توحيد المصطلحات (ارجو من الجميع الدخول)

[W351]

السلام عليكم ورحمة الله وبركاته

اعضاء منتدى سوالف الاعزاء حبيت انكم تشاركوني ها الفكره لاني من

الذين يحبون معرفة مفردات ومصطلحات جديده لدى الاخرين.

لا يخفاكم وبما اننا من بلدان مختلفه وجود بعض الكلمات المختلفه التي

تدل على اشياء واحده وليكن ذكر الكلمات في مجالنا مجال السيارات

على سبيل المثال في السعوديه وبا التحديد في المنطقه الشرقيه

نسمي حشوة البريك : قماش او فحمه

بنما اخواننا في الكويت يسمونها : سفايف

محور الدوران الخلفي نسميه : دفرنش

اخواننا في الامارات يسمونه : دفريشن

كراسي السياره نسميها : اسيات او مراتب

اخواننا في الكويت يسمونها : كشنات

غطاء المحرك نسميه : كبوت

اخواننا اتوقع في الامارات يسمونه : بانيت

ارجو من الجميع المشاركه مع ذكر اين تستخدم الكلمه وتكون شبه

موسوعه للمعلومات العامه ولكم تحياتي.

[SLR]

الرافعه:

بالاماراتي الجيك..

بالسعودي والسوداني : العفريته.


درج السيارة : اعرف بالعراقي من المسرحيات يسمونه جغمغجه :D

غطاء المحرك : البونيت وبهلجة ثانية ماقدر اطريها ..:D


وذا في اشياء جديدة راح اخبركم:)


تحياتي لكم...

SLR

[NFS]

--------------------------------------------------------------
غطاء المحرك : البونيت وبهلجة ثانية ماقدر اطريها ..
--------------------------------------------------------------



الكلمة هذي عادية جداً ، بس كل واحد وتفكيره....... :D

[Dreams_Maker]

Wheels

جنووط<< عندنا بالسعوديه

رنقات<< بقية الدول.."مدري عنهم"


:rolleyes:

[A7medo]

افي البحرين انسميه انتيك لكن السعودسة يسمونة ثلاجة ...مادري ويش الشبه الي فيه الي خلاكم اتسمونه بهذه الطريقة

الأسطبات : احنا انسميهم ليتات خلفية

الدركسون : احنا انسميه سكان

وبعد شنو ...

بس

[922]

اكزوست = قزوز

الدركسون = طاره

درم ويل = هوب

رافعه = عفرتيته

كربريتر = في بعض الرويات كلبليتر

رديتر = في بعض الرويات لديتر

دفرنش = كرونه

نور اللمبات الصغيره بدون الشمعات = سكن

كلتش = ديبراج :laugh:

سده = صره

ناقله سيارات = سطحه = قنص

دفتر وليسن = الرخصه والاستماره

شكشوكه بالسعودي = بيض طماط بالكويتي

كبسه = متشبوس

قرصان بالرياض =لحوح في جيزان


:banana: :banana: :banana:

[RED Chevy]

إي والله وإنت الصاج يخي كل كيلومترين لهجة وكلمات غير:D

تفضل هذي بالبحريني:

نسمي حشوة البريك : قماش او فحمه
_____
إحنا نسميهم شوزات( جوتي بالعنجدريزي الله يعزكم)

__________
محور الدوران الخلفي نسميه : دفرنش
_____
اخواننا في الامارات يسمونه : دفريشن( وإحنا مثلهم)
__________

كراسي السياره نسميها : اسيات او مراتب
_____
إحنا نسميهم كراسي أو سيتات
__________

غطاء المحرك نسميه : كبوت
_____

اخواننا اتوقع في الامارات يسمونه : بانيت( نفس الشي بانيت)
__________
درج السيارة نسميه: بيتي:D
__________
الدركسون: نسميه "سكان"
__________
هوبات: نسميهم درامات
__________
رافعه: جيك
__________
طبلون: قيجات( يعني العدادت)
__________
الطبلون بعد: نسميه دشبورت( بس مو العدادات المكان اللي فوق المسجل والعدادات ووووووو





