سوالف للجميع
(http://www.swalif.com/forum/index.php)
- ســـوالف الأصــدقـاء العامـــة
(http://www.swalif.com/forum/forumdisplay.php?f=41)
- - ( من سوالف امـــــــــــــــــــاية...)
(http://www.swalif.com/forum/showthread.php?t=232373)
( من سوالف امـــــــــــــــــــاية...)
السلام عليكم ورحمة الله وبركاته أحس إني من زمان ما نزلت موضوع .... :Sad2: البارحة تولفنا ( يعني تجمعنا ) ترجمة خاصة حق خواني السعودييين :) في بيت أماية ... أنا وخواتي الأربع.... أحب فأمي إنها ومهما كبرنا نحس فوجودها قد شو نحن صغار .. شخصيا أحس بعمري أصغر وحدة فخواتي ... مع إني أكبر وحدة.... :D يلسنا معاها فحجرتها.. هدوء حجرة أمي غريب... أحس إني في جزء ثاني منفصل عن العالم الخارجي ... كوكب خاص له نظامه الخاص .. وجوه الخاص... ( والله صدق ) انزين أنا كنت شوي فيني حماس وأريد أسمع سوالف قوية ... يعني خارج الوجود الإنساني وخارج التصور البشري.. وأمي ماشالله عليها موسوعة تبارك الله قصص وحكايات أغرب من الخيال .. وبيني وبينكم ( حرمة أخوي كانت يالسة وحبيت أخوفها ) لنها تخاف من سوالف الين والسحر والمشعوذين :D ( أنا مب شريرة .. فيني شر شوي بس.... المهم .. قمت أنكش فأمي مثل ما ينكش الواحد الجرح.. أبا اوصلها انها تحكيلنا عن سوالف عالم الجن والسحر .. لني إذا قلت لها مباشرة _ امييييييييييييييييه قولي لنا سوالف عن الين ( ما بتعرف سبحان الله وبتم تفكر ) بس لما تبدا بروحها تتفتح قريحتها وذاكرتها عدل .... وتي السالفة تير إختها أول قصة مت عليها من الضحك .. ( القطوة والشاب ) من الزمان القديم .. عاشت عايلة .. وعندهم ولد صغير .. ويت قطوة وعاشت معهم لين كبر الولد وصار شاب ... يعني مرت سنين وسنين والقطوة معاهم تاكل من أكلهم وتتبعهم وتسير وياهم كل مكان .... يعني صارت منهم وفيهم في يوم من الأيام.. راح الشاب يحش .. ( يحش يعني ما يحش في الناس .. :D ) يحش يعني يقطع عشب للهوش ولغنم.... وهو منهمك فشغله .. سمع صوت يقوله :( قصيدة بالعامية ) يا حشاش السيب ولِعبلي قول لمي تيني بعيلي تيب الطاق والطربال والير بو لعسلي لمي: يعني قول حق أمي .. تيني : تأتي .. بعيلي : بعجل وبسرعة تيب : تُحضر معاها وهي قادمة ... الير : الجرة .. بو لعسلي : فيها عسل. الباجي ماعرف ما سألت عن المعاني .. بس ينفهم من سياق القصيدة المهم... الشاب سمع هالكلام واستغرب بس ما عطى الموضوع أهمية ... عند الظهر .. يالس يتغدى ويا هله.. والقطوة يالسة على صوب .. فتذكر الشاب وكان يقول : _ هي صدق ما خبرتكم... اليوم الصبح ونا يالس أحش سمعت صوت يقولي: يا حشاش السيب ولعبلي قول لمي تيني بعيلي تيب الطاق والطربال والير بو لعسلي ويوم سمعت هالقطوة الكلام .. قالت له: _ وفيك العمى عن تقولي هالكلام من الصبح.... !! وقامت وطلعت من البيت سيدة لا كلام ولا سلام .... وعقب ماحد شافها..! عاد أنا وخواتي مستغربين.. سألتها أنا _ إنزين اماية يعني القطورة رمستهم صدق..؟ قالت لي : _ هي.. لن القطوة أصلا كانت ( ينية ) _ انزين اماية .. وشو ها لي سمعه الشاب خلا القطورة تعصب وتطلع عن طورها..! والسالفة طلعت شو يا جماعة الخير.. لي سمعه الشاب كان من بنت القطوة .. وهي في حالة وضع وولادة وتبا أمها تيها بأسرع وقت.. والشاب نسى يخبر وتذكر وقت الظهر... عصبت القطوة منهم وتركتهم وراحت لبنتها.. عاد بعدين بخبركم السالفة الثانية .... :o |
البارحة تولفنا ( يعني تجمعنا ) ترجمة خاصة حق خواني السعودييين
هههههههههههههههههههههههههه حلوووه تسلمي زهره علي الموضوع السوالف اصراحه مرره حلووه تسلمي يارب |
أختي زهره الله يحفظلك والدتك ويطول بعمرها اللهم آمين. الحقيقه قصص الوالدين جميله دائماً ، بس عتبي عليكِ كان قلتي للوالده عن قصص أخوك أبو محمد عن الجن والأشباح :D :D يمكن تصلحلها السوالف وتعطيكي كم سالفه نستفيد منها بمنتدانا. على العموم قصص جميله جداً وسلامي الحار للوالده العزيزه حفظها الله ورعاها. |
وعليكم السلام ورحمة الله وبركاته
حياك الله اختي زهرة ..
