شباب أنا نويت على مسجل ممكن أحد يساعدني

[مجنون سيارات]

كيف الحال شباب

انا خلاص نويت اركب مسجل MP3

لان صراحه طفشت من الكاسيت بعدين السي دي ارخص :D

فا بغيت أحد يساعدني ويشور علي في مسجلات حلوه

خصوصا الاخوان أصحاب الخبره .....

DDesigns
902

على فكره سيارتي سوناتا 2001
ميزانيتي حدود 1200ريال لو في زياده شوي ما عندي مشكله
ابغيه يشغل MP3 ... وإنه ما يقطع مع المطبات (واحد متعقد من الـ CD Player :D ) ... شكله جميل وحلو ... وإذا يشغل VCD يكون شيء حلو ...

وطبعاً الكاسيت راح ينلغي نهائياً من عندي ... وأظن إن DDesigns عنده فكرة عن حجم فتحت مسجل السوناتا :)

[DDesigns]

يا هلا فيك اخوي ...

ايه والله السوناتا ايام ايام لوووووووووووووول ..


المهم اخوي طبعا ما دام اتك بالسعوديه فا ما لك الا Pioneer ولا تخاف تراه زين ..

عموما انا انصحك تاخذ هذا الموديل ::


Pioneer DEH-P8650MP

http://www.pioneeraus.com.au/images/products/DEH_P8650MP_ES.jpg

ما ادري اذا نزل ولا عندنا بالخليج المفروض انه نازل من قبل 4 شهور ..

اكيد نزل مستحيل ..

طبعا سعره راح يكون اغلى من 1200 يعني بالامارات المفروض يكون سعره 1300 بس بالسعوديه لازم دائما كل شيء غالي ..

عموما مثل ما انت شايف الشاشه ملونه يعني راح تخبل الشباب فيها ..

وهذا يعتبر المسجل القبل الاخير في القوه من هذه النوعيه لو تحصل لي والله اخذه لانه فيه شرايح Burr Brown لزياده نقاوه الصوت ..


عموما انت شوف وضعك ..

اذا حصلت موديل 8550 اللي هو حق السنه اللي طافت لا تاخذه الا بسعر رخيص جدا جدا ولكن انصح بالجديد ..

شوف ايش يصير معاك وقول لي .:banana: :banana:

[مجنون سيارات]

مشكور على سرعت الرد

لكن ما عطيتني تفصيل اكثر عن المسجل يعني نقاوة الصوت وهل ممكن يعني يقطع الصوت على اقل حركه او مطب
وهل ممكن يشغل VCD ??
طبعا يشغل MP3 أكيد وألا ؟
والمسجل ألي اعلى منه كم سعره وش هي مواصفاته ;)

[loolicpolic]

أهلين أخوي DDesigns..

بصراحة الموديل الي حاطه خيالي.. بس ما في واحد نفسه فيه راديو، كاسيت، و سي دي؟ طبعا ملون :D ..


تحياتي..

[مجنون سيارات]

أخ DDesigns

المسجل نزل عندنا في السعوديه شفته المسجل شكله حلو

لكن زي ما قلت في السعوديه كل شي غالي لقيته بــ 1700 تقريبا ريال سعودي وش رأيك في السعر انت هل هو يستاهل او لا وكم سعره في الامارات ؟؟

أما عن الموديل Pioneer DEH-P8650MP يقول خلص

عندي سؤال كم راح يكلفني تركيب المسجل اذا نويت عليه انشاء الله طبعا التركيب عند الوكيل ما عندك فكره عن سعرههم وشغلهم في التركيب ؟؟؟

ما أدري أخوانا في البحرين ما عندهم فكره عن سعر المسجل عندهم ؟؟

لأن اذا لقيته في البحرين بسعر حلو وفرق كبير في البحرين وانا مغمض راح اخذه :D

[922]

