تلفزيون......جديد... و لكن!!(1)

[مدردش متقاعد]

تعودت في كل مرة أرد فيها البلاد إني أضيف شي في البيت.. سواء أغير ستارة.. أييب زولية (سجادة) أغير فرش.. أييب كبت.. أي شي.. المهم أييب شي يديد...منها أفرح الوالدة و أخواني الله يحفظهم.. و كنوع من التغيير.. الفرحة الي أشوفها في وجووههم ما تقدر بثمن.. و مادام أنا انسان مقتدر.. فأهلي أولى إني أعطيهم.. صحيح و لا كلامي غلط؟
إذا تريدون تفرحون أي حد.. ابدوا بأهلكم و أقاربكم.. هم أولى الناس...

في هذي المرة..بعد مشاورات و مداولات مطولة بدأت منذ الصيف و سافرت لبريطانيا و المداولات بعدها شغالة.. لكني وضعت حد لعملية السلام.. قصدي لهذه المداولات و عزمت على شراء تلفزيون يديد.. لا تتحروني أشجع على الفساد..بس للعلم في بيتنا ما حد يطالع مسلسلات..و لا كلام فاضي .. اللهم رسوم(بوكيمون حق أخوي الصغير) و أخبار.. و على فكرة ترى آخر تلفزيون اشتريناه كان من 11 سنة.. هذا أجدد تلفزين في البيت:) و الحين شيب و بدا يخرف و الوالد كان معارض ..فاستخدمت حق الفيتو و اشتريت واحد.. خاصة إنه اخواني يو يتشكون لأنه الوالد مدمن...... هي نعم مدمن.. بس لا يروح بالكم بعيد.. الوالد مدمن على شي اسمه قناة الجزيرة:).. 24 ساعة و هو مجابل التلفزيون الأثري.. حاط على الجزيرة.. يموت في شي اسمه أخبار ما أدري ليش.. على كيفه بس المصيبه إنه حاط التلفزيون في الصالة بين الغرف و الدنيا امتحانات.. قأقنعته بعد جهد جهيد بشراء تلفزيون يدي علشن يحطه في الميلس و يسوف على كيفه.. و الحمدلله اشترينا تلفزيون سوني 29 بوصة.. يملا العين:)

http://www.harrythecat.com/graphics/k/tv2.gif
بعد ما اشترينا التلفزيون.. قالت الوالدة.. يبالنا طاولة علشان نحط التلفزيون عليه.. سرنا ندور و ندور و ندور و ندور في محلات المفروشات في أبوظبي كلها.. و ما حصلناه إلا في مكان....
تريدون تعرفونه؟ تريوا المقال الياي بعنوان (غشاشين... عيني عينك!!)


تحياتي
م.م

[سردال]

في البيت عندنا كل واحد عنده تلفيزون وأنا أسميه تلفعيون! :)

كل واحد يشوف اللي يريده في غرفته وما له أي شغل بغيره! إلا أنا اللي مسوي حرب على التلفيزيون ومنعته من دخوله إلى الغرفة منعاً باتاً.

والشياب يحبون الأخبار وكذلك أبوي، اللي أتابع وياه الأخبار من قبيل المجاملة :) عشان ما يزعل علي ويقول أنته ما تجلس معاي :)

[النابغة الطائي]

للأهل لها طعم خاص ..بغض النظر عن نوعيتها ..

مدردش ..للتنبيه .. البوكيمون التي ذكرتها خطرة جداً .. وأذكر أنني قرأت مقالة للأخ فارس الفرسان عنها ..علك تبحث عنها في مواضيع فارس الفرسان .. وهو جديد ..

[مدردش متقاعد]

ما أحب أشوف التلفزيون.. أللهم بعض البرامج المفيدة قي قناة الجزيرة.. و إذا في مباريات نتسلى فيها.. هذا طبعا يوم أكون في بريطانيا بس.. أما يوم أكون في الامارات..
و لا حتى أقرب صوبه.. جدولي مزحوم.. حتى النت ما ألاقي فرصة أدش فيه:)
دروس العلم و المشاويرمع الأهل(كد على أصوله)..و شوفة الشباب الطيبين أمثالك..ما تخليلي وقت:)

شكرا لك على المشاركة

[مدردش متقاعد]

هدايا الأهل لها طعم خاص.. و خاصة يوم تكون جاي من السفر:)

و الله عن البوكيمون.. أوافقك الرأي.. بس مش ذيك الخطورة.. اللهم رسوم و السلام.. لو شيكنا جميع الرسوم الي يشوفونها الأطفال لحصلنا سلبيات وايدة..و الله المستعان:)

ها قولي شو ناوي تعطيني هدية؟:)

[aziz2000]

ماشاء الله ..

تلفزيون 29 بوصة ..:)

هذا تلفزيون عميان ..:)

ماشاء الله تبارك الله ..:)

أنا في البيت إللي مدمن قناة الجزيرة ..:)

على فكرة .. في كل كورنر فيه تلفزيون ..:)

.
.
.

بس الهدية لها وقع جميل على من تُهدي إليه .. فما بالك بأهلك ؟؟ ..:)

.
.
.

بس خلني مع سردال شوي ..

تلف عيون ( تلفعيون ) .. كانت جدتي الله يرحمها تسميه كذا .. :)

ماشاء الله .. توارد خواطر بين جدتي و سردال .. :p

تحياتي للمدردش ..:)

[سردال]

عزيز: الله يرحها رحمة واسعة، توارد خواطر عجيب! :) صراحة هو تلف عيون فعلاً، بس اقترب منه وخل بينك وبينه متر بس أو مترين وبحلق فيه ساعات ويصير لك نظارة سمييييييييييكة :)

[سعودية]

ما شاء الله تبارك الله ولد بار الله يحفظك ويبارك فيك ويخليك لعين ترجيك " دعوة بريداوية " :)

مبارك عليكم التلفزيون وتكسرونه بالعافية :)
" مصطلح بريداوي للجديد " :)

أخوي لو سمحت تعزم الوالد متقاعد أبو مدردش علشان يجلس مع المدمن اللي عندي " ابو شيطوني " :9
مدمن الجزيرة وال ann والمنار وكل اللي يتطاقون في هالتلفزيون :(

إن شاء الله ربي يرزقك بالذرية الصالحة اللي تبر فيك مثل ماانت بار في اهلك بس ما يشترون لك تلفزيون يشترون لك جنجر :)

تحياتي لك :)















سردال حلوة تلف عيون :) بس شاشة الكمبيوتر وش تسميها تلف النظارات بعد :)

[مدردش متقاعد]

غبار طلع مع الموضوع.. وين لاقيته الله يهديك؟:)

ياخي خلينا نفرح بالتلفزيون.. سوني بعد:)

إن شاء الله بس.. يستخدم في الخير.. و كلي أمل في ذلك..


بخليك مع سردال على راحتك:)



تحياتي

[مدردش متقاعد]

كل شيء له إيجابيات و سلبيات.. و و من ذلك جهاز التلفزيون.. المهم هو كيف نوظف استخدامه..إما في الخير أو الشر..
و شو رايك إنت عاد الجزير في أي منهم؟:)


تحياتي