هذا اكبر عيب في المنتدى

[خالدالفيصل]

انه الواحد ما يجاوب الا على موضوع عضو معروف وهذا اكبر مشكلة عرفتها بالمنتدى مثلا موضوعي حق لليان اللبنانية الله يعلم كنت متحمس له شلوون وتعبت نفسي واكتب ومتحمس في منتدى ثاني((ماراح اذكر اسمه))شكروني وشكرا وننتظر القصص القادمه اما هنا بس عدد زوار بسيط ومن غير ردود ليه؟؟عشان الكاتب خالدالفيصل مو سعودية او سردال ((لاتحسبوني حاقد عليكم ياسعودية وسردال )) بس صراحة هذا اللي من زمان ودي اقوله:( وعشان كذا:(:( انا باقرر قرار لا تراجع فيه:(
هو-----> اشوف اني اخذ ملفاتي واطلع من المنتدى مثل ما سوى اخوي على البال:(وشكرا لحسن ضيافتكم لي

[بدون زعل]

عزيزي خالد الفيصل
ان ردود الفعل لموضوع تطرحه تعتمد على الموضوع وحجم اعضاء المنتدى واعمارهم....واشياء كثيره اخرى.
ولاتزعل اخوي كم موضوع تحمست له ووضعته ولم اجد اي ردود عليه....
تحياتي
بدون زعل

[الجيوكندة]

على فكرة هذا الموضوع طرحه الكثير قبلك و اهمهم هبة الرحمن و الاخت جرح السنين و كثير مما لا يحضرني اسمائهم

لذلك اتفق معك و الله يا خوي ان في مواضيع ذهب بس ماحد يرد عليها و مواضيع ثانية يمكن تكون منة كم كلمة تلقى الردود ما تنعد

بس لا يا اخوي هذي ما هي مشكلة .. دير بالك ترحل و الا هذا يكون استسلام

احيي فيك صراحتك و جراتك .. خلك على هذا و لا تتغير

و انا اطلبك تبقى و انا اخوك .. اذا ما تبي تزعلنا

[ســامــر]

اخي العزيز......خالدج الفيصل...
نظرتك جميلة...كمحاكاه للواقع...
عزيزي...ملاحظتك توجد في اي منتدى...لاسباب...منها...التحيز لعنصر ما..او الاهتامات لاتخدم بعض المواضيع...او تغير اهداف دخول المنتدى من شخص لاخر...
واعتقد انسحابك مبكر جدا...لذلك اطلبك بالاستمرار...وانشا الله كل اعضاء المنتدى نحن قراء و وردود لهم.....

تحياتي لك........سامر

[جرح السنين]

فعلا ظاهرة موجودة

و لكن صدقني الفشل اول طريق للنجاح و حاول وحاول

و صدقني الاصدقاء هنا طيبين .. و ستندمج معهم بسرعة .. و لا تزعل

صدقني الموضوع يتوقف على قارئه فاعرف من تخاطب .. تعرف كي تكتب بعقله كي يفهمك و يستوعبك بسهولة

و لا تنسحب هذا امر .. ولازم تطيع الاوامر .. يلا عاد ارجع و خل كل هذا وراء ظهرك .. و ابدا من جديد

___________________________________________

&& جرح السنين && ( فتاة من القمر )

انا هنا في هذا الموقع تعال الى عالمي

http://www.moveed.8k.com/images/java/hhh/b6.gif
http://www.topgulf.net/userpages/Jar7-Alsnen.html

[الدكتور ريان]

اهلا عزيزي ..خالد الفيصل


طالع تحت ..اسمك وش ذنب ال81موضوع الي كتبتهم ..خلاص بتتركهم .
اخوي ..لاتعصب ..نفس المشكلة صارت لي في اول دخولي للمنتدى .بس الان صار لي اصحاب احبهم ويعزون علي ..منهم انتا ياخالد مع انك مقصر شوي بردودوي (لاكن ولايهمك )...
وبعدين ياخالد ..لو انتا خرجت وخرجت جرح وخرج جيو كندة وخرج سامر وخرجت وانا وخرج الجميع .....من سيظل .....لااحد
فأرجوك عاود التفكير ..وتعال افتح مواضيع تشد الجميع وشيقة (مش مثلي مواضيعي التافة )موضوع غير شكل ..لو شخصي مايهم وصدقني الكل راح يجاوبني معاك وعلى فكرة انا اكره عنصرية المواضيع مثلك ودائما يشدني الموضوع نفسه ..
وحاول تنتظر لرد الشباب لانه مش كلهم موجوديين ...وحاول ترد عليهم علشان يردون عليك (عمري ماشفتك رديت لاحد )


فلا تزعل يادايم السيف ...احلى اسم لشاعر ..وتعال شمر عن قلمك ولا تروح ....
ولا ماعندنا خاطر عندك ..يعني ..وهات راسك (امووه )مبسوط ياباشا ...
وبعدين اهل سوالف لاتزعلون خالد ..تراه غالي عندنا ..

