تجربة VW Passat 1.8 ...... بالصور

[CL 600]

كيف الحال يا شباب :)

في البداية وقبل ما ابدأ في سرد تفاصيل التجربه ...

أحب أرجع الفضل في كتابة الموضوع لأخونا المشرف NFS
لأنه هو أول من بدأ بعمل تجربه ( شخصية ) في المنتدى



ندخل في الموضوع ...
أول شيء السياره اللي تمت تجربتها هي باسات 99 قير عايدي و 4 سلندر ....
مكان التجربة مدينة جده .......... والسيارة عموماً تم الحصول عليها من أحد الأصدقاء :) حاط سيارته في الصيانه الدوريه فأعطوه الباسات مؤقتاً :) ... فقلنا يالله فرصه لا تعوض ;)

المهم . . . انا شفت اني أتكلم عن التجربة بشكل نقاط أفضل ،،، بمعنى ان التجربه انحصرت في عدة نقاط وهي :

1- المحرك

2- العازلية

3- الراحة ( امتصاص المطبات )

4- التماسك

5- التصميم الداخلي والخارجي + الجوده العامه للسيارة
=============================================================
أولاً : المحرك
السيارة طبعاً 4 سلندر وقوتها 125 حصان ، وهى مناسبة بالنسبة لسعة المحرك المنخفضه 1,8 ليتر ، لكن لاحظنا ( انا وزميلي اللي معايه ) ان المحرك ما يعطيك قوته الا على دورات عاليه ،، يعني لازم تشد على المحرك الين توصل الـ RPM الى 4000 تقريباً وبعدها تحس ان السيارة تبدأ في الإنطلاق بشكل جيد ، اما صوته فهو مزعج نوعاً ما خصوصاً بعد 3000 RPM
بالنسبة للأداء فالتسارع مو بطال لكن زي ما قلت المشكله في بداية دوران المحرك ( ما في عزم كافي :( )
التسارع من الصفر إلى 100 تقريباً في حدود 10,8 ثواني
والسرعة القصوى مع الأسف ما جربتها :( لكن وصلت بالسيارة الى سرعة 180 كلم / ساعة

فيه عيب كبير جداً في السيارة أثر على تسارعها بشكل واضح وهو طول نسب القير ... بمعنى أن المسافه بين النسبة الأولى والثانية كبيره ، يعني تقريباً الـ RPM ينزل 3000 لفة !!!!! لما تغير من الأول الى الثاني ..... ولما تغير الى السرعة الثالثه تلاحظ ان العزم يبرد بشكل محبط :(
=============================================================

ثانياً : العازلية
عازلية الهواء ممتازه في السرعات العاليه ،، يعني عند 140 - 150 بالكاد تسمع صوت الهواء الخارجي .
لكن عازلية صوت المحرك لم تكن بالشكل المطلوب ، ما أدري يمكن السبب المحرك أصلاً مزعج ؟؟؟؟
بالنسبة لإحتكاك الإطارات بالأرض ( طريق خشن ) مو بطال يعني جيد جداً بالنسبة لسيارة مافيها شاسيـه
=============================================================

ثالثاً : الراحة وامتصاص المطبات
التعليق بصفه عامه مريح وجيد في امتصاص المطبات الحاده ( حفر مثلاً ) لكن المطبات الكبيره ( مطبات اصطناعيه مثلاً ) الراحة عادية والسبب اعتقد ان المدى اللي يتحرك فيه التعليق قصير شويه
=============================================================

رابعاً : التماسك
تماسك السيارة والحق يقال - الماني - اللي حصل انه زميلي اللي كان يسوق ( محترف طبعاً ) كان يحاول ينزلق بالسيارة عند الدخول في لفة بسرعه ،،، لكن السيارة ما جملت في الإنزلاق :( كانت متشبته بالأرض بشكل عجيب ..... أقصد بشكل الماني :)
التماسك على سرعة 180 كلم ،، أيضاً ممتاز بسبب انسيابية السيارة ،، بعنى انها ما تتأثر بالهواء ( ما في أي تأرجح يمين ويسار ) ........... شغل الماني ;)
الغريب ان السيارة كانت تميل بشكل واضح في اللفات ..... لكن ماسكه
=============================================================

خامساً :
التصميم الداخلي والخارجي + الجوده العامه للسيارة

بالنسبة لجمال التصميم الداخلي فهذا مسألة ذوق شخصي ... لذلك أترك الصور تعبر عن نفسها ...... ( معليش تصوير سريع سريع )
لكن اللي انا لاحظته واستغربته ان السيارة من الخارج ما توحي أبدأ بأنها وسيعة ،، المقصورة الداخليه مستغله بشكل ذكي يعني تقدر تقول ان السياره أوسع من ( الفئة الثالثة - بنز C - أودي A4 - فكترا - بيجو 407 - بريميرا - ليغاسي ...... الخ ) خصوصاً في المقاعد الخلفيه ،،
كذلك من ذكاء التصميم ان السيارة قصيرة وصندوق الأمتعه واسع جداً بالنسبة لطولها ... ( مافي صور :( )

بالنسبة للجوده العامه للسيارة تحس انها فعلا جيده ( المانيه ) يعني لما تدخل بالسيارة في مطبات صغيره وحاده .. ما تسمع أي أصوات من داخل السيارة أو من جهاز التعليق ،،، يعني تشعر ان السيارة كلها قطعة واحده صلبة مع انها موديل 99 !!!!
=============================================================

وهذه بعض صور التجربة :


- لوحة القياده ( تخشيبه + مكيف الكتروني )
http://storm.prohosting.com/~majedsg/444.jpg


- الإتساع الداخلي واضح
http://storm.prohosting.com/~majedsg/4444.jpg
http://storm.prohosting.com/~majedsg/55.jpg


- الشكل الخارجي مصمم على مبدأ ( البساطـه تولد الجمــال :) )
http://storm.prohosting.com/~majedsg/11.jpg
http://storm.prohosting.com/~majedsg/22.jpg
http://storm.prohosting.com/~majedsg/33.jpg


- زميلنا وهو يحاول يثبت ان السيارة ماهي راسيه ( ثابته ) بس ما قدر
http://storm.prohosting.com/~majedsg/77.jpg
http://storm.prohosting.com/~majedsg/66.jpg


ان شاء الله تكون التجربة عجبتكم ؟؟ الحقيقه انا خرجت بانطباع جيد جداً عن السيارة ( راحة - ثبات - شكل جميل - مقصورة مريحه وواسعة - تأديه لابأس بها ..... الخ )

وفي الختام اعتذر عن الإطاله ...
وهذا اللي انا قدرت عليه ،،، ولو في شيء نسيته ما أتكلمت عنه .... اسألوا وانا حاضر :)


وشكراً لحسن استماعكم ،،

[زورو الامارات]

السلام عليكم ورحمة الله وبركاته


في البدايه احب اشكر الاخوان الذين قاموا بالتجربه وكتبوا لنا تقرير مبسط شامل عن هذة السياره

ماحبيت ان اضيفه على الموضوع:
السياره رائعه جدا من حيث التصميم
ولو لاحظتوا ان الجسم الخارجي مصنوع بجوده عاليه جدا ومتناسق يعني مافي هفوات في قصات الزوايا او الابواب وهذا يرجع لخبرة فلوكسفاجن خصوصا من شريكها اودي المعروف عن الاودي انه جسمها الخارجي به دقة تصنيع عاليه جدا جدا

لكن كما اشار الاخوان المشكله في هذة السياره محركها
محتاج عزم اكثر كون هذة السياره عائليه
لذلك حبذا لو تم تزوديها بمحرك جديد 4 سلندر ب 2200 سي سي سيكون دافعا اكبر للشراء اعلم جدا توفر محرك 6 سلندر لكن سيكون السعر مرتفع قليلا

تحياتي للجميع

[Bold]

الصراحة يا CL 600 شكرا على التجربه .. السياره فعلا نزل منها موديل جديد باختلاف بسيط في الشكل "في المقدمه والليتات الخلفيه " والسياره فيها موديل مخيف ب 6 سلندر 3.0 ليتر ومواصفات رائعة "جلد وتليفون داخلي وليتات زينون ورنجات 17 " واعتقد انها قويه .. اما الموديل اللي اعتبره ناجح هو التيربو ديزل فهو اقتصادي جدا .. تخيلوا الفول ديزل ب 40 درهم كم يمشي .. 950 كلم !!!!!

[S2000]

حلو ياCL600 اشكرك على المجهود اللي بذلته :)..

ممكن مداخلة...
- الصور ماطلعت..
- الاتساع الداخلي الخلفي سيء..
- المحرك وانا مع الشباب في هذي النقطة..
لاحظ ان البورا "بحجم السيفيك" متوفرة بمحرك 2 لتر!!
- الوزن..

وشكرا :)

[CL-Class]

يعطيك ألف عافية حبيبي CL600 ..
والله مواضيع كباتنة .... يا كابتن :):)...... وصدقني موضوعك بيكون من المواضيع اللي بيرجعلها أهل الطلب لأنه مرجع جيد...
بصراحة جهد تشكر عليه ..

[سوناتا]

= أستفسار = هل هناك محرك 4 سلندر من باسات أعلى من 1.8لتر ، ومانوع الدفع في السيارة أمامي أو خلفي ؟ ، مع الشكر للجميع مقدماً .

