هوس الحمار بالمضمار !

[أبو نايف]

بسم الله الرحمن الرحيم

يقال في ماتواتر من قصص الاغريق والرومان انه في يوم من الايام
ملاحظه هذا اليوم في عصر الطفره .(طفرة الفحم).
.ويوم الفلوس ( الخمسميات) عددها ينافس عدد الطعوس

قام رجال من الرجاجيل وبناله ساحة مضمار...... يبي يتكسب الرجال ماينلام.....الرجال بنى المضمار وكان هو او مضمار في ديرة بني قريقيعان ....:laugh:....هذي الديره بمضاميرها انقرضت هالحين وصارت سواليف شيبان



طبعا الرجال يوم بنى المضمار يبي المكاسب يعني يبي يجذب الخيول ...واهل الخيول ..والجمهور..
الخيول يتسابقون في مضماره... ومنها الدخوليه ب10 ريال ومنها وناسه وسعة صدر ....وبزنس وانت مرتاح مدام الاراضي بلاش


مشكلة صاحبنا انه ماحصل اقبال كبير من الخيول....... الخيول في ديرة بني قريقعان قليله والخيل الطيب الاصيل اللي يجذب الجماهير نادر وماتلقاه بسهوله ......وان لقيته بدل ماتبي من وراه دراهم مهوب جاي الا بدراهم...وحبة براطم:laugh:






فكر الرجال وقدر وحك خشمه وتفكر... ونظر فوق وتحت وتلفت يمين ويسار............. قال بس ....
مالي الا الحمير اناديهم يتسابقون عندي....:laugh:..... لين الله يفرجها ويكثرن الخيول ويحلها الف حلال .....لكن لازم ابدا البزنس من الحين لو بحمير ان شاء الله بقطاوه احسن ما اقبل المضمار وابيعه بالخساره


سوى الرجال اعلان على باب المضمار :
( نرحب بكل دابه... نرحب بكل مخلوق هاج داج )


وياللهول ويامسكين انت ياراعي المضمار محد جاه الا حمار واحد --------- واثق الخطوة يمشي حمارا...



يافتاح ياعليم يارزاق ياكريم : اشتغل المضمار مع شوية خيول وبغال .......ومعهم هذا الحمار.... وكل يوم يتسابقون ويتطاحسون ....والحمار يوم ينهزم بالسباق .......ويوم لاوالله ....يرافون بحاله اخوياه ويخلونه يروح الاول ...عاشروه وعارفينه غثيث
بس وش يسوون خويهم ومصاب بالخرف الرعاشي والكبت السمعي النهاقي.... حيث ان الحمير كلهم اذانهم طوال الا هذا الحمار الفريد من نوعه اذانه من الحجم الدائري ابوبصمتين


واذا جاء يتسابق معهم يدززهم بدل مايركز على السباق ويناظر قدام

ومرة من المرات كان يتسابق مع بقره وكان هو وياها في المقدمه وهو يحدها بس البقره درت عن نيته مسبقا وقامت ومسكت بريك والا الحمار طاب مع الحاجز وبرى السباق
:laugh:


ماعلينا ..........
مع مرور الايام كثرو الناس ومعهم كثرت الخيول والبغال ولا يهونون الحمير ...... وكثرت المضامير لكن الاقدميه خدمتك ياراعي المضمار....والمضمار صار مقصد لكل خيل اصيل.....
وانهلت الخيول اشكال والوان.... اشي بتيربو... واشي بسوبر تشارج .....واشي ماعنده لعب لو يفكر الحمار ينطحه والله ان يقلع رقبته برفسه
:laugh:


الحمار احس ان مستقبله في المضمار ضاع وقال في نفسه ويني انا وين ها الاشكل عساني اقدر على البقره و حصان ابو علف .................يطلع لي اسد!!!!!!




اقوووووووووووووووول.......... وهو يطلع من مناخره ذيك الدخاخين..... وركظه على بيت صاحب المضمار


الحمار: ياطويل العمر وش هذولي الخيول اللي انت مدخلهم في مضمارنا هذولي واجد والمضمار زحمه....( يعني هو ماوده يقول انه بيروح في الرجلين)

قال صاحب المضمار: والله يا اخي الميدان ياحميدان وانت من القديمين الخبراء واكيد بتثبت وجودك بينهم

الحمار: طيب عطهم قسم من المضمار وخل قسم لي انا واخوياي حنا الاوائل وراعين الاوله

طبعا راعي المضمار طنشه داري عن الفوله والخبزه وكل الوجبه..... قال رح اركض معهم ولا تخاف ان دجيت محنب طاردينك بس لا تدزز هم وي عوايدك


ترى هروجك الاوله معاد تمشي ياحمار امش مستقيم يحتارون فيك الناس !!


