالي مستحيل

وكان في المركز شباب قطريين وشباب بحريننين وابصراحه ماقصروا حاولو يساعدوني ولاكن بلا جدوى

وبذلت جهدي ان اتخلص من هذه المشكله او ان اقابل مسؤل يساعدني ولاكن دون فائده المسؤل في الخارج وأقسم لكم بالله اني جلست في المركز حتى الساعه 7 صباحا يعني 13 ساعه :cry1:

ولاكن لامجيب

ولما رجعت اللى مركز الامارات وعرف اول موظف وهو موظف الجوازات بالموضوع قال لي : لاحول ولاقوه الا بالله وانا اسف ياخوي مافيدي شي اسويه لك لكن ودي اخدمك لان احنا مثل الأخوان واحنا لما نجي قطر ماتقصرون معانا. ابصراحه كلامه حسسني اني بالفعل في بلادي وبدأت بالاجرائات وهي اعاده تصدير السياره اللى الامارات لانها طلعت والحين محتاجه (بيان جديد ) وأجرائات جديده وكان في مشكلتين وهم

1- رسوم اعاده التصدير
2- ممنوع دخول اي سياره بأسم اي شخص لايوجد معه سكن ( عقد تملك شقه او فلا)

ولكن مدير الجمارك الله يجزاه خير وهو من اصل اماراتي لما عرف بموضوعي عفاني من الرسوم وسمح لي بالدخول على ان يتم تصديرها او نقلها باسم اماراتي

والحمدلله تمكنت من العوده اللى دبي بعد كابوس استغرق حوالي 14 ساعه

ويوم السبت الموافق 12 -11-2005 شحنت السياره عن طريق البحر وستصل اللى قطر نهايه الاسبوع

والحمدلله على كل حال

أخوكم محمد

[قلق و رجه]

الله يعينك على اللي صار اول شي


وثاني شي مبروك السيارة والله يعطيك خيرها ويكفيك شرها
وانشالله توسع صدرك عندنا

فيه نقطه ودي اعقب عليها

ترى هالموظف واخلاقه ما يمثل السعوديه والشعب السعودي
يمثل نفسه بس

ويمكن عنده قانون ما تقدر تدخل وما اظن انك تبيه يخرق القانون ويعاقب بعدين

وطبعا هذا ما يبرر سلوكه وطريقة تعامله

ومشكلة السعوديه موظفه ناس مب كفو في اماكن حساسه فيها تواصل للناس في الخارج والداخل وهذا اللي مشوه سمعتهم شوي

يعطيك العافية والحمدلله على السلامه

[UaE Nightmare]

اخيييرا سمعت تكملت القصه :p


شيبتنا انت لو قلت لهم انك ياي من صوبي بس !! :glasses2:


خخخخ

والله ما تستاهل اللي استوالك

بس يالله عشان مره ثانيه ماتغلطة في رقمي :bomb:


والحمدالله على سلامتك

ونورة المنتدى :D



سي يو لييطر


:knight:

[infiniti]

اول شي الحمد الله على السلامه

ثانيا

مبروك على السياره الله يعطيك خيرها و يكفيك شرها .



صدقني لو ادري انك ناوي تشتري سياره و تسافر عن طريق البر كان اختصرت عليك المشوار و قلت لك اشحنها بالبحر و ريح نفسك كثير من الاخوان من البحرين و الكويت واجهتهم نفس المشكله .

اذكر من فتره كانوا يطلعون السياراه على سيارات نقل و يختمون بالشمع و يعطونك خطاب الى المنفذ المتجه اليه و هناك يفتحون الخطاب و يتاكدون انك وصلت بس هذي الطريقه الغتها الجمارك السعوديه و السبب بعض الاخوه الله يهديهم يدخل السياره على اساس انها رايحه الى البحرين او قطر او الكويت و بعدين ينزل السياره بالسعوديه و يبيعها خصوصا سكايلاين GT-R و من بعدها تم الغاء هذا النظام .

اما هذا الموظف صراحه مايستحي المفروض يحترم الناس و ينقل صوره جيده عن نفسه بالاول و عن السعوديه ثانيا.

