ضع دائرة حول الإجابة الصحيحة! !

[مدردش متقاعد]

السلام عليكم جميعا

ما تكرر لي هذا الموقف مرة وحدة او مرتين... للأسف دايما يتكرر و أعتقد إنه يتكرر مع الكثير منكم يا إخوان الي في بلاد الخليج..

أكيد كلكم تروحون تتسوقون و تتشرون أغراض..و أحيانا تروحون ويا أهاليكم.. و هذا شي طبيعي.. بس في مرات يصادف إنه المحل الي تريد تدخله يكون في حريم أو بنات شابات كاشفات و جووههن و ماخذين راحتهن رغم وجود بياعين رجال .. و البياعين دايما يكونون من جنسية غير خليجية (هذا شي ستاندرد) يا هنود يا عرب و إنت المسكين يكون وياك زوجتك و لا والدتك أو أختك و يريدون يدخلون المحل علشان يشترون غرض معين.. فإذا كان في المحل بياعة حرمة بيكون من الطبيعي إنك تترياهم برع المحل.. بس بما أن البياع رجال فلازم تدخل و ياهم....... و هني السؤال يطرح نفسه..

ليش إذا دخل الرجل الخليجي المحل مع أهله تلاقي البنات ارتبكوا و حالتهن حالة و كل وحدة تنادي خويتها :اتغشي يا فلانة، اتنقبي يا فلانة، عدلي القذلة، عدلي الشيلة، عدلي التقاب .. ترى واحد دخل لابس غترة (شماغ) و عقال( أتمنى إني قلتها بكل اللهجات) بالرغم من إنها أصلا كانت كاشفة وجهها للبايع من الأساس.. بس علشان الي دخل خليجي.. سووا لي فيها حالة استنفار.. و للأسف دايما تصير ويااي رغم إني لاني بمغازلجي و لا أحب أدخل مثل هالأماكن أصلا.مما يعرضني للاإحراج.. و ينرفزلي أعصابي!!

أنا جاوبت على نفسي و حطيت عدة احتمالات إن شاء الله وحدة منهن تكون صح.

1)الخليجي (عينه زايعةو مب شايف خير) والبايع الهندي (يستحي)!!

2)نور مشع و قوي (يطلع من الخليجي) مما يعرض عيون الفتيات للخطر فيلبسن الغشوة كنظارة شمسية!!

3) الخليجي متعطر بعطر فواح و قوي يستلزم من الحريم إنهن يتغشن أو يتنقبن للمساعدة على التنفس( يعتي فلترة)!!

4) حركة لجذب الانتباه لا أكثر و لا أقل!!

الرجاء وضع دائرة على الإجابة المناسبة حسب رؤيتك للموضوع..

و تحياتي..

[عسل]

رقم 5

[بنت الدوحه]

رقم 1 و 2 و 3 و 4 .... :p

[WEBMASTER]

الخليجي يسولف في سوالف.......الآخرين ماعندهم سوالف أوعندهم بس بالأردو...

اس ليركي بوودأتشاهيء.بلكل تيجا..... ( يصلح عنوان موضوع هنا)..


طبعا أنا أضع اللوم على الدائرة.التي على راس الخليجي (العقال) لأنه مع الشماغ هو السبب.....


:):):)

[آهات الليالي]

لووووووووول حلوه حقت الفلتره!!!!!
بس انا برايي ان السبب في بعض الاحيان يكون رقم 1 و من قال الهندي يستحي لا ابدا بس يمكن عشان في بعض الشباب عينه قويه و يطالع و يخز فالبنت تغطي من اول ما تشوف واحد خليجي.و اما الهندي ليه تفتش عنده و ما تغطي فانا ما ادري صراحه؟!
و في سبب بعد ان ممكن هالرجال اللي دخل يكون يعرفهم او ان الحريم اللي معاه يعرفونهم او انه يطلع صديق اخوها او... او.....او....او انه يطلع ولد الجيران.يعني كلام الناس(يا عيبااااه شفنا فلانه في السوق ما تغطت!!!!!والله انها ما تستحي بارع!!!ما تعرف الحيا......)
اتمنى ان كلامي يكون واضح و اسفه على الاطاله



آهـــــ الليالي ـــــات

[مدردش متقاعد]

يا شباب يا شباب..
ترى ممنوع الغش.. و أي واحد أزخه إنه غش من ربيعه أو دخل براشيم ترى بروغه من سوالف هاهاها:)

و يا أخ آهات الليالي..

