المساعدة يا اهل الخبرة "انا طفرت !!!!!"

[Bold]

السلام عليكم ...
هذا تقريبا اول مشاركة لي عندكم في المندي وطبعا اوجه اعجابي الشديد لما وصلتوا له .. ندخل في الموضوع:
انا عندي ماكسيما 98 اول ما طلعتها من الوكاله كانت معاي تمام وتسكر 250 على الخط .. بعد فتره اخذها الوالد وتمت معاه حوالي 7 شهور "باختصار كربنت" وبعدها اخذتها واكتشفت الحقيقة المره , اصبحت ما تنزل إلى 230 بصعوبة .. وعندما اضغط عليها تطلع دخان ابيض من العادم .. المهم في الموضوع اني اعرف علاج هذه المشكله .. ولكن المشكله التي تؤرقني ان الموضوع طول جدا .. انا كل اسبوع اضرب خط من العين لابوظبي والعكس .. واقل سرعة لي 180 ودايما اضغط عليها لاضيع الكربون .. وانا على هالحال لي حوالي 11 شهر!!!!!! .. معقوله الكربون يتم كل هالفتره المخيفة .. اعطونا الحل الله يخليكم لاني شوي وبحرق السيارة من كثر ما خطفت عني سيايير على الخط !!!!! :(

[أبو نايف]

اولا احب ارحب فيك اخوي Bold معانا في المنتدى

فحللت اهلا ووطئت سهلا ...:)

وبرضو ارحب فيك كعضو جديد في حزب الماكسيما.....وينك ياfist
ماترحب في الرجال...!!!!


مشكلة الماكسيما حقتك غريبه ....المفروض ان الكربون طاير من زمان.



طيب اخوي....عندي لك سؤال لما تدخل يدك في الشكمان وتمسح داخل باصبعك.......ماهو اللون اللي بيظهر على الاصبع..


اذا كان اسود فهو لازال كربون:::(


واذا ماهو اسود................بيعقد الحزب اجتماع ويناقش مشكلتك وبنشوف لها حل ان شاء الله

[مسيطر]

====================================

وبرضو ارحب فيك كعضو جديد في حزب الماكسيما.....وينك ياfist
ماترحب في الرجال...!!!!

===============================================

[أبو نايف]

يا Bold

حبيت بس اعرفك على الاخ الفاضي


الاخ الفاضي هو مستشار الحزب .......:)


والاعضاء هم.. fist ...مزمز....اوهايو.....بوجاتي.....ابو نايف



من باقي بعد؟؟؟؟





لا كون نسيت احد بس.....اعذروني على النسيان..:(

[مسيطر]

بس حبيت أذكرك إن عندي مكسيما2001



مشاء الله تبارك الله,,,,
_____________________

[CL55-AMG]

اه قريت هالكلام يا S8؟

وانشاء الله عرفت ليش موقع نيسات يكتب ان سرعة الماكسيما 230 كلم\س؟

هاه ايهما طلع ادق كلام اوكاله والا كلام تجاربك الحلوه؟

[E55]

أول شي

يا هلا ومرحبا فيك في منتدى سوالف وإن شاء الله تستمر ويانا

مب تحل مشكلتك وبعدها ما نشوفك :):)

في البداية

شيل سالفة الكربون من راسك ، لأنك ماشاء الله تبارك الله طلعت كربون سنة جدام :)

ممكن أعرف سيارتك جير عادي ولا أوتوماتيك ؟

ولو إني ما أظن الجير أوتوماتيك ممكن يوصل 250

بدلت التواير واستخدمت نفس النوع ولا نوع ثاني ؟ نفس القياس ؟؟

السيارة تعرضت لأي حادث من قبل ؟


بصراحة أسئلة كثيرة ممكن منها نطلع لك سبب المشكلة

[Bold]

اولا اشكركم على استقبالكم الحار لي :)
بالنسبة للاوكزوزست فعليه شوي سواد ومافي صرفية زيت "قدامها زمن لسا" جير عادي وكانت فعلا تنزل 250 وللدقة 255 لكن !!!!
المهم انا اغيرلها البلاكات كل 20 الف كلم والزيت احط موبيل 1 اللي يتبدل كل 10000 كلم وابدله كل 6000 او 7500 كلم باختصار ابدل كل شىء قبل ما ينتهى عمره بفتره .. فلتر البترول صرت مغيره 4 مرات والسيور بدلتها والتواير نفس اللي من الوكاله "Bridgeston botenza" وما حصل معاي اي حادث والحمد لله .. عرضت المشكله على الشباب وفي اللي قالي حط السائل اللي ينظف الانجكترات واللي ينصب مع البترول وفي اللي قالي اصرف نظر عن هذا الاقتراح .. وفي اللي قالي اني اطول على الزيت وان حكاية الموبيل ال 10000 كلام فاضي واحسنلي احط ابو 5000 واغيره كل 3000 !!!!!!!!!!
ما اعرف شو السالفة فعلا احترت .. واخاف مرور العين ينجع الخيانة ويرفض ترخيصها بعد ما طبقو النظام الجديد لترخيص السيارات وصاروا يوضعو جهاز على الوكزوست لفحص الغازات !!!
المهم شو رايكم في الاقتراحين اللي انعرضوا علي ؟وهل في شي غلط انا اسويه ؟
على فكره انا خطفت عن شبح 97 خط "ايام العز :("

[NFS]

