كلمه في قلبي..

[wildorchid]

شوفوا..
في الحقيقه انا قافله معي..
الاسباب
اني كنت اسأل نفسي الأمريك كم يساوي من عربي؟؟
والا بالأصح من خليجي؟والا على وجه الدقه من سعودي؟؟

اذا النتيجه 1:1 اذن مافي مشكله..اذا النتيجه في صالح الأمريكان
طيب ليش؟؟
يعني مالنا رب؟؟
الأمريكي لما يروح لسفارته يقولون له "آمر..وأجيك أطامر"
وانت لما تروح لسفارتك يقولون..ماعندناش فكره..

وآخ..يا عروبتي
اللي ماخلتني أسوى شوي!!!!!!

[khalid99]

وكلمه في قلبي

ليش المواطن السعودي لما يروح سفارته

يكون موضع شبهه وريبه

من يوم تدخل السفاره والعيون طايحه فيه بحلقه

شعنده؟؟؟ اكيد سكران وسارقين فلوسه!!!!

شهنده؟؟؟؟ اكيد متهاوش ومضيع جوازه!!!!!

شعندك ياأخ؟؟؟

لا والله سلامتكم بس شفت العلم يرفرف فوق وأشتقت للديره!!!!

[آهات الليالي]

لووووووووووووووووووووووووووول
للاسف يعني كلامك صح يا خالد. وانت لو سمعت كلام احد الموظفين في احد السفارات في الخارج.يحكي باستحقار و ان كل الشباب السعوديين اللي يروحون له كلهم عندهم مشاكل و كلهم ضايعين و كلهم و كلهم...حتى انه قال(مثل ما صار في طاش ما طاش)و للاسف ان بعض الشباب هم اللي يعطونهم هالفكره بس انه هو بعد غلطان مفروض ما يعمم.
حلوه شفت العلم و اشتقت للديره لوووول



آهــــ الليالي ــــات

[khalid99]

هلا بأهات

وأهات على حال الي تحده الظروف ويراجع سفارته:(

تصدقين ان المشكله في موظفين السفاره

نوعيات دايخه الا من رحم ربي

يتعاملون بفوقيه كريهه مع المواطن

مع انهم موضوعين لخدمته اولا وأخيرا

[Pokemon]

لو مو كذا ...
انا بنفسي اشتغلت في احدى سفارات المملكة في الخارج وشفت التعامل الرائع اللي يقدمونه زملائي للمواطنين هناك ..
واذا كانت هناك حالات شاذة في اسلوب التعامل فلننظر الى البلد التي يتردد اليها الشباب والغرض
يعني بالله وش الفرق بين أمريكا او اوروبا عن بانكوك ؟؟؟
شوفوا من يروح هنا ومين يروح هناك ؟؟؟؟

كنت في لندن قبل فترة ورحت اسجل جوازي
قسم بالله اني شكيت بنفسي قلت اني يمكن يشبهون علي اني VIP
لأن التعامل كان راقي جدا مع انهم ما يعرفوني اني زميل عمل لكن شيء يثلج الصدر حقيقي ، واتنت الاجراءات خلاص نص ساعة وانا اشرب الكوفي في مكتب القنصل ..
وش رايكم ..

سلام

[khalid99]

هلا بوكمون

اولا بما أنك موظف سفارة فيكفي مقارنتك بين امريكا وبانكوك

لنبين للجميع نظرة موظفين السفاره للمواطنين

ياأخي انت وش عليك من الي يروح لبانكوك انت موجود لخدمتهم

اذا جاء أحد يبي منك سلف لاتعطيه لكن اذا جاك يبي خدمة

سفارته فغليك خدمته

ثانيا الا يوجد عوائل يذهبون للمناطق الجميله في تايلند

الا يوجد رجال اعمال يذهبون لشراء بضائع من تايلند

أنت لست بمكلف بمراقبهم بل بخدمتهم وتسيسر امورهم

انشاء الله أروح اسرائيل مادام فيه سفاره فعليها خدمتي

اما سالفة روحتك للسفاره وتعاملوا معك تعامل راقي

وخلصوا شغلك بنص ساعه لا وانت تشرب كوفي في مكتب القنصل

فهذي كثر منها000 أنا أجزم سيدي الفاضل انك اول مادخلت

السفاره طلعت بطاقتك وانت تبتسم ( كأني أشوفك )

معكم زميل لكم تكفون خلصوني!!!!!!!