الحمار طمن راسه
وارخى اذانه
ودحدر للمضمار,,,,,,,,,,,,,,,,,,,,

,, ويقولون ياساده ياكرام
النيه مطيه.... والطمع شين..... والحسد ياكل الحسنات كما تاكل النار الحطب

ها الكلام كلن يفهمه الا الحمار
:D


ومالكم بطولة الكلام .....بعد ما اقتحمنا نفسية الحمار الا هو يحدث نفسه بصوت واطي مدري ليه صوت واطي المفروض مايطلع صوت ....بس العذر والسموحه الحمار ماعليه شرهه واللي يشره على حمار عز الله انه من جماعته والا بينه وبينه مصاهره



يحدث نفسه ويقول:
مالي الا اكيد لهذولا الاغراب مابقا الا هي بعد المحل محلي يعني انا واخوياي اول ناس جينا فيه يجون هذولي و يتونسون يحطونا على الرف




المكيده المكيده..... ويجهز الحمار المكيده لواحد من الخيول اختاره لانه ابرزهم وان طاح كل اللي معه بيطيحون حسب تحليل مخ الحمار قال مالي الا استفزه واهبل فيه وتصير مشكله ومضاربه انا ابضربه وبعدين هو بيجلدني
مايخالف....:laugh:...واقعد اصيح واروح لصاحب المضمار وهذي السالفه فيها اكيد طرد للحصان وياسلام


وفي احد السباقات فوجئ الجميع بصاحبنا الحمار واقف عكس السير ويوجه
الجميع..............


ياحصان( ا) ارجع شوي.......

ياحصان (ب) قدم شوي..........

ياحصان ( ج ) رح اوزن على الميزان....... شكلك اليوم سمين....... اكيد ماكل بردقان ..:laugh:....رح اوزن وتعلم نظامنا في المضمار..........


تفاجا الجميع وكل حصان يناضر خويه وش فيه ذا السبيكه قام يتفلسف علينا......... غمزلهم راعي الاوله وقال ياجماعه هذا قديم واتركوه مجامله



مافاد التعامل الزين مع الحمار.... وكل يوم مشاكله تزيد

ربعه الاولين يوم معه مجامله ويوم مختفين

والجماعه ضاقوا ......وكل حصان يبي يركض الا ها الحمار طاب في حلقه اركض الركضه الفلانيه والا تبدا الا لمن اصفر ...:D...


مع التطنيش والحقران مثل مايقولون يقطع المصران

مصارين صاحبنا الحمار تقطعت وذابت وصارت مثل عصير البطيخ الخربان

وطاح كرته وطاح حضه وكثرت الجماهير في المضمار ..........
...وكلن يبي يشوف الحصان فلان والحصان علان ولا احد يطريك يالحمار



ايييييه يازمان اول............... مع ان الحمار مايومن بشئ اسمه منافسه شريفه ومزنه وتلبيسه
لذالك قرر انه يخربها وينطح واحد من الخيول الاصيله وافتعل مشكله طويله عريضه وصارت هوشه ومناطحه تدخل فيها صاحب المضمار ومن ثقة الحمار بنفسه العجيبه كان يعتقد ان صاحب المضمار ممكن يطرد كل الخيول ويتركه هو ابو الدمن....... لكن خاب ظنه ويشوته الرجال ببوز القدم ويالله لاعاد اشوفك ياالحمار ياقليل الحيله............ شف لك حوش يقبل بك وبا المترديه والنطيحه



نفى الحمار ومن حوش في حوش ودوران بها الخرايب الى ان لقاله زريبه قعد فيها يفكر ويتامل.......... حمار يتامل ممكن ليش لا بس تامله له حدووود تامل على قده

يقولون الهوى غلاب والعشق ليس الا للعشيق الاول والحمار قلبه رهيف ومن يوم طلع على الدنيا وهو في ها المضمار


الله لايفتنا مثل مافتن هذا الحمار!!!

