ويك إند أمـــني !!!

[بياع القلوب]

قبل امس الفجر كنت طالع من البيت ورايح ... ماراح اقول
عموما مستعجل اشوي لأني تأخرت ..
وفي اشاره دمها ثقيل
اشوفها من بعيد مولعه اخضر وتغازلني ( كأنها بنت لابسه مخصر ولثام وتمشي بالراشد ) وتقول تعال يا شاطر والحقني ، واذا لحقتني انا لك ..
عموما اخوكم بالله حط رجله تقول ذيب ورا غزال وقبل كم متر ما تزال الاشارة خضراء - فقلت اوكيه الطريق سالكه
وفجأه وبدون مقدمات ولعت حمرا - بدون اصفر ... تبن
لو احط رجولي الاثنين محل الفرامل ماراح يردني الا الرصيف الثاني
فقلت ياولد حط رجلك ما حولك احد
ايه كثر منها
ما دريت الا الدوريه وراي
ياخي من وين يطلعون مدري ؟؟؟
لو اني في نص الظهر وصار حادث من 15 سياره ما تلقاهم
عموما وراي وراي
قلت
عز الله افطرنا عيش وحلاه اليوم
وقفت طبعا ونزلت
رخصة واستماره
اتفضل
وين تشتغل ؟؟؟
( ما تلاحظوا انهم بسألونا وين نشتغل قبل ما يتخذوا اي اجراء؟؟ ليش ياترى )
اوظيفة موظف حكومي - يعني يخوف
قلت له في .............. ماراح اعلمكم عشان الواسطات ، ماعندي :)
عموما عرف وين اشتغل وطالع فيني وقال :
ابغى منك واسطه ... !!!
قلت مدري والله النظام ما يسمح ( قمة النذاله مني .. صح ) شسويله ؟
عموما بعد السوالف والاسئلة عطيته كرتي وقلت له كلمني يوم السبت بالمكتب ويصير خير
قال لي : سم طال عمري وهمنا حنا سلامتك ، مع السلامه ..
بس

يمكن القصه ما لها مغزى
بس حقيقي احيانا تضيع الحقوق كثيرا ف يالطرق ..
قصة حقيقي وقعت لشاب في الجامعة وابوه معرف جدا من رتبته ومركزه في امن الدوله ..
طلع مع زميله للرياض ومعام شبح ونص الطريق اعترضتهم سيارة امن الطرق ..
كانت سيارة أمن الطرق تبغى تعدي للخط الثاني بكل تهور والمسكين الشاب ما لقى الا انه يتفادى هالغبي هذا ويطلع عن الخط ..
والنتيجة
مات الشاب
واللي معاه انشل
وحطوا الحق على الشابين
قال ايش ؟
قال مسرعين
مسكينه امه ....

ياأمن الطرق ما صرتم أمن ... على فكرة يا امن الطرق تراني ما سددت المخالفة اياها حق السرعه ,,, وماني مسدد كمان ,,,, الله يخلي الكمبيوتر وشششششششش اختفت ....
وويكيند سعيد عليكم

[ma3gool]

بياع انا هالمره بعطيك كرت احمر وفوشي..وش ذا الاغلاط الاملائيه الرهيبه!!!!!مره ثانيه لا تستعجل في الكتابه وطالع الكي بورد وانت تكتب ولا تستعجل على الغداء..واربط حزام الامان...

يونيك وينك تشوفين اللغه الجديده اللي ابتكرها بياع...جزاء له لا تسوين الغداء اليوم..:):)

[بياع القلوب]

هلا اخوي معقول
شمتان حضرتك ؟؟
تصدق من كثر ماني مسرع ما ركزت في الاملاء؟؟
ياويلي من يونيك

بس على فكرة انا خلصت غدا من بدري اليوم
مرقوق :)
الظاهر ان الدهن كثير وعشان كذا تزحلقت الحرف مني على الكيبورد :)

[سردال]

بياع .... :)

لا تسرع وأنا اخوك، هذي الحركة تصير مع ناس كثر، لكن بعضهم يوصل بعد تستوي الإشارة حمرا وتحصل سيارة طالعة من مكان ثاني ويصير حادث مأساوي

أنت في هذه الحالة خف السرعة، ولا تسرع، راح تستوي حمرا :o وبعدين تنظر دقائق بس، وراح تستوي برتقالية :cool: وبعدها ثواني تستوي خضراء :p

:o
:cool:
:p

[بياع القلوب]

سردال
طيب المشكلة اذا كانت خضرا وماشي بأمان الله وبدون مقدمات قلبت حمرا ؟؟
وش ذنبي اروح ضحية خراب لمبه صفرا ؟؟؟؟
تحياتي :)

[سردال]

مممم! هذا غلط البلدية :) لازم يسون صيانة دائمة! :) ولا الموضوع ينقلب لمأساة ونحن مو ناقصين في الخليج مأاسي وحوادث سيارات :)

[بياع القلوب]

فعلا اخوي سردال
وهذا المغزى من موضوعي هذا
الاهمال
ومن المسؤل عنه ؟
ولماذا اللائمة دائما تقع على المواطنين ؟
تحياتي

[aziz2000]

--------------------------------------------------------
اشوفها من بعيد مولعه اخضر وتغازلني ( كأنها بنت لابسه مخصر ولثام وتمشي بالراشد ) وتقول تعال يا شاطر والحقني ، واذا لحقتني انا لك ..
----------------------------------------------------

إنت تقول يا بياع إن السالفة يمكن مالها مغزى .. وأنا أقول هذا

أحد مغازيها .. اللي يصير في الراشد .. مــأســاة أخــلاقـيـة ..

أما سالفة الواسطات .. هذي اللي محد يقدر عليها في السعودية ..

تحياتي و تقديري لك أخي الكريم بياع القلوب .. :)

[بياع القلوب]

هلا اخي عزيز 2000
وفعلا كلامك صحيح
اشياء كثيرة تحدث حولنا ولا ننتبه لها الا بعد فوات الاوان ..
وسالفه المخصر هذي سالفه طويله ماراح نخلص منها ابدا ولا راح تنتهي ..
والواسطات ؟؟!! اذا كنت انا اشجع على الواسطة طيب شلون ابقضي عليها ؟؟
تحياتي

[unique]

ويا ليتهم خالفوك بعد

[بياع القلوب]

يونيك
وليش كذا طيب؟؟؟
ما استاهل انا ؟؟
والا عشان المخصرات واللثامات ؟؟؟ :):)

من هالناحية مو بس مخالفات استاهل؟ الا في البلاك لست :)
صح ؟؟؟

[unique]

لا طبعا مو هذا قصدي
بس كذى نحاسه
انشالله تغازل كل بنات الارض وانا مالي

[بياع القلوب]

طيب نحاسه ليش؟؟؟

[marwah]

بعدين هالوشششششششش ماتصير لكميوتر مدرستنا علاماتنا مخزنة عليه يليت الوششششششش توصله :)

[بياع القلوب]

هلا بالصغنونه مروه
اشارة والا بنت .. وش دخلك ؟؟؟ عيب .... ذاكري دروسك احسن لك :)
وبعدين ليش وششششششش كمبيوتر مدرستكم ؟ انا ما عندي واسطة حق أحد ويقولون ان نسبة القبول في معهد التربية الفنية والتفصيل والخياطة بيوصل الى 40% يعني لا تخافي بيقبلوكي بس بعد واسطة :)