هل نحن بحاجه إلى كل هذه القوه والسرعه ؟؟؟

[غالية]

السلام عليكم ورحمة الله

بالتأكيد كلنا تقريباً في هذا القسم مولعون بالسيارت وخصوصاً السيارات القويه و الرياضيه..
((لا اطالعوني عاد بنظرات استغراب و استعجاب ..هيه بنت وتحب السيارات الرياضيه )) :confused:
.....وهناك شباب معدلون للسيارتهم....
واضفو لها تعديلات جعلت من سيارتهم تضاعف من سرعتها اضعاف الاضعاف......ولكن اتسال!!....
هل نحن بحاجه إلى هذه السرعه و القوه في حياتنا اليوميه؟؟
خصوصاً الاشخاص المحصوره قيادتهم للسياره في شوارع المدينه....
حيث انك اذا امتلكت سياره قويه لا تستطع في كثير من الاحيان قيادتها على هواك..تحس انه هناك شي يكتم على انفاسك....
مع الازدحام المروري الذي تزداد وتيرته يوم بعد يوم....
ومع وجود اجهزت الردار الثابته و المتحركه المنتشره في كل حد وصوب....
والان في دبي على حد علمي اصبحت غرامة الردار مضاعفه
اذا تعديت السرعه القانونية بكثير مثلاً الشارع الذي تحدد عليه السرعه 80 وانته قدت سيارتك بسرعة 120 ك/س....
حيث انه تحتسب عليك غرامتين غرامة سرعه و غرامة القياده بطيش و تهور يعني المجموع 400 درهم....
فهل نحن بحاجه فعلاً إلى كل هذه القوه والسرعه ؟؟؟
واذا اردت ان تشتري سياره رياضيه و قويه...ما هو هدفك من شرائها؟؟؟
ما الشي الذي يدفعك ويجذبك اليها؟؟؟
هل مثلاً ..مثلاً قيادتها تجعلك مرتاح نفسياُ ؟؟؟ :D
عطونا ارائكم يا شباب...هذا موضوع لللنقاش...

تحياتي للجميع :)

[Lamborghini]

هذا الشيء هو جزء من الإنسان ، الإنسان أول ما ياخذ ليسن يقول ياريت لو عندي سيارة لو كشرة ، بعدين يقول ياليت لو عندي سيارة الفلانيـة وهكذا يمشي في الحياة .. :)

السيارة السريعـة هي شيء كمالي و غير عملي ، الإنسان ياخذها ويمشي فيها ويعدلها بعدين يمل منها ويبيعها .. :D

السرعـة الزائدة غير مفيدة خصوصا في الدولـة عندنا .. مثلا في أبوظبي لو إنت ماشي ألف ولا ماشي خمسين الإشارة رايحـة تزخك يعني رايحـة تزخك ، في العين الطرق طويلـة لكن خمسين ألف رادار في الشارع ، دبي الله يخلي الزحمـة ، علـى الخطوط اللي ماشي 120 ( قانوني ) يوصل بعد اللي ماشي 180 ( متهور ) بعشر إلـى ربع ساعـة بالكثير لا والريال وفر بنزين وحافظ عالسيارة وريح نفسـة .. :D

[ابو دانه]

زياده القوه مطلب اساسي لسيارات الدفع الرباعي عشان تقدر تجتاز التضاريس الصعبه

اما في سيارات السيدان فزيادة القوه والسرعه عن حدها استهتار بارواح الناس

[silver]

مش شرط أن إلي يزيد قوة السيارة هدفه السرعات العالية ...

يمكن قصده زيداة تسارع السيارة ... يعني مثلاً انت عند الإشارة وعندك نقول سيفك ... والسفك لاعب فيها ... وتجي جمبك مكسيما مثلاً ويضغط بنزين يعني شوفوني محد قدي ... توق لنت طيب ... وأول ما تفتح الإشارة تطلع انت عليه وهو توه عند الإشارة إلين سرعة مثلاً 80 وبعدين تهدي ... مو شرط تكمل لما آخر الطبلون .... لأن كذا كأنك قلت اصحى يبوا الشباب منت بلحالك إلي عندك سيارة :D

وبعدين مو كل من زاد قوة السيارة كان مستهتر بحياته وبحيات الناس ... في ناس يزيدون قوة سياراتهم لكن ما يستخدمون هذي القوة غير في الطرق المهجورة لأنه مافي ناس تستخدم هذي الطرق.

