ذكريات ويوميات الثانوية!!(1)

[Mr.Saudi]

بسم الله الرحمن الرحيم
السلام عليكم ورحمة الله ..
احببت ان اشارككم في هذا القسم عن يومياتي في الثانوية قبل سنة ونصف تقريبا(قبل التخرج) :)
وحبيت احط لكم كل ذكرياتي على شكل حلقات وكل ماتذكرت سالفة حطيتها بحلقة...
ــــــــــــــ

ذكريات:
إحراج ViP

بما اني طالب مدرسي فانا اقوم خلال فترة العشاء بالاستحمام ومن ثم أقوم بعدها بمراجعة بعض الدروس ومن ثم اقوم بترتيبها على حسب الجدول ومن ثم أخلد إلى النوم... :sleep:

استيقظت في هذا اليوم العصيب متأخراً كالعادة :knight: واكل لقمة خفيفة مثل الريشة!!(ماكن فيه شي غلط بالمثل الشهير؟ :think: ) ومن ثم اطير طيرانا الى المدرسة...
طبعا ابتدأ اليوم العصيب بتأنيب شديد اللهجة وهوشة من المدير على الطاير :ranting:

الحصة الأولى :كيمياء سخيفة<<< ما افهم شي في هذي المادة عشان كذا سخيفة واذا عرف السبب بطل العجب :blink: !!

الحصة الثانية: لااذكر الا انها كانت مادة عربية .

الحصة الثالثة: الحصة المرتقبة حصة دين(تفسير) بدأت بدخول المدرس تملأه الهيبة والوقار والسكينة.
دخل وقال وش الموضوع السابق؟ قالو كذا وكذا!
قال لا لا مستحيل ماهو كذا!

بعدين اخذ كتابي وقعد يشوف الدرس بعدين ارتسمت على وجهه بسمة شريرة !

انا قلت وش فيه استانس؟ :cool: وشذا الضحك :think: ؟

القي طلة عليه بدون مايحس :o
فاذا بالطامة صورة عائلية داخلة بالغلط في الكتاب :cry1:
وانا اللي يسوي نفسه ماشاف شي ولا درا عن شي :sleep: وهو بعدها قام يلفلف بالكتاب يبغاني اشوف الصورة وانا اللي اواصل سياستي ما اعطيه وجه!!

هو انقهر مني اني ماعطيته وجه وكني مادريت عن الموضوع!! :shy:
قام قال يله بسرعة رح جب وسيلة الايضاح من الغرفة الفلانية!!(ياالله ام الاحراج الحين)!! :(
واروح اجيبها بس قهر يوم جيت حط الكتاب على الطاولة يعني قعد يقزز لين طفش!! ويوم شافني جيت قال وجع ورا ماتطق الباب؟؟ :m: :mad:

المهم انا اخذت الموقف بنفسي وقعدت افكر اسال الطلاب فتح الكتاب ولا لا؟؟ قلت لا بيسألوني ليش؟ :eek:

المهم بعدها شققت الصورة الى الابد !! وزال همي بس الحقد في قلبي ماطفى :bomb: ,,,

[افكر كثير]

السلام عليكم ورحمة الله وبركاته


ضحكتني والله .


بس تصدق ما ضحكت من القصه ضحكت من شي ثاني .


عطنا قصتك الثانيه مع مدرس التوحيد هالمره بالله عليك .


افكر كثير

[Mr.Saudi]

شفت الحالة الكسيفة يا أفكر كثير!! :shy:

[سنـاري]

الجميل في هذه الحلقة انها مختصرة و متسلسلة و واضحة المعالم :D

كمان ايش الحب هذا اللي خلاك تحط صورة عائلية وسط الكتاب:think:

اما الحقد اللي في قلبك ما الومك عليه ... خاصة لما تصير المشكلة من شخص يعتبر مثل اعلى و متوقع منه الكثير من الايجابية فيفاجئك بطامة سلبية

معليش حاول تنسى الموقف و تبرد قلبك

و بسبب موضوعك قعدت "افكر كثير" :D بخصوص مواقفي في المدرسة و الجامعة و صراحة فعلا فيه مواقف المفروض تكتب مو في المنتدى و بس لا المفروض تكتب بمداد من الذهب على جدار التاريخ .... حكمة :D

و في مواضيع المفروض تنحذف قبل ما تنزل في المنتدى و فيه كل انواع الحكاوي

بس خلينا في السيارات و الكفرات احسن :D

[Mr.Saudi]

سناري:
انا ماحطيتها والله بالكتاب هي اللي جت شلون ماأدري! :cry1:

ايه الحين كبرنا ونسينا ان شاء الله :smart:

