صويلح وحصيصه (مسلسل مسروق) (الحلقه الأولى)

[زهر الليالي]

في يوم ..مشرق بالليل..ومن صباح هذا المساء...ولد فتى مملوح ..يدعى صويلح
وكان هذا الفتى..يتميز منذو نعومة اصابعه ..بأنه خرشه ..مع شيء من الطفاقه..ولايهون الأستدلاخ
ويعد صويلح..ايضا..اول من انولد بالعالم..وهو عمره سبعطعش..يعني سبعطعش..سنه منسدح ببطن امه يقول منيب طالع لين تشرون لي سيارة..
وكذلك..وبعد اربع دقايق ..وست وسبعين ثانية..من مولد صويلح...ولدت الفتاة حصيصه..
والتي تتميز..بقناصيعها..والتي كانت سبب ضياع مستقبل صويلح...وايضا..تتميز ..بطول القامه..حيث انها اذا جت تركب السيارة يصفطونها بالشنطه اللي ورا
بعد ..ان مرت عدة سنين...وتوالت الأيام ...وفي اليوم العاشر..من شباط الخامس حزيران السابع من عام الف وسبعمية وسبع وثمانون من سبتمبر نوفمبر الجاري..للميلاد قبل الهجرة
في ذلك التاريخ اللي قبل شوي..والله منيب قايله مره ثانيه..
ومن صباح ذلك اليوم.......
ترررررررررررررررررررررررررررررررررررررن = هذي ساعة صويلح الخراشه
قام صويلح من فراشه..وبكل أدب اخذ الساعه..وفلق بها هندي
فتح اللمبه..حيث كانت لمبه لونه اسود ..على باله بتصير ظلام..
وكان صويلح يحس..باحساس ..نفس احساسك اذا ارسلك ابوك تشري مقاضي ويوم وصلت البقاله نسيت وش تشري..
فتح صويلح الطاقه ( النافذه - الشباك )..وقعد يتمغط ..ويتمغط...لين تمصع ..ولكن مازال يتمغط ..يوم ناظر تحت ..ترارا (موسيقة تصوريه) انصدم ..وصابه الذهول..مع شد عضلي بالخشم...وانهبل..وجاه اسهال باصبع رجله اليسار...ياللهووول ماذا رأى صويلح...؟؟
عندما..قام صويلح..الى الطاقه (الشباك - النافذه ) ..نسينا نقولكم انه كان فيه ستارة على الطاقه..تونا مركبينها....
لأن مساعد المخرج ..الأخ محماس..توه يجيب القطة حقت الفلم..حيث انه قاط معنا بستارة..خربزية مائلة الى اللون الأخضر..اللي لاشفته من بعيد قلت انه اسود..كاروهات..مقلم ببرتقالي..مع قليل من الشخابيط عليها..تقل شخابيط واحد بثاني ابتدائي حاء....كل ذا وصف الستارة..
اهم شي..فتح صويلح ..الستارة ..ومن ثم الطاقه..وبعده قليل من التمغطات المتتابعه...لفت نظره ..شيء بحوش الجيران..
وصرخ صويلح فجأه قائلا : وجع ياملا البلا وش ذي الجنيه..وانطلق يجيب حطبه موزيها بالدولاب..
تنبهت له الجنيه : عض على شحمه لا اجي احوسك ..انا حصيصه بنت جيرانكم ..اول مره تشوف..وحده منفقع بشوشتها قنبله ؟
رد عليها صويلح...بالفعل..وليس بالقول...حيث..نشب الحطبه بجبهتها...واتبعها..ببعض الشتائم...منها ..قال : انثبري بس ياللي خشتك كنها حاصل قسمة 72 على 87 .
ردت ..عليه حصيصه..بنظرة خاطفه..تدل على ..مدى ماتتمتع به من خبث ولعانه ونجاسه لو يفرقونها على فصل اولى ثانوي طاء بمدرسة خزاعة بن اموكاشي..بنيجريا لكفتهم ..
وردت عليه..قائله : كش عليك..يارب تزلق بقوطي صلصه على خشتك..ويمر ددسن محمل رز ..ويدعس خشمك ..انت ووجهك اللي كنه ..دفتر توحيد ابو سبعين
فيه هذه اللحظه..الحاسمه من الهوشه..صويلح فهم غلط..
وقال بنفسه..ياعمري ياحصيصه تقول يارب يدعسني ددسن محمل رز بس ؟؟ ياربيييه ماقالت محمل اكياس سمنت (علما ان كيس السمنت اثقل من خيشة الرز بخمسة كيلو ) ياربييييييه ما تحمل..حبتني حصيصه لا ما اقدر اي كانت اي كانت = يعني ما اقدر بس بالأجليزي
وبلحظات ماكان صويلح يهوجس..جته بياله مسرعه مره ..ماردها الا خشته ..وانتبه انها حصيصه ..كانت تشرب شاهي...
جاء حس بهول الموقف..وقال لها بيتين شعر ...:
ماكنت ارضى تزعلين ....وانتي بتهديني الزعل ( بعذره والله فالقته ببياله )
محروم عيني شوفتك (الله من النصب ) ........لا تحرميني كلمتك ( يقصد فلقتك )
ردت عليه حصيصه...وبــــكل ماتحمله من رومانسيه في وجدانها ..قائلة...: اقول انثبر وهات بيالتنا لا اجي اتوطى ببطنك
قال صويلح : هاه ايه البياله سمي هذاه ( فهم غلط صويلح وقال بنفسه..اكيد تبين احط لها رساله بالبياله..بس على مين تلبعها ..وحط لها علك ابو طبعه ..وكانت الطبعه صورة عنز منسدحه )
===============================================================
------------------------------ فترة إعلانية اصبروا شوي الحين نجي ------------------------------
صابون ابو عنز الرهيب....تراه ازين شي..اشره تراه رهيب ....حتى بصوا على عصاقيل صويلح في المسلسل
عصير بردقان ..ذو الصفطه الذهبيه....تشربه بالشفاط..مايتنثر ولا شي..واذا تنثر على ثوبك...جب ثوبك نغسله
------------------------------ عودة لإكمال المسلسل ------------------------------
===============================================================
اخذت حصيصه البياله ..وقزت العلك ...( وفهمت غلط هي بعد ..وقالت بنفسها..ياربيييه ..شكله حبني..وش دراه ان ابريق الشاهي حقنها فيه شخر..واننا نبي نسده بعلك )
ومير تلتفت على صويلح ..وتقوله : خذني بقايا جروح ...ارجوك داويني (بهاللحظه صويلح قال يووه الصيدليه صاكه) صاكه = مسكره
صويلح ...وصمخ ...صويلح وصندوقين صمخ يا السلوقي وش قاعد تسوي = هذا ابو صويلح جاي يركض
صويلح : سم يبه هاه وشو نعم وش سويت والله موب انا اللي اخذ موترك وفحط بالشارع اللي ورا وصدم الهندي وفقع كورة جيرنا ..
طبعا ابو صويلح..مسك صويلح وعبر عن مشاعره ..بحيث انه صفقه تصفيقا مبرحا
وبنفس ذيك اللحظه ...
حصيصه ...حصيصه .. ياجعل يطيح عليك مكيف صحراوي وجع وش تسوين بالحوش = هذي ام حصيصه ..جايه تركض
حصيصه وبكل لطف ردت : اصلا ماعندنا مكيف صحراوي
طبعا ام حصيصه ..مسكت حصيصه ..ووربطت قناصيعها بالمروحه وشغلتها على رقم 5


