مشكلة في الرمانه

[سدرك]

إذا كانت الرمانة الخلفية تطلع صوت وتركتها هل فيه مشكلة ؟ أو تخرب علي شي ثاني؟

[الشبابي]

طبعا غيرها بسرعة قبل لاتصير عندك مليون مشكلة ..
انا تركت الرمانه للكفر الامامي وبعد فترة صارت تطلع صوت قوي والكفر صار مايل ، وديتها ميكانيكي وفكها ولقى حتى الفلنشة محفورة من الداخلة وبالتالي صارت كبيرة وغيرت الفلنشة والرمانه عندك هذا الميكانيكي المتخلف وصار ال ABS للكفر الامامي الايسر ما يشتغل ...
والقطعة اذكر انها رخيصة قيمتها حول 120 للمكسيما لكن انا دفعت حوالي 1600 ريال فانتبه وروح بأسرع وقت غيرها ..









اخوكم الشبابي

[TOP-SECRET]

اخوي شكلك تقصد الكارونه مب الرمانه

الرمانه اتجي في سيارات الفورويل في الخلف (قلص)حق طراد او جت سكي او سطحه,,,

بالنسبه للكارونه

اذكر مره طلعت صوت من بعد ما خذ المنتخب القطري كاس الخليج 17 :D

كنت استعرض بالسياره لين ما طلعت الكارونه صوت

وتركتها فتره ومره كنت امشي على خط "الخور" تقريبا 130 وتعلقت علي

ومسكت التواير الشارع يعني وقفت يعني كاني ساحب هاند بريك

والحمد لله قدرت اسيطر عالسياره

والكارونه يطلع صوتها وتحتاج لتبديل من بعد الاستعراض "تفحيط" او ان السياره قديمه

ومن زمان ماتحركت من البيت ,,,

لكن كلمة رمانه اخوي مالها دخل في الكفرات هي تجي في البمبر الخلفي في الوسط :-)

[EL_3grab]

يا بو شهاب غلطان تراك .. :D

الرمانه هي القطعه المكورة المتصله بالتاير والدفريشن (الأمامي) ومكانها بسياير الفورويل اللي فيها الـSolid Axle جدام ..

أحين خيو سدرك يطري الكراونه .. ولا الـCv's Joints

:think:

[Prelude 4 Life]

اعتقد يقصد البيرنقات :think:

[comondor--GTSR]

يمكن تقصدوا المقص الامامي

[R32 HPA]

والله شايف الشغلة من الشباب اتوقع واشك واظن واقصد :D

تقصد الرمان بلي الأمامي اللي يكون بداخل الفلنجة تبع الكفر :D

[TOP-SECRET]

لا ياخوي غانم الله يهديك شقالو لك مانفرق بين الكارونه والرمانه :D

مادري اذا فيه رمانتين بس عندنا نسمي الرمانه القطعه الي حق القلص

يمكن فيه مسمى ثاني برع,,,

بس القطعه اللي يطلع منها الصوت هي الكارونه :-)

[bahrainlove]

احترنا بين الرمانه و الكارونه :(
احسن شي تكتبون اسم القطع بالانجليزي عشان الكل يفهم وتعم الفائدة

[NisFan]

في شي رمان بلي
وفي الدفع الخلفي الكرونه
والرمان البلي نصيحه لا تركب الا اصلي وكاله واذا تركتها تطلع صوت حنه قويه
والكرونه تخرب دايم اذا كانت السياره ماشيه كثير حوالي 300-400 الف كيلو
وغاليه سوينا مرة كرونه كابرس صابونه بتقريبا 4 الاف ريال في الوكاله :bomb:
والكفرات اذا كانت خشنه تطلع صوت مزعج كأن الرمان بلي خربان !!!

[Prelude 4 Life]

هذا الرمان (bearings)......



http://www.camskill.co.uk/smsimg/28/340gtti_rearwheelbearing.jpg

[نديم الطيف]

الرمانة الخلفية لها تأثير ماتتوقعونه :blink:

اذا كانت الرمانة تطلع صوت ترا القير يتأثر (اذا كان اوتو) ومع الوقت تتغير نسب التبديل وبتتعب تعب يخليك تعاق السيارة وتعافها وتفكر ببيعتها بدل ماتصلحها :headshak:

[EL_3grab]

ههههههههههه .. والله الشباب مب مقصرين ..