[BENZ]

هلا والله اخوي اخوي همان

والحمد لله على سلامتك قلبي بصراحة سالفتك لاتحسد عليها

الله يكون بعونك
ولاتلوم موضف الجمارك هو عبد المامور

لاكني ماايد ولا احب الطبع الجاف والتعامل القاسي الكلمة الطيبة تسوى ذهب

كم كلفك اخوي نقلها عن طريق الباخرة؟؟

وفي خلال كم توصل لك؟

انت تعرف من قبل ان السيارة محولة ؟؟

[AMG]

الله يعينك على اللي صار ومبروك على السيارة وننتظر صورها :knight:

[طالب جكر]

أول شي الحمد لله على السلامة والله يعطيك خيرها ويكفيك شرها
اذا تبي تجرب مع اليون مستعدين :think: :headshak: :m: لوووووووووووول

بنسبة لموضوع الموظف فا أعتذرلك عن نفسي وباقي اعظاء المنتدى السعودين وتاكد انه زي ما قالو الخوان انه مايمثل الى نفسة ومثلة بفعلتة ما يشرفنا
واصابع ايدينك مو بسوى

عموما هل اشكال لا تخليها تنغص عليك فرحتك باالموتر مبروكين الموتر ال :banana:

[1100R]

فشلنا :ranting: :ranting:
هدي
عوايدهم :ranting:

[ميكانيكي]

ياخي انا مقدر وضعك تماما
ومعاك حق تتضايق ..لأن الموضوع فعلا يرفع الضغط


للاسف حصلت الكثير من المضايقات في مركز الحدود التابع للسعودية خصوصا لما تكون طالع من الغويفات ورايح على قطر :headshak:
لدرجة ان الموضوع صار مشهور ومعروف...


ماقول غير
.... الله يرحم ايام حدود سودانثيل ..كنا نطلع من قطر وعلى طول ندخل ابوظبي..
بدون تدخلات في نص الطريق ..

وعلى كل حال

هانت يالطيب..ان شاء الله يبنون الجسر البحري بين قطر و ابوظبي .. :banana:
وساعاتها نفتك من هذا الهم ووجع الراس ... :)

[سنـاري]

انتبهوا بس لا يروح الموضوع بعيد و توصلوا لمواصيل مالها داعي

[ABD 911]

عندما تكون لدولة معينة قوانين صريحة (وأعلنت هنا في المنتدى) عن منع دخول السيارت المحولة لأراضيها فهذا من حقها .. خاصةً وبعد الشكاوي المتكررة من قبل الوكلاء ..

أما مرور السيارات من هذا النوع بأراضيها متوجهه لدولة أخرى ..فكان مسموح ومصرح به حسب ماذكر .. ولكن إذا حصلت تجاوزات متكررة فمن غير المعقول غض النظر عنها و إعطاء الحرية مرة أخرى للخارجين عن النظام بتكرار عملهم مرات ومرات ..

وأظننا جميعاً نتفق في هذه النقطة ..

أما عن سوء التعامل من قبل الموظفين فالحالات الفردية لاتعمم !

يعني لو شفت فلان من دولة **** سكران ما أقول عن كل شباب هالدولة رايحين فيها !! ..

وأتمنى عدم التحدث بالكلام الجارح عن السعودية كدولة وعنا كسعوديين .. فالإحترام المتبادل هو الأساس في تعاملنا مع بعضنا الآخر .. وكما ذكرت الحالات الفردية لاتعمم والنظام يسري على الكل ولستم أدرى بمصلحتنا من المسؤولين ..

والكلام هنا ليس موجه لشخص بعينه ولكن رأيت تجاوز في أحد الردود وأردت التعقيب لتتضح الفكرة ..


وأبارك لك أخيراً أخوي HAMANN.de على السيارة و بإنتظار تقرير كامل عنها :-)

A B D 911

[مؤيد اف1]

المفروض انك تبتسم وقتها لانك كنت في السعوديه :D


مبروك عليك السياره


والحمدلله شفت لك حل :p

[رفجة عرب]

الحمد لله على السلامة..

ومبروووووك على الموتر .. اخوي بكره تشوفه وتنسى كل شي..

[الشبابي]

الله يعينك اخوي ....
والحمدلله انها جت على كذا ... وللاسف اللي صار معاك يدل على ان الشخص اللي تعامل معاك غير متعلم ...











اخوكم الشبابي

[co0oL_bo0oy]

مثل ماقالوا لك الاخوان تصرف هالموظف مايعكس صوره السعوديه باسرها ....