لا وفي مكتب القنصل بعد وكوفي ساخن؟؟؟؟؟؟؟؟ظ

اخي العزيز نحن لاننتقد للفضيحه

نحن نتقد للنصيحه

[Pokemon]

هلا اخي خالد
طيب ياخي انت ليش زعلان ؟؟؟
انا ما قلت ان تعامل الناس يكون حسب المكان
انا اقول ليش كثرة المشاكل تصير في بانكوك بينما الدول الاخرى لأ؟؟

طيب وش رايك بالهموقف صار في بانكوك وعرفنا عنه عن طريق زميل عمل

واحد شاب رايح فيها
ضيع جوازه وفلوسه
وراح للسفارة معبي الطاسه
لا ومين معاه
ماما سن ( خويته )
ياسيدي على المواطنه ..
بالذمه تبغاه يحتضنونه الموظفبن هناك؟؟

طيب وبعدين انا ما كنت في بريطانيا للدراسات العليا
ومو لازم ابرز اي بطاقات عشان احصل على مميزات في سفارات بلدي

صدقني
احنا تنعامل مع الموقف وليش الاشخاص
وهذا اللي تعلمناه ودربونا عليه :)
وبعدين ياخي لازم تكون ثقتكم بالعاملين بالسفارات طيبه نهم من افضل وأخير الموظفين ...

عموما
تيقى قناعات الناس مختلفة :)

سلام

[آهات الليالي]

طيب انا باسال سؤال انت ليه تقارن بين اللي يروح لبانكوك و اللي يروح لاوروبا؟؟؟؟ما عليناوين يروحون نبي نعرف ليه المعامله السئيه مع البعض؟؟؟و ليه التفرقه؟؟؟؟هذاك قلتها بنفسك
(شكيت بنفسي يمكن يشبهون علي اني vip)
يعني لا صرت vip تشققت شفايفهم من الابتسامه و لا صرت شاب سعودي عادي محترم نفسه هانوك؟؟؟؟؟؟؟
vip طيب على عيني و راسي بس لازم يحسنون تعاملهم مع الباقين بعد.
يعني مع احترامي لك اللي اقصده مو كل الموظفين مصدقين انفسهم و لا كلهم راقين في تعاملهم.في رايي انهم صوره لبلدهم في الخارج و اقل شي ممكن يسونه انهم يساعدون اهل ديرتهم و بعدين (الابتسامه في وجه اخيك صدقه)مو لا دخل احد عليهم من اللي قد حاله كشروا و كل منهم مرفع حواجبه على ولا شي.هم هناك لخدمة ابناء بلدهم مو عشان يسافر و يكيف و يبسط نفسه في الخارج و لا مافي داعي احسن لهم يقعدون هنا في السعوديه.

آهــــ الليالي ــــات

[ma3gool]

اوركيد!!! وينك!!! اتصل عليك يعطي مشغول او محد يرد..:(

وبعدين ليش زعلانه...هم يا ماما اذا قالوا له ما عندناش فكره قوم الدنيا وقعدها وفضايح في الاعلام وووو توصل للقضاء..
اما عندنا حدث ولا حرج معك واسطه ولا فلوس الله يحييك ..ما عندك ضف وجهك ولا نعرفك ولا نبي نشوفك مره ثانيه لان ما فيه جهه تشكينهم لها واذا شكيتي طلعتي انتي الغلطانه...:(:)

[Pokemon]

آهات
شكرا لرايك :)
لكن ركزي شوي على اللي كتبنه انا فوق
وبتلقين الاجابات :)
سلام

[آهات الليالي]

والله يا بوكيمان لما انا كتبت الرد ما كان ردك موجود بس لما رجعت للصفحه بعد ما كتبت الرد لقيتك كتبت already



آهـــــ الليالي ـــــات

[Pokemon]

آهات
هلا بك :)

[WEBMASTER]

أوركيد ....تحيةطيبة

الفرق=أكثر من مائة عام تطور على جميع المستويات

ليست أنهزامية.....بل قمة الواقعية

أتمنى تقليص الفارق
هل هناك بصيص ضوء يلوح في آخر النفق(على رأي السياسيين)
الأجيال القادمة (وليس نحن)تملك الأجابة (:(:

[wildorchid]