وحفظ الله الوالدة وآطال الله في عمرها .. تسلمي اختي على هذه القصة .. وحقيقة ملاحظ تشابه قصص الجن في المنطقة وتشابه بعض الاعتقادات ومنها الاعتقاد بأن القطط التي تعيش في المنازل بعض منها من الجن وهناك قصص كثيرة سمعناها تتشابه بهذا الاعتقاد ... شكراً على هذه القصة وننتظر باقي القصص :) |
هلا بصاحب القلم الذهبي ...
شو أسويي يا أحمد.... لازم إذا بنكتم باللهجة الإماراتية نسو ترجمة ...) لنها يايتني قرصة من هالسالفة ) قلت توبة .. غير أحط الترجمة.... لأن معظم خواتي واخواني السعوديين ما يفهمون بعض الكلمات ... ونحن بعد ما بنفهم عليهم عدل إذا بيكتبون بلهجتهم السعودية الجميلة... ويسلم لي مرورك وتعليقك .. |
مرحبتين أخوي بو محمد...
ويحفظلك اهلك .. ويعطيهم الصحة والعافية.. ..... سوالفك انت غير عن سوالف أماية... ما بتتقبلها أعرفها.....(: وان شالله يوصل سلامك.... شكرا لك |
مرحبا أخوي الطارق.....
انا شخصيا ماحب القطط... ولا أحب الحيوانات بشكل عام.... وأخاف منها خاصة في الليل.... لأن كل حيوان بالنسبة لي وراه مصيبة....! يعني مرة أتذكر.. في بيت أمي.. طلعت أيب شي من برع في الليل... ووقفت مادري شو أسويي ويوم رفعت راسي شفت قطوة تطالعني وعيونها خضر... من الخوف ( ردة فعلي كانت غريبة ) المفروض أشرد.. بس تميت أطالعها وهي تطالعني بغيتها تكسر عينها عني ما رمت... .... تجمدت مكاني من الخوف! القطوة اعتقد إني غمضتها وصعبت عليها يوم شافتني واقفة بدون حركة.. قالت هاي ما منها فايدة أسير احسن..... فتركتني وراحت |
صحيح قصص مثيره وغريبه <<< فلم اكشن ذا :D
بس اذا تبين الصحيح مااحب هالسوالف بالمره :help: يعني تسبب تصلب في الشرايين :D + ارتجاج في المخ مع شوية خوف :damp: :D تسلمين اختي زهره والله يحفظ لك الوالده وكل ماهو غالي عليك .. وننتظر السالفه الثانيه بدون افلام مرعبه :D :D |
بسم الله ... :mad: خوفتيــني :shock2: قمت اقرا المعوذات.. :D ياحبيلك انتي وامك سلمي عليها كثير السلام :shock2: بس لا هنتي وصليلها لا تسولف عن اشياء بسم الله علينا :shock2: تسلك ايدينك ننتظر جديدك.. :) |
إقتباس:
إبداع أنا يوم أسمع مثل هاي السوالف أحس إن الأدرينالين طول الوقت متحفز فجسمي ... والأمور تكون مثيرة وحماسية لأن هاي الأمور الغيبية . بالفعل تشد المشاعر والأحاسيس ... خاطري أشوف يني غير عن لي شفته ذيج المرة... بس ما يكون شين.. إذا بيطلع لي شين مابا أشوفه :o |
إقتباس:
مملوحة ... أستأجرت فيج خليتج تقرين المعوذات.... :D بس سوالف اماية وايد وايد متنوعة وحلوة.. حتى أنا أفكر جديا اسويلها كتاب ... بس متى عاد ....أفضى.. :o |
انزيييييييييييين
نروح للسالفة الثانية ... ( الجنية والشباب لثنينه )  يقولكم يا جماعة الخير كان فيه شباب اثنينه راقدين في الوادي ... ( والينية ) سارحة .. ( يعني طالعة فشغل ) تغزل ( أكيد الغزل عارفينه.. غزل شغل الإيد مب النوع الثاني الله يبعدنا عنه .... :45: .. وتوايج عليهم ( يعني تطالعم كل شوي ) .. وعلى راس الوادي سيل .. فهي خافت عليهم وحبت تنبهم فقالت: ( بعد قصيدة بالعامية .. السيل ضحــــــــــــــــضاح والبرق لواح خوفي على الشبان من موج لبطاح فلما سمع الشباب لثنينه هذا الكلام .. على طول ركض ويشردون من الوادي.. وعلى طلعتهم ... مر السيل وشل معاه كل شي.. يعني أنقذتهم .. بعدين بخبركم السالفة الثالثة.............................. |
