اول مشاركة وسؤال

[M.A.M]

السلام عليكم ورحمة الله وبركاته
هذي اول مشاركة لي واتمنى انكم تقبلوني معكم في هالمنتدى الحلو
سؤالي هو:
انا املك هوندا اكورد 98 ورحت للوكالة وسألتهم عن التشييك وقلت ابغى اشيك على السيارة,قالو لي كم ماشية السيارة قلت 90000 قالوا اصبر لين تمشي 100000 ونغير لك الجنزير,قلت لهم كم تكلف قالو 2000 ريال للجنزير بس
هذا غير اذا لقوا فيها فحمات ولا شي ثاني طبعا بتزود التكلفة حسب الاشياء اللي تحتاجها السيارة.
وش رايكم اشيك على السيارة الحين واغير الفحمات لانها على وشك تنتهي ولا اصبر لين تمشي السيارة 100000واشيك عليها واغير الجنزير ولا اغير فحمات وبس بدون تشييك وبدون تغيير جنزير.
علما بانهم يقولون اذا ماغيرت الجنزير يمكن يضر السيارة وينكسر راس المكينة وتكلفك كثير.
دلوني على الحل المناسب الله يخليكم
واسف على الاطالة

[S8]

هلا والله بالصديق الجديد
بس ما قلت لنا
من وين ؟
وكم عمرك؟


وعن استفسارك اقول ان الكلام هذا قالوه لي لمن شريت كامري 97 وقالوا يتغير بعد 50 الف (مثل الألتيما )
لكن لنل صفيت ومشيت بالكامري 158 الف كيلو متر وماشاء الله ولاحصل اي شئ
هذا رأي ولكن انتظر رأي شباب HONDA
تحياتي S8 S8 S8 S8 S8 S8 S8 S8 S8

[M.A.M]

انا من الرياض
وعمري 21
وسيارتي هوندا اكورد 98 جنوط وخشب وشوي من التعديلات اللي انتم عارفينها
ومن ناحية المطارحات لي سوابق
وبعضها تفشل وبعضها يشرف
ومااقدر اذكرها لاني راح اطول

[S2000]

أهلا فيك عزيزي M.A.M (أتوقع محمد أحمد مسعود ;))....

على العموم شوف أنا عندي هوندا 96 يعني الآن كملت خمس سنوات وماشاء الله السيارة لايعلى عليها....

الكلام اللي سمعته من الشركة هو نفس الكلام اللي سمعوني اياه لكن انت خليك في الوسط.... بصراحة شغل الصيانة حق 40 ألف كلم و100 ألف كلم كلها سحب فلوس (من متابعة زملائي)...

الإستعانة بالشركة (مجرد رأي) تكون في حالة الأعطال الميكانيكية الصعبة مثل: عكوس..بخاخات..السيور (أو الجنزير) في حالة العطل.. لكن اذا كانت عبارة عن فرامل أو قماشات (فحمات) أو تغير زيت بتلاقي الأفضل (والأمهر) خارج أسوار الشركة..

وعموما الصيانة الدورية مهمة لكن انا باحكيلك من واقع تجربة شخصية..... وانت وذوقك عاد :).. بس خلي بالك ان سيارتي ماشية 67 ألف كلم بس ;)...

انتظر راي البقية :)......

[NFS]

أهلاً M.A.M ، وأخيراً اشتركت:)

بالنسبة لسعر تغيير الجنزير تراه سعر مبالغ فيه ، لأني أنا غيرت الجنزير مع طرمبة المويه بـ250 ريال بس!طبعاً في ورشة عادية , عشان كذا أقولك غير السير وسفايف الفرامل خارج الوكالة.

الشيء الي لاحظته في الصيانة الدورية ان الوكالة تغير الزيوت و الفلاتر و تشد على سيور المحرك وتغير البواجي" البلاكات" وتنظف البخاخات وبعض الأحيان يغيروا السفايف "على حسب المزاج" .

لو أنا كنت مكانك كان أغير الجنزير بس تعدي السيارة 100000 كيلومتر في ورشة موثوق منها بدل الوكالة ،أكيد بعضكم ما يعرف ايش هو الجنزير !الجنزير"Timing Shaft Belt or Cam Shaft Belt" هو عبارة عن سير مثل السيور الي نشاهدها في المحرك مثل سير الدينمو وسير المروحة لكن الاختلاف أن له سنان "لكن ما تعض:)" ويكون مخفي يعني صاير داخل المحرك. ايش بصير اذا ما غيرته ؟ أول شيء خلونا نعرف وظيفته : ايش الي يخلي الصمامات تعمل بتوافق وبنفس سرعة عمل المكابس "السلندرات"؟ السير هذا مربوط بين عمود الكرنك مع عمود الكامات فاذا مهما كانت سرعة الكرنك فان عمود الكامات يدور بنفس المنوال ، تخيل انك تمشي بسرعة 120كلم وانقطع السير هذا فجاءة ايش بصير؟؟ في حالة القير العادي ، عمود الكرنك فيفضل يدور لأنه متصل مباشرة مع القير الي هو بدوره متصل بالاطارات "معنى ههذا المكابس لسه تتحرك صعوداً ونزولاً" بينما عمود الكامة بيتوقف عن الدوران فلذلك "لازم يكون احدى صمامات المحرك في الوضعية المفتوحة ، فالذي يحصل أن المكابس تبداء تضرب في الصمامات لغاية ما تنبعج "تنطعج = يتغير شكلها!!" ويمكن يتأثر رأس المحرك:(

من هذا نعرف ان اهمال تغيير هذا السير قد يؤدي النتائج خطيرة على المحرك ويكلفك مبالغ كبير فأقولك خلي تغيير هذا السير من أولوياتك وغيره كل 100000 كيلو متر ...

ليش الناس تسميه جنزير ؟؟؟ لأن لغاية الثمانينات كان يستخدم الجنزير بدل السير فكان حصول مثل هذه المشكلة أمر نادر لكن الأن لا أعتقد أن في شركة سيارات تستخدم الجنزير فلذلك جميع السيارات باختلاف أنواعها تحتاج لهذا الاجراء.

أسف على الاطالة

[بارق]

مرحبا مليون:)
يااخي اسمحلي اسمك ذكرني بحلاوه كنت اخذها من زمان اسمها M&M
وان شاء الله تكون مواضيعك احلى منها:)

[M.A.M]

ايه ابشرك سجلت ياNFS
ماشاء الله عليك عارفني مانسيتني :)

S2000 ماني اللي في بالك :)

بارق مشكور على الترحيب وان شاء الله تكون مواضيعي حلوة مثل M&M :)