راح ارجع له :)

[فارس مشاعر]

الاخوه والاخوات الكرام ليس هناك مجال للمقارنه بيننا وبين امريكا واعتقد بان هذا ظلم ايضا في المقارنه بالنسبه للسعوديه0 واتمنى ان يكون هناك طرح ومناقشه منطقيه او ممكن يكون هذا الموضوع اساءه متعمده للوطن الغالي00واتمنى ان اكون غلطان في تصوري هذا000اخواني واخواتي اقولها لكم بكل صراحه وعلى بلاطه00مشكله وماساه بان ترى شباب وشابات سعودين عندهم نظرة اسقاط لكل شي سعودي00وانتقاد لكل شي00والشي الزين لايذكر ابدا00عموما هناك نواقص واعلم اكثر مما تعلمون00واعلم مما تشتكون00ولكن هناك حبي واحترامي لبلدي التي ولدت وولد ومات اجدادي كلهم في ترابها00اعزائي فليكون نقاشنا موضوعيا وبعيد عن المهاترات والانتقاص من اي سعودي سواء كان موظف في سفاره او فراش في مدرسة ابتدائي00فمن غير المعقول ان نعمم عندما يواجهنا موظف فاشل ونقول بان الجميع فاشلين0انا هنا اتكلم عن المواطنين المخلصين الكادحين وهم كثير في بلادنا ان شاء الله0 ولست اتكلم عن الحكام فما يهمني بالدرجه الاولى الوطن وابناءه ومن يحبهم ومن يراعيهم ويلبي مطالبهم وليس من ينتقصهم ويعيب عليهم00اخواني واخواتي الانتقاد والتشويه المتعمد سهل عندما لايكون هناك حب للوطن00 نعم حب للوطن00ولست اتكلم عن حب ال سعود00فهذا شانكم انتم0اما من يكون حاقد على ال سعود ويخلط حقده لهم ايضا ويجمع الوطن في قائمة حقده0فهذا عديم الوطنيه00فالوطن شي كبير واكبر من كل شي تتصورونه ومالاتتصورونه00حبي لوطني وترابه وحرصي على سلامته من الفتن والحاقدين يجعلني اكون واقعي في طرحي ومناقشاتي لمشاكله00وهذا مالم اراه منكم00ولم ارى منكم غير الاستخفاف وانت يافارس دبوس ومباحث00مشكلتكم انكم تريدون واحد يطبل معاكم ويعزف على نفس اوتار احقاد بعضكم وكرهه للوطن الغالي0انا هنا لااعمم ولكن كلامي موجه للحاقدين على الوطن من ابناءه الخونه فالنظام والحكام قد يبقون وقد يذهبون0ولكن الوطن ومايحتويه من ابناءه المواطنين يبقى ويذهب الجميع00وسلامتكم00

[آهات الليالي]

طيب يا فارس مشاعر احنا قلنا مو كل الموظفين فاشلين و لا كل الشباب ضايعين.وحب الوطن شي اكيد كلنا نحب هذه الارض الغاليه و هذه التراب الطاهره.وكلنا تربينا فيها وولدنا فيها و قبلنا اجدادنا الله يرحمهم.وكلامنا ما يمس حب الوطن ماحد قال مانحب ديرتنا بس ودنا الكل منا يحاول يتذكر انه في كل تصرف يمثل بلده.



آهـــ الليالي ــــات

[فارس مشاعر]

اهات الليالي اشكر لك تفهمك لما قصدت00وبالحب نبني الوطن وبالقفز فوق كل العراقيل سوف نبني صروح المجد00 وبالنقد البناء وطرح المواضيع لحلها وليس للتشهير انا معك على طول الخط00وعلى الحب نلتقي00وسلامتك00
هذا اهداء يسيط مني عربون صداقه واخوه:-
http://www.mohammed-abdu.com/lyrics/images/galbi.gif

[آهات الليالي]

هلا اخوي فارس
مشكور على الاهداء بس في شي بسيط في اخطاء بالابيات
مير هذا نصيبك يالعيون الشقيه
اتصبر واقول اني على البعد قاوي
كان ابشكي عيون اللي فراقه خطيه
كل ما جا طيب الونات زادوه كيه


ومشكور مره ثانيه



آهــــــ الليالي ــــــات

[wildorchid]

اسمحوا لي أخواني اني ارد على فارس مشاعر أولا..