[HaKeM]

والله السرعة بالنسبة ليا سلاح ذو حدين

السرعة في الحالات الطارئة ماعليها شي مثل واحد مريض على وشك الموت أو أختبار مهم وحتتأخر عليه .

أما السرعة بالنسبة للمطارحات والسباقات هذا شي ضار وسيء بالنسبة لحياتك ولغيرك وللسيارة ...
وبعض الأيام تجيني الهبقات وأتسابق .

تحياتي:D

[ACCORD-V6]

اول شي شكرا غاليه على الموضوع لانه بصراحه هذا الموضوع
ذكرني بايام اول سوالف عام2001-وبدايات2002<<<<<قديم:cry:
كان المنتدى ولا ارووووووووع

نرجع للموضوع
بصراحه انا عن نفسي ابغى سياره فخمه حلوه قوتها معقوله هذا اهم شي

وبالنسبه لي شكل السياره اهم من قوتها(لحد يزعل راي شخصي)

والسيارات الرياضيه
1-تمل منها بسرعه
2-سعرها يطيح عند البيع بشكل غير طبيعي
3-غالبا لاتكون فخمه وتكون تجهيزاتها الداخليه عاديييه


شكررا على الموضوع الرائع جدا يااخت غاليه
واتمنى من الاعضاء التفاعل مع هذا الموضوع

وشكرا...

[ACCORD-V6]

نسيت شي

اللي ماخاف على نفسه من السرعه راح يخاف من الرادار؟؟؟:confused:

[DodgE]

منتوا لاقين سبب

السبب الوحيد هو المتعه وبالدول الخارجه يجي عامل آخر وهو المنافسه ومن ثم الفلووس $$$

ليش الشباب حفاي بالشوارع يلعبون بشي كروي من جلد ويرجع للبيت رجوله وسخه وكلها دم من التكسير

السبب الوحيد بنظري متعه وجعل الناس لاتصتطيع منافستي


تحياتي

[عاشق التضبيط]

السلام عليكم

انا عن نفسي اهتم بشكل السياره الخارجي والداخلي اكثر

والسرعه آخر همي

يعني احب اضبط السياره شكل بس جنوط _ زوايد _ تنزيل من برى

جلد _ تلفزيونات _ سستم من داخل

بس مكينه والذي منو ماحب اتعبث فيهم ولا احب ازيد السرعه

لان طبعي هادي ماحب ادوس

يعني اي واحد تشوفونه عنده ماكسيما ماسك اليمين ومهدي تأكدوا 100% انه انا:p

بس اعرف واحد عنده موستنق مجنون سرعه كله ملزق الدعسه وكل شوي يا حاط قطعه ولا شايل قطعه و قومات 77 ساعه انا يرتفع ضعطي لما اركب معاه وهو يرتفع ضغطه لما يركب معي

على العموم مشكوره اختي على الموضوع
وبغيت أساألك انتي من النوع اللي يحب السرعه ؟

لاني احس البنات يحبون السواقه الهاديه :rolleyes:

[vette4ever]

انا صراحه شريت كورفت ، مو عشان سرعه
السرعه تجي في الاخير (اجل ليش سموها سيارة رياضية):damp:
ما همني في السيارة كثر الشكل الخارجي:cool:
لو مهتم في السرعه (اشتري بورش ولا فراري):damp: وها السيارات طبعا اقوى من الكورفت (ولا انا غلطان)
لو ابي اطارح ، اقول للي ابي اطارحه تعال اوديك شارع فاضي ما في احد ، (وازهب كامرتي واقوله تـــــــــــــــم);) :D ;) :D
وشكرااا على الموضوع

مع تحياتي...:cool: :cool: :cool:

[CORVETTE^C5]

رد مقتبس من CORVETTE_99
انا صراحه شريت كورفت ، مو عشان سرعه
السرعه تجي في الاخير (اجل ليش سموها سيارة رياضية):damp:
ما همني في السيارة كثر الشكل الخارجي:cool:
لو مهتم في السرعه (اشتري بورش ولا فراري):damp: وها السيارات طبعا اقوى من الكورفت (ولا انا غلطان)
لو ابي اطارح ، اقول للي ابي اطارحه تعال اوديك شارع فاضي ما في احد ، (وازهب كامرتي واقوله تـــــــــــــــم);) :D ;) :D
وشكرااا على الموضوع