[خالدالفيصل]

بدون زعل------> مشكور وما قصرت
الجيوكندة-----> تسلم يالغالي وماتقصر
جرح السنين----> والله انا هذي الحكمة ما دخلت مزاجي يمكنها غلط((الفشل اول طريق للنجاح)):)
سامر----------> والله انا اشوف مواضيع سخيفة لناس معروفين جدا بالمنتدى وله ردود بالصفحات؟؟!!:(
الدكتور ريان--> والله ان اكثر واحد يعجبني بالمنتدى عشانك تحاول ترد على مواضيعي وشكرا لك:)
----------- والله انا راح اجرب واحاول ارد على اكثر المواضيع وان شاء نسلك معكم----------:)

[أحبها]

خالد الفيصل ..

إختيارك لهذا الإسم يدل على ..إعجابك بالشعر المميز ..

خالد الفيصل ..
لكل عضو إهتمامات معينة .. وعلى حسب الميول الثقافية .. فتجد هذا يميل للكتابات الجادة .. والآخر .. للشعر والأدب .. والآخر .. للطرف ( بضم الطاء ).. وهكذا .. فركز جهدك على مجال معين لتفيد وتبرز منه ..

وأيضاً ..ضع في بالك أن العضو .. مثل الصحافي .. لا يستطيع أن يكوٌَّن له من المتابعين وجمهور قاريء عريض .. إلا بعد .. جهد جهيد .. وعلى قدر .. تأثير طرحه على المحيط به .. يكون حينها التفاعل المنشود ..

خالد الفيصل ..
لا تنظر للشاذ من الأشياء وتجعله قاعدة مسلمة ..
فمن قال لك أن الأعضاء بدرجة نون النسوة لهم الحظوة بالمتابعة .. ربما وربما لا ..
صدقني على قيمة الطرح للموضوع يكون التفاعل .. وأنا واحد منهم لا أنظر للإسم بقدر النظر للموضوع .. وما يحتويه ...

وتقبل تحيات ( أحبها )
ودمت ودام وطني العزيز ..دون تزلف ولا نفاق المنافقين ..

[نجمة المساء]

الاخ خالد الفيصل : ليس لان هناك تفريق بين عضو او اخر ولكن قد يكون الموضوع الذي طرحتهه تم طرحه في السابق ، او ان لا تعليق عليه .



تحياتي لك

[عمروبن كلثوم]

^1

ألأخ خالد : الشلليه موجوده في كافة المنتديات وليس في هذا المنتدى , وهذا شيء طبيعي ومعروف ؟!

أماموضوعك الذي تعبت عليه وتطالب بردود عليه , أنا قبلك ياخوك كتبت موضوع أطول منه , نفس الشيء قصه وتعبت عليه ليلتين ؟! ولا أحد رد عليه ؟! شطف :(

بس عادي ؟! تدري وش سويت ؟! رحت وفزعت خويايه وأصدقائي بالطرائف وقاموا بالواجب وماقصرو :)

والموضوع كان أجتماعي جميل وكان من المفروض يتبعه جزئين بس تحطمت وتركت كتابة القصص الجاده:( , والحين أكتب قصص طريفه في منتدى الطرائف والكاركاتير وألأمور ماشيه على احسن ممايرام :)

بس انت استمر ولا تيأس وخلك مثلي , وشوي شوي راح تكون أصدقاء بالعربي شله ؟! وراح يتفاعلون معاك وتتفاعل معاهم .

وهذي المشكله تواجه جميع المسجلين الجدد في كافة المنتديات وليست محدثه .

عادي أصبر شوي وماعليك وتذكر ان الصبر مفتاح Mr K :) .

تحيــــــــاتي , مع تمنياتي لك بالتوفيق .