[Abu Omar]

الله يغربل ابليسك - ذكرتني والله بأيام الثانوي :D

أذكر كان عندنا مدرس رياضيات سورى - شرحه ممتاز والصراحة عنده مرره ضمير -

كان اذا عطانا واجب يجي ثاني يوم يمر على واحد واحد يصحح الواجب ويتناقش معه

المهم أنا طبعا كنت من الطلاب المجتهدين - ماشاء الله عليهم - ماعمرهم حلو واجب :D

وكل مره يمر على وأقوله نسيت الواجب :damp:

الحقيقة كان عندي ظروف صعبة أمس :damp:

أففففف ... حليت الواجب بس شوف كيف نسيت الدفتر .. قهر :damp:

إذا مره توهقت ومالقيت حجة أقولها . :shy:

بكل شموخ أرفع -راسي فوق- وبنظرات ثقة جبارة

أقوله ياستاذ : كان عندنا أمس نشاط طلابى و مشارك بالمسرح - بعني المفروض تقدر شوى- :D

وكل يوم بهالحجج - حتى ان وزارة التعليم عرضت على صفقة - درستها بجدية- انهم يشترون منى حجج الكيلو بسبعه ريال ... :D

وذاك اليوم يمر المدرس كالعاده وياخذ دفتر اللي قدامي - كان دافور ماشاء الله عليه-
وهوماسك الدفتر يصححه .. قمت أسولف مع المدرس وأساله أسئله في صميم المنهج -تنم عن عبقريه متناهية- في محاوله يائسة لاثبات انه عندي اثنين جرام فهم :D

المهم ان المدرس قام يتفاعل مع أسئلتي العبقريه ...

طبعا كل الفصل متابع وش يصير .. يتحرون وش الحجة اللي بقولها للمدرس اليوم

ويوم خلص تصحيح الواجب في الدفتر حق خويي اللي قدامي حط الدفتر على ماصتي وقالي أخيرا صرت تحل الواجب .. وراح للي وراي ياخذ دفتره .
وأنا في ذهول :blink:
وفجأه ينفجر الفصل كله يضحك والعالم انقلبوا على ظهورهم وأنا أولهم

ويلتفت المدرس حوله ويسألهم -- شو في ياأولاد ؟؟؟؟

على طول أرد عليه مافي شيء ياستاذ .... هذا بس كان واحد يطيح من كرسيه

والله ومشت عليه :D

طبعا كل المدرسة ذاك اليوم سألوني وشي الأذكار الصباحية اللي أقولها الصبح
يمكن في شيء ناسينه


ابو عبدالله :-)

[Abu Omar]

ولله زمان ...تسع سنوات أو اكثر كانها البارحة - شفتو كيف أعرف أتكلم بالفصحى- :D

تصدقون ياشباب عاد أحلى مرحله كانت مرحلة الثانوي

كان ممنوع بالمدرسة أحد يجيب معه ساندتشات من خارج المقصف حق المدرسة

طبعا سمعتم الحكمة الحكيمة اللي تقول - كل ممنوع مرغوب -

الحكمة هذي كنا نسير على نهجها بالحرف الواحد ولا نحيد عنها أبدا :D

كان حول المدرسة مطاعم كبدة وفلافل- يسمونه صاروخ- - ياعيني من اللي قلبك يحبها - :D

وكل واحد من شلة الانس عليه الدور يوم هو اللي يجيب لنا الصواريخ

اذا رحت للمطعم تلقى امم وأفواج من طلاب المدرسة - المجتهدين طبعا - :D

صافين سرا طويل وراء بعض غاية في النظام والهدوء ماعمرك تلقى مثل هالنظام في أي طابور بالعالم ولا بالمدرسة
والهندي اللي يسوي السانوتش كأنه ملك على عرشه الجميع يحرص على رضاءه لعله يحظى بطحينة زيادة أوشطة أكثر :D

طبعا اليوم اللي يصير علي الدور أجيب فيه الصواريخ تلقاني واقف خلف الامام بالصف الأول بصلاة الفجر أدعو الله أن ييسر لي مهمتي النبيلة وأن يصرف عني أعين مدير الدرسة والوكيل والساده أعضاء التدريس وأن يكفيني شر الدبابيس- الجواسيس-
وعقب الصلاة أنطلق للبيت وقبل لا أطلع أشغل السيارة عشان تسخن بحيث اذا نزلت ماأضيع وقت - ذكاء غير عادي ماشاء الله علي- :D
وبسرعة البرق أغير ثيابي - وقبل لا أنزل تصيدني الوالدة الله يحفظها... وش بلاك مستعجل افطر طيب ولا أصبر شوي خذلك سندويش معك ؟؟ :shy:

