سؤال في اللومينا SS

[مفتون]

السلام عليكم
صراحه انا ناوي ومخطط على سياره وهي لومينا SS
وصراحه معجبتني خصوصا الجناح حقها :)
لكن ابي أسئل هل هي عمليه ؟ هل قطع غيرها كيف غالي ، رخيص ؟

واتمنى تعطوني مميزاتها ؟ لان ناوي اشتري ومتردد :)

واكون لكم شاكر ،،

[E55]

سيارتي بعد يومين بسويلها عيد ميلاد (كملت سنة)

ما اشتكيت من اي شي خلال هالسنة ما عدا البطارية ، وبدولوها على الضمان وبس .

قطع الغيار ، ما أدري ، لكن السفايف اللي جدام بس بـ 370 درهم

ما أدري السعر هذا يعتبر غالي عندكم ولا رخيص مع العلم إن السفايف عندي لحد الحين

بحالة جيدة جداُ

مميزاتها ، شكل حلو ، محرك رائع ، قوة رهيبة ، واسعة نوعاً ما من الداخل

تجهيزاتها الداخلية قليلة جداً.

إذا تهمك الأشياء اللي فوق ، توكل على الله واشتريها .

إذا كنت من عشاق الأزرار والشاشات الخضراء والتجهيزات الداخلية .. ما أنصحك .

[مفتون]

الف شكر اخوي على المعلومات الرائعه ..

ابي أسألك اخوي زياده :

كم سعرها في الامارات ؟
هنا في السعوديه SS
105
انا شفتها صراحه مميزه جدا وحلوه ويقولون تمشي لحتى 140:)!؟

وهل هي تصرف بنزين ولا عاديه ؟؟

والف شــكر اخوي ..

انا اللي يهمني كان شكلها الخارجي وهو روعه ..

لكن كيف الداخلي ؟؟ مع انه عادي عندي ..

[E55]

أخوي مفتون

السيارة هذي غير متوفرة حالياً في الإمارات حسب ما قالي الوكيل

سيارتي إشتريتها بـ 90 ألف درهم ، وبعد ما اشتريتها بشهرين أو أكثر نزل سعرها لـ 88 ألف

لكنها غير متوفرة في الوقت الحالي ، يمكن ينتظرون الموديل الجديد !

من ناحية استهلاك البترول ، إذا كانت فاضية بالمرة بتحتاج لـ 55 درهم تقريباً عشان تفولها

الـ 55 درهم تكفيك لمسافة 450 كيلو على الخطوط الخارجية وبسرعة بين 120 و 140

على الطرق الداخلية وداخل المدن ، يكفيك لـ 350 كيلو تقريباً

وأنا أعتبر استهلاكها للبترول ممتاز إذا أخذنا بعين الإعتبار محركها الكبير نسبياً 5700 سي سي

السيارة هذي توصل لسرعة 240 بسهولة وبعدها تقطع إلكترونياً

ممكن إنك تتجاوز هذي السرعة بطريقتين

الأولى ، إنك تلغي الـ Cut off وهذا راح يكلفك الضمان لأن الوكالة ممكن تكتشف تغير البرمجة بسهولة

الثانية، إنك تشيل الفيوز رقم 13 الموجود داخل السيارة

طبعاً كل العدادات بتوقف لكنها ما بتقطع حتى لو وصلت 260 وأنا أتوقع إنها ممكن توصل لهالسرعة ويمكن أكثر

السيارة ن داخل عادية جداً وخصوصاً الطبلون ، المكيف عادي ، المسجل عادي حتى مع وجود السي دي بلاير

الكراسي جلد ويمكن هذا هو الشي الفخم الوحيد فيها

أي معلومات ثانية ؟

ترانا حاضرين

[المسلم]