وكل إناء بما فيه ينضح :smart:

[mzr603]

مبروك والله يعطيك خيرها ويكفيك شرها
اما عن الموظف اللي يفشل ويسيئ الينا كسعوديين فمنه الكثير في السعودية (للاسف)
:confused:

[NFS]

الحمدلله على السلامة يا محمد ،


بس حبيت أقول ، ليش أخذت سيارة محولة وخصوصاً ان السيارة متوفرة سكان يسار؟

[NFS]

سؤال ثاني ،


كيف عرف الموظف أن السيارة محولة؟ من رقم الشاصي؟ وكيف؟

[opel005]

فعلا مثل هالاشخاص يسيئون للبلد ... وما المفروض يحطون بمثل هالمكان
لكن نقول لك ترا يمثل نفسه فقط بطريقة تعامله هذه

والله يباركلك بسيارتك وتكسرها بالعافية ان شاء الله

[bashar_255]

مبروك عليك السيارة :)



و أظاهر انك الآن حاس يعني ايش تكون مواطن سعودي :D

للعلم السيارات المحولة مقودها هذا الأمير محمد بن فهد شخصيا مطارد وراهم و مانع دخولهم ( ما ادري ليش !!! )

عندما تكون لدولة معينة قوانين صريحة (وأعلنت هنا في المنتدى) عن منع دخول السيارت المحولة لأراضيها فهذا من حقها .. خاصةً وبعد الشكاوي المتكررة من قبل الوكلاء ..

وكالة الجبر عندها GT-R34

[C6]

ياخي هذا انسان حاقد وترى كثير منهم عندنا في السعودية(العسكر)

ولاحد يقول عبد مأمور (واحد يقوله لوجاء مدير الجمارك بنفسه ما يدخله) تحس كأنك قتلت احد من اهله

ياناس اعطيكم مثال

انا كنت مداوم ايام العيد وطبعا لازم امر من نقطة تفتيش بين الجبيل والدمام وقفوني في التفتيش وعطوني مخلفة على انتهاء الرخصة طبعا انا ماتكلمت لانها غلطتي اني ماجددتها

بس بعد يومين يوقفني نفس العسكر ومصرين يعطوني مخالفة (طبعا انا اعطيهم فلوس المخالفة على الجزمة ولا انزل مستواي لمستواهم) بس كنت بأوضح للعسكري انه زميله اللي جنبه عطاني نفس المخالفة قبل يومين وان احنا الان في عيد وكل الدوائر الحكومية
عندهم اجازات وماقدر اجددها الان (طبعا لاحياة لمن تنادي لاومتهمينني اني افحط) عرفت من ساعتها انهم بس عشان شايفين السيارة سبور خلاص جنوا. :ranting: :ranting:








متعت الاحزمه

بس حلوة متعت الاحزمة

[ABD 911]

للعلم السيارات المحولة مقودها هذا الأمير محمد بن فهد شخصيا مطارد وراهم و مانع دخولهم ( ما ادري ليش !!! )

وكالة الجبر عندها GT-R34

الكلام عن شكاوى الوكلاء كان السبب الرئيسي بالمنع حسب الخبر الي وضعوه الشباب هنا بالمنتدى على ما أذكر ..
والجي تي آر 34 اتلي تقول عليه سبب لي أزمة نفسية يوم شفته في تجمع الشبيلي :cry1: تحسه جدييييد ولا مشى أكثر من 1000 كيلو بالكثير !

مشكور على تعقيبك بشار

ABD 911

[uae speed]

مبروك الشيخ على الموتر ، يعطيك خيره ويكفيك شره .

والحمدلله على السلامه :)

[cadyman]

الله يعينك على السعوديه واهلها وازمة الاخلاق اللي عندنا

[B.M.W X5]

هلا والله بالأخ هامان نور المنتدى وألف مبروك السيارة يعطيك خيرها ويكفك شرها :eek:

وأنا أقول الطرائف ناقص صرقعه هالأيام :D

على العموم عودة حميدة وفي أنتظار تقرير مفصل عن السيارة :p




تحيات الزعيم :glasses2:

[UAEnos]

الحمدلله على السلامة اخوي والمهم ان المشكلة انتهت وبإذن الله خلال اقل من اسبوع تكون السيارة عندك ..


وربنا يعطيك خيرها ويكفيك شرها :-)

[RED Chevy]

ألف مبروك على الموتر ويعطيك خيره ويكفيك شره...واللي صار خلاص مافي فايدة من الكام احين...تكبر وتنسى :D

[cruiser2000]

الله يعينك على اللي صار اول شي


وثاني شي مبروك السيارة والله يعطيك خيرها ويكفيك شرها
وانشالله توسع صدرك عندنا

فيه نقطه ودي اعقب عليها

ترى هالموظف واخلاقه ما يمثل السعوديه والشعب السعودي
يمثل نفسه بس

ويمكن عنده قانون ما تقدر تدخل وما اظن انك تبيه يخرق القانون ويعاقب بعدين

وطبعا هذا ما يبرر سلوكه وطريقة تعامله

ومشكلة السعوديه موظفه ناس مب كفو في اماكن حساسه فيها تواصل للناس في الخارج والداخل وهذا اللي مشوه سمعتهم شوي

