كامل المواصفات لرائعة تويوتا ( افالون ) بالصور

[الشبابي]

السلام عليكم ورحمة الله وبركاته


فوجئنا بما تحمله لنا تويوتا بفرعيه لكزس وتويوتا واكثر ما فاجأني هي الافالون الجديدة فلأول مرة نرى سيارة رخيصةمن تويوتا تحمل كل هذه المواصفات ...

http://www.toyota.com/images/vehicles/avalon/gallery/exterior/photo_1.jpg

نبدأ من المحرك والاداء ..
المحرك سعة 3.5 لتر وبقوة 280 حصان على 6200 دورة و 260 رطل على 4700 دورة ... متصلة بجير ذي 5 سرعات تندفع بالعجلات الامامية الى سرعة 100 خلال حاجز ال 6 ثواني ..
وبالنسبة للشكل الخارجي فالسيارة مزودة بانوار زينون امامية وبجناح خلفي ليحقق انسيابية جيدة جدا 29. cd وقد تم دمج الاريال الخلفي في الزجاج الخلفي .. وتاتي السيارة بمرايات خارجية مدفأة و بخاصية الاوتو دمنق وكذلك الداخلية ...
ونجد مخرجين للاكزهوست في الخلف ... وتأتي السيارة بجنوط مقاس 17 بعجلات 215 / 55 / 17 ..


من الداخل ..
السيارة مزودة بمسجل من نوع JBL Synthesis بست سيديز و 12 سماعة بقوة 350 واط ..
وبشاشة ونافيجيشن بالصوت وحساس مطر وذاكرة للسواق والراكب وتسخين للمقاعد الامامية و دخول للسيارة بنظام المفتاح الذكي ( الكرت في مرسيدس ) وتشغيل السيارة بلمسة زر ...
مع وجود تحكم بالمكيف لكل شخص مع فلترة اضافية للهواء ...
مع ريموت كنترول لفتح الشنطة وغطاء المحرك وفتحة تعبئة البنزين والسيارة طبعا ...



بالنسبة للسلامة ...
السيارة مزودة ستاندرد بايرباجين جانبيين واماميين وللفل كامل يضاف ستارة علوية وايرباج للركب وبانظمة رساوة لتقليل نسبة حصول الحادث مثل vsc نظام التحكم الديناميكي بالمركبة و ebd نظام توزيع ضغط الفرامل و ba البريك استيستنت ... وتراكشن كنترول ..


بقي ان نقول ان هناك مواصفات كثيرة اختيارية ومنها ( الديسترونيك ) نظام التثبيت بالليزر ..
وهناك مزايا اخرى اختيارية كثيرة لكن لانعلم ماهو آت الينا ...
بقى ان اقول اخيرا انه ومع المحرك الكبير هذا الا ان استهلاك الافالون اصبح اقل من القديمة بكثير فاستهلاكها في المدينة 22 ميل للجالون و 31 ميل للجالون خارجها ... ويعتبر هذا الاستهلاك جدا ممتاز مقارنة بالشيفروليه ماليبو ذات المحرك نفس السعة وبقوة 205 احصنة و 220 رطل ...
واحب اقول ان اغلب المواصفات الموجود بالتقرير موجود عندنا بالسوق الا الديسترونيك طبعا ...
واليكم بعض الصور ...


http://www.toyota.com/images/vehicles/avalon/gallery/exterior/large/photo_2.jpg

http://www.toyota.com/images/vehicles/avalon/gallery/exterior/large/photo_5.jpg

وهذه صوره للداخلية ...

http://www.toyota.com/images/vehicles/avalon/gallery/interior/large/photo_1.jpg

التبريد والتسخين ...

http://www.toyota.com/images/vehicles/avalon/gallery/interior/photo_4.jpg









اخوكم الشبابي

[رفجة عرب]

رائعـــــــــــــــــــــــــــــــــــة ..

والانطلاقة قوية جدا ..

والسيارة من الخارج والداخل فخمة وتستاهل والله ..

شكرا لك اخوي..

[Lumina LS]

مشكور أخوي على هالمعلومات الممتازة ..

بس ما ادري ليش انا ما احب شي اسمه .. افالون بتاتاً ..

يمكن لان شكلها بايخ يعني شكل البودي سخيف او بمعنى آخر (أهبل) + حجم التواير (الاطارات) صغير + الجنوط صغيره ومو راكبه على الموتر !! يعني ايش فيها لو انهم يصلحون من شكلها شوي او يقربونه من شكل اللكزس او الانفينيتي ، خصوصاً انها الطراز الفخم والملكي من تويوتا ..

ومع كذا تلاقيها ملغمة بأوبشنات وشغلات متطوره هي اصلا ما تستحقها ..

اضافة ان سعرها غالي ..



على العموم مشكور اخونا على الموضوع ..

[kin porch]

انا شفت السيارة اليوم على الطبيعة وما عليها كلام ... وهناك ميزة جديدة وهي الجير بخاصية التيبترونيك
سعرها يبدأ ب 95 الف ريال للمقاعد المخمل ويصل لل 110 الف ريال للمقاعد الجلد .. السيارة واسعة ومقاساتها تطابق ال GS الجديدة

مشكور اخونا الشبابي على الموضوع الحلو

[760IL]

مشكور اخوي على الصور والتقرير الرهيب بس انا ابغى اعرف مين راح يشتري لكزس es300 مع وجود هذي السياره

[MYBACH 62]

السيارة روعة وفخمة جدا , وواضح الجودة مازالت عالية .

[علي عبدالله]

مشكور اخوي على الصور والتقرير الرهيب بس انا ابغى اعرف مين راح يشتري لكزس es300 مع وجود هذي السياره

اللكزس له زباينه دائما
ولو انه لابد نعترف ان الطراز الجديد من الافالون راح يؤثر كثير على مبيعات اللكزس ..نظرا لجماله ومواصفاته الجديدة والمغرية
وعموما الافالون ما ارتفع سعرها بشكل جنوني مثل باقي سيارات تويوتا اللي اسعارها زادت بعشرات الالوف :think:

[الشبابي]

شكرا لمرورع الجميع هنا ...
اخوي لومينا ال اس ...
نحترم وجهة نظرك ... لكن اعتقد ان السعر رخيص بالنسبة لسيارة سعرها 110 يابانية وبهذي المواصفات الحلوة ..
ثانيا لاتنسى ان حجم السيارة كبير ، اكبر من الكزس جي اس على الطبيعة واوسع من اللومينا ( بين اللومينا والكابريس ) .. سيارات تويوتا جودتها عالية وقطع غيارها رخيصة ومتوفرة وجودة المواد الداخلية الافضل و سعر اعادة البيع مرتفع ...



اخوي 760 ...
سعر الاي اس ارتفع ولا نسيت ؟؟؟
الاي اس صارت ب 128 الف ريال ...


اخوي راعي البيج ...
فعلا السيارة يعتبر سعرها جيد واعتقد ان ابو جميل ما رفع سعرها لأن الموديل القديم ما مشي .. وبالتالي هو يبي يرغب الناس بالسيارة الى ان تبدأ بالانتشار بين الناس وبعدها يبدأ يرفع السعر بالتدرج ..
واعتقد ان الاي اس راح يرتفع سعرها السنة الجاية كثير وبتكون بالمحرك 3.3 وبشاشة وبيرفع سعرها عشان يترك مجال لل is350 الجديدة ...









اخوكم الشبابي

[غريب السيف]

مشكور اخوي الشبابي على الموضوع
لكن انا مومصدق لين الحين ان سعرها 110 الاف
يمكن السعر هذا بس في السعودية لكن الامارات اتوقع فرق كبير لان القديمة كانت ب 108 الاف عندنا
ولو كانت فيها المواصفات اللى في الافالون الجديدة بيوصل سعرها الى 130 الف :confused:
والكل يعرف الوكيل عندنا الفطيم واسعاره النارية ومواصفاته التعبانه حتى ان كثير من الناس يشترون التويوتا من المناطق المجاورة وخصوصا البريمي

وبالنسبة للكزس es330 تراها موجودة عندنا من السنة الى فاتت وكان سعرها قبل 7شهور ب 138 الف درهم :ranting: وهو قريب جدا من سعر الفئة الخامسة 525


والسموحه

[abumhdi]

مشكور اخوي على الصور والتقرير الرهيب بس انا ابغى اعرف مين راح يشتري لكزس es300 مع وجود هذي السياره


ايه ولله صدقت من اللي راح يشتري الكزس .. !!

بصراحة انا اشوف السيارة جداً واقعية بالسعر مع هذه المواصفات الفخمة .. وغريبة من عبد الطيف هذه .. ان يخلي سعرها معقول .. !

وانا اتوقع ان لها مبيعات كثيرررررة .. وانها راح تقلل من مبيعات اللكزس ..

[Za7ef]

طيب هل الموديل ابو 110 آلاف يشمل كل المواصفات اللي قلتها "نافقيشن - حساسات - حساس مطر - مقاعد مهواة ألخ ألخ ألخ ....." ؟؟؟؟

[sayedco]

شكراً على الموضوع أخي الشبابي

موضوع متعوب عليه و مفيد

الله لا يقطع مواضيعك

[HaKeM]

اليوم مريت على الشركة وانا مستعجل

السيارة رائعة بمعنى الكلمة

أقل نوع ب96000 والفل اوبشن ب110.600 ريال

الشي الي لاحظته ولم يكن موجود في المواصفات السابقة المقاعد الخلفية يمكن تعديل درجة ميلان الظهر عن طريق مقبض بجانب الكراسي الخلفية

السيارة محافظة على وسعها الداخلي ويمكن زادت بشي بسيط التصميم جداً رائع

تحياتي