يا أخي مفتون احب اضيف على ما افد الأخ وتصحيح القليل مع انه ذكر اشياء كثيرة ومفيدة في ما قاله عن صرف الوقود السيارة صرفها اقل من هذا المستوى لو فللت التانك ممكن تمشي 600 كيلومتر خط طويل وفي داخل البلد ممكن 400 كيلو متر وهي جداً اقتصادية والتانك متوسط غير كبير وهي سعرها عن الوكيل الجميح 96 الف ريال بجميع المكملات (فتحة سقف مقاعد جلد ) وهذه هي المكملات المتوفرة اير باج للسائق والراكب الأمامي مقاعد جلد او مخمل اختياري . والسعر عند الوكيل بالبيد 92 الف ريال طبعا ما تتوفر لديه السيارة بالمكملات التي ذكرتها انا مثل الجميح وخدمات الشركتين في الصيانة غير جيده اما في التوكيلات العمومية للسيارات توجد بجميع المكملات بقيمة 94 الف ريال حجم المحرك cc5700 v8 بقوة 325 حصان السرعة القصوى 250 كيلو متر في الساعة وحسب ماذكر الأخ e55 ان ممكن تتعدى هذا الحد اذا عملت بعض الإجراءات ولكن ما انصحك بها .
وفي السيارة مشكلة انه نظام الأمان فيها معقد هي الكابريس الجديدة ممكن اذا اتعطل المفتاح ما تشتغل السيارة الا اذا غيرت المفتاح او بالأصح اذا غيرت جهات الفتح والقفل عن بعد انا انصحك بالسيارة اذا كنت غير متهور لان السيارة فيها قوة رهيبة لان المحرك الموجود فيها نفس المحرك الي على الكورفييت لكن الفرق في 20 حصان بس والدليل على جودة السيارة وجودة في خدمة شرطة دبي ويوم السبت الماضي اذا لاحظت في الشوارع وجودها في خدمة مرور جدة والرياض بس لكن مش الأس الأس النوع الأقل الأل اس .

ارجو ان اكون قد وفيت واذا كان في اي تصحيح ارجو الكتابة
او المراسلة على بريدي الأليكتروني aasamar@yahoo.com

[E55]

الأخ المسلم
بصراحة سالفة إنها توصل 600 كيلو صعبة شوي
ما حصلي الشي هذا حتى خلال فترة التمرين ، لكن كل شي جايز
وبعدين أنا اعتقد إن إذا كانت السواقة هادية ، ممكن التانكي يكمل 500 كيلو وخاصة الهدوء في البداية.
أما بخصوص سيارات الشرطة فهي موجودة ومستخدمة من قبل شرطة أبوظبي وهي من نوع LS جير عادي مثل ما ذكرت
لكن ما أدري إذا كانت شرطة دبي تستخدم نفس النوع حالياً.

[مفتون]

الله يعطيكم العافيه على المعلومات الحلوه هذي :)

وماقصرت اخوي e55
كذلك اخوي المسلم ماقصر والله
وصراحه الحين عطيتوني انطباع عام و مفصل عن سيارتي قريبا :):)

اخوي المسلم هل انت متأكد سعر اللومينا SS
96 الف ؟

لاني واحد من الشباب قبل كم يوم راح لم الوكاله وقالي انها سعرها بي 105

والله يعطيكم العافيه ياشباب

وفعلا تم توزيع 400 سياره لومينا على الشرطه هنا في الرياض .. والحين الواحد مايفكر ينحاش من الشرطه :):)

والمسلم بصراحه انا نص متهــووور :):)

ومشكورين

[المسلم]

تحذير : هذه السيارة غير مصممة لضعاف القلوب ؟؟؟؟؟؟؟؟

[M5]

اهنئكم على المشاركات الفعّالة.....

أما بخصوص سيارات شيفرولية لومينا المخصصه للشرطة فهي موجوده أيضاً في المملكة العربية السعودية ولكـــن......!!!!

الأنواع المومجودة لدينا هي LS و ٍٍSS ولكن الـ SS متوفرة بكميات قليلة جداً وهي من الخارج SS عادية ولكن الفرق الوحيد أنها بدون اكسسوارات إضافية وبدون جناح فقط أما المحرك وبقية التجهيزات نفسها.


الأخ العزيز " ُE55 "
تحية من القلب إلى القلب,,,

يا خوي أبغى أعرف انت متأكد من حكاية الفيوز رقم 13 , وثانياً الكلام هذا ينطبق على شيفرولية كابرس SS والاّ لا.

[E55]

الله يحيك يا أخوي

بالنسبة للفيوز رقم 13 ، نعم أنا متأكد لأني جربته على سيارتي لكني ما مشيت فيها لأن كل العدادات ما اشتغلت

وهل الفيوز مرتبط بـ Trip computer وعداد السرعة ، وبما أن مافي قراءة توصل للكمبيوتر تتعلق بالسرعة

إذا مافي Cutoff على سرعة 240 لأن الكمبيوتر مب عارف كم سرعة السيارة.

وما أدري إذا كان هالشي ينطبق على الكابريس لأن التجهيزات الداخلية مختلفة نوعاً ما بين السيارتين

تحياتي لك أخي العزيز وننتظر مشاركاتك ومواضيعك.

[مفتون]

الله يعطيكم العافيه والله ماقصرتوا :)

وابشركم سعرها وصل الحين ال اس اس 93 الف :):)

كل راح ومسعرها :)

لكن وش رأيكم احلى لون على اللومينا اس اس ؟؟

وشكرا لكم جميعا