هذا شي عام ياخي... اتحصل البنت تعرف نص شباب الفريج.. بتغطي من من و بتكشف لمن؟ أنا بصراحة أختار الإجابة رقم 4 :)

[قطر الندى]

السلام عليكم ورحمة الله وبركاته..
مع احترامي للجميع..أنا لا أعرف الأوضاع في الدول الأخرى إلا أن الوضع عندنا في السعودية..هو كالآتي.معظم الشباب السعوديين متعوديين على أنه المرأة هي التي تتحجب وتغطي وجهها وهو ليس له دور..والسؤال للشباب هو أليس الله أمركم بغض النظر..لماذا الفتاة هي دوماً المسؤولة؟؟..فترى أعين الشباب مصوبة كالسهام حتى لو كان الجزء المكشوف هو فقط العينان..والله ودي أني أعمي هذي العيون..وبالنسبة للجنسيات الأخرى فأنا لا ألومهم فه جهلاء بالدين..وترى الفتاة الي تغطي وتحترم نفسها أمام الخليجي فقط يكون هدفها أنها لا تنفضح قدام أهل بلدها..

[مدردش متقاعد]

و عليكم السلام و رجمة الله و بركاته

يا أخت قطر الندى غض البصر شي لابد منه و مأمورين فيه نحن الشباب و نتوا بعد البنات بس الموضوع إنه هاي الحركة تحرج الواحد رغم إنه في معظم الحالات ماله خص و لا هو ناوي يشوف.. بالعكس هذي الحركة مدخل من مداخل الشيطان الي يقوله.. ليش البنت تغطت منك؟ أكيد جميلة.. أكيد فيها شي؟
و بعدين ليس ما تتغطى من الأساس من أولها؟ الهندي أو المصري مب ريال؟!
والتنقب و تغطية الوجه المفروض يسري على الكل ما دام الي جدامها بالغ عاقل و ذكر؟!

و تحياتي

[شجون المحبه]

وعليكم السلام ورحمه الله وبركاته .........:)

شوف انا ما بقولك ان ايجاباتك كلها لا تحمل الصحه
او ا بعضها صحيح والاخر غلط ....لا ابدا ....
تعرف ليش لان ممكن تكون كلها صح ....
وهذا طبعا يعتمد على نوعيه البنت ومدى تفكيرها ,,,

لان البنات مو كلهم يتغشون ويغطون وجوهم
فاذا البنت ما تتغشى اصلا .....في بعض الاحيات تضطر
انها تتغشى ...ليش لان بعض الشباب كانهم عمرهم ما
شافوا بنت في مكان ...فما تلاقي البنت سبيل الا
انها تتغطي وتفك نفسها منهم


وفيه نوع ثاني يحب لفت الانتباه له ...
وغيره ما يعترف ان الهندي او الوافد ريال ..
بس المواطن هيه ...:)


يعني مافي اجابه وحده ..كل نوع له ايجابه ...:)

[الزهراني العجماني]

بسم الله

الجواب لان الخليجي ( صاحب الكندورة والغتره )
ريال ( رجل) اما الوافد او الهندي (غير ذلك) :)
استغفر الله

[مدردش متقاعد]

في البداية أشكرك يا أخت شجون على ردك الذي لم اره منذ فترة ليست بالقصيرة.. و كذلك أشكر ردك (الديبلوماسي) إذا صح أن نطلق عليه:)

لمن حبيت أذكر لج آخر موقف مريت فيه يوم كنت في البلاد في الصيف و أباج تحكمين فيها..

مرة سرت محل مفروشات من الكبار الي يدش فيه الواحد يضيع و كان وياي الوالدة و أختي .. و عادة أول ما الواحد يدش المحل يلصق فيه واحد من مندوبي المبيعات علشان يشوف طلبات الزباين.. و كان في وحدة و ريلها و ولدها. و كان وياهم مندوب شامي الجنسية و الحرمة كانت ماخذة راحتها وياه رغم إن زوجها وياها.. بس أول ما بينت (طلعتي البهية).. تقول شايفة شيطان الله يعوذنا منه .. على طول تنقبت و حالتها حالة بالرغم إني ما طالعت و لا حتى كنت أحاول.. بس ليش هي من الأساس مب متغشية؟...
أنا صراحة أنحرج من هاي امور و ما أحب بمواقف مثل هذه... لأني لا أنا راعي سوالف بنات و لاني بمغزلجي.. فهل هذا عدل في رايج؟

و تحياتي

[مدردش متقاعد]

أشكرك على أول رد لموضوع من مواضيعي يالزهراني..

و يبدو إنك وصلت للإجابة الصحيحة الي كانت بين السطور:)
و كسبت لعبة أتاري مع 100000 شريط.. مبروك :)
بس تعال استلمها:)

و تحياتي لك