درشــــات بحـــــــ( 9)ـــــــرية <<الشبح الغامض>>!

[مدردش متقاعد]

في الجزء السابق توقفت عند رنين التلفون البغيض الي ما دق إلا أول ما بديت أشخر.. و قام بتعكير مزاجي و طير النوم من عيني:(

لقراءة الجزء السابق
درشــــات بحـــــــ( 8)ـــــــرية <<و بدأت الرحلة من جديد>> (http://www.swalif.net/sforum/showthread.php?threadid=85014)

تعرفون الواحد يوم يصحى من النوم يكون بعده (مسطل) و فيوزاته ضاربة ما يدري شو السالفة .. ليل و للا نهار؟ أببض و لا أسود؟:p

و هذا فعلا الي صار.. أنا كان همي الأكبر ذيج الساعة أذبح الي اتصل في و ووعاني من النوم و أنا توني ما صدقت أنام(الظاهر من الشاورما:)) .. و أنا عادة إذا كنت نايم نوم تعب.. و جا واحد و صحاني… الله يعينه من ردة فعلي. ...أسوي مصايب!!,.. بس ما أدري ذاك اليوم ردة فعلي كانت مؤدبة جدا!!:p

الظاهر وجودي في فندق محترم خلاني أكون محترم .. حتى في نومي هههه..

عموما مثل ما توقعت الأخت موزة كان فعلا الي اتصل في هو المسؤوول عن الملاحين الملتحقين و الطالعين و الي أكد علي إني أكون تحت في قاعة الفتدق على الساعة 6 الصبح بس الظاهر من التعب ما سمعت منبه التليفون (أريكسون هذيك الأيام) .. فقمت بسرعة كأنه شيطان يلحقني و أخذت لي حمام على السريع و كشخت و تمكيجت.. أوبس………….. قصدي حسنت من هيأتي و هندامي و نزلت (أجرجر) شنطي و أغراضي {نسيت أخبركم إني كنت جايب معاي جهاز تلفزيون مع فيديو في نفس الوقت (2 في واحد )!!}:p ..و انا متحسر على الثلاجة الي في الغرفة … كانت مليانة بما لذ و طاب من المأكولات و الحلويات و انواع مختلفة من العصائر.. و (البلاوي) الزرقاء و الحمراء طبعا..بس أعوذ بالله.. ما قربت صوبها!!

المهم نزلت و سلمت بطاقة الباب (ناس متطورين الباب يتبطل بطاقة مش بمفتاح) ..

سألني موظف الاستقبال إذا كنت أخذت شي من الثلاجة .. قلت له لا:(!

سألني إذا أكلت أي وجبة في الفندق… قلت له لاااااااااا:(!

سألني إذا كنت طلبت مشاهدة أي فيلم أمريكي على التلفزيون (الفندق يوفر خدمة مشاهدة الأفلام الأجنبية الجديدة على تلفزيون الغرفة و الدفع يكون ببطاقة الإئتمان)!
رديت عليه قلت له : لاااااااااااااااااااااااااااااا:(!

قالي كان مسموح لك بثلاث وجبات في اليومي.. ليش ما أكلتها؟
و كان مسموح لك تاخذ من الثلاجة الي تريده..و الحساب على الشركة..

أنا يوم سمعت هالكلام.. كان ودي أذبحه صراحة و أسوي جريمة http://www.swalif.net/sforum/images/icons/icon8.gif

الحين جاي يقولي بعد ما خلاني أطلع أحوط سنغافورة كلها أدور لي على لقمة آكلها.. و الحين يقولي مسموح لك ثلاث وجبات؟
و أنا طول الليل قاعد أتفرج على الثلاجة حالتي حالة و عطشان أريد اشرب عصير يبل ريقي ..و شايف المكسرات و ما قادر آكلها (سعرها غالي:p) . و ابتلشت في برامج تلفزيونهم المجانية..ما فهمت منها شي.. كلها باللغة الصينية و السنغافورية… و الله بلشة:(

المهم وقعت على الفاتورة.. و انا قاعد أعض على اسناني من القهر..(صدقوني لو كان في وقت كنت رحت أطلع حرتي على الفطور).. و بعدين قمت أدور على الي اتصل في.. ما لاقيته فقعدت على كرسي في بهو الفندق (حلوة كلمة بهو) أنتظره.. كاني واحد مهم و عندي موعد هههه

كان في إثنين يطالعوني بفضول .. بس الظاهر انتبهوا إني لاحظت نظراتهم فنط علي واحد و سلم علي و عرف لي نفسه .. بعدني ما أنسn اسمه (جود فري).. ملاح ثاني بيلتحق معاي في السفينة.. شكله طيب و هادي و فعلا كان كذا.. و بتعرفون بعدين

الثاني كان اسمه (أليستر) ملاح ثالث شباب طول و عرض .. قعدنا نسولف و ندردش شوي لين ما جا صاحبنا و شلنا وودانا المينا.. و من المينا ركبونا على طراد (مركب) صغير وصلنا للسفينة.. و استغرقت الرحلة من المينا لمكان السفينة (كانت جاية من اليابان و رايحة إلى الإمارات و مرت على مضيق (ملقا) هذا الطريق الملاحي المشهور و المزحوم جدا).. حوالي الساعتين..

