وينكم؟ اختفيتوا؟

[سردال]

وين موزة؟!

صار لها يومين مختفية أو أقل أو أكثر! :)

أكيد ألحين تصحح الأوراق والدفاتر، الله يعينها ويعين جميع المدرسين!

بعد مدردش وينه؟ غايب عنا صار له يومين تقريباً! يمكن عنده امتحانات؟ الله يعينه...

[أكسجين]

وين أكسجين من زمان ما شفناها ...أكيد معَيده الله يسعدها :)

[سردال]

إي نعم الله يسعدها! :)

أختي الكريمة أسمحي لي، لكن ما أشوفك تشاركين كثير معانا، شاركي وراح الناس يسألون عنك :)

[نجمة المساء]

اشوه محد سال عني :)


يعطيهم العافيه موزه ومدردش

[الدكتور ريان]

حتى انا ماحد سئل عني الله يعطينا الحظ ..ويحبب فينا عبادة ..(الي ناسينا دوم )

[mouza]

هي والله صدقت كنت شويه ها اليومين مندسه بين الاوراق وكله اصحح


تعبت والله وحد منكم ساعدني :(
اتصدق حتى مخي توقف ما قدرت اشارك بموضوع جديد يمكن كنت ادخل واطلع واطلع
بس انت بعد يا سردال ما اشوف لك مشاركه جديده
شو رايك نسميه فترة اجازو عن مواضيعنا وانا بعد مفتقده مدردشكو :)

[سردال]

نجمة: مشكورة على التواجد :)
دكتور ريان: الله يذكرهم بك :)

موزة: الله يعينك :) خلك مني أنا، قفل مخي وما أقدر أطلع شيء أكتبه :) لأني مشغول بعدة أمور ولازم أجدد حياتي زين! شو عندك أفكار عشان أجدد حياتي؟! :)

هي فترة إجازة لكن لازم نجدد أنفسنا عشان نرجع أكثر نشاطاً :)

[mouza]

صدقت والله
اتصدق انا بعد حاسه المخ ها اللي في راسي مافيه افكار ما ادري ليش
صدقك نحتاج تجديد
واكيد مدردشكو يجدد بعد :)

[سردال]

موزة: شو عندك من الأفكار حق نجدد؟ :) تروحين المدرسة مشي!!! أو تجلسين مكان الطالبات وتخلين طالبة تشرح الدرس!! :) أو تغيرين نظام الأثاث في الغرفة (هذه الفكرة راح أطبقها :)) ترتبين الغرفة والسيارة والمكتب!! :) وتتخلصين من كل شيء ما له لزوم أبداً..

انتظر أفكارك :)

[mouza]

اسير المدرسه مشي صراحه وايد صعبه حرام عليك

هااهاهاهاهاهاهاهاه


اجلس مكان الطالبه واخليها تشرح سويتها كم مرة وشعور حلو اوالطالبات يفرحن :)


اتعايز اني ارتب الكبت :(
ترتيب الحجرة توني قريب مغيرته


انا عندي لك افكار
شو رايك تطلع فوق السطح وتقرا كتاب شعور حلو يوم كنت صغيرة كنت اسوي بس الحين ممنوع :(



شو رايك تتعلم سواقه بس والله للزمن واحد بعد يحتاط لا تسوق بس تعلم بيكون تغيير في حياتك

[سردال]

زين! ما شاء الله مسوية ترتيب وتخلين الطالبات يشرحن الدرس :)، رتبي الكبيت واستريحي من همه خصوصاً إذا كنتي تريدين ترتبينه فلا تأجلين :)

أطلع فوق السطح؟ ليش لا؟ خصوصاً الليلة قماري :) قمر بدر كاااااامل! مشكورة وايد على هذه الفكرة :)، يمكن أشيل الفراش وأنام فوق، هاهاها :)

أتعلم سواقة؟ والله لازم آخذ الرخصة قبل ما أخلص الدراسة ولا يا ويلي! كيف بروح الجامعة؟ لازم آخذ الليسن خلال الشهرين الجايات لازم!

ذكريني كل يومين بهذا الشيء عشان أروح وآخذه وأدعي لي الله يوفقني :)

[mouza]

اخبرك خذ فراشك وسير فوق السطح 00وتذكر ايام اول يوم كنا نرقد فوق السطح


يلا شد الهمه وخذ الليسن وعن التذكير لا تخاف دوم بذكرك :)
مافينا تصك درب العين بمشي
اههاهاهاهاهااه


عن ترتيب الكبت ان شاء الله الاجازة اليايه :)

[سردال]

من أبوظبي صوب العين... لازم أطلع من البيت قبل الدوام بيومين!! :)

بس شهر واحد وأرجع ضعيف مرة ثانية! شو رايج ما آخذ الليسن بالمرة :)....

المشكلة إني أعتمد على التكاسي وحافلات البلدية! تصوري التكسي يريد له 5 دراهم والباص عشر، وبعدين ما آخذ راحتي فيهم، السيارة تقضي حاجات كثيرة :)....

أيام أول ما كنت أنام فوق السطح أبداً، تصوري كنت أخاف أصلاً أركب على السلم اللي يوصل للسطح، مب مثل هذي السلالم العادية، لا سلم خشبي أفقي يعني اللي ستخدمونه العمال حق الشغل!

حاولوا وياي كثير ما قدروا يخلوني أقتنع أركب فوق! إلين ما جا أخوي الكبير شجعني أيام كنت ياهل بعدني! شو لو تشوفين الفرحة لما ركبت! عالم جديد أكتشفه في بيتنا الجديم..

أيام حلوة :)