رغم كل التشويت والترفيس مازال القلب متعلق بالمضمار
راحت الدنيا عليك وبتروح على غيرك ولو دامت لك ماوصلت غيرك

حمار عاد وش بيفهمه...

. زبدة الكلام..... الحمار قرر انه يرجع مره ثانيه للمضمار بعد ان انطرد منه بضعة سنين ......وترى سنين بني قريقعان تختلف عن سنيننا والتاريخ يختلف وذاك زمااان يوم الناس مايشربون النيدو والحمير مايعرفون البرسيم ...:laugh:



الحمار عارف انه لو بيرجع ماراده الا بوز ثاني وطرده ثانيه

مهيب حلوه بحقك يامخضرم وخلال هذا التفكير الحمار كل شوي يجي يترسس ويتجسس ويوايق على المضمار من ورى الشبوك......في كل سباق يشوف وش الاحوال.. من جا من راح وش صار وش ماصار


الدنيا دواره والحال ماتدوم يا فلان .........كل مده تطلع لشلة الخيول والبغال والحمير موضه وكل يركبها هالموضه حتى لو ان الموضه مهيب له ولا تركب عليه لكن يبي يساير التيار ويموت مع الناس
وياشين بعض الخيول لامشى مشية الحمير يقولون له تقدم يتقدم ارجع يرجع


الحمار قلنا يراقب الوضع عن كثب لاحظ الحمار بعد بضعة سنوات ان الموضه الحاليه ان اكثر المتسابقين من الخيول قاموا يركبون براقع... عبالهم صقور ...يعني موضه مثل موضات الشباب اللي تنتشر كل مده لاوالبراقع طويله تدودل وتلعب مع الهواء اثناء السباق

تعريف
(( البرقع هوقناع او غطاء الوجه تلبسه المراه والصقر))
:laugh:



لاحظ الحمار ايظا ان نتيجة السباق ماعادهيب مثل اول اللي يسبق ويفوز هو اللي يوصل خط النهايه
.......لا صار اللي يفوز هو اللي لابس برقع طويل ولا منه ركض قام طرف البرقع يرقص معه ويلعب بالهواء وياحسافه صاروا يتنافسون على لبس البراقع وترقيصها في السباق وصاحب اطلق اخرش رقصة برقعيه..:laugh:...ياخذ نتيجة السباق.....

والحكم بدون مقياس.... اهي احكام تقديريه بالمزاج

قال الحمار في نفسه الله اكبر بس هذا اللي ابيه انا البس لهم اسمك واطلق برقع .....:D......ويازين هذا النظام احسن من اول ايه كذا يقدرون المواهب ياسلام عليك يا ادارة المضمار
هذا هو تشجيع المواهب والا بلاش وتشوفون الحمار الدليخه وش يسوي من علوم
انا اخلي اللي مايرقص يهز رقبه
:laugh:


اوووووه بس انتظر انا مطرود ولازم اتنكر ومالي الا اسوي عملية تجميل او تغيير ملامح............ او اخلي واحد من ثيران حارتنا يعطيني بقس مخمس يغير ملامحي

لا بس هذي الاخيره صعبه اخاف اموت واروح فيها....... ويفوتني العوده للمضمار... وانا تراني اذا بغيت اصلي ما اتوجه لقبلة المسلمين.... انا قبلتي المضمار ...وماعليكم مني هماني حمار مرفوع عني القلم وحمار عاصي مع سبق الاصرار والتنهق



اتجه الحمار لمحل ابوريلين لتغيير الملامح وغير الطبيب ملامحه من ملامح حمار الى ملامح جحيش..... ومن لايعرف الجحيش................ الجحيش هذا تصغير للجحش والجحش ولد الحمار ماسوينا شئ
:D

ضبط الجحيش نفسه وتعطر وتنظف..... وشرى ذاك البرقع وارد ابو كاس طويل الحبه.... وبعد مادق من الكبسه وشد على خشته البرقع فريد النوع.............. الا وهو جاي طاااير للمضمار........... سلالالالام ياجماعه انا متسابق جديد والله يعزنا ويعزكم وكل المسلمين بطاعته


قالوا ياهلا فيك يلابس البرقع والله ان مظهرك يدل على انك منا وفيناونبي نكون متفاهمين والمنافسه تراها ياجحيش شريفه
والي يرقص البرقع اكثر له الجايزه انت تشوف الناس اللي حولك هذولا الجمهور ماعاد يهمهم من يسبق ومن يلحق يبون رقص يابن اخي ...........يبون البرقع يدهر.........