يعطيك العافية والحمدلله على السلامه


انا اوافقك الرأي اخوي طارق


ومبروك عليك السيارة اخوي
الله يعطيك خيرها ويكفيك شرها وشر الحاسدين

بس ما قلتلي

اي معرض لقيت الايفو
وبكم لقيتها وموديلها وحالتها
وهل هي ستاندر ولا عليها شي

ولا تنسى الصور الله يخليك <=== وايد يطلب :D

[HAMANN.de]

تنويه هام

أرجو ان الشباب وبالذات السعوديين انهم مايفهموني غلط وانا لم اقصد الأسائه اللى السعوديه ولكن كنت اريد ان اوصف قسوه الموضف وتعامله معي. واشكر الجميع اللي باركولي على السياره وتحمدولي بالسلامه والله ماقصرتو ياشباب

والحين بارد على الأسئله

infiniti: من المستحيل اخوي ان احد يبيع السياره وهي عليها لوحات تصدير لان اداره المرور في السعوديه ماتسجل السياره يعني راح تبقى طول العمر بأسم المالك الأول وماظن ان في احد يعرظ عمره لهذا الخطر حتى ولو كان في خارج البلاد ومش من اهلها

BENZ: الله يسلمك يالغالي كلفني الشحن 1850 مع اجرائات الجمارك والسياره ادري انها محوله وهاذي السياره رقم 3 اللي اشتريها من الامارات وهي محوله

طالب جكر: شاكرلك ردك اخوي الغالي وصدقني انا عارف انها غلطة موظف واتنو مالكم شغل في الموظوع

ميكانيكي: صادق ياخوي الله يرحم ايام سودانثيل بس انشالله الامور بتتعدل

ABD 911: اتفق معاك اخي الكريم ان كل دوله لها قوانينها والواجب علينا ك زوار نحترم هاذي القوانيين لكن لازم يكون في حل لهذه المشكله مش بكل سهوله (أرجع مكان ماجيت) يعني مثلا يمشون وراي دوريه او يحملون السياره على بركدون(ريكفري) الخاص بالشرطه حتى ولو أدفع لهم فلوس من حقهم بس المهم ان يكون هناك طريقه.

مؤيد اف1: فعلا انا ابتسمت ولكن بعد ماوصلت البيت :D :D

NFS: انا متعود على المحول ومرتاح له

[HAMANN.de]

cruiser2000: هلابك اخوي انت رديت وانا اكتب الرد :D

الله يسلمك انا قعدت ادور ايفو في دبي والشارجه وماحصلت والسياره هذي شريتها عن طريق صاحب كراج يعرف صاحب السياره ولاتنسى اني خبير الحين هاذي ثالث ايفو اجيبها من عندكم يعني اتوقع المره الجايه بتعطوني بلاش :)
هي مو 2001 يعني ايفو 7 وحالتها جيده عليها اقزوز greddy trust وchep وانا شريت باقي الأغراض من انتراكوااللي في الشارجه وسعرها باقولك اياه في رساله خاصه مانبي فظايح :D

[abumhdi]

الاخوان قلق ورجه و infiniti و ABD 911 كفو ووفو ..

وتاخد خيرها ويكفيك شرها ..

[big block]

بس كيف عرف الموظف إن السياره محول دركسونها؟؟

سؤال ثاني
واحد من الشباب عنده سياره محول دركسونها قطع من الوكاله يعني
مو قص ولحام في هذي الحاله يعرفون إنها محوله ولالا؟

[infiniti]

تنويه هام




infiniti: من المستحيل اخوي ان احد يبيع السياره وهي عليها لوحات تصدير لان اداره المرور في السعوديه ماتسجل السياره يعني راح تبقى طول العمر بأسم المالك الأول وماظن ان في احد يعرظ عمره لهذا الخطر حتى ولو كان في خارج البلاد ومش من اهلها






:D هذي المشكله فيه سيارات محوله كثيره بالشرقيه عليها لوح تصدير من دبي و الشارقه و ام القيوين تمشي بالشارع من سنوات هذي كلها كانت داخله السعوديه للعبور و لما دخلت ما طلعت طبعا ممنوع تسجيل هذي السيارات لانها داخله ترانزيت و هذا هو السبب يخلي الجمارك تشدد على هذي السالفه .