يعني وصلنا تقريبا الساعة عشرة و نص الصبح… و نفس سالفة يوم التحقت في السفينة الأولى:-

درج طوييييييييييييييييل جدا و متعب لازم الواحد يطلعه لين ما يوصل السفينة.. و الحمد لله إنه البحر كان هادي و الدنيا نهار فما كان في أي مشكلة… المشكلة كانت في الأغراض الي وياي… الانجليز الي معاي استغربوا .. (شو جايب هذا؟) خصوصا يوم شافوا التلفزيون الي جبته (نوعه AIWA) خفت و الله يحسدوني… المهم شليت الشنط الخفيفة على ظهري.. و طلعت و أنا خايف إني أطيح… و باقي الأغراض الثقيلة مالتي و مالت الجماعة طلعوها بونش (سفينة متطورة) و كان في بعد أغراض ثانية جابينها تموين حق السفينة (لحم و فواكه و خضرة .. و قطع غيار) و الله يستر!

وصلت للسطح و لله الحمد و انا ألهث من التعب ( هه هه هه هه )………..
.. (و الله الدرج يتعب) و لاقيت واحد من الملاحين في استقبالنا سلم علي ببرود إنجليزي(و هذا مو مستغرب) و دلني على برج المراقبة .. وين ألاقي الكابتن.. بس ما رحت إلا يوم تأكدت إنه أغراضي كلها وصلت (الملاحين فلبينين حرامية).. المشكلة كانت إنه الكل مستغربين.. الظاهر أول مرة واحد يجيب أغراض هالكثر..(العرب ما يسافرون إلا كذا.. شالين الدنيا على راسهم؟!):p

المهم طلعت مثل السفينة الأولى و اتبعت نفس الإجراءات المعتادة… سلمت على الكابتن و عطيته جواز السفر (خايف إني أشرد!!)و جوازي البحري (إحم إحم.. هذا جواز مخصص بس للبحارة) و غيرها من الوثائق.. (شهادات تطعيم.. شهادات لياقة طبية.. إلخ) ما بصدع راسكم فيها.. رحب في الكابتن و خلاني أوقع على دفتر السفينة .. و سلمت علي الي شفتهم من الملاحين و عرفتهم على نفسي و بعدين نزلت لحجرتي المخصصة…(Engineer Cadet)...

نسيت أخبركم إنه هذي السفينة مصنوعة في اليابان.. لأنه شركتنا عندها ثمانية سفن أول أربعة مصنوعات في اليابان و الاربعة الثانية مصنوعات في فنلندا و كل فئة لها مميزاتها و صفاتها.. يعني الي مصنوعات في اليابان أربع طبق الأصل.. اللهم كل وحدة لها اسم.. و نفس الشي للأربعة الثانيات.. و للأسف ما عندهم اعمالة الكافية لإدارتها.. فمعطيتها لشركتين أجنبيات للأسف!
http://www.animfactory.com/animations/transportation/boats/cruise_sky_md_clr.gif

ماعلينا من هالسالفة.. المهم سرت حجرتي.. و إنتو تدرون إني مب راقد عدل.. فكنت واصل حدي.. مستوي خلاص.. خصوصا مع طلعة الدرج .. خلصت ياقي البطارية الي كانت في (إنرجايزر).. فيا دوب بدلت ملابسي.. و رتبت أغراضي على السريع وأكلت لي حلاوة فانفير إذا تعرفونها (جايب لي كرتونين:p) و شغلت اللاب توب مالي و حطيت فيه سيدي القرآن (.. أغلى إهداء من العزيز سردال) و على طول على الفراش.. و رحت في سابع نومة……..خخخخخخخخخخخخخخخ

فجأة.. واحد سوى عملية كزماندوز على حجرتي… فتح الباب و دخل… اشوف شبح اسود لشخص عملاق جدامي…. و… و . آآآآآآآآآآآآآآآآآآآآآآآآآآآآآآه.... الحقووووووونييييي:(!