>>>>>>>>>>>>>>>> والى اللقاء في الحلقة القادمة

[الكييف]

الله يفقع مرارتك
شوقتينا على المسلسل
كله دعايات مثل جورج قرقاحي ابو المليون

[جاسم]

شباب ممكن واحد يقول لي الزبدة

[زهر الليالي]

لا... أكيد حتكيف على المسلسل كيف محصلش :)
الحلقات القادمة أكثر أثارة

[زهر الليالي]

الزبده لسه في البقرة :)

لا ... صحيح دور لك على مترجم سعودي-أماراتي
أو خل شبوحة تساعدك :)

أو الجمل :)

المهم دبر نفسك لأني ماني فاضي لك :(

[شبوحة]

جتلتونى من التكعكع(لغة امارتية قح)

جويسم ترى انا مب فاضية دور على توتة تترجم

اقول زهر ودى اعرف شىء الحين هالخرشة صويلح امة امارتية والا ابوة

ترى مسلسل رهيب ويصلح يأخذ جائزة السعفة الذهبية

زهر حاسب لاحد يزيغك ؟؟

فى انتظار الحلقات الياية اكيد بتكون اكثر تشويق

[جاسم]

بس كذا

الحين اتصل السفارة او ابعث الرسالة مع هذه القصة
السفارة الإماراتية للتنويه

واحط توقيعي

يشوفها السفير يقول بسرعة في ظرف 24 دقيقية لا حظ مب ساعة

تترجمون القصة

علشلون عيل

[توتة]

قصة رهيييييييييييييييبة يا زهرررررررررررر

اديلووووووووو ادي .... :):):):):)


شبووووووووحة ===> :) ليه يا شبحبح رميتي الترجمة عليّه ..
الهرووووووووووووووووب .... هههههههههه بس جد حلوة من زهر :)

جاسم ===> هذي حلاتها تقراها ببرها ... غير صالحة للاختصار
ركز عالقصة ... و ما بتشوف نفسك غير منسدح من الضحك ...


رهييييييييييبة يا تسالي .... :)

[جاسم]

يعني يا توتة ما تقدرين تقولين لي الزبدة


انا اذا قريت 10 اسطر مخي يوقف

هذا النظام شذي ايش اسوي

لول لول لول

[زهر الليالي]

جتلتوني !!
تكعكع !!

أكيد جاسم راح يهستر :(

أما حكاية الخرشه فهي كلمة عالمية مسجلة في منظمة اليونسكو :)

[زهر الليالي]

لا يهمك جاسم
أحيانا يضحك بدون ما يفهم النكته :)
وأحيانا بالمقلوب ... يضحك ضحكة واحده أول ما يدخل الطرائف وبعدها يقرا النكت :)

لووووووووووووووووووووول