سيدي الكريم..
استخدام لفظ " حاقدون""حقد" لا يليق ان يطلق على من ينتقد..
الانتقاد لا يعني الحقد أو الكراهيه ابدا..
المقارنه بين أمريكا وبين السعوديه ليش تقول انها مش ممكنه؟؟
حضاريا..ممكن
صناعيا..أكيد
لكن انسانيا؟؟ماادري
من حق المواطن أنه يتعامل كمواطن درجه أولى بغض النظر عن اي شيء آخر أو مميزات أخرى..
من حق المواطن انه يتمتع بكل خيرات بلده..زيه زي حكامها
وصدقني الحقد كلمه كبيره مانقدر نطلقها ابدا..
صعب تقول انك حاقد لمجرد ان اللي في داخلك ثورة وعدم رضى على الوضع القائم..
حب الوطن لا يعادله اي جب في الدنيا..مافيه زي بلدك اللي راح يحتضنك ويرضى فيك..
حبك لوطنك يولد في داخلك شعور بالوطنيه والانتماء..ومافيه شعور أصعب من انك تحس انك مشرد..ومتغرب..والأقسى من هذا انك تشعر بالغربه في بلدك..تشعر ان حقك مهضوم ومسلوب..
تصدق؟؟
الرضى عن الخطأ هو قمة الخطأ..
لايمكن انك ترضى على وضع لمجرد أنك تبغى تحافظ على سمعة بلدك
احب اذكرك ان كرامة وسمعة البلد هي جزء من كرامتك وسمعتك..
لايمكن ترضى عليه ولكن ليش نسكت؟؟؟ليش تدفن راسك زي النعامه؟؟

شيء غريب..
لازم اسكت عشان اثبت اني مواطن مخلص؟؟
ومتى كان الاخلاص مرهون بالسكوت؟؟
ومين اللي ساكت.؟
ياشخص مستفيد والى الدرجه الأولى واما شخص رضى انه يعيش باقي حياته لا يرى لا يسمع لا يتكلم..
طيب ممكن تعرف لي الوطنيه بمفهومك؟؟
استروا على ماواجهتم؟
والا كيف؟؟
سؤال ثاني
هل تعتقد ان السعودي أو حتى الخليجي متمتع بحقوقه كمواطن كامله؟؟
وهل هو بالاساس يعرف وشي حقوقه؟؟
أكيد شفت أفلام لما البوليس يمسك مخالف فيقول له انا اعرف حقوقي حتى لو كان كتكوت ماطلع من البيضه هل تعتقد ان احد فينا يعرف وش له؟؟بس الاكيد يعرف وش عليه!!!!!!!!!!!!!!!!!!!!

اتمنى اني اقدرت أوصل لك وجهة نظري..
بس اسمح لي اقول اني ارفض انك تشكك في وطنيتي أو وطنية أي شخص آخر........
ملحوظه:
تخيل انك داخل السفاره السعوديه وكلك احساس بالفخر انك داخلها وراسك مرفوع..
وفجأه تلقى العسكري يفتش شنطتك وشوي ويفتشك شخصيا ويسجلون اسمك ماتدري ليه وتستنى قدام وحده نصف ساعه وهي تسولف في التليفون وفي الأخير تطالعك وتقول..آسفه :)

[تفاحة]

سلمتي اختي كلامك صحيح // وما اقول هالكلام مجامله
لا انا فعلا لا اعرف ما هي حقوقي // حتى في العمل
اللي اعرفه إني اتبع اوامر وبس // و أأدي عملي على اكمل وجه
لكن في حالة صارت لي ظروف وطلبت إجازه مثلاً :(
شوف تقعد كأنك تشحذ منهم وتكلم مليون شخص
يتوسط لك
لييييييييييييييييييييييييش // مو من حقي أتمتع
بإجازه غير مدفوعة الاجر // لازم احد يتوسط لي
ولازم نحب الايادي والروس علشان تنقبل
ما اقول غير حسبي الله ونعم الوكيل //

[khalid99]