الوالدة الله يحفظها إلى يومك هذا كل يوم تقولي خذلك سندويش :shy:
أحاول أقنعها اني تعديت خلاص رابعة ابتدائي ... :shy: يعني صرت كبير ... :shy: بس مافي فايدة :D
المهم طبعا إذا قالت لي كذه ولا الردود جاهزه ..
لا معليش عشان أبمر واحد خوي بيته في أخر بلاد المسلمين :D
لا معليش عشان المدير قرر يصك الباب بدري اليوم :D
لا معليش عشان مفتاح المدرسة معي ومايصير المدرسين يلقون الباب مقفل وينتظروني بالشارع.... :D :D
:D نصـــــــــــــــــــــــاب :D
الغريب اخوي الصغير يناظرني ويرتسم على وجهة ابتسامه صفراء :damp: لها مدلولات مريبة :damp:
ماأدري أحس هوعنده شك في صحة كلامي :damp:


معليش أستطرد كثير بس تحملوني شوي - أجرب الكيبورد حق الاب توب الجديد :D

أرجع أقول عقب ما أشري السانوتشات انطلق بسرعة للمدرسة لان الباب تقريبا في الرمق الأخير والمدير يصكه.
وعاد اتفرج على اللي يصير كل يوم للمتأخرين - وللحديث بقية انشاء الله ..........


اخوكم ابو عبدالله

[Mr.Saudi]

هههه ماشاء الله على الذاكرة يااحمد
والله قصصك طالعة من قلب!

شكرا والله انك اثريت الموضوع :smart:

[Mr.Saudi]

بانتظار ابو عبدالله حبيب الشعب يكمل قصة الطريق الى الصواريخ محفوف بالمخاطر :knight:

[Abu Omar]

هلا اخوي مستر سعودي

الصراحة موضوعك أكثر من رائع... وشدني مررررة.. وشجعني أكتب فيه

وتسلم اخوي على أسلوبك الراقي

اعذروني عندي شغل وما أدخل النت غير ساعات الراحة ...
ياشين إذا صارالـ Boss حقك بالشغل انجليزي ولا ألماني.... يبيك تلف بالمشروع على مدار أربع وعشرين ساعه... :bomb:

المهم ... نرجع للأيام الخوالي ....
والله يالدنيا ..... رغم الزهايمر اللي بدأت اشوف اعراضه بقوة :cry1:

بس أيام الثانوي ماتنسى أبدا بعكس أيام الجامعة- اللي درستها خارج المملكة- ما أذكرغبر أول يوم رحت فيه الجامعة :(

كان معي الوالد -الله يحفظه ويطول بعمره - بذاك اليوم مشغله مترجم عندي :shy:
من يوم دخلنا مع باب الحرم الجامعي وانا ماسك بثيابه مع تحت – تقل بزر- :D
جابلى الاستمارات وسوالي كم شغله ما أذكر.. وجابلي الجدول

يوم نطالع بالجدول .. والوالد يقولي يلا عندك محاضره هالحين... يلا روح المدرج احضر!!!!!
وتغير لوني لجميع الألوان المرئية والغير مرئية .... :damp:
وش دعوة يبا ؟؟ :blink:
ماإتفقنا على كذه ... أنت قلت لي نروح نخلص ورقك ونعرف الجدول ونشوف النظام كيف ..
بس ماقلت تحضر محاضرة ... :sss:

عاد الوالد يناظرني من فوق لتحت .. :mad: يلا عاد خل عنك الدلع .. انت مو رجال .. انت صرت كبير ولازم......
في تلك اللحظة فقط – وأنا أستمع لتلك الكلمات- تذكرت كيف انطلت علي تلك الكلمات المعسولة من قبل...
وهاهو الوالد الله يسامحه يخدعني مبعسول الكلام للمره الثانيه ..

كانت المره الإولى قبل اثنا عشر عاما يوم أدخلني المدرسة لأول مرة في حياتي
نفس الكلام بالضبط يقوله لي اللحين ...... يبا أنا ولدك ليه تسوي فـــــــ.............