تابعوا معي الحلقة القادمة


تحياتي ..

مدرش بحري

[توتة]

ليش وقفت عند اللحظة المثيرة ..... ! :(


و على طاري الشخير .... :)
أدخل موضوع بياع " مرة ثانية بالكوفي شوب "
و شوف توتة شو كاتبة ... ههههههههههههههههه
كأني سمعت شخيرك :) من البارحة سامعتنة :)


و على طاري فان فير ... هذا كاكاوي المفضل :)
و بعد يعجبني تويكس و الأنواع العجيبة ...

:)
بصراحة سرد جميل و موفق كالعادة ...... :):):)

و في انتظار الجزء التالي .... :):):):):)







يعني لو كملت سطرين بس ... ! :(:)



ماما شعنونة ,,,,, تحياتي :)

[متشيم]

سنة 1995 خذت أول موبايل في حياتي (وحليلي فرحان) وفي أول يوم فرح من أيام الموبايل ، حطيت راسي الساعة 10:30 مساء للنوم ، وفجأة وبدون سابق انذار ، يتصل بي شخص الساعة الواحدة بعد منتف الليل ويدور الحوار التالي:
... السلام عليكم
... وعليكم السلام أهلا بو محمد (وما كان بو محمد ، نفس الصوت).
... خذت الرقم؟.
... نعم خذته والحمد لله . بس من وين جبته؟
... دقيت على اتصالات وقالو في واحد سبقك له.
... عفوا من المتكلم.
... فلان بن فلان الفلاني (أول مرة اسمع الاسم).
... نعم يا فلان أي خدمة؟
... أبغي الرقم.

بالله عليكم شو موقف أي واحد منكم؟

وحرقة لأعصاب توتة بقول القصة بعدين.

صرنا نقلد الأخت موزة فس أسلوب التشويق وحرق الأعصاب.

[سعودية]

الحين من صباح الله خير وانا شاقة نفسي بالدردشات ..

واقرأ واقرأ واقرأ واقرأ واقرأ واقرأ
واقرأ واقرأ واقرأ واقرأ واقرأ واقرأ
واقرأ واقرأ واقرأ واقرأ واقرأ واقرأ
واقرأ واقرأ واقرأ واقرأ واقرأ واقرأ
واقرأ واقرأ واقرأ واقرأ واقرأ واقرأ

:):):)

هذي على وزن ...

تدوم و تدوم و تدوم :p

أجل إنرجيزر :):) :p :):)

وأخرتها ما ألاقي الا الشبح .. في النهاية كلمة ونص :(


المهم ..
دردشاتك متألقة كالعادة والله يعطيك العافية ..

بس ما إنطبعت المرة هذي :p
أخاف ابو شيطوني يعصب علي ويقول يا سلام وين الباقي ..

خليها 2×1 :)

مسكين اجل ما أكلت في الفندق :( حرام لازم تنتبه مره ثانية ولا اقولك سو مثل ابو عربوا وكل كل اللي في الثلاجة بعدين استهبل ولا تدفع .. يقولون ما كنا ندري وما عندنا فلوس خلونا نغسل صحون والله ويسون اكثر من كذا :(

بعدين تصدق يا مدردش انا اتعقد يوم يكون المفتاح حق الغرفة كرت مو مفتاح .. يا شيخ كل مادخلت الكرت ما تطلع اللمبة الحمراء وكل ما حاولت مت من الضحك وبعدها يجي ابو شيطوني ويقول ما شاء الله جايبك معاي بعد انا ووجهي :p

وبصراحة بعد ما أحب الفنادق بالمرة أحب الشقق الفندقية ..

يعني تاخذ راحتك " ابو شيطوني راعي مزاج ... القهوة العربية معانا في استراليا والتمر بعد .. " ما يصلح تتسوى بالغلاية تطلع ماصخة :):)

حلو انك ما اكلت الوجبات ولا الفطور مسكين رحمتك من صدق لا تخلي الوالدة تقرأ الجزء هذا ترى اكيد راح تبكي .. اعرفهم زين :)


وهذا الشوكولاته العجيبة من وين جايبها ولا التلفزيون 2×1 هذي روعة ولا راح يحسدونك تاخذ العقل :)



من متى جايب لاب توب يا مدردش اتذكر كمبيوترك انا شمت فيه ومات الله يغفر لنا ولأموات المسلمين متى تحول الى لاب توب http://www.swalif.net/sforum/images/icons/icon10.gif

بس على فكرة مدامك ولد المدير مثل ما الإشاعة قالت المفروض انهم يحطون لك اسكليتر بدال الدرج الله يهديهم :)

الدردشات رائعة والله يعطيك العافية .. بس لا تطول علينا مثل العادة :)

تحياتي لك :)

[غريب نجد]

اقول تراني من امس اول من قرى الموضوع وحرقت اعصابي بالنهاية الافلام البحرية هذي ....... انصحك تكمل الجزء التاسع قريبا ولا باضرب عن اكمال المتابعه لدردشاتك انت وزميلك بحر هذا ...