إقتباس:
هههههههههههه تم في هذه الجمله انواع الضحك :laugh: :laugh: :laugh: :laugh: :laugh: بالنسبه للسالفه الثانيه الحقيقه فيها الخير جاتهم بالسياسه :damp: :D إقتباس:
ننتظر السالفه على احر من الجمر :D ( معليش إبداع.. غلطة من لي خابرهم عن إختك ونا إختك....... تتذكر غلطة المبتسم .. شراتها.. كنت بقتبس .. أثري داشة أغير الموضوع.... بس الله سلم.... ما جست حرف من كلامك .. حتى شوف بنفسكـ....... :OO: |
تسلمي اختي زهرة .. والله هذه الجنية ( الينيه ) بنت حلال :) (( فقالت: ( بعد قصيدة بالعامية .. السيل ضحــــــــــــــــضاح والبرق لواح خوفي على الشبان من موج لبطاح )) يعجبني في القصص الشعبية لأباءنا وأجددانا ذوقهم الأدبي حتى في قصصهم الخيالية :) ننتظر السالفة الثالثة أختي الكريمة .. |
إقتباس:
هي والله أخوي الطارق.. ماشالله عليهم .. وزن وقافية وكل شي عندهم بترتيب ونظام..... :) |
قصص حلوهـ ..
حتى لو إنها عن الجن .. بس ممتعه  ..يلاا يازهرتنا منتظرينك  .. |
إقتباس:
ههههههههههههههههه انا مت من الضحك ابوموت والله وش اللي صار :laugh: :laugh: :laugh: :laugh: :laugh: :laugh: على طول تذكرت سالفة المبتسم :laugh: :laugh: :laugh: :laugh: وفيه احد يقدر ينسى ذا الموقف :laugh: :laugh: :laugh: تبين الصحيح مت من الضحك ولايهمك حتى لو غيرتي في ردي الرد وصاحب الرد تحت امرك يالغاليه :laugh: :laugh: :laugh: :laugh: انا ذا الحين ابضحك الى مالانهايه :laugh: :laugh: :laugh: |
هلا روزي
تسلمين الغلا ..... ان شالله بنزل الثالثة بس ضيعت لورقة لي كاتبة فيها ملاحظاتي عن القصص..! إبداع.. اضحك الله سنك......... (: |
ياحليلها والله طيبه... :D تسلم الايادي :) |
الظاهر بنفتح قسم للحزاوي ... حزاوي أم الزهور
وبعدين إنت وإبداع صايرين دكاترة ... تصلب شرايين وادرنالين ومخ ومخيخ سوالف وايد حلوه الله يحفظ أمايه ويبارك فيها أقول زهورة رجعتي لسوالفج ... وما بغيتي تسوينها هذي المرة إلا في مبدعنا بنثبت الموضوع في انتظار باقي سوالفج الحلوة ... الله لا يحرمنا منج |
إقتباس:
عيونج الاحلى يا مملوحة (( مملوحة يعني + ملح :D |
الله بشورة شو هالنك نيم الخطير ( أم الزهور ) بصراحة عيبني آخر شي.... احس كان الزهور تتفجر حولي وحوالي شرات الفوشار ....( عاد انتي لا تعلقين على الموضوع ...... أنا تعرفين شو مشكلتي .. وايد مستعيلة.... يعني بكتب الرد ما براجعه .. يوم اسير اقراه أحصل عمري مهببة تهبيب وبرجع وبعدله وبعد ما براجعه سيدة اطرشه وأحصل إني بعد مهببة فيه تهبيب..... وهكذا دواليك...... |
اختي زهرة كلمات بزااااف لم افهمها ولكن المجمل فهمت بس انا على قولتك انت وابداع هالقصص بتسوي فيني اللي قلتوه
وتبين الصراحة اخاف منها خوف شكرا لك زهرة والله انت ام الزهور اختك فوزية |
ولكوا شو هالسيرة هاي جن وعفاريت
 .... يا زهرة في ناس قلوبهم ضعيفة ما بتستحمل زي ابداع هيك  ثانكس ع القصص الحلوة مع اني ما فهمت كتير من التفاصيل بسبب اللهجة مع انه في ترجمة  بس عندي سؤال هل هالقصص حقيقية ولا خيال !! |
ههههههه
السوالف قامده اوي يابوشريك :D ولازم اخاف :black: وينك يا ام الزهور :Sad2: |
| الساعة الآن » 07:51 AM. |
Powered by: vBulletin Version 3.0.16
Copyright ©2000 - 2024, Jelsoft Enterprises Ltd.