[mouza]

لا تفهمنا غلط ارجوك
صدقني اظني انا جد قريت موضوع من مواضيعك القصصيه واطريت على الموضوع كان اسلوبك حلو في الكتابه
وصدقني انا البارحه كنت بقرأ الموضوع يوم شفته وايد طويل قلت باجر ان شاء الله عشان انا ما احب ادخل موضوع ما ارد عليه
صدقني اعط لنفسك فرصه
هل انت مثلا تدخل مواضيع كل الاعضاء وترد عليها
انا صراحه اشوف ردودك قليلا جدا على المواضيع ؟
لا تزعل مني لكن هاي الحقيقه تواصل دائما بمن في المنتدى الكل يتواصل معاك وبالعكس الاخ على البال نتمنى رجوعه والكل كان يتجاوب معاه واذا انت تعرفه خله يرجع لنا ترا نحن نتريا

وبعدين حاول انك تصغر من حجم الموضوع احسن واجعله على اجزاء صدقيني بيكون فيه التشويق :)

وشكرا مجرد وجهة نظر

[سردال]

ولا تزعل يا خالد :)

أخوي فيه قانون فيزيائي يقول: لكل فعل ردة فعل يساويه في المقدار ويعاكسه في الاتجاه :)

إنت رد على الأعضاء في مواضيعهم راح يردون عليك إن شاء الله :)

[الغرضون]

خالد باشا الفيصل:
كلامك صحيح بالنسية لقلة الزوار والردود.. صحيح 1000% .. .. اصبر والعاقبة لمن صبر.
لكن لا تتركنا .. لا تتركنا .. لا تتركنا .. يكفي عقلك وفكرك .. ههذا سوى توقيعك الجميييييييل والرائع الذي لا يوجد في أي منتدى؛؛؛؛؛

[زهر الليالي]

خلي روحك رياضية :):)
اللي يرد يرد واللي مايرد شوف غيره :)
بس لا تأخذ الأمور بصفة شخصية
صراحة أسمك رهيب... على أسم واحد عزيز وغاليhttp://www.swalif.net/sforum/images/icons/icon12.gif

تحياتي

[شاهيناز]

خالد...لاتهتم بعدد المشاركات اهتم بعدد الي قرؤ الموضوع....

انا دئما يجذبني عنوان الموضوع اكثر من اسم الكاتب....

[خالدالفيصل]

هههههههههههههههههههه صراحة اول موضوع اطرحه ويجيني هالعدد من الردود :)

[مصعب]

^1

أخي إعلم إنه يجب على كل واحد منا أن يصبر ويتصبر ومن يتصبر يصبره الله والإنسان المؤمن لا ييأس هكذا بهذه السرعة ولكن لابد عليه أن يواجه الصعاب وأن يتحمل وأن يكون صدره أوسع من هذا ، ولا يمل بهذه السرعة لأن ورائك أمور أكبر من هذا وتحتاج إلى صبر أكثر من هذا في هذه الحياة الدنيا وانظر إلى كثير من الكتاب الذين يكتبون وينقلون المواضيع المفيدة التي تبني هذه الأمة البنيان الصحيح ولكن القليل من يردها واضرب لك مثلا آخر فارجع إلى بعض المواضيع التي طرحتها أنا مثلا فستجد أن ما أصابك قد أصابني ولكن أعود وأقول لا بد أن نتحلى بالصبر فإن هذه الدعوة لم تصل إلينا من الجيل الأول بالسهل ولكنها ما وصلت إلينا إلا بالجهاد والتحلي بالصبر وانظر ما أصاب للنبي صلى الله عليه وسلم حين طردوه أهل مكة ورجموه أهل الطائف ! فهل ترك دين الله ؟ وقال مالي ومال الناس ؟ لا وألف لا فنحن أمة محمد مصيبتنا أننا نريد الشيء أن يكون كن فيكون .

فالله الله ، ولا تؤاخذ يا أخي على هذا الكلام فإنني أحبك في الله وأنت واحد منا ولا نريد أن نفقد أخا لنا ولو كنت عضوا جديدا ما دام أنك دخلت معنا في السوالف فأنت واحد من هذا البيت الذي سيكمل بنيانه على يديك إن شاء الله تعالى

أسأل الله لنا ولك وللجميع التوفيق والسداد وأن يهدينا وأن يرشدنا إلى سواء الصراط .


أخوك في الله ( مصعب )