[مسيطر]

اول شي الله يعطيك العافيه,,

ثاني شي بغيت اسلك عن اسعار الباسات,,

ثالث شي:



ها شباب ,,


من اللي بعده,,

نبغى تجربه على مستوى

-------------------


شباب اقتراح بسيط
---------------

وش رايكم نخلي التجارب بشكل شهري,,

يعني كل شهر نحدد واحد من الأعضاء الكرام

يقوم بتجربه لسياره مناسبه ومتوفره لديه

بشرط ان تكون مصوره



وبدون تفحيط:)’’

ها وش قلتوا,,

[corvette 40th]

موضوع رائع يا CL 600
اشكرك
و احث الجميع على هذي النوعيه من المواضيع

[NFS]

تجربة حلوة وجميلة ، لكن عندي سؤال : كيف السيارة هذي ما فيها شاسيه؟؟؟؟

زين ممكن تذكر أقصى سرعة على كل غيار؟ ولما كنت تمشي على سرعة 100كلم/ساعة كم كانت سرعة المحرك "RPM"؟

أيضاً أنت ماذكرت شيء عن الفرامل ، أن شاء الله تكون بعد شغل ألماني؟

في النهاية أحييك على هذي التجربة الموفقة و أنا في أنتظار تجاربك القادمة ولا تنسى إلي وصيتك عليه;).

[مسيطر]

محد رد على إقتراحي,,


غريبه,,

[E55]

رائع :)

شكراً لك يا CL600 على هذا الموضوع :)

بصراحة تشكر عليه

بس في ملاحظة..

"بالنسبة لسيارة مافيها شاسيـه"

في سيارة ما فيها شاسيه ؟؟


الفاضي
ياخوي إقتراحك ممتاز والله لكن المشكلة عندنا إن كل شركات التأجير أو معظمها

ما تأجر إلا كرولا أو صني

أما السيارات اللي هيه ، تحصلها عند الشركات الكبيرة وما تقدر تأجرها بسهولة

وإذا حصلت ، قيمة الإجار تكون ........ حااااااااااارة :)

[مسيطر]

البركه في سيارتك:):):)

[NFS]

زين أنا عندي أقتراح ثاني ، أذا كان في شخصين هنا معانا في المنتدى يعرفوا بعض ومن نفس المدينة ، فبأمكان كل واحد يجرب سيارة الثاني بشرط أنها ما تكون من نفس النوع "للأبتعاد عن الأطراء والمبالغة". أيش رايكم؟؟؟

[E55]

سيارتي !!!!

إنسى .........

ما تهون علي ، أخليها حقل تجارب :)

[CL 600]

العفو يا شباب وانا ما سويت الا الواجب ،،

زورو الإمارات : شكراً على الإضافه :)

S2000 : شكراً على المداخله ;) ولو اني اختلف معاك في مسألة
- الاتساع الداخلي الخلفي سيء..

الفاضي : اقتراح جيد ،، لكن يا حبذا لو نحدد سيارات معينه ( غير معرفه للجميع )

NFS : الفضل يرجعلك :) بعد الله ،،،
بالنسبة للفرامل أفضل من الهوندا والأوميغا في القوة - لكن مشكلتها اذا سخنت ما تبرد بسرعه !!!!!!!
اما
E55 : العفو :)
بالنسبة لـ

" سيارة ما فيها شاسيه " -------- نعم ، أغلب السيارات الجديده ما فيها شاسيه

بس يمكن المشكله اني ما وضحت وش المقصود بالشاسيه

ان أقولكم :
تعرفوا السيارات الأمريكيه القديمه ( كابرس 96 وانت نازل ) فيها هيكل ( شاسيه ) منفصل عن البودي ( الجسم الخارجي ) ،،،
بينما السيارات الجديده يتكون جسمها من قطعه واحده فقط وغير منفصله ( شاسيه + بودي خارجي )

فعشان كذا قلت انه ما فيها شاسيه ( يعني ما فيها هيكل منفصل )







هذا للتوضيح وشكراً للجميع ،،

[كابريس]

للرفع

[Reckless2008]

مشكووووووووووووووور يا أخ كابرس وماتقصر وبأدعيلك إنهم يرخصون البانزين وياشباب كم السعر بكل الأنواع

[Pure_Intimidation]

Thanks for the effort :)

[M5]

طيب يا CL 600 ... يصير خير ....

كذا تجرب من ورايه ولا تعطيني خبر ...

معليش ...

بس عموماً ،، التجربة حلوة وكلامك كان منسق ومنظم ومبسط .... بشكل يدل على ان عندك خبرة في تجارب السيارات :)

مشكور حبيبي وما قصرت ..



تحياتي ،،

[AMG]

مشكور وما قصرت يا سي ال 600 :)