الصراحة حالة غريبة و ألي أعرفه أن أداء السيارة يتحسن مع الوقت مب العكس!؟!؟!؟

زين أداء السيارة يتغير لما تغير نوع البنزين؟ يعني لما تحط ممتاز تلاقي تحسن في الأداء والا لا؟ "عندنا في السعودية نوع واحد من البنزين ما أدري أيش يطلع هل هو عادي ولا ممتاز وبس حبيت أعرف هل له أي تأثير على الأداء؟"

[Bold]

والله يا NFS الموضوع حيرني حتى الوكاله ما عرفت حل على العموم انا انشاء الله رايح العين يوم السبت اشوف لها حل!!
بالنسبة للبترول في ابوظبي والعين في ثلاث انواع ممتاز وخصوصي واخضر .. الخصوصي هو للسيارات الجديده او باختصار لجميع الناس , الممتاز لليبي الارخص , اما الاخضر هو الخالي من الرصاص سعره 4.2 درهم للجالون وقالولي شباب جربوه انه فعلا يؤثر على اداء السيارة للاحسن لكن المشكله انه لو حطيته مش ممكن تغير عنه لانك لو غيرت بتخرب الصبابات وبتتبهدل , على فكره في دبي في 4 انواع !!!

[CL-Class]

عزيزي BOLD...
هل ركبت زوائد واكسسوارات خارجية للسيارة ؟؟
اذا كانت الاجابة .. لا
أتوقع وبشكل كبير ان المشكلة في عناصر ناقل الحركة ... سواء القير أو الدفرنس .... المهم شيكها مضبوط وردلي خبر ....

[Bold]

مشكور وايد يا شباب ما قصرتم معاي .. اعتقد ان المشكله على الاغلب في الجير مثل ما قلت يا CL-Class وانشاء الله بشوفه

[fist302]

احم احم.....انتباه..::
الأمين العام لحزب الماكسيمات يتحدث....
أولا:
مرحبا بالعضو الجديد Bold
ثانيا:
يسعدني انضمامك الى حزبنا الموقر وانا أرشح تعينك كمستشار قانوني...:)
ثالثا:
يعين كل من أبو نايف كذراع أيمين لي
والأخ أوهايو الذراع الأيسر
كما يعين الفاضي كمرجع علمي لحل القضايا الخاصة بحزبنا.
الأح مزمز سيعين كمندوب دعاية للحزب
والأخ بوجاتي كجاسوس أمني.
وعلى من لم يجد اسمه هنا الاتصال بالفاضي للتنسيق .
رابعا:
عزيزي مشكلتك انشاء الله حلها سهل لاتشيل همها......
حاول تشيك على الكلتش..!!! القطعة هذه لو خربت تغيرلك أداء السيارة كليا....وحاول تنظف البخاخات.....وتأكد اذا مافي أحد لعب في كهرباء السيارة........شيك عليها...اذا مااتحسن الحال وديها الشركة.....لهم طرقهم الخاصة في اكتشاف الخرابات.
أنا منتظر اسمع أخبار حلوة
على فكرة يا أعضاء حزبنا أنا أرى انه من الضرورة اننا نتحد في مواجهة الأحزاب الأخرى تراهم شادين حيلهم..
الكورفيتتات بقيادة corrvette the 40th
اللومينا ت بقيادة E55
الهوندات بقيادة كل من NFS &S2000
جميعهم يشكلوا تهديد لنا خلوا بالكم.....انها الحرب اذا...
حبايبي يعلم الله اني شاعر بانضمامي لسوالف زدت عدد اخوتي وحبايبي الغاليين على قلبي ....كلنا اخوة بس مافي مانع من الحروشات الخفيفة والحروب الباردة....:)
تحياتي للجميع

[corvette 40th]

[أبو نايف]

والفاضي وجميع الاعضاء.......................................
..........................................



لا تنسى من ظمن الاحزاب حزبين قويين جدا وهما:

حزب المورسيدس

وحزب البي ام

[Bold]

تسلم يا fist302 .. شكرا للشرف الرفيع اللي منحتهولي بس انا دايما بانقطع من السبت للثلاثاء علشان الجامعة في مدينه ثانيه .. على العموم بالنسبه لمشكلتي فاعتقد فعلا انها في الكلتش لاني اول مره في حياتي اشوف كلتش يشتغل زين لما يسخن!!!!! اول ما اشغل السياره الصبح يطلع صون زنه غريبه لما اوازنه .. وبعد فتره ما يكون عادي .. وديت السياره للوكاله قالولي حرام تغيره الحين في سيارات تمشي عليه 150000 كلم "على فكره انا شاري السياره من وكالة البريمي وما ادراك ما وكاله البريمي " وطلعولي اشياء تافهة علشان اغيرها .. ويوم قلتله على سالفتي قال اساسا انا ما سمعت عن ماكسيما تسكر اكثر من 230!!!!!!
على العموم انا رايح اشوف السالفة هالاسبوع وربنا يوفقني واحلها .. وشكرا لجميع الشباب على الهتمام

[LS430]

مرحبا بك يا خوي Bold

ويا هلا بك بين أخوانك..

بخصوص مشكلة التجديد في مرور العين

يا حبيبي روح مرور (( الوجن )) ولا (( الهير ))

بيجددون لك الملكيه بدون هالحشره كلها.

[CL-Class]

صباح الخير يا fist .....
الرجال شبع من شكواه .. ويوم جينا نفزع تقوله انتبه من الأحزاب الثانية ...؟؟ والله كلام عجيب ....طيب انت مشغول الله يعينك ... وين ربعك الماكسات ..؟؟