مع تحياتي...:cool: :cool: :cool:

---------------------------------
انت نفس صاحبنا هذا شوف الصوره
http://www.exoticcarforums.com/ferrarispeed.jpg

:D :D :cool:

-------------------------------

بالنسبه لي داخل المدينه ما احتاج للسرعه ( لكن احتاج لسرعه المناوره )
بس في الخطوط السريعه اذا كان عندك سياره المانيه و لا v8 بعد و انت شباب و الشارع فاضي مليووووون بالمئه راح على الاقل تمشي 180 ;)
لانك ببساطه ماراح اتحس انك امسوي شي عااااااادي
بس لا يصيدونك ههههه :D
و شكرا على الموضوع الحلو

[vette4ever]

CORVETTE^C5
(بالنسبه لي داخل المدينه ما احتاج للسرعه ( لكن احتاج لسرعه المناوره )
صحيح كلامك هاذي مطلوبه ها الشغله لانه في لبريميرا ماراح اتوفي ها الشغله;)
و مثل ما قلت لازم يكون الشارع فاضي ، (بس لايكون واحد منخشلك)
;) ;) ما تسوى السالفه:D ;)

[CORVETTE^C5]

ههه مو بس ما توفي الا تكرهك بالسواقه روح اب تكسي احسن :D ;)

[vette4ever]

رد مقتبس من CORVETTE^C5
ههه مو بس ما توفي الا تكرهك بالسواقه روح اب تكسي احسن :D ;)
يا حبيبي هاذي الخير والبركه:p :p :D
يا ما قزينه فيها ;)

[فاهم]

السلام عليكم

والله يا جماعه الواحد ان تعود على السرعه صعب يتركها اذكر قبل لمه قاعد اتعلم السواقه كنت اسرع او ابوي يقولي لاتسرع بعدين اتعود

يعني مثلن عندي واحد من الربع ما يحب السرعه يكون راكب معاي ونا ماشي 140 انا احس انه عادي مو مسرع او اهوا يقولي خفف خفف يا مجنون لانه مو متعود

وسرعه لابد منها لانه احنى في زمن السرعه بس مو بكل وقت الواحد يسرع يعني بخط سريع الساعه 2 الفجر بمشي 100؟ لا اكيد بنوم العداد لمه يقفل الموتر :D

او بالنسبه حق القومات انا اكثر قوماتي عند الاشاره او اتواعد مع واحد بشارع فاظي

بس الشي الخايس الي يسرع او يقط بتاوين وشارع زحمه؟ هذا يبيله قص رقبه

بس والله السرعه مامنها فايده بس الواحد ان تعود مصيبه ونا امشي 180 والله ما احس اني مسرع لانه الواحد تعود

او اكثر شي اكرها اذا شفت جهال او مسرعين او يبتونون:corsair:

بس الركاده زينه يا جماعه

او مثل ما قالوا الشباب السرعه بعظ المرات تحتاجها حيييل

ولي يزود موتره ويلغمه عشان المقاوم بالشوراع هذا يبيله حرق

الله يستر علينا وعليكم يا شباب او بنات:D

فمان الكريم

[STS4ever]

والله الردود كثيره وماقريت اي رد بس انا بقول ايه نحتاج للسيارات القويه حتى لو في حياتنا اليوميه ومو لازم في مطارحات لاكن ممكن نحتاجها في عزمها وفي خدمتها على المدى البعيد لانك ماراح تظطر تشد عليها وكذا حاجه ...

وتصبحون على خير ( الساعه 5 الفجر )

سلام

[kin porch]

تذكرت احصائية من سنتين تقول ان ( الوجاهة الاجتماعية اهم عامل عند شراء السيارة لمستهلكي امريكا الشمالية ودول الخليج )
صحيح كلنا و بكل اسف نشتري او نتمنى نشتري سيارة قوتها مثلا 300 حصان من اجل ان يرانا الناس لكن بالواقع لا نحتاج الى نصف تلك القوة.........