... قال الجحيش في نفسه ادري ادري يالسبهه:laugh:



ومر كم يوم والجحيش مستانس وفي السباقات له صوله وجوله ....ومع الخيل ياجحيش ....ثبت البرقع وزين الرقصه ومفيش حد احسن من حد الحمار مثله مثل الخيل بالرقص بالعكس الحمار اطلق


والخيل الاصيل ماله الا الركض


ياسلام...... ومدح لك ياهالجحيش الين ظن نفسه ابو العريف

يقولون ابوطبيع مايجوز عن طبعه

الا الجحيش نفش ريشه بين الخيول وقام يتليقف على فلان وعلان


وعادت حليمه لعادتها القديمه ...........ياشين خفة العقل والدلاخه

انت يافلان ارقص هناك............ وانت ياعلان برقعك مايل عدل البرقع بارك الله فينا وفيك:laugh:

[أبو نايف]

صحيح اهل العقول براحه.. وفي يوم من الايام والجحيش ماكمل كم اسبوع


الا واحد من الخيول جاي من البيت ومتهاوش مع المدام .....تقول له وراك ياخيلي تروح دايم للمضمار ......ترا البيت له حق عليك وانا الفرس تتركني وتروح عند ذا الفاضين ...:mad:....وانت تراك زلابه لو انك رجال مالبست برقع وقمت تهز قدام الرجال:laugh:


الحصان رد عليها الكلام الصاع صاعين وطلع من البيت من دون فطور متنكد من الكلام....:mad:..... ودخل المضمار متبرقع وعيونه مغطاة صايرة حمر من الزعل ومناقز الشياطين قدامه ....
وبينما هو يهم ببداية الرقص لينفس عن نفسه ...الا بالجحيش طامر في وجهه يقول

((يافلالان...... ياحصان ياخي لازم توضح فتحات عينك في البرقع حسب قوانين السباق تراني مانيب قديم فيذا بس قاري ذا الكلام في الجريده ))


كانت هذه الكلمات هي القشه اللي قصمت ظهر الحصان


الا الحصان ضايق من هذا الجحيش من زمان ..:laugh:....وهو يعطيه ظهره... وهي رفسه ياجماعه وعينك ماتشوف الا النور الجحيش طار خلف المظمار والبرقع تمزق والا الجحيش مسكين مغمى عليه وفي غرفة الانعاش...وخربت عملية التجميل وبانت خشة الحماروكلن عرفه........... وفضيحته صارت في جلاجل او في المزاحميه ماندري هذي اختلف فيها المؤرخون















السؤال اللي يطرح نفسه....وينصب على نفسه ...ويضرب ولدعمته ...من قائل هذه العباره




(نزل طبع ولا تنزل جبل)













واقلب القدره على فمها تطلع البقره على ام عباس
:laugh:


















مين عباس???









وشفتوا كيف الحمار ماتعلم من اخطاءه وشفتوا ليه كل يناظره باحتقار لسبب بسيط انه حمارمع سبق الاصرار والترصد ....كان بدل ماصرف الريالين على تغيير الملامح ....صرفها في عملية غسيل وصنفرة مخيخه


:laugh:




وكل عام وانتم بخير
:)
:glasses:

[ZAZA]

السلام عليكم ورحمة الله وبركاته أبو نايف

كل عام وانت بخير وصحة وسلامة .. وعيدك مبارك بإذن الله :)

الحقيقة يابونايف . سالفة حلوووووه :OO: :glasses:

وبعد الدق فيها على كيف كيفك ..;)

يسلموا أبو نايف ..... جد شكسبير سوالف ..:cool:

مسيكين هالحمار .. لا له في الثور ولا في المعيز :p :p


تحياتي

:) :) :)

[أبو نايف]

عيدك مبارك اخوي عبدالعزيز:):)

وكل عام وانت بخير

تسلم على حضورك وتعليقك ;)....الذي اسعدني
:laugh: