عندي استفسار بالنسبة لمحرك SR20DET هل هو جيل واحد بنفس القوة ؟ والا جاء منه عدة أجيال ؟

هل وضعيته بالطول والا بالعرض ؟

هل هو نفس محرك البولسر ؟

بكم أحصل نص سيارة عليها محرك SR20DET ؟؟




مشكورين

السلام عليكم ورحمة الله وبركاته

M5

ماعندي خلفيه عن هي المكاين وان شاء الله الشباب يفيدونك اكثر بعد.

للرفع
:banana:

أحد ناداني ؟؟

أخوي M5 مكينه الSr20 أسميها أنا مكينه الكرف في نيسان لأنها منتشره في سيارات كثيييييير من نيسان.

بس خلنا نفكك رموز المكينه اللي تتكلم عنها حبه حبه.

SR مكينه أربع سليندر.
20 2 لتر.
D دبل كام.
E بخاخ.
T تيربو واحد.


ذي تجي على شكلين.

شكل طولي (زي في السلفيا)

شكل عرضي (زي في البولسار)

وللجواب على سؤال لك هل أتت جيل واحد بالجواب: "لا"

لأن فيه مليون تصميم للمكينه من نيسان.

وفيه وحده جديده بنفس صفات ذي المكينه بس بنظام معقد وبدون تيربو بس تطلع نفس قوه التيربو تقريبا والا هي SR20VE.

M5
جبتها على الجرح


عندي استفسار بالنسبة لمحرك SR20DET هل هو جيل واحد بنفس القوة ؟ والا جاء منه عدة أجيال ؟

هو عدة اجيال و يختلف من سياره الى سياره

يعني تحصلها على بلوبيرد وارد اليابان قوتها 202 حصان دفع رباعي و المكينه بالعرض و انتركولر صغير فوق المكينه مباشره
و هذي المكينه تعرف باسم SR20DET ورقم الشاصي U12 للموديلات القديمه و U13 حتى موديل 1996 و قوتها اعلى شويه 205 حصان


و تحصلها على البولسار قوتها 227 حصان و دفع رباعي و المكينه بالعرض و انتركولر كبير شوي و فوق المكينه مباشره بس توجد فتحات تبريد في الكبوت و التيربو T28
و هذي تعرف باسم SR20DET و رقم الشاصي N14


اما المكينه بالطول هذي موجوده في السيلفيا

السيلفيا من موديلات 1989 الى 1994 و غطاء المحرك احمر ورقم الشاصي S13 و قوتها 205 حصان و حجم التيربو T25 الاشعال ديلكو الكتروني و حجم البخاخات 370 CC

سيلفيا من موديلات 1995 الى 1998 و غطاء المحرك اسود ورقم الشاصي S14 و قوتها 220 حصان
و جحم التيربو T28 الاشعال ديلكو الكتروني و حجم البخاخات 370 CC

سيلفيا من مافوق 1999 غطاء المحرك اسود ورقم الشاصي S15 و قوتها 250 حصان و حجم التيربو T28 و شغلات كثير تختلف عن الموديل السابق نظام الكهرباء الكتروني بالكامل (كويلات) و الثلاجه اكبر و البخاخات 480 CC


هل هو نفس محرك البولسر ؟

الجواب في الشرح السابق .


بكم أحصل نص سيارة عليها محرك SR20DET ؟؟

هذي تسأل فيها اهل الامارات و اللي اعرفه انها قليله في الامارات اتكلم عن البولسر اما السيلفيا ما عندي خلفيه عن توفرها في الامارات.


و اذا تبي تخربها مره وحده
خذ SR20VET قوتها 278 حصان هذي مخصصه للاكستريل وارد اليابان و رقم الشاصي T30

و عندك محركات من فئه SR قوتها ممتازه
SR20VE على البريميرا وارد اليابان رقم الشاصي P11 قوتها 190 حصان مع جير 6 غيار CVT لون المحرك ازرق (من 1997 الى 2001)

SR20VE بريميرا وارد اليابان رقم الشاصي p12 قوتها 204 حصان و جير 6 غيار CVT و لون المحرك احمر و اسود من 2002 و فوق.

SR16VE بولسار وراد اليابان رقم الشاصي N15 موديلات 1997 و مافوق
المحرك غطاء ازرق قوته 175 حصان
المحرك غطاء احمر قوته 200 حصان


ادري شكلك احترت من كثرهم

باقي عليك الاختيار.

خبير الSR20 الملقب بانفنتي قد أفتى و دحر جميع الخزعبلات.