[Oettinger]

هلا اختي غالية ومشكورة على الموضوع ، اللي ما جا على بال احد هع هع



الردود والاراء اختلفت!
لكن في رأيي اسند هذا الموضوع الى نوع من الجينات في الحمض النووي DNA الذكوري مسؤول عن السرعة!
وزي ما نعرف الذكر XY والانثى XX ، فايضا احتمال تكون في بنات تحب السرعة!

بس خذوها منها ، الموضوع ذكوري بحت في الاصل! السرعة والاستعراض:D

[غالية]

اشكر جميع من شارك و رد على الموضوع....تسلمون يا شباب..:)

ورد على استفسارك اخوي عاشق التضبيط هل أنا من النوع اللي يحب السرعه....
بصراحه نعم وهذي صفه سيئه طبعاً والردارات تشهد لي :cry: ....
...والسرعه تكون عندي على حسب الحاله المزاجيه والظروف....
لما اتاخر ...
وبعد يوم اكون امعصبه ادوس على البترول و لا احس به
:corsair: ...
واحياناً اسرع بدون سببب مباشر...:rolleyes:
بس اكتشفت ان صديقتي اخس مني في هالموضوع...ومره كنت انا و هيه انطالع على النت مخالفات الردار ....
جان اقول لها انا اتحداج جان تقول لا والله ثم والله ما تتحدني و برويج....
ويوم شفنا طلع لها اكثر من 4000 الالف درهم ردارات :eek: .....
قلت لها لا والله انج كسبتي التحدي و بيضتي الويه :D ....
والسرعه صح اخوي Oettinger انها صفة الشباب .....بس بعد في بنات جذيه....
هو يعتمد عاشخصية البنت اذا كانت من النوع الخواف و الهادي والمتردد....بتشوف سواقتها بارده...
وعند اللفات او الفتحات اموقفه طابور سياير واقفين وراها ويدعون عليها .... :D
لكن اذا كانت من النوع اللي ما يخاف و جريئه...وامقويه قلبها...
بتشوفها تدعس على البترول ولا عليها....
والله ياما شفت بنات ايسوقن CL500و بورش ....وغيرهن من السيارت الرياضيه
وحتى النيسان بترول على تايرين مشوه....هيه والله سواها بعض البنات تراهم...:glasses2:
والله يستر من الياي :black:
وتحيــــــــــــــــــــــــــاتي للجميـــــــــــــــــــــــــــــــــــع:) :)

[ابوعليوه]

شوف داخل الديرة مااحتاج الا سيارة عزمها حلو :) وتكون 6 سنلدر (((عشان صرفية البنزين)))

اما اذا انت راعي سفرات كل يوم بمنطقة انصحكم بمرسيدس SEL500
لأن كانت معي مرسيدس قبل فتره حجم 500 بس ذبحتني كل اسبوعين القى الزيت قالب اسود واذا دعست لها تشوووووف الدخنه سوداء اخر قمت اعطيها الناااار لمدة ستة شهور :)

مشيت عليها طبلون المرسيدس والي كان 240 بس لحد الان ماشفت زي ركادة المرسيدس على الخط واذا انت مسافر خل سرعتك من 180 الى 220 :)


اما عن المخالفات علي اكثر من مخالفة

عندي سرعة

وتفحيط :( سمعت ان ماعليها تخفيظ والغرامة 900 ريال :(







واحب انصح نصيحه مجرب
مو كل مره تسلم الجره




بسبت السرعة والتهور داخل البلد صدمة لي حرمة مصريه :) بس كانت هي الغلطانه قطعت طريق سريع وانا مسرع



والثانيه

كنت افحط على كامري تأجير وكنت مسرع وعلى لفة سحبت السايد كملت على خطها بس كان الشارع فيه تراب خفيف على مااخذت الزحفة الا بوجهي سيارة بيك اب مستوبيشي اضرب بريك ماينفع الكش القير ريوس مانفع لين صدمتها



وطلع راعي السيارة واحد نشبه قال مااسامح :( ياولد يامنا قلت اعطيك فلوس تصليح سيارتك بس فكنا من المرور قال لا لازم يجي :( المهم وتجيني مخالفة التفحيط + تصليح سيارتي (تأجير) 1500 ريال ومخالفة 900 ريال على حد ماسمعت وتطلع تصليح دعامية المستوبشي 300 ريال :(

عاد شف وجهي قدااااام اهلي ماتقدر ترقعها




المهم من عقبها تركب التفحيط لاكن السرعة موجوده لحد الان










على العموم سامحوني على الاطالة

[bashar_255]