اخي فارس مشاعر

اولا أهديك هذا البيت

بلادي وان جارت علي عزيزة

وأهلي وان شحوا علي كرام

ثانيا

ياخي الكريم لايجب ان ندفن روؤسنا بالرمال

ونقول بلادنا افضل البلدن بل يجب ان ننتقد بما يسمح

به النقد ونحاول تصحيح بعض الاخطاء

يااخي موضوع السفارات السعوديه في الخارج مؤلم

تخيل انك في غربه وتحدث لك مشكله الى اين تتجه

صدقني ان أخر شىء تفكر فيه هو سفارتك

لماذا لاتسأل نفسك اولا؟؟؟؟؟؟؟؟؟

أذكر لك موقف سمعت عنه وأترك لك الحكم

في احدى الدول الشيوعيه واثناء منع السعوديين للسفر اليها

ذهب مواطن سعودي هناك للنزهة وكانت السفارة الكويتيه

راعية للمصالح السعوديه هناك ( على حسب ماقال الشخص)

وحدثت له مشكله وذهب للسفارة الكويتيه وقامت معه السفاره

بشكل طيب لدرجة انهم وصلوه للمطار

يااخي نحن لانقارن مع امريكا وبريطانيا نحن نريد سفارات

لها دور فاعل مع المواطن بغض النظر عن شخصه وهدفه من السفر

بعدين نحن لم نتكلم عن الحكام بل نتكلم عن الموظفين

الحكومه لاتعطي تعليمات بالتكشير في وجوه المواطنين

الحكومه لاتقول عطلوهم وعقدوهم

نحن نعرف ان هذي التصرفات فرديه بحته ومن موظفين لايحملون

للمواطن اي اهميه لعقد نفسيه يعانون منها

[فارس مشاعر]

عموما اشكر لكم جميعا ردودكم00
حبيت اوضح نقطة( الحاقدين00)اناقلت بان هناك بعض الحاقدين ووجهة كلامي لهم00ومن لم يكن منهم فكلامي ليس بموجه له:)0ومافيه داعي للزعل يا اوركيد:)
انا لم اطالبكم بالصمت00ونرجع لنفس موضوعنا الاول امايافارس تهاجم معانا او انك دبوس ومباحث وايضا وحده جديده اليوم نعامه تحط راسها بالتراب:):) انا اتمنى انكم تفهموني انا فقط اطالبكم بالموضوعيه والمنطقيه في الطرح وعدم مقارنتنا بامريكا00على الاقل اعملوا المقارنه مع مصر:)
انا اطالبكم بالتكلم وفضح كل قصور ولكن بموضوعيه وعقلانيه وايضا مع طرح الحلول المعقوله واللتي تكون في متناول اليد لاحظوا هذي (متناول اليد):) لكي نتناقش فيها00
الطرح للمواضيع لمجرد الاستخفاف والانتقاد والهجوم لمجرد الهجوم شي بسيط ولكن مقرف00واعتقد بانكم توافقوني الراي جميعا00
اخواني واخواتي انا لست اشكك في حبكم لبلدكم ولكني قصدت كل حاقد على وطني الغالي00فهل جميع السعوديين مخلصون وهل جميعهم اوفياء؟؟؟00وسلامتكم00

[wildorchid]

لا زعل ولا حاجه..:)

ومن قال انك دبوس؟؟
مو لازم الواحد ينتقد عشان مايقال عنه دبوس..يمكن لأنه عارف ان الحكي ماراح يجيب فايده..فليش يجيب لنفسه وجع الراس؟؟

أعرف ان احنا يمكن مانقدر نغير حاجه والسبب ان احنا ماحنا يد وحده ولا قلب واحد..

الشعب له صوت لكن لو صار وحده واحده مو كل واحد يغني على ليلاه..
تقدر تقول انك ومن خلال وظيفتك ومنصبك تقدر تطبق اللي انت مؤمن فيه وعلى الأقل تحارب الفساد أو اي تصرف يمس بلدك قبل لا يمس شعبك ولكن هل تعتقد انك راح تستمر؟؟
الواحد احيانا ينفجر من الضيق اللي فيه لما يحس انه قاعد يدور في حلقه مفرغه مالها نهايه..والسبب؟
أن فيه ناس أخذونا بحكم المسلم به..took us for granted
وأعتبروا ان رضاناوسكوتنا هو واجب مقدس..مما اعطاهم الفرصه في انهم يتمادون يوم عن يوم والابشع من هذا انهم عارفين ان كثير مو راضي بس "أعلى مافي خيلك..أركبه" ورني وشلون بتحاسبني؟
لا وأزيدك من الشعر بيت..
فيه نوعيه من الناس- موظفين حكوميين- كانوا ولا شيء ولما صاروا شيء حاولوا وبكل مافيهم من عقد نقص انهم يقللون من قدر المواطن السعودي ..وبستخدم منصبه في اذلالهم عارف انهم ماراح يردون عليه لان مصلحتهم عنده..مع ان هذا واجبه الا انه مسكين..
ناسي انه سعودي..واذا كان يطلق عليهم الفاظ فهذا لأنه مريض الضعيف..

