شخصيات الحلقه: سنفور:البطل..

ولد ناس مليان احساس………من البيت للجامعه.(سنه اولى)

ابومخروش
صاحب كابريس 1979 عربجي……… في اواخر العشرينات….المؤهل الدراسي رابعه ابتدائي(ليلي)
عليه ثلاث سوابق….. انتين مضاربات….ووحده ترويج ممنوعات(طراطيع اطفال)

شرطي غير مثقف:
....برتبة جندي...المؤهل رابعه ابتدائي (ليلي)


............................................................


سنفور مفتون في اللكزس حقته الجي اس 2001 شاريها تقصيد....... على كفالة ولد عمته...

يغسلها كل يومين مره وبنفسه والكفرات بالستوب كل فجريه يدعكها قبل مايروح للجامعه
يتمشى ويدور دايم في السويدي (احد احياء الرياض) رغم انف المطبات...

مره من المرات كان يتمشى عليها ويتبختر فيها في شوارع السويدي …………يدخل في شارع ويطلع من شارع......يدخل في حاره ويطلع من حاره....
كأنه مالك الدنيا كلها

وفجأه………………..
جاه كابرس تسعاوي ابيض... مشبوه... مغبر... له شهر ما لمسته المويه...... صاحب الكابرس (ابومخروش) داق اللطمه رغم ان الجو حار……..ومشغل شريط لفهد بن سعيد …………المراتب مخرقه من السجائر….طبيعي ...يطفي السيجاره بالمرتبه...

المهم…….ابومخروش ماهو منتبه……….وصدم اللكزس من الخلف
الصدمه خفيفه …..لان ابو مخروش كان مهدي……بس عند سنفور كأن الصدمه في قلبه.
نزل سنفور من اللكزس مذهول .....…..يمشي الهوينا وعينه اليسرى تناظر صدام اللكزس الممخوش(محكوك)....والبويه اللي طايره منه
وعينه اليمنى تناظر سواق الكابرس (ابو مخروش)

وقف سنفور بعيد شويه واستجمع قوته.... ودار بينهم الحوار التالي:

سنفور: سلام عليكم....…..ياالشيخ والله مالك حق…...… ليش صدمتني.

ابومخروش: ماعليش يابو الشباب……….اسفين.


أحس سنفوران موقفه قوي شويه………..وشدد لهجته شويه:

سنفور: اسفين………!!!!وين اصرفها هذي…….يااخي ما تشوف صدام اللكزس محكوك.

ابومخروش: اقول لاتزودها……..ولا تطولها وهي قصيره…………احمد ربك مادخلت الصدام كله عليك.
سنفور: ايش…..تدري اني لازم ارش بوية الصدام كله هذه لولو
على بالك يعني.......................
بوية …كابر…..قصدي كورولا 1979 ……..والله بتكلفني……أكثر من مكافأة الجامعه..


ابو مخروش: والله اني رحمتك……….ماعليش تراها بسيطه وانا مامعي الا عشره ريال ابعبي فيهن بنزين.
يعني بالعربي………اطلع من مخي ….وضف وجهك.

سنفور: لا ............ابغى ننتظر الدوريه.

ابو مخروش: صحيح ان الوراعين ما ينعطون وجه…………..أقول طلع سيارتك من قدامي والا ابى انتفها بصدام التسعاوي اخليك تبيع سيارتك تشليح .

ابو مخروش شغل سيارته وحط القير على D

سنفور راح يركض لسيارته ……يبغى يسلم عليها وعلى عمره………يبي يشغلها وينحاش.…..وسبحان الله في نفس اللحظه وقفت عندهم دوريه (صابونه)……

..استانس سنفور ونفش ريشه ونزل – ياسلام جاني الفرج -……نزل الشرطي

الغير مثقف ………..ايش فيكم.

وش المشكله………

سنفور: ياطويل العمر صدمني من الخلف واظنه والله متعمد…..شكله غيران من سيارتي……..تصدق!!!

ابومخروش: يا ابن الحلال والله مادريت عنه ولا جبت خبره هو اللي طلع قدامي.

الشرطي الغير مثقف: ها الحين موقف شارع كامل عشان حكه في الصدام يا…….

سنفور: أي شارع كامل …….هذا شارع وسط حاره ياطويل العمر………….وبعدين انا ابغى تعويض……لاني لازم اضرب الصدام كله بويه جديده………….وهذي لكز……

الشرطي الغير مثقف: بس ولا كلمه………..حرك…….حرك….والا سحبتك للقسم.

أناتوني مباشر حالة دهس……….واللي اندهس تنازلوا اهله عنه…………
وقبل امس شبح داخل في ماصوره………………..والماصوره هي الغلطانه….واقفه في نصف الطريق
وما طالب صاحب الشبح بتعويض.........
وانت تبغى تعويض على حكه بويه في صدام.

انت وين عايش؟؟؟؟؟

الشرطي الغير مثقف لابي مخروش: وانت بعد فتح عيونك جعلها للغمص.
وخلاص اذا صارت الصدمه بسيطه مثل حالتكم ياخي
تسامحوا……………….مو تعطلون الشوارع……حنا ماحنا فاضين لكم…….ياالله نلحق على الحوادث اللي تسوى.

سنفور: اسف ياطويل العمر …..حنا والله متسامحين…..وراكب سيارتي ابي امشي ….بس يوم شفتك قلت يمكن…..لكم راي ثاني…….الله يسلمك.

.سنفور يركب سيارته اللكزس: اسفين ياطوال العمر………………الحمد لله على السلامه.

صحيح أهم شي سلامة يالانسان….

الشرطي الغير مثقف ركب الصابونه وبالمكرفون….تحرك….تحرك……ودعس

:(

لا ياشيخ.... هذا ماهو انت


اسم على اسم


يعني مافيه سنفور غيرك



فيه سنافير كثير