السلام عليكم

مجنون سيارات ماشاء الله اخوي DDesigns ماقصر وعطاك المفيد

وترا الموديل هذا مو طبيعي وان شاء الله بشتريه

طيب اذا انت ناوي فديو VCD تاخذ لك مبدل بايونير وتعدله عشان يطلعون لك مخرج فديو ومجرب الحركه هذا وشغالة


=================

DDesigns

الالباين اللي عندك مافيه مخرج Optical مادري

مانويت تطور crossover يكون فيه Optical

والله بيكون SQ عندك موطبيعي الظاهر بيكون THQ معدوم

[DDesigns]

السلام عليكم


آسف اخوي ما رديت بسرعه لاني ضيعت قعدت ادور موضوعك بشوف ايش صار معاك بس ما حصلته والحين حصلته لووووووووول .


عموما المسجل هذا يعتبر من افضل المسجلات يعني لو اخذته راح تكون بدايتك سليمه في انشاء سيستم صوتي ..

نقاوه ؟؟ هههههههه ما يحتاج اي كلام حبيبي هذا المسجل فيه شرائحBurrBrown اتمنى تكون في مسجلي .. بس وش نسوي الزين ما يكمل .

تقطيع مطبات ؟؟ لا لا انا عندي عدسه البايونير من اقوى العدسات عندي هي اقوى من الباين ما تقطع ابد ..

اذكر كان عندي مسجل بايونير اقل فئه تقريبا وكنت طاير طبعا واحد لف علي واضطريت اني اوخر عنه ودخلت على لفه اليو تيرن ونطيت الرصيف السياره طارت في الهواء طبعا قطع المسجل لان من قوه ضربه الرصيف ..

شفت يعني اذا تبي تضرب رصيف اكيد بيقطع بس مطبات عاديه او تجي طاير ولا تطق بريك على المطبه عادي ما يقطع فيه مضا للاهتزازات .

اما ام بي 3 فا نعم فيه .

اما فيديو سيدي فا لا وما ادري عن الطريقه اللي ذكرها الاخ 902 ما عمري سمعت فيها ..

ولكن من يبي الفيديو الحين مو كل الاغاني الحلوه تنزل فيديو يعني اغنيه ولا اغنيتين تكون مصوره في الالبوم .


اما المسجل اللي اعلى منه طبعا هو اعلى شيء في البايونير سعره راح يكون عندكم اتوقع 2200 ما دام هو 1700 العادي لانه يحبون يسون فرق 500 ريال بين الموديلات ما ادري ليش ..

عموما المفروض سعره عندنا 1700 والمديل اللي تبيه 1300 .

الفرق في ميكانيكه فتحه الباب لانه يصير شاشتين ( ما انصحك فيها العادي اصرف لانه يبيله عنايه شوي )

والفرق في مواصفات خاصه للمحترفين في السيستم يعني ما راح تاذثر معاك كثيروكلهم نفس الالوان ونفس الشرائح ونفس كل شيء لا تخاف خذ الموديل 8650 وبس .

=============

الاخ الي يسال عن وجود مسجل ملون كاسيت هههههههههههه لا مستحيل ما اظن يسونها ما فيه رغبه كبيره للناس في الكاسيت الحين ولو بيسونها اعتقد راح يسونها في المسجلات الكبار اللي تجي سيدي وكاسيت مع بعض ..

خلاص الكاسيت موضه قديمه بس حنا الشرق الاوسط للحين نستخدمها ..

شباب انا اعتبر بايونير بدت معركه الالوان يعني السنه الجايه راح تكون المسجلات كلها الوان..

الحين هم بدو ب 16 لون بكره نبدي بالالاف مثل الجوالات لوووووول .

===================


اما بخصوص التركيب فا انت من وين ؟؟ ما دام قلت البحرين شكلك من الدمام ولا الخبر ..

روح شارع الملك فهد حق الجوالات في الخبر بتحصل محل صغير على يدك اليسار اسمه الدواي هذا الهندي مخه نظيف مررره ..

حاول معه انا يسولي اياه ب 50 مدري 55 ريال تركيب .

شوف انت اذا تبيني ارسله لك من دبي براحتك يعني مثلا اذا هو هنا 1300 وارسله لك مثلا 50 او 100 ريال انت ربحان صح ولا لا ؟؟

انا ما ابي شيء خدمه انسانيه بس ..

شيك البحرين وشوف ..

انا ترا ما اعرف سعره في دبي للحين ...

ويا ليت لو تشوف لي الموديل 8650 و 9650 الموجودين عندنا في السعوديه صناعتهم وين ؟؟ ابيك تقراء المكتوب على المسجل مو الكرتون علشان اشوف اللي عندنا في دبي مضروب مجمع في جبل علي ولا كلهم نفس الشء ؟


====================

هلا 902 حياك الله ...

ايه عندي اوبتيكال ههههههههه ..

تعرف الشباب الامريكان مرتفع ضغطهم لان الموديل اللي عندي نسخه يابانيه او تقدر تقول شرق اوسط وهي تجي مع اوبتيكال بس النسخه الامريكيه ما تجي معاها لووووووووول ... ( بس هم عندهم راديو ساتالايت قهررررررر )

ان شاء الله راح استعمل هذا المنفذ بس يبيله فلوس ..

يعني انا عندي اطور الميدرينج والتيورات وكل شيء بعدين هذا اخليه اخر خطوه لانها تكلف ..

مثل ما انت عارف الاوبتيكلبصري وما فيه اي Preout voltage يعني ما راح استفيد من 4 فولت اللي عندي ..

يعني احتاج DAC اللي يحول ديجيتال الى انالوج . واحتاج preamp علشان اقدر اتحكم في الفولتج اللي هو يعلي الصوت ويقصره و احتاج signal prossecer علشان يسوي معالجه ويسوي تحويل من Optical الى RCA :shock2: :shock2:

بس لو سويتها فا انا :banana: :banana: :banana:

والفلوس :cry: :cry: :cry:

[مجنون سيارات]

DDesigns

صراحه ما اقدر وش اقولك كفيت ووفيت انا أساسا سالفة VCD ما كانت مهم بنسبه لي بس حبيت اسئل هل فيه أو لا

انا من سكان الظهران يعني الخبر الدمام :D والمحل ألي وصفته لي اعرفه واشوف ناس واجد يركبون عنده مسجلات وشغلات للجوال وانشاء الله اذا شريت المسجل راح اركبه عنده بس ما قلت لي بايونيير غالبا وش صناعته (معليش طفشتك بكثر الاسئله لكن استحملي شوي :p لاني غشيم في الشغلات ذي :D )




902

شاكر لك على الرد زي ما قلت في ردي على الأخ DDesigns
سالفة VCD ما كانت مهم بنسبه لي بس حبيت اسئل هل فيه أو لا

مشكورين ما قصرتوا جزاكم الله خير :)

[ابداع2004]

بسم الله الرحمن الرحيم اخوي العزيز خذلك جي في سي ام بي ثري تراني مجربه مرره ممتاز صوت نقاوه :eek: طبع الشاشه كبيرة ومااعرف كيف احط لك الصورة مع الاسف واسمحلي على التقصير000

[مجنون سيارات]

ابداع2004

مشكور على ردك بس اذا ممكن تحط موديل المسجل والسعر اذا ما عليك كلافه

[ابداع2004]

ابشر بعزك ياخوي jvc-kw-xc838 سعره تقريبا 900 ريال ويمكن رخص اتوقع 00

[DDesigns]

اخوي ابداع ..

المسجل الجي في سي اللي تكلمت عنه زين بس ما يوصل الى مستوى البايونير مستحيل يعني خصوصا الموديل اللي انا حطيته لانه احترافي كثير ..

وثاني شيء انت حطيت مسجل Double-DIN يعني حجمه كبير نفس حق الجموس واعتقد هذا ما يحتاجه صاحب الموضوع لان معاه سوناتا ..

ومشكور على المداخله .

[beast_camaro]

الموضوع حلو مرة وانا حبيت اشارك بصراحة انا عندي سؤال اليكم

انا رحت حق محل المسجلات عشان اركب مسجل جديد بدل الي عندي وكنت حاط فبالي اركب مسجل سي دي وكاسيت

وشفت مسجل سوني كاسيت ويفتح سي دي ب700ريال

وواحد mp3 مع كاسيت ب900ريال


والرجال نصحني اركب مسجل جي في سي ب300 ريال وسيدي بكس فيه 12 سي دي mp3 جي في سي بعد

وانا سماعاتي الي عند السواق مشقوقة فقال بيبدلهم وبيركب لي سماعات بايونير

وكل مع التركيب بيطلع عليي ب1000 ريال


بوشو تنصحوني :think:

على فكرة السيارة كمارو

[الأنصاري]

والله الشباب ماقصرو

لو حبيت تاخذ شئ فوق 1000 فاعتقد البايونير ممتاز جدا

بس لوحبيت شئ رخيص وممتاز ((مايوصل مستوى البايونير)) بس حلو
عندك جي في سي في نوعية 800 ريال مع ام بي ثري فية سي دي وفية كاسيت مدمج واحلى ميزة عندي ان يكتبلك اسم الغنية على الشاشة ومن ناحية التقطيع انا عندي لاند كروزر اركب الرصفان واروح البران وماقطع علي ولا قطعة

بس حبيت اتكلم عن مسجلي الرخيص:D :D

بس دام ان الميزانية عندك فوق 1000 اعتقد البايونير ممتاز

[loolicpolic]

رد مقتبس من DDesigns


=============

الاخ الي يسال عن وجود مسجل ملون كاسيت هههههههههههه لا مستحيل ما اظن يسونها ما فيه رغبه كبيره للناس في الكاسيت الحين ولو بيسونها اعتقد راح يسونها في المسجلات الكبار اللي تجي سيدي وكاسيت مع بعض ..

خلاص الكاسيت موضه قديمه بس حنا الشرق الاوسط للحين نستخدمها ..

شباب انا اعتبر بايونير بدت معركه الالوان يعني السنه الجايه راح تكون المسجلات كلها الوان..

الحين هم بدو ب 16 لون بكره نبدي بالالاف مثل الجوالات لوووووول .

===================

:

عفوا أخوي.. أنا ما سألت عن كاسيت ملون :blink:

سؤالي: هل يوجد موديل من بايونيير نفس الي ذكرته يجمع بين الكاسيت والسي دي والراديو في نفس الوقت؟

أنا عندي سوني، سي دي + راديو من غير MP3، فحبيت أستفسر بس :confused:

شكرا، وتحياتي..

[DDesigns]

نعم لا يوجد حتى هذا النوع ....

[666]

رد مقتبس من loolicpolic
عفوا أخوي.. أنا ما سألت عن كاسيت ملون :blink:

سؤالي: هل يوجد موديل من بايونيير نفس الي ذكرته يجمع بين الكاسيت والسي دي والراديو في نفس الوقت؟

أنا عندي سوني، سي دي + راديو من غير MP3، فحبيت أستفسر بس :confused:

شكرا، وتحياتي..


أشوف ان السوني سوت هالشاشات قبل البايونير على مسجلات السيارات .:D

[مجنون سيارات]

أخ DDesigns

اليوم رحت لوكيل بايونير

وحصلت Pioneer DEH-P8650MP تجميع تايلند :confused: وش رايك انت ؟؟

ودورت موديل Pioneer DEH-P8550MP عند الوكيل او محلات ما حصلت

وش رايك في موديل P7650MP ؟؟؟ نفس الاداء او في فرق كبير بينهم ؟

[DDesigns]

اها انا كنت متوقع كذا ...

عادي مو مشكله تايلند انا كان عندي واحد وكان تايلند وماشي زي الحلاوه ..

بس لان العاده اغلى موديل يكون يجي ياباني اصلي ما يخلونه تجميع تايلند لانه ما يعرفون يجمعونه صعب عليهم ..

بس خلاص خليني اشيك الوكاله عندنا واشوف اذا هو بعد تايلند ولا لا .