[opel005]

جارنا معاه لاند ومن عرفناه واللاند عليه لوحة تصدير والى الان باقي عليها يمكن اكثر من خمس سنين .. ومستغرب ليه الى الحين باقي عليها بس الحين عرفت ان اللاند محول :D

[ABD 911]

ABD 911: اتفق معاك اخي الكريم ان كل دوله لها قوانينها والواجب علينا ك زوار نحترم هاذي القوانيين لكن لازم يكون في حل لهذه المشكله مش بكل سهوله (أرجع مكان ماجيت) يعني مثلا يمشون وراي دوريه او يحملون السياره على بركدون(ريكفري) الخاص بالشرطه حتى ولو أدفع لهم فلوس من حقهم بس المهم ان يكون هناك طريقه.

مشكور اخوي على تعقيبك و أنا عارف إن قلبك أبيض ولكن فيه واحد إستفزني الله يهديه ..

عموماً الف مبروك وعقبال ماتوصلك السيارة ونسمع أخبار حلوة :-)

ABD 911

[2k2]

الحمد لله ع السلامه إنها انتهت كذيه ..

ومبرووك عليك السيارة ...


:cool: :cool: :cool:

وما شاء الله نقدر نقوووووول خبير ايفو .... :-)

[HAMANN.de]

big block: علافو انها محوله من شي سخيف لو كنت ادري انه بيشيك في هذا المكان كان جهزت كل شي فبل لاجيهم :)

infiniti: بس ياخوي اللي تتكلم عنهم وتقول ان عندهم سيارات تصدير من سنيين اكيد السيارات بأسمهم يعني مثلا لو اني انا دخلت السعوديه وبعت سيارتي بلوحات التصدير وانا عارف انها ماراح تتسجل يعني بتبقى طول عمرها بأسمي ومش انا اللي املكها ايش يظمني ان الشخص مارايح يرتكب جريمه ويوديني انا في داهيه يعني نفرظ انه دعم شخص وذبحه وهرب الوحيد اللي بينظر هو انا لانها بسمي واكيد راح يوصلونلي حتى لو ماكنت في السعوديه ....ز هذي وجهه نظري وكلامك على عيني وراسي

opel005: اشرايك اجيك ونفحص سيارة جاركم بما اني خبير محول :D

ABD 911: الله يبارك في عمرك ياخوي واكيد كلنا اخوان ومابينا شي والحمدلله اللي جمعنا في هذا المنتدى وتعرفنا على ناس محترمين مثلكم

2k2: مب خبير خبير يعني 70% :D شاكرلك مرورك يالغالي

[mr.lamborghini]

والله ثم والله ان كنت اسال عنك


و اقول بو جاسم ما يشبك وايد



اخاف زعلان ولا شي



و انت الله يهداك لا قلتلنا انك بتسافر ولا شي



المهم مبرووووك عالسيارة حبيبي :D

[bahrainlove]

الحمد الله على السلامه

ومبروك على السيارة .... وانا حصلت لي مشكله مشابهه معاهم في 2003 بس الحمد لله على كل حال

[ديزل]

الف مبروك السياره والله يعطسك خيرها ويكفيك شرها
صراحه انظمة السيارات المحوله في السعوديه سيئه جدا يعني مثلاواحد رايح يعتمر مع عياله واهله وراكب لاند كروزر محول ما يقدر يدخل يعني يرجع ثاني باهله
بعدين اذا كانوا في السابق يعطو سماح دخول والسيارات تقعد في السعوديه ما تروح للدول الثانيه فالامر بسيط جدا يقدرون يتغلبون عليه وهو انهم يعطون سماح لمدة شهر واحد واذا انشافت السياره في الشوارع تتوقف ويعاد تصديرها ويش المشكله يعني بس ويش تقول .

الله يباركلك مره ثانيه

[edubai]

يعني سيارة محولة ولا سيارة عادية

ترى في النهاية سيارة وفيها تواير و تمشي

مادري ليش هذا القانون الي يمنع دخول السيارات المحولة :bomb:

[طالب جكر]

مبروك عليك السيارة :)



و أظاهر انك الآن حاس يعني ايش تكون مواطن سعودي :D

للعلم السيارات المحولة مقودها هذا الأمير محمد بن فهد شخصيا مطارد وراهم و مانع دخولهم ( ما ادري ليش !!! )



وكالة الجبر عندها GT-R34

بشار حبيبي اذا مو عاجبك تكون سعودي ماحد جابرك
وللاسف انه يطلع هل كلام منك واذا وصلت للوطنيه ارجوك وقف عند حدك ولايكثر كلام الجحود
نعم هناك بعض التقصير الشخصي ممكن للجهل او قلة المعرفة


ويكفيني فخر اني سعودي والي مايطول العنب حامض عنه يقول

مع احترامي لكل الاخوان بالمنتدى

ملاحظة بشار كندا تقبل التجنيس

[red_RPM]

مبروك الإيفو والله إيهنيك فيها