وانت اللي تلقب نفسك بانفنتي رد على جوالك لأهكر عليك الحين :anger:

grandv8

وعليكم السلام وحمة الله وبركاته

اشكرك على مرورك الكريم


King 4x4

مشكور يالحبيب .. واللي أدور عليه عليه أنا محرك أربع سلندر بالطول توربو .. والظاهر اني لقيته
وتسلم على الشرح الوافي .. ولو تعرف أنا وش ناوي عليه بالمحرك ذا كان أخليك تشيل من راسك شيء اسمه باترول ;)



infiniti
شكلي جيت على الجرح بالفعل

الله يعطيك العافية


اقتباس
=====================================================
اما المكينه بالطول هذي موجوده في السيلفيا

سيلفيا من موديلات 1995 الى 1998 و غطاء المحرك اسود ورقم الشاصي S14 و قوتها 220 حصان
و جحم التيربو T28 الاشعال ديلكو الكتروني و حجم البخاخات 370 CC
=====================================================

هذا بالضبط اللي أدور عليه .. ويقولوا تحصل في تشاليح الشارقة نص سيارة ورخيص

يا ترى بكم تقريباً ممكن أحصله ؟ تقريباً يعني من كم الى كم ؟



تحياتي للجميع ،،

M5
يعافيك ربي اخوي

انا نفس حالتك افكر اشتري نص سياره بولسار من الشارقه بس ماني عارف كم الاسعار و كيف اشحنها للسعوديه و الشي اللي مخوفني كيف اقدر اغير برمجه الكمبيوتر عشان يشتغل على بنزين السعوديه انت عارف البنزين عندنا على ما اعتقد 93 ron و اليابان عندهم 100 ron اقدر اشغل المكينه بس الاداء بيكون ضعيف و الديتونيشن احتمال كبير يفجر المكينه و فيه ناس تقول تغير الحساس مال الكرنك و تشتغل المكينه بدون مشاكل !!! و هذي اول مره اسمع فيها عندك اي فكره او حل ؟؟؟

عندك حل أحسن والا هو بخاخات مويه Water Injection وحل مشكله الديتونيشن من البدايه.

طبعا ذا الكلام اذا كانت السياره حقت قومات بس.

مرحبا شباب ..

الحقيقة أنا خبرتي في التوربوهات لسع في بدايتها ..

لذلك أنا أتوقع انه مع محرك الجيل ما قبل الأخير أبو 220 حصان ما راح يكون فيه مشكة مع الديتونيشن .. حتى مع المحرك الجيل الأخير أبو 250 حصان ما راح تكون مشكلة كبيرة خصوصاً اذا كنت تسوق السيارة قيادة عادية ..

لكن لو كان فيه ريس حرش .. بسيطة .. كلها واحد جالون أبو أوكتين عالي للفزعات بس

بس المشكلة اللي راح تواجهني فعلاً في المستقبل هي لما أرفع البوست
خصوصاً اني احتمال ما أغير القازقيت ( قازقيت = وجه الراس )
على العموم كل مشكله ان شاء الله ولها حل

بس الغريب محد سألني عن مشروعي !!

والغريبه أهل الأمارات محد أعطاني وجه !!
الظاهر مو متعودين يطلعوا في البرد

Sr20DE قطع تلغيمها رخيصه نسبيا بس الله الله بالتيربو لا تخليه كبير مره (To4 زين لك).

و النوس لا تقرب منه ما ينفع.

اذا ما كانت القوه كامله تحت رجلك بدون شيء ثاني يحددها فانت عايش.

أخوي الله في الPulsar GTiR تراها مجنونه و شوف مقطع الفيديو حقها ضد فايبر اللي في قسم الفيديو :banana:

مرحبا اخوي M5 ..
والله يالغالي ما عندي فكرة عن اسعار المكينه ..
لكن يا طويل العمر ما ابا اردك ..
بقولك عن اماكن توفر المكينة .. بتحصلها في عجمان .. صناعية عجمان تحديداً ..
اذا وصلت عجمان .. اسأل عن المحطة الكبرى لخدمة السيارات .. الكل يعرفها ..
الصناعية وراها .. هناك في وايد كراجات ومحلات تبيع مكاين .. وخاصة الـ rb

واذا ما لقيت ... تقدر تمر على معارض العوير في دبي .. قسم السيارات الوارده (مقود يمين) ..
هناك بتلقى مواتر رخيصة ونظيفة حيل .. يعني مثلا تويوتا ستارلت بتلقاها بـ 4000 درهم !!
جيتي r32 على 8000 درهم ..!!
لكن المقود يمين .. ولازم تحولها يسار اذا بغيت اتسجلها في مرور أم القيوين .. دبي ما يسجلونها !!
المهم أدري أن ردي ما يتعلق باللي طلبته لكن حبيت أفيدك .. وما بغيت اردك خايب ..

تحياتي وبالتوفيق في مشروعك ..

uae speed

ما قصرت يالحبيب والله يعطيك العافية


King 4x4

محرك البولسر فيه واحد في جده حاطه على صني 98 ومولف لها قير بريميرا .. ويطلع على اللومينات بالراحة ..

لكن أنا اللي يهمني انه يكون المحرك طولي .. عشان وضع كراسي المحرك مهمة جداً ..

المشروع هو تركيب محرك SR20DET على سوزوكي Vitara Sport 4WD باب واحد 97 قير عايدي

لك ان تتخيل امكانيات السيارة في الطعوس مع وزن خفيف ومحرك SR20DET بلمسات فنية

وفي نفس الوقت تخيل وضع الرانجلرات أصحاب S/C والتويوتا الربع اللي فرحانين بالـ V8 383




مشكورين ،،

عاد على كذا الله لا يهين التيربوات الصغيره اللي تفتح بدري عشان يكون عندك عزم من بدري