[wildorchid]

تطلب منا ان احنا مانقارن انفسنا بأمريكا..
اسألك ليه؟؟

سبق وقلت انه اذا كانت المقارنه صناعيا قهذا ممكن ولكن في معاملتهم للفرد فمادري وش يمنع.؟؟
بالعكس..
احنا عندنا دين اللي هو شريعتنا ودستورنا ومع هذا نشوف انه وبكل بساطه لا يطبق الا على اللي ......ماعنده ظهر!!
اسمح لي اقول ان المقارنه ممكنه..وممكنه جدا..
بس نحتاج عقول واعيه تفهم ان احنا اللي نطالب فيه هو شوية عدل,شوية مساواة..وكثير من الرحمه...
ولا ننسى..
الضمير......سواء في العمل أو في المعامله أو التعامل!!

[فارس مشاعر]

واشكر لكي ردك اللبق والجميل00واللي يدل على سعة صدرك وافكارك 00عموما على طاري الوظيفه والعمل فصدقيني ياعزيزتي باني اعلم مايحدث من قهر وظلم للمجتهدين ومن يقول الصدق ويكون صريح يحارب وتلغى ترقيته 00عموما عزيزتي00انا والله داري عن ايش تتكلمين وعن ايش في خاطرك وماقلتيه000
عزيزتي فيه شي وحيد يسليني ويخليني انسى ويخليني معظم الاحيان انتصر00هو تقربي من الله00ومن يكن مع الله نصره وايده00

[wildorchid]

وأنا بدوري اشكرك على تفهمك..
يعني نقدر ان احنا نعاني من نفس الشيء..بس نتعامل معاه بطرق مختلفه..انت تفضل الصمت..وأنا احب اعبر..
ماأقدر ماأقول للأعور انك مانت أعور :(

لكني أؤمن ان الله ماراح يضيع أحد ولا راح يضيع أجر اي واحد..
الله يعينا ويساعدنا..على انفسنا وعلى اللي قاعد يصير..

تحياتي فارس,,

[فارس مشاعر]

اختي العزيزه00انتي قلتي انك تتعامل مع الامور بالصمت00وانا لست كذلك ابدا00عزيزتي انا كل ماقلت باني لااحب المهاترات والانتقاد لمجرد الانتقاد00وانما احب النقاش الموضوعي المبني على اسس وافكار علميه0وايضا انا من الناس اللذين احب ان اعمل اكثر من ان اتكلم وحتى عندما اعمل فاني اعمل في صمت00فلست احب في طرحي لاي موضوع ان يكون مبني على استخفاف وتجريح وتهميش وتنكيت بدون حلول000 وفي ذلك الوقت يكون السكوت افضل واكرم000اختي العزيزه جملتك الواجب تكون نحن نعاني من نفس الاشياء لكن تعاملنا معاها يختلف00احب ان اشكر لكي ردك الطيب الذي يدل على طيب معدنك واخلاقك00وسلامتك00

[wildorchid]

كلمة" نقول" سقطت سهوا من سياق الجمله..

وأنا معاك أن مو كل صامت هو انسان قليل حيلة..بالعكس..
أكثر الناس حنكة وذكاء هم من يعمل في صمت..ومن يدع عنه جانبا كل مايعكر صفو مزاجه أو يؤدي به الى طريق مغلق..
المهاترات والاستخفاف بأمور تحدث في المجتمع أو تنخر في اساسه هو أمر خطير جدا..
الاستخفاف يعني عدم الاهتمام وعمد الالمام بحقيقة الوضع كما هو..
اللي يحز في نفسي ان كثير منا والى الآن ماهو عارف وش اللي بالضبط يبغى يوصل له ولا قد ايش احنا ممكن نعمل تغيير بشويه تعاون وتفاهم..وفوق كذا..........جديه!!!!!


تحياتي,,