salman-33
16-05-2001, 05:34 AM
كنت قاعد بغرفتى مالى شغل باحد كافى خيرى شرى قاعد افكر فيج براحتى ومجابل هالتلفزيون صارلى ثلاث ايام ماكو مسلسل طلع الا واتخيل نفسى البطل وانتى حبيبه البطل مابى اقول البطله لاابتلش فيج وتاذينى سامى مابى هالدور احس انى مو ماخذه البطوله بشكل كلى ومن هالسوالف المهم مادريت الا والوالده اطق الباب هلا يمه ياى ياى وابطل الباب والا الوالده وياها اخوى الصغير حمنى عبدالرحمن لغير الناطقين باللهجه الكويتيه هاهاهاهاها شرايج بالحركه هذى المهم جان تقولى يمه سامى عفيا اخذ اخوك لحديقه الحيوان وده هناك جان اقولها والله يمه مالى خلق يبونه ايون اهم وياخذونه انا شكو ايا اللى ماتستحى على ويهك اخوك شاذى ياخذونه صج ماتستحى اخذه ونسه كل عيال خواتك واخوانك طالعين مافى بالبيت الا حمنى يالله اخذه ويهد زين يمه زين انا شدرانى ان قصدج جذى المهم طلعنا انا وحمنى ودخلنا الحديقه واذانى باسئلته سامى هذا شسمه وهذا شسمه وهذا الذكر والا النثيه وهذا ليش عصعصه قايل جذى وهذا ليش يطق هذا ومن الاسئله الباجى اللى اتدوخ هذا غير الاسئله اللى ماتنقال المهم انا من كثر الفرفره تعبت مليت يارايح لقفص الزرافه يامار قفص الشواذى يارايح صوب النمور وانا وراه المهم اخر شى قالى ابى اشترى نفيش ابى اعطى الشواذى عطيته دينار يشترى وقعدت على الكرسى مقابل قفص الغزلان والحمير الوحشيه اعزج الله وانا قاعد مندمج بمنظر الوان الحمير الوحشيه مادريت الا وانا بافريقيا التفت يمينى والا منو على يمينى ؟ مااتصدقين انتى بس شوى بعيد ومحاصرينج الاسود حبيبتى بورطه ياللهول جان اييج اركض بينى وبينج انا عبالى اسدين قلت هينه السالفه بوكس بايدى اليمين ورفسه بريلى الشمال اتخلص السالفه بس اطلعو سبعه انا من وين اييب اربع ايدين وثلاث اريول قلت ماكو الا طريقه طرزان اتعلق بحبل واقط روحى وانتشلج من بين براثن الوحوش ركزى على كلمه براثن الوحوش والله انا فلته المهم جان اركض اركض واتعلق بغصن اشيره وانط والا تدرين شصار ؟ والا انا يمج بين الاسود مو انكسر الغصن مال الشيره وطحت عندج هم بين براثن الوحوش ولييه شيفكنا الحين انا وين وهالطلايب وين شكو راز ويهى وافكج من هالاسود بس لما فكرت بالسالفه والا صراحه تستاهلين الواحد يموت عشانج بس والله غميضه مابى موته سريعه ابى انقذج عالاقل ادش مستشفى وتزورينى واتييبيلى ورد واذلج كل يوم انقذتج انا اللى انقذتج افا انا سامى اللى قط روحه بين براثن الوحوش وانتشلج من بينها اتسوين فينى جذى وكل يوم اليما اموت اخليج اتكرهين الحظه اللى انقذتج فيها هاهاهاها لكن موته سريعه جذى ما اعتقد لها معنى وانا شدرانى انقذج واتبهذل وانتى تروحين وتحبين سائق الاسعاف اللى شايل جثمانى لالالالالا ماكو فايده بس الحين مو وقت هالكلام خلينى افك روحى انا بروحى مبتلش وبالمره افكج يالله يالله نفس الشى وانا احاول انى انقذج مادريت الا والاسد ياينى من ورا وحط مخالبه على جتفى التفت والا منو ؟؟؟؟؟؟؟ العامل مال الكفتريا اللى بالحديقه يقولى الود ده معاك ؟ اشوف والا حمنى عيونه صايره حمر من كثر البجى الله لايبارج بالساعه اللى يبك فيها وياى شفيك جان يقولى المصرى مش حرام عليك يافندى يامحترم الواد بئاله ساعه بيعيط وانا مفيش حد بالجنينه كلها مسالتوش ازا كان يعرف الود ده ياعمى خدو بالكم من اولادكم ده هرانى عياط شكرت الريال واعتذرت له يامعود حقك علينا اسفين تعبناك ويانا جان يقول لا يا افندى محصلش حاجه بس انا سمعته واهو رايح يقول الله يخرب بيتك وبيت اللى بيشتغل بالكويت على اللى بيجى الكويت وكلام جنه يسب بس انا قلت خله يولى اهم شى ان حمنى مافيه شى انا ما احاتى الا شى واحد الوالده اذا درت شيفكنا جان اقول لحمنى حمنى بابا مو اتقول لماما عفيا الشاطر راح اوديك قريه الطفل واشترى لك بعشر دنانير فيش وبعشر دنانير تذاكر ولما نخلص نروح للماكدونالد ونتعشى وانروح بعدين تدرى وين ؟ راح اوديك لفانسى وولد مال الالعاب واخليك تشترى اى لعبه تبيها انا بالنسبه لوعودى نفذتها كلها وشريتله لعبه بخمسين دينار يعنى صرفت على حمنى خمسه وسبعين دينار بس عشان مايقول للوالده بس حمنى الله يهداه صج ياهل ورحنا البيت احنا دخلنا البيت والله لايراويج حمنى اول ماشاف امى جان يطيحله بجى الله الله فضحنا الله لايبارج بابليسه جان اتيي الوالده ركضه هو هو شفيه ولدى حمنى يمه شفيك جان يبط السالفه كلها وخسبقنى الوالده خزتنى بنظره لاحول ولا قوه الا بالله جان تعطينى من الكلام اللى يحبه قلبج ياشسمه وياللى وياللى فيك وياللى ماتستحى ويا اللى ماعليك اتكال والشرهه مو عليك وانتى ال متى ما تصير ….. ومن هالكلام المرتب ادرى انتى يازتلج السالفه واستانستى لما اتزفنى الوالده كله منج الله يهداج كل ما اتذكرج انسى كل شى من حوووولى بس شسوى خربطتينى بس مهما زفتنى الوالده هم انا مستانس انج انتى السبب بس عسى يبين بعينج