وأقترح تثبيت الموضوع:D

[Black Chevy]

اي والله مشكله:D هاذا الي عندنه بالكويت:::

الرجوع للخلف بالكويتي: قري و بالاماراتي: ريوس
غطه المكينه بالكويتي:كبوت
فحمات البريك بالكويتي:سفايف
مقود السياره بالكويتي:سكان
الاطارات بالكويتي:تواير و اعتقد بالسعوديه:كفرات
weels بالكويتي:رنجات
انبوب رش الماي على الجام الامامي بالكويتي تشاشات و المساحات قليل يسمونهم مشاشات
درج السياره بالكويتي و بالعراقي جمغجه
الهاردتوب نسميه تنته او نص تنته لو كان صغير او كشف اذا كان كامل
العادم بالكويتي قزوز
الرافعه بالكويتي :جك او تمساح لي كان كبير
مفتاح براغي يالكويتي ليور
كراسي السياره بالكويتي :كشنات
الطبلوم المنطقه الي تصير تحت الجام الي وره و الي جدام
الهاندبريك بالكويتي:سايد و اعتقد بالسعودي جلنط
الليتات الي جدام و الي وره بالكويتي سطبات

و مشكور اخوي W351 على الموضوع الرائع و مثل قال اخوي RED Chevy ياريت لو الموضوع يتثبت:)

تحياتي

[عاشق التضبيط]

السعوديه البحرين

صدام بمبر

جنوط رنجات

كفرات تواير


بنزين بترول


زيت الظاهر دهن

هذا اللي اعرفه حاليا وجا على بالي

[W351]

اخوي SLR مشكور علي ردك والظاهر السواداني اللي يقول عفريته
كان يشتغل في السعوديه ;)

اخوي NFS نورت الموضوع بردك مع اني توقعت منك مفردات اكثر بحكم تجاربك مع مكاين الهوندا وتشاليح الامارات والكويت :think:

اخوي Dreams_Maker مشكور على مشاركتك وننتظر المزيد

اخوي A7medo والله حتى انا مره جلست اتسائل ليش نسمي الانتيك
ثلاجه :think: وما فيه سبب بس اسم درج على الانتيك . وعلى فكره
عندنا بعد يسمون الدركسيون سكان:banana: والف شكر لك على ردك

اخوي 902 مشكور على ردك وحلوه منك بيض طماط :p لكن ما حددت المنطقه اللي يستخدمون المفردات:mad:

اخوي RED Chevy ابشرك مو كل كيلومترين عندنا من ورشه لورشه
تختلف المفردات:blink: ومشكور على اقتراحك التثبيت:banana:

اخوي Black Chevy الله يستر منكم يا الشفراويه كل يوم واحد جديد
بلاك وريد ويلو وبلو وبراون ال شفر (بعطيكم عين:shock2: )
الله يعطيك العافيه ومشكور على مشاركتك وترا عندنا مفتاح العجل مثلكم نسميه ليور ونستخدمه لاشياء ثانيه:corsair: :black: للهواش
بعد المدارس ما سمعتوا بواحد اسمه بو ليور:Sad2:

اخوي عاشق التضبيط اعصر مخك وطلع اللي في الهارد ديسك :think:
مشكور على مشاركتك وننتظر المزيد منك.

[A7medo]

قمباري : روبيان :laugh:

[oil_HKS_lio]

مشكوووووور على الموضوع

دعميات=صدام ((الضاهر البحرين لئني شفت بحريني في الخضريه يتكلم بس خبريبي بمبر))

مفتاح بلوط الجنط= مفتاح عجل

عده تنضيف السياره= صطل خرقه وشمليزر (جلد الغزال ) و صابون فيري وبروش

فرامل=بريك

الكفر الاحتياطي= سبير=ستبنه

والجربه

[JUST CORVETTE]

السلام عليكم ورحمة الله وبركاته



هلا اخواني ..