انا ما ابي السيارة تمشي مليون :headshak:

ابيها بقومة سريعة و الباقي ما همني:OO:

[alsamawe]

انا عن نفسي مزاجي في السرعه يعني لو كانوا الاهل معاي ما اسرع بس لو كنت بروحي ما احس الا وانا واصل فوق 200 .
اما عن البنات فان اشهد ان شي بنات با يعينها بشرف (يوم كنت راجع من بوظبي الساعه 2 في الليل ويوم وصلت لجسر ملعب غنتوت اشوفلك وحده حرمه يالسه ترايسني وانا ما قصرت يلست اداعس معاها بس بعدين خفيت لانها مصختها كانت تمشي فوق 220 قلت يمكن مب صايحيه وابتلش فيها خليتها تروح)
وشكرا

[زورو الامارات]

السلام عليكم


القوة ليست بالضروره تترجم الى سرعة

السيارات العائلية تحتاج الى قوة + عزم لان عدد ركابها فوق ال 7 اشخاص

- الباترول الجمس الكروزر فتحتاج الى قوه اكبر وعزم عالي دائما


لان مهمه نقل 7-9 ركاب بأمتعتهم بسياره يفوق وزنها طنين امر صعب جدا على محرك عادي تحمله وان فعل فيكون الاداء ضعيف جدا



لذلك نجد اغلب السيارات بدأت في زياده قوة محركاتها


لاتنسوا ايضا ان جهاز التكييف يمتص من عزم وقوة السياره


لو فرضنا ان محرك 8 اسطوانات بسعة 5000 سي سي

وبقوة
260 حصان

وزن السياره على الاقل 1800 كجم

القوة صافية بعد تركيب كل المعدات والمحرك والدفريشن وكل شي ناهيك عن المروحه التي تستهلك جزء قوي من القوه

المتبقي من القوه بحدود 235 حصان

جهاز التكييف على الاقل يستهلك من 15-25 حصان وهالشي محسوس


كم المتبقي ؟

215 حصان

اذا فرضنا ان حمولة السياره بكامل ركابها ( الوزن )

2350 كجم

هل ستكفي 215 حصان على حمل سياره من سبع ركاب ؟

اذا سيكون الاداء ضعيف


وهذا ما احب ان اصل اليه


---------------------------------------------------------------------------------------


نقطة ثانية مهمه جدا :

قليلون من يستخرجون كامل طاقة المحرك خصوصا من المحركات الصغيره

او الكبيره جدا

لذلك القوة المتوفرة تكون متدرجه يعني على 2500-3500 دورة بحدود 170 حصان من اصل 225 ( هذا مجرد مثال)

كذلك وجود اجهزه قطع الوقود بعد سرعات معينة تساهم في الحد من التهور


لذلك ارى ان زيادة قوى المحركات ظاهره صحية خصوصا مع المحركات اليابانيه الصغيره

ولاتنسوا شيء مهم جدا : كلما طال عمر المحرك قل اداءة

هذة قاعدة :

وكلما كبر حجم المحرك وسعته ازداد عمره الافتراضي


اما كون الشباب تدرجوا الى موضوع السرعة

فهذا شي موجود من اول يوم تم اختراع السياره فيه

الاهم من السرعه التسارع هذة المتعه الصرفه

والاداء يبرز

اما الآن فلاداعي للسرعات العالية بسبب الازدحامات والرادارات



تحياتي وان شاء الله اكون قد توفقت

[الأنصاري]

مشكورة اختي غالية على الموضوع
واخوي زورو الإمارات صحيح وانا احس ان الاندكروزر وجميع السيارات اليابانية تحتاج لزيادة في العزم والأحصنة عشان تكون افضل
يعني انت تحس بالفرق يوم يركب معاك 7 وتشغل مكيفين وتملي الخزانين فل تلاحظ ان عزم الكروزر يطيح مرة واتقد في النيسان اكثر لذلك لازم يزيدون اعتقد الباترول 280 حصان حلو الكروزر لازم يوصل300
اما السيارات الصغيرة انا ملاحظ ان اليابانيين حريصين يزيدون سعاتها

[غالية]

اشكر جميع من شارك في الموضوع ...
تحياتي للجميع :)