ابغي افتح محل تعديل سيارات انشالله ومحتاج مساعدتكم

[الرمحي]

السلام عليكم اخواني ...

بعون الله نويت افتح محل لزينة وتعديل السيارات بس على مستوى انشاء الله ...

المحل بيكون في أبوظبي ... وبيكون فيه كل شي تقريبا ...

* تفصيل بدي كت على أيدي محترفين ...
* تركيب وتوصيل وتفصيل أجود أنواع الانظمة الصوتية مع عمل ديكورات احترافية لها ...
* استيراد افضل انواع الجنوط (الرنجات) ومن ماركات عالمية معروفة مثل FOOSE و BBS ...
* عمل جميع أنواع الصبغات وبحسب الطلب مع تصميم الرسومات والأشكال ...
* صبغ الرنجات بأي لون ...
* تركيب المخفي بجميع أنواعه ...

بالإضافة إلى جميع أنواع اكسسوارات السيارات الأخرى ...

طبعا فيه منتجات بنستوردها بتكون لأول مرة في الدولة وحتى في الخليج العربي كله ...

ولا يزال البحث مستمر حاليا لايجاد شخص خبير في التنجيد والتفصيل وتلوين الفرش الداخلي والتابلوه والتخشيب ...


وبصراحة عندي كم شي أحب استفسر عنه من الاخوان في سوالف ...

أولا : من وين ممكن نستورد مادة الفايبر؟ وشو تكلفتها؟
ثانيا : هل في داعي انه نوفر قطع ومستلزمات تزويد الماكينه مثل الفلاتر الرياضية والنيتروس والتيربو ؟

اتمنى من الجميع الافادة وانشالله اعضاء سوالف بيكون لهم خصم خاص عندنا في المحل ...

وهذا وعد مو بس كلام ...

ومشكور ...

[grandv8]

السلام عليكم ورحمة الله وبركاته

اخوي الرمحي

الله يوفقك اخوي والله يعطيك خيرها ويكفيك شرها

اول شي اخوي

يكون الموقع مناسب ومعروف

ثاني يكون لديك عمال محترفين وهمرة ولديهم الخبرة بجميع المجالات

توريد اشياء التي تحس انها غير كثير الطلب عليه

بالنسبة لتوفير مادة الفيبر اذكر شي شركة بجبل على وتقدر تسأل عن الدليل التجاري الخاص بالمنطقة الحرة بجبل علي.

اما توفير تيربو والغاز هذه شغلا غاليه وحاب تكون على الطلبية تكون احسن

بالتوفيق لك اخوي

[sayedco]

ما شاء الله

بالتوفيق أخوي ، بالنسبة للفايبر آنا في البحرين ما أدري عن الإمارات

بالنسبة لقطع التزويد ، فالفلاتر الرياضية ، و اكزوز سستم يمكن شي بصالحك يعني بتحصل زباين إن شاءالله

لكن التيربو و الأشياء اللي تحتاج تركيب صعب شوي ، فهاذي إذا مو إنت تركبها فلا تجيب قطع ، لأنه عادة اللي يبون قطع تيربو يركبون عند نفس المحل

عاد نبي صور المحل و معلومات عنه ، و بالنسبة للخصم ، حق أعضاء سوالف في خصم ، بس آنا من البحرين يعني إذا جيت و شريت فلتر سبورت 70 درهم جم يصير بعد الخصم :D

<< امزح :D

[red_RPM]

بالتوفيق ياخوي
والله إذا تبي تسوي حركه عليك بالكاربون فايبر أحسن واقوي من الفيبر وتراه اللي إتشوفه في السيارات مثل المكلارن وغيرها ينتج إذا ماني غلطان بالمغرب وشوف بكم يبيعونه شركات السيارات
إذا الإخوان عندهم فكره عن صناعته بالمغرب إنشاء الله بيفيدونك وإذا وفرته بأسعار رخيصه راح يصير طلب عليه لأنه أقوي ألف مره من الفيبر

وبالتوفيق إنشاء الله

[Prelude 4 Life]

بالتوفيق اخوي وانا اول زباينك :D

ابي كبوت كربون فيبر حق سيارتي

درت الامارات كلها ماحصلت :(

[bashar_255]

اذا ما تعرف للتزويد لا تقرب له