لو احد دعم سيارتك بخفيف من ورا .. وش بتسوي ؟

[الكونكورد]

هلا وغلا بالشباب ..

يليت اعرف راي كل عضو بهالموضوع ..

مثلا انت بشارع .. ويجيك مثلا هندي ولا حتى سعودي او خليجي حسب دولة العضو ,,, ويجي وراك وتضغط بريك بقوة لان السيارة الي قدامك ايضا ضربت بريك " فرامل " بقوة .. والي وراك .. بووووم يطق بسيارتك ...

ونزلت من السيارة تشوف صبغ السيارة تقشع حقتك وسيارتك (جديدة) وصار فيها عيوب بالبويه بس ما صار شي لبدي السيارة ...


وش موقفك من الي صدمك ؟؟

[MuGeN]

هـ هـ هـ هـ هـ هـ

مو بعيدة أقتله :D ..

الصراحة على حسب .. مثلاً يجيك شخص يقول إني الغلطان و يقلبها مهزلة ؟! .. أكيد ما راح أسكت ..

بس يقولون .. بالإحترام تقدر تحل أي شي ...

[lumina]

الصراحه انا جربت ودعمت واحد بسيارة ربيعي عليها مدعمية الصب القويه والسيارة كامري بوكس المهم سيارته راحت ملح من الخلف ..
لكن إذا دعمني واحد من الخلف وسيارتي جديدة بطلب الشرطة للتخطيط وبروح التأمين .. عيل ليش ماخذ سيارة وكاله فيها ضمان .. خلنا نطلع جيمة السيارة ..:)

[loolicpolic]

طبعا، بطلب الشرطة :) ..

لأنو تأمينه بيصلحلي، ومادام سيارتي جديده، بتتصلح في الوكاله :banana: ..

وبعدين، بقوله: الله يسامحك :D ..


الله يخلي التأمين، والتأمين الشامل بعد!


تحياتي..

[oil_HKS_lio]

انا ضربت تاكسي كرسيدا وتاكسي كابرس صابونه ولا قالو لي شي

انا مره ضربني مكسيما2002 بدل ماتتعور سيارتي تعورت سيارته واذا قالك القايل صحيح النار ماتحرق سوى اقدام واطيها

اكيد تعرفون الكبارس 87 لحمه خشن:laugh:

[سنـاري]

اذا صدمني واحد من ورا صدمة خفيفة

يعني بس تقشرت البوية او عفته بسيطة

طبعا النظام في السعودية يقول الخطأ عليه 100%

المهم انزل من السيارة و اروح اسلم عليه و اقله كل شيء قضاء و قدر و انا مسامحك

و في امان الله لا مرور و لا حاجة

و اذا صدمه قوية من ورا راح فيها الصدام و الشنطة و الرفارف ( الله يبعدنا و اياكم عن هذه الحوادث )

انزل و اسلم على الرجال و اقله الله يهديك و يصلحك

و ادق تلفون على المرور و استنا الين يجوا و يقدروا الحادث و يعطوني ورقة اصلاح

و انا متنازل ... و كل واحد يروح لبيته

ما ابغا لا تأمين و لا تعويض و لا حاجة

الواحد يقول الحمدلله و بس

:glasses2:

[loolicpolic]

رد مقتبس من سنـاري
اذا صدمني واحد من ورا صدمة خفيفة

يعني بس تقشرت البوية او عفته بسيطة

طبعا النظام في السعودية يقول الخطأ عليه 100%

المهم انزل من السيارة و اروح اسلم عليه و اقله كل شيء قضاء و قدر و انا مسامحك

و في امان الله لا مرور و لا حاجة

و اذا صدمه قوية من ورا راح فيها الصدام و الشنطة و الرفارف ( الله يبعدنا و اياكم عن هذه الحوادث )

انزل و اسلم على الرجال و اقله الله يهديك و يصلحك

و ادق تلفون على المرور و استنا الين يجوا و يقدروا الحادث و يعطوني ورقة اصلاح

و انا متنازل ... و كل واحد يروح لبيته

ما ابغا لا تأمين و لا تعويض و لا حاجة

الواحد يقول الحمدلله و بس

:glasses2:

متنازل :blink: ..

3 أو 4 دعمات وأفلس :laugh: ..

يا سيدي، وجهة نظر، وشكلك طيب..

أحترم رأيك..


تحياتي..