وأنا قاعد أتذكر تلك اللحظات وفجأه الوالد يدفعني داخل قاعة مليانه عالم ويصك الباب ورائي ....... :blink:
ومع صكة الباب .. جلست واقف للحظات يمكن ساعات في ذهوووووووووول :blink:

أنا وين هالحين....؟ أنا في أي عالم .....؟ من وين جابوا هالعالم ...؟ انا وش جابني عندهم ..؟ :blink: :damp:

نص المدرج بنااااااااااااااات والنص الثاني فتياااااااااااااااات والنص الثالث شابااااااااات والنص الرابع نساااااااااآت :D
بل حتي المحاضر طلع دكتوره!!! :D

جاء في بالي أن الوالد - ماشاء الله عليه- :D عرف كيف يخليني أحب الجامعة- زي ماضحك علي أول مره يوم دخلني الابتدائية شرالي كوره وزمزية حقت المويه – عشان يحببني في المدرسة
نفس الأسلوب تماما بس مع مراعات فرق السن !!!! :D

المهم هذي كانت أول محاضرة جامعية في حياتي طبعا مافهمت من الدكتورة ولاحرف بكل يساطه لأنها تبرطم انجليزي ... وأنا بالطبع وبصراحة يعني .. كانت ثقافتي هولاندي . :sleep:

ومر أول يوم وأنا في حالة غيبوبة تامة ومرت من بعده ست سنوات مثل الطيف وأنا في تلك الحالة مابين غيبوبة وزهايمر وفقدان للوعي ماكنت أفيق من هالحال إلا حينما تهبط بي الطائرة في أرض الرياض الحبيب ... :eek:

نرجع لأيام الثانوي الجميلة وأكملكم مغامراتي وصولاتي وجولاتي.... :knight:
بس خلوني أعرف أنا كنت في أي جوله كنت أقص عليكم ....

اي تذكرت كنت أقولكم كيف تتم عملية تهريب الصواريخ* إلى داخل المدرسة....
ملاحظة هامة: *الصواريخ جمع صاروخ
والصاروخ هو سندويش الفلافل مع الباذنجان والبيض والطحينة والطماطم والفلل والشطة ... ومكونات فتاكة وشديدة الإنفجار..

وسمي بالصاروخ لتأثيره الجبار ومفعوله القوي على كل النواحي العقلية والهضمية والحسية والداخلية – والمقصود بالداخلية هي تلك الكمية من الغازت والتفاعلات النووية داخل بطنك – :D

وكذلك النواحي الخارجية- والمقصود بالخارجية هي حينما تنطلق تلك الغازات خارج بطنك لتنتشر في أنحاء الفصل في الحصة الثالثة بعد انتهاء الفسحة :D

وأنا أعتقد ان النواحي الخارجية هي السبب الرئيسي لمنع مدير المدرسة من دخول تلك الصواريخ شديدة الدمار داخل المدرسة :D
بس بصراحة ماله حق ... المفروض كنا نبلغ عنه منظمات حقوق الإنسان.. كانو شافولنا حل معه ...

لعي أكملكم – بمشيئه الرحمن – غدا الصبح لان يدي تعبتني والله من الكتابة :shy:

أخوكم أبوعبدالله

[Abu Omar]

ياشباب خلونا نشوف مشاركاتكم وتعليقاتكم

في قسم السيارات إذا حطيت مشاركة أشوف مليون ردعلى طول في ثواني..

نصاب بقوة :D

يلا عاد ولا بروح لأخواي المصرقعين حقين السيارات :ranting:

[Abu Omar]

وش دعوة .. ماعجبكم موضوع الثانوي ..؟؟؟؟؟ :damp:

طيب خلاص ممكن نقلبها ذكريات الابتدائية ولا المتوسط ... :D

حتى لو تبغون ذكراياتي مع الميكانيكية ولا السمكرية ... ممكن نعطيكم

بس تكفون عطونا وجه :cry1:

أنا داري ان الذكريات اللي كتبت فيها مبالغة حبتين ... :D
بس هذا عشان تظبيط الطعم قصدي السالفة ...

يعني مثل الشطه والكاتشب والمايونيز والحركات .......... معليش واحد جواعان :D

خلاص مو لازم ذكريات .. ينفع قصة قصير ؟ إذا مانفع بمشي معكم روايات تاريخية ؟؟

ممكن أشعار إذا جازلكم .. فصحى ونبطي وبنجلاديشي بعد :D

يلا سمعني صوتك ...
عزيزي العضو المحترم
أيوه معاك على الهواء مباشرة ...تفضل شارك معانا من غير خوف ولا تردد ..

خليك ريلاكس ... مافي إحراج إنشاء الله ...
بس شارك ولو إبتسامة زي هذه :ranting:

[سنـاري]

ماشاءالله عليك اخوي احمد هاني

علاقتك قوية بأيام زمان ...

انا اسجل اعجابي فيك و في كتاباتك خفيفة الدم

في الحقيقة الموقف اللي مريت فيها عديدة لكن مافي شيء في بالي حاليا

اول ماراح افتكر أوول