الرمانه هي الكورة مال القلص ..

وبعد الجزء المتصل بالتاير والدفريشن (الأمامي فقط .. الا اذا عندك سيارة توايرها الخلفيه تلف :D ) ..

الرمانه هي Cv Joint بس الي تي على الـSolid Axle اللي فيه الـSteering سواء أمامي ولا خلفي .. :D

http://www.truckworld.com/Monster-Trucks/Monsters-Monthly/2003-july/joints1.jpg

http://www.truckworld.com/Monster-Trucks/Monsters-Monthly/2003-july/joints4.jpg

..

والـCv joints للـIndependent (Front Or Rear) Suspension شكلها المتعارف عليه جه

http://www.tierodend.com/fadsbig.jpg

..

أما الكراونه هي الـRing&Pinion

http://www.motivegear.com/pages/ring_pinion/Ring_Pinion/DANA/D35-411.jpg

..

أما رمانه القلص .. :D

http://www.coates.com.au/equipment/pics/Tow%20Ball.jpg

..

أحين أخونا سدرك لك الأختيار .. :D :D

[MoHaMaD_Q8]

على ما اعتقد تتكلم عن البككس؟؟

اذا كان البككس مرات يطلع صوت حنه او يطلع صوت طقات

نصيحه بدله..وليش الخوف على السياره..

الخوف على حياتك يالغالي

حياتك بالنسبه لنا اهم من كل شيء..

وبالنسبه ممكن يجي يوم وانت تمشي تمسك التواير الخلفيه مسكه جامده السياره فيها تفلت وممكن تفتر فيك

يعني افرض انك ماشي بالخط السريع 150ومره وحده مسك معاك وجمبك سيارات..وسيارتك هجت.. :cry1:

هذا اذا كنت تقصد البككس

تحياااااتي

[سدرك]

أقصد رمانات العكوس الخلفية (هذا نفس كلام الورش اللي مريت عليهم)
وبعضهم قال يمكن الصوت من الكرونه مو من الرمانات

[سدرك]

ويقولون بعد تأخير تغيير زيت الدفرنس أكثر من 60ألف يأثر على الكرونة

[TOP-SECRET]

لوووووووووووووول بس غانم فيه رمانه حق القلص المهم :D قم بس قم يالدب :banana:

[EL_3grab]

اللي تقصده الطيب ..

أذا هو شي خارج عن المألوف ..وما كان موجود أصلا ..

يبالك تصليح - تبديل ألخ ..

:-)

[EL_3grab]

TopSecret ..

كلنا في الهوى سوى .. :D :19:

[cruiser2000]

http://www.truckworld.com/Monster-Trucks/Monsters-Monthly/2003-july/joints1.jpg

اخوي غانم هذا الشفت ونحن قعدنا نصلحه بسبة هالقطع

http://www.truckworld.com/Monster-Trucks/Monsters-Monthly/2003-july/joints4.jpg


وكانت حق كابريس 87

بس شغلة كانت الصراحة

بس اعتقد الريال يمكن يقصد الدرام ويل الخلفي ولا انا غلطان؟

[الشرار]

اكيد بتتعب لك العكس لن راح يكون عليه ضغط اكثر من الجهه الثانيه واذا بغيت تعرف اذا كانت الكرونه تعبانه او الرمانه ارفع السياره من ورا وعشق القير وخل الكفرات تدور وشيك على الصوت شوف من وين يطلع , لن صارت لي المشكله بسياره من قبل تماتك , القير تعب عندي والكرونه تعبت واظطريت اني ابيع السياره بدال ما اصرف فلوس على تصليح القير والكرونه

واذا كان الصليب اللي بعمود الكردان تعبان عندك نصيحه غيره لن اعرف واحد الله يرحمه انكسر عليه العامود وضرب بالارض والسياره انقلبت بقوه على التنده