[RamAir]

انا مع سناري لو صدمني بقوة او خفيف بسامحه لأنه حديد وما يستاهل اخرب اخلاقي بسبته بس اهم شي يكون الي صدمني متعاون ويعترف بغلطتة والحديد معوض :cool:

[black scorpion]

انا اتفق مع اللي يقولوا ان الاحترام سيد الموقف يعني لو نزل الرجال و اعتذر وقال انه هو الغلطان ما رح اخد منه ولا شي بس اخد ورقة اصلاح وقدر الله و ما شاء فعل اما اذا كان مؤمن يعني هو ما بيدفع من جيبه يصير كلام ثاني.:) الله يبعدنا عن الحوادث
الكلام دا اطبقه اذا انا بسيارة خفيفة صداماتها اما اذا كنت بالجمس ولا الكابرس كلهم موديلات قديمة افكر اني ما انزل من السيارة لاني عارف النتيجة في سيارته وهو الغلطان 100%:D

[الشبابي]

موضوع جميل ...
انا بالنسبة لي قد انصدمت من الخلف كثير وسامحت كل اللي صدموني لكن مرة واحد قهرني بغيت اذبحه ...
القصة : كنت ماشي في امان الله والاخوان معاهم كورولا قديمة جايين بسرعة من ورى وصدموني لأنهم ما كانوا اساسا يطالعون بالطريق ...
طبعا هم كانوا مسرعين وانا ماشي عادي ...
المهم نزلت وظهري يألمني وظنيت ان الخلفية كلها راحت ... بس الحمد لله الصدام تكسر على خفيف ...
المهم تعرفون ايش سوى راعي السيارة ؟؟؟
نزل وطالع بقاعدة لوحة السيارة الامامية حقته وقال : الله يعين مين يصلح لي سيارتي ... !!! تخيلوا يفكر في سيارته والناس متجمعه علي يقولون لي تبغى نجيب الاسعاف ولا نوديك المستشفي ؟؟؟
ثم جا يبغي يطلع الغلط علي ... مسكته وقلت له : يا ابن الحلال تراك صادمني من الخلف وانت طاير بدون ما تضغط فرامل حتى ... امش الله يعطيك العافية ...





















اخوكم الشبابي

[CRX]

هلا و غلا

اقول اخوي كتر منها والله تحصل معاي والمشكله حتى المرور يقول لك تنازل يارجال وخلك كريم بس لو كان واحد طيب :D ماكو مشكله بس ادا كان شخص متكبر نو ويه ان اتنازل عنه حقي :banana:

[جداوي كول]

والله لا سمح الله طبعا لو احد صدمني من ورا

ونزل :damp: اتا سف ما انتبه او شي زي كده :think: :think:

هادا لو كان سعودي وكبير في السن طبعا اقله اتوكل على الله بس اللهم خلي المرور يجي عشان التامين وازا ماكان مامن

ربنا يعوض :Sad2:

[ABD 911]

إذا كانت خفيفه رح أتنازل وأقوله جزاك الله خير وأمشي .. ماعندي مشكلة ..

أما إذا كانت قوية فأشوف الرجال هل هو قادر على تصليح سيارتي
إذا كان قادر فالمرور طبعاً ..


أما إذا كان واحد مسكين توه ماسك تاكسي و لا واحد فقير ولا حارس مدرسه وماشابه .. فأتنازل عنه .. عل وعسى ناخذ أجر فيه ..


ABD 911

[FSM]

رد مقتبس من ABD 911
إذا كانت خفيفه رح أتنازل وأقوله جزاك الله خير وأمشي .. ماعندي مشكلة ..

أما إذا كانت قوية فأشوف الرجال هل هو قادر على تصليح سيارتي
إذا كان قادر فالمرور طبعاً ..


أما إذا كان واحد مسكين توه ماسك تاكسي و لا واحد فقير ولا حارس مدرسه وماشابه .. فأتنازل عنه .. عل وعسى ناخذ أجر فيه ..


ABD 911

[TOP-SECRET]

اذا حد دعمني من ورى وماتعورت سيارتي سهالات ماراح يصير شي ولا اطلب شرطه وحتى لو تعورت بشكل خفيف ماراح اسوي مشكله طويله عشان شغلات تتصلح بكم ريال لكن لو طير ظهر سيارتي:D اكيد بطلب الشرطه وبشوف شسالفته :p

[RED Chevy]

هذي حزت هالموضوع اليوم:D

اليوم صاحبي صاده حادث خشن بس ربكم ستر وطلع مناه سالم تخيلوا شارع السيارات تمشي فيه سيدة ياك واحد ذكي جداً وعشان مايطوف الإشارة حمرة وتصوره الكامريا قام وسحب الهاند بريك:D

طبعاً سيارته إفترت وإعتضرت نص الشارع وصاحبي بالكرسيدا صدمه ومن رصيف لي رصيف لي ماوقفت وربكم ستر محد تعور:)

جاك الشيبة بعدين( مو هو اللي يسوق ولده) ويقول إنتوا المفروض ماتنعطون لياسن وإنتوا الغلطانين زين ماسدحناه في الشارع لولا الشيب اللي في راسه جان صار كلام ثاني:D

ولو نرجع للموضوع إذا حادث خفيف نمشيها عادي لكن إذا خشن مالك غير 199( رقم المرور بالبحرين:D )

[tornado]

الحمدلله ماجربت هالحاله ..

بس لو دعمني حد المشكلة انا من أطباعي اني اعصب بسرعة بس

راح أملك نفسي واضحك بويهه وبقول بخاطري ياعلك الماحي خخخخ .. سوالف ..

والله ذكرتني بأخويه هههههه عنده استيشن ومركب هوكي هاي صورته
بس الي كان موجود قبل اطول عنه :eek:

http://www.ta7meel.com/up/42/1092009493.jpg

المهم مره كنا سياير دبي والا ورانا وحده لازقه بالموتر شعر بس وتدعمنا

اخويه بس شل ريله من الريس ولحس البريك ههههه وله الحبيبه لزفت

الاستيشن وبالهوكي ههههه والشبك والمدعمية والراديتر تكسرووو:eek: :D :D

[B4_STI]

ربنا المعوض.:banana:

[Imaj]

ونزلت من السيارة تشوف صبغ السيارة تقشع حقتك وسيارتك (جديدة) وصار فيها عيوب بالبويه بس ما صار شي لبدي السيارة .
إذا كذا أسمحه! حتى لو تأثر الصدام الخلفي مو مشكلة أسمحه! لأنه حديد أو بلاستيك وطز فيه.. إذا الضربة شايده أطالبه أو شركة التأمين المسؤولة بالتعويض.

ما أتهاوش معه ولا حتى أنزل أخلاقي عشان حديد ما يسوى!

أنا مرا راحت سيارتي وطي وقعدت في الورشة أكثر من شهر تصليحات بسبب دمار شامل حصل لأن واحد سقط عليّ. صحيح إني غضبت وقلت له هذا شي تسويه فيني لكن ما تهاوشت معه. قعدت أبكي عند السيارة :cry: والله بكيت ذاك اليوم بكاء ما قد بكيت مثله:cry:

وإلى الآن شركة التأمين ما عوضتني الله لا يبارك فيها :anger:

ومرة ثانية واحد قطع اشارة وصدمني. وحالته كانت أسوء من حالتي. أنا راح علي الرفرف و الجنط أما هو دمار شامل. عاتبته بس ما تهاوشنا ولا ارتفع صوتنا كنت حزين ذاك اليوم :( والحمد لله شركة التأمين المسؤولة عنه عوضتني على طول.


لكن هواش أبداً ما أتهاوش لو سيارتي رولزرويس.






قلت لكم قصة حياتي. بس العبرة أبداً ما يسوى. خصوصاً إذا الضربة تافهة وما أثرت تأثير بالغ في السيارة.









سلام :banana:

[Nas]

انا صارلي موقف مثل هذا لكن غير عنكم كلكم:confused: :confused:

كنت واقف و انتظر الطريق في الدوار
فكان عدالي شي يجذب الانتباه:eek: (مابقول شو هذا الشيء) المهم تميت اطالع الشي هذا و نسيت نفسي (لا تلوموني)
و دعمت الي قدامي لكن منو هذا يا ترى:confused: :confused:






كان هذا الريال ابوي جايب اخواني الصغار من المدرسه:blink: :blink:

[عين الفهد]

رد مقتبس من TOYOTA - OBAS
اذا حد دعمني من ورى وماتعورت سيارتي سهالات ماراح يصير شي ولا اطلب شرطه وحتى لو تعورت بشكل خفيف ماراح اسوي مشكله طويله عشان شغلات تتصلح بكم ريال لكن لو طير ظهر سيارتي:D اكيد بطلب الشرطه وبشوف شسالفته :p

أحلى صدام خلفي للتيوتا فورويل وبس :black:

[SLR]

بقوله بارك الله فيك...

[ABD 911]

رد مقتبس من Nas
انا صارلي موقف مثل هذا لكن غير عنكم كلكم:confused: :confused:

كنت واقف و انتظر الطريق في الدوار
فكان عدالي شي يجذب الانتباه:eek: (مابقول شو هذا الشيء) المهم تميت اطالع الشي هذا و نسيت نفسي (لا تلوموني)
و دعمت الي قدامي لكن منو هذا يا ترى:confused: :confused:






كان هذا الريال ابوي جايب اخواني الصغار من المدرسه:blink: :blink:



كككككككككخخخخخخخخخخخخخخخخخ :D :D :laugh: :laugh:

خلصت السيارات عشان تصدم أبوك .. :laugh:

حلوه منك NAS



ABD 911

[TOP-SECRET]

رد مقتبس من عين الفهد
أحلى صدام خلفي للتيوتا فورويل وبس :black:

خاصه اذا كان مغير الرمانه ومركب وحده من الي يحبهم قلبك:glasses2:

[لون الليل]

لو احد دعم سيارتك بخفيف من ورا .. وش بتسوي ؟
احطه جدام سيارتي وادعمه :D :D :D

لا كنت امزح :laugh:

اطلب الـ Police طبعا :cry:

[السائق المثالي]

صدقني أخليه يصلح السيارة لو بس كلفت 10 ريال

أجل من وين نحلل قروش التأمين

بس المشكلة هذا كلام بس لكن وقت الجد تلاقيني أسامح