تحياتي لقلمك الرائع ولاسلوبك الاروع والله يحفظك ويحميك من كل سوء بس عاد كمل الـ 9 قبل لا ننسى الموضوع :(:(:(

تحياتي لك

[رحيل]

مرحبتين اخي مدردش ..
ياسلام شوهالسرد الرائع ...بصراحة أسلوبك في الكتابةأكثرمن ممتع
على فكرة موظف الإستقبال يوم سألك تراه كان يبغي يورطك في الحساب ...يعني لو قلت له هيه كلت ...جان بيقولك أدفع ...بس لأنك قلت لا ..قال ليش ماأقهره وأقول له إن الأكل كان ببلاش!!:)
والله يعينك على العدة اللي شايلها معاك ..عيل حد يشيل معاه تلفزيون!!!!!!!!!!!:)

تحياتي لك ولقلمك المميز
رحيل ...

[mouza]

يعني يوم انا خمنت كان صح وليش قلت غلط هاااااااااااااااااااااا


دواك دواك ما كلت من الثلاثه بسك بتمتن :)

هههههههههههههه هم اصلا متعمدين ما يخبرونك قبل عشان الشركه مخبرتنهم ما يبون يخسرون احتمال صح ؟


بسم الله منو دخل عليك الحجرة

هههههههههههههههههههههه اكيد من طاقم السفبنه من بيكون يعني
يقولك تبا عشا

[مدردش متقاعد]

سوري. بس هذا يسمونه فن الإثارة.. تيحدون موزة يوم تمت تخسس فينا.. توقف عند اللحظة المثيرة:)

أنا نفس الشي.. لازم أخسس فيكم شوي ههههه

هالمرة ما بتأخر .. كلها شهرين و بتعرفون :)


دورت على الموضوع ما لاقيته.. شو سالفة الشخير ها.. يعني مثلا إنتي تشخرين؟.. عادي مافيها شي:)


أنا أحب فانفير و من أنا صغير.. ايام ما كان الباكيت في 6 اصابع.. و بربية و نص... الحين صار 5 أصابع و بربيتين و ربع:(
و أحب بعد حلوة أبو الكور.. هالي الدواورير المغلفة بقرطاس ذهبي.. عجيبة هاي.. بس غالية:(


توتة.. تابعي وياي الحلقة الياية:)

تحياتي

[مدردش متقاعد]

أسميك إنت عجيب يا متشيم في سرد القصص.. و (النغزات) :) ياخي شو أسوي.. ماأريد أخرب المسلسل.. و الجمهور عاوز كده.. عاوز إسارة(إثارة) و أكشن:)

إن شاء الله يوم بتصل فيك على البرنامج بخبرك هههه

تحياتي لك:)

[متشيم]

يا أخوي موضة درب الزلق قديمة ، على آخر الحلقة يربشونك ، لا لا . أعمل موضة هوليود في التشويق وشوف ردود أفعال الشباب ...

[شبوحة]

تخسسون فينا وتخلونا نتريا الاثارة فى الموضوع

اقول دردشينا الظاهر ان اللى دخل فى الاخر قطو اسود والا المارد

يبا يقول تمنى امنية اممممممممممممم والا الفراش (ضربت فى رأسة ويبا ينظف هذيك الساعة)

ربى يعطيك العافية على هالمجهود الرائع واحنا فى انتظار تطور الاحداث

تحياتى لجميع المشاركين

[مدردش متقاعد]

أيوه اضحكي علي.. شو راج:(

و الله ايام صراحة ما أقدر أنساها بحلوها و مرها.. كنت فيها بطارية (دوراسيل) مو إنرجايزر هههه


ليت الشباب يعود يوما لأخبره بما فعل المشيب

الي يقول الحين عمري تسعين سنة:)

أجل ما تعرفين الفانفير؟ الظاهر مو موجود عندكم بالسعودية هههه اسألي شبوحة و لا توتة و بيخبرونج عنها.. تراها غالية يمكن ما تقدرين تشترينها:)


اللاب توب حقي هذيك الأيام كان جديد توني شاريه بعشرطعشر ألف.. طلعت فيه الي وراي و الي جدامي علشان أشتريه ... توشيبا بينتيوم 200 إم إم إكس واي زد... (واي و زد) من عندي هههه
صحيح الحين شوب .. و عطيته تقاعد و قاعد استخدم كمبيوتر تجميع:) بس لي معاه ذكريات:)
و أقلوك من الحين (من عاب ابتلى) فخليج من سيرته لكمبوترك يصيربه شي..:)


أففففففففف.. تصدقين عاد نسيت أطلع إشاعة ولد المدير هذي؟ كيف فاتتني؟:(
بس إن شاء الله اذا في مرة جاية بطلع إشاعة جديدة علشان يخافون مني.. ههه ما يمشون إلا بالعين الحمرا..

المهم الله يردك بالسلامة
و مبرووك على البيت مقدما:)

تحياتي

[مدردش متقاعد]

اسمح لي.. ما بقولك:)

خلي عندك صبر ياخي و بتعرف.. كلها كم شهر و بتعرف من هو الشبح الغامض هذا هههههه
و أعتقد الفترة كافية جدا علشان تفكر فيها:)

تريد حل سريع.. و تعرف فيها الشبح؟

انزل تحت









































انزل يعد شوي












































بعد بعد









































اشتري لي كرتونين فانفير هههههه





تحياتي لك أخي الغالي:)

[مدردش متقاعد]

اتمنى إنك تكونين استانستي بقراءة هذا الجزء:)

الظاهر موظف الاستقبال يبا يقهرني.. بس ما عليكم.. أنا آخذ حقي و آخذ حق الجيران. المرة الياية يوم بلتحق في السفينة بتشوفون شو بسوي:)
باخذ الأكل سفري هههه

شو أسوي يا أختي.. تدرين إنه كل ما أسير البحر ينقص وزني على الأقل 4 أو 5 كيلو من اليوع.. هاي 4 شهور مب لعبة.. و شغل من الساعة 8 لين 5 كل يوم.. شغل يهد الحيل:(

التلفزيون بتعرفون ليش خذيته.. في الحلقة الياية:)


تحياتي لك أخي الكريمة:)

[مدردش متقاعد]

أنا ما قلت غلط.. أنا قلت اتريي للجزء الياي.. و الحين عرفتي الإجابة:)

رجاء لا تخربين الأكشن إلي في دردشاتي.. رجاء هههه

و عناد اج.. ما بخبرج منو دش علي
هالمرة مالج أمل تعرفين:)


تحياتي

[مدردش متقاعد]

شو اسوي يا شبوحة.. الجمهور عاوز كده:)

لو خبرتكم السالفة بتكون بلا معنى:)

شمعنى موزة تطوفون لها السالفة.. و أنا تحتشرون علي.. وين مبدأ المساواة ها؟:)


إن شاء الله بتعرفون قريبا... عقب ما أرد.. من...:)

تحياتي

[مدردش متقاعد]

شو رايك تنتج لي الحلقات الياية من الدردشات:)

و نتقاسم الربح.. ترى موضوة التشفير هي الي سايدة هالأيام في سوالف:)

[mouza]

تعال بكلمه راس بقولك شيء

ههههههههههههههههههه


اخبرك بتخبرني وانا بتريا لين تكتب درشاتك ترا بخرب الاكشن سوالفك

[مدردش متقاعد]

و ما بخبرج,,,شو كل يوم عيد ؟:)

هالمرة ادفع مقابل أن تعرف:)

نفذي الاتفاق الي بيننا:)

[mouza]

اخبرك الحين منو اللي لازم ينفذ الاتفاق انا ولاانت ؟


دورك الحين

[مدردش متقاعد]

لا تحاولين... وين كرتونين الفانفير الي وعدتيني بهم؟:)


كيفج صراحة... ما بتعرفين منو الشبح إلا في شهر بطليموس:)

[الفرزدق]

الله يستر من الأشباح ،،، بس الظاهر لم يعرف ذاك الشبح بأن اللي قدامه ( جاكور:)) ،،،


تسلم والله على السوالف هذه ،،، ولو تدونها في كتيبات ثم تنشرها راح تكسب واجد:) وش رأيك!!!
النص بالنص( لأني صاحب الفكرة:))


ويالله مثل العادة ننتظر السالفة القادمة:) بس عجل الله يوفقك :)

[mouza]

واخبرك شهر بطليموس بعد قرن ونص كيف بصبر انا


هههههههههههههههههه



انزين ترا ما بعلمك طبخات هاااااااااااااااااا ؟
يالله قول



انزين بخمن انا يمكن واحد يقولك العشا جاهز

او يقولك انه رفيقك في الغرفه

هههههههه
او او او او او او او او ماادري بعد بفكر