مشكوووووووووور اخوي W351 علي المعلومات الحلوة والموضوع المميز

هذا الموضوع بيوفر علينا اسئله كثيره :p



تحياتي لكم جميعا ;)

[oil_HKS_lio]

صاموله برغي واشر:D

[durango]

اتحدى احد فيكم يقولي ايش معنى


((((((( اكره )))))))))

بضم الالف و تسكين الكاف و فتح الراء

:banana: :banana: :banana: :banana: :banana: :banana: :banana:

[W351]

السلام عليكم ورحمة الله وبركاته

اخوي durango دورت في كل المصطلحات الخليجيه وما لقيت معنى

اكره :damp:
ممكن تعطينا معناها مع ذكر مين يقولها:confused:

[الارهابي]

أكره الباب :D

اللي تمسكها و تفتح بها الباب

[durango]

رد مقتبس من الارهابي
أكره الباب :D

اللي تمسكها و تفتح بها الباب

============================

ما شاء الله عليك................

كيف عرفتها؟؟؟؟؟؟؟؟؟؟؟؟؟

ما عمري قلت الكلمه دي ,,,, و احد فهمني


على فكره يابو الشباب :laugh: :laugh:


ياليت لو تغير الاسم ........

مو مساله شخصيه :D بس الاسم حلو :D


لكن الوضع هاليومين ما يساعد :laugh: :laugh:


لا تفهمني غلط ................................


-----------------------------------------------------------

كلكس .. بالمصري


بوري بالسعودي (او على الاقل عندنا في جده) = نوع من انواع السمك في الخليج (على ما اعتقد)

هرن .. في المناطق الخليجيه

[durango]

رد مقتبس من W351
السلام عليكم ورحمة الله وبركاته

اخوي durango دورت في كل المصطلحات الخليجيه وما لقيت معنى

اكره :damp:
ممكن تعطينا معناها مع ذكر مين يقولها:confused:

=================================

الاخ الارهابي (مجرد اسم) ماشاء الله عليه ماقصر و جابها


لكن المرجع: شوف المعجم الوسيط اذا لقيته .... دق علي ... :D :laugh: :D :laugh: :D :laugh: .........


لالا امزح........ :laugh:


مادري ايش اصل الكلمه....... لكن انا متعود عليها و على معناها


و الموضوع يبعث فيني احساس اللقافه (يعني شيق)



و مشكور على الموضوع

[عاشق التضبيط]

جامه = نافذه

دبه = شنطه :D

على فكره بالسعوديه فيه اختلاف باللهجات (حقون) الغربيه يختلفون عن (حقين) الشرقيه ويختلفون عن الوسطى والجنوب يعني مشوااار

الغربيه يقولون غمازات وحنا نقول اشارات:D
ويقولون تقطيب واحنا تضبيط او تعديل

يعني انا عاشق التقطيب :laugh:

الامارات يقولون مدعميه والكويت دعاميه والبحرين بمبر وحنا صدام

على فكره ذكرتني بمصري يتكلم بحريني واااه من جد مسرحيه :laugh:

[A7medo]

احنا ما انقول تفحيط ..انقول تقحيص

[RED Chevy]

رد مقتبس من A7medo
احنا ما انقول تفحيط ..انقول تقحيص

تقحص--تخمس--حراق:D

[بوأربع]

ليور:سبانه

بس صراحه موضوع شيق

شكراً لكاتب الموضوع

[DraGGeR]

موضوع جميل جدا

في كلمة سمعتها من خوي بالبحرين لما رحنا انطعس في الهاف مون

بغينا انغرس قعد يصيح ريس ريس ريس !!!؟؟؟

ما عرفت معناها و غرزنا بس بعدين اتضحلي ان معنى كلمة ريس هي دعسة البنزين ( يعني لما تدعس بنزين مو الدعسة نفسها)

خلينا انشوف أهل الشام

البوري = الزمور و الطويطة ( بعض عرب ال 48 )

الدركسيون = اللويدا

الكلتش = الكلتش و ايضا الدبرياججج ( بتدليع الجيم كخخخ ) أهل التبولة

التفحيط = تشفيط ( الاردن ) تسريك ( فلسطين )

جهاز الانذار = ازعكا ( فلسطين و أهل 48 ) اصلها بالعبري :damp:

الحبة الي اتسكر فيها الباب = اللكيتة:think:


و هذا كل ما عندي

تحياتي