View Full Version : ابي فزعتكم لا تردوني اجبرو بخاطري وردو
PT Cruiser
22-11-2001, 12:10 AM
السلام عليكم ورحمة الله وبركاته
عندي مشكله ويمكن الاقي عندكم الحل
--
انا امشي دايم وروحتي وجياتي مع مجموعه معينه من الشباب
تقريبا 12 واحد
اعرفهم من يوم كنت ادرس في اولى ابتدائي ما تفارقنا ولا سنه
الا السنه هذه
انا رحت كليه غير الكليه الي هم فيها
--
بس يوميا معاهم واذا ما تقابلنا لازم نكلم بعض بالتلفون
-
بحكم اني بكليه غير الي هم فيها تعرفت على ناس جدد
-
الشباب الي اعرفهم من زمان ليهم طبيعه تفكير وطريقه معامله تختلف عن الي عرفتهم جديد
يعني لا طلعنا نكون رسميين مشخصين نقعد بمكان هادي كوفي نجلس ببيت واحد منهم
الي عرفتهم الحين لا شباب يبي يستانس ويضحك ويهبل والاشياء هذه
عجزت اعرفهم على بعض
-
بطبيعة ان الشباب علاقتي معاهم توها جديده ف لقالو لي ها طلعنا قلت يالله
-
بس الشباب الي اعرفهم من اول اذا ما بغيت اطلع اقدر اقولهم لاني امون عليهم عادي يعني ما بيننا شي مع بعض
-
مرت ايام وايام
جهاز جوالي ضاع وكنت مخزن فيه ارقام كل الي اعرفهم
وانا من النوع الي ما يحفظ ارقام
فانقطعت عن شباب كثير الا عن الي معاي ب الكليه
كنت اروح دايم لبيوت الشباب الي اعرفهم من زمان بس ما كنت احصلهم
-
اليوم حصلتهم سلمت عليهم وينكم من زمان
كان ردهم
انت متغير علينا
انت بعتنا عشان ناس جدد متعرف عليهم
وانت وانت وانت
فهمتهم ضروفي
بس قالو لي انها مو مقنعه
دلوني وش اسوي
قلت لهم وش يرضيكم
قالو الشباب الي انت معاهم ما نبي نشوفهم ولو شفناهم نبهم انهم يتحملو كلامنا لهم
:(
زهرة الكركديه
22-11-2001, 12:22 AM
شو ها المصيبة اللى انت حال فيها
حسبت هذى السوالف يسوونها البنات بس .....
بس هذا الامر يرجعلك انت اللى ترتاحله امشى معاه ..واللى تشوفه معاه حق وقاعدين تضحكون وتستانسون ولا تسوون اللى يغضب رب العالمين خليك معاهم يعنى لا تقطعهم وحاول انك تفهم رباعك الاوليين وتوضح لهم وتقولهم
ان اللى يقولونه غلط وما ييوز وحاول تعرفهم على بعض
بس المشكلة انى اعرفها نقشاتكم وحركاتكم انتوا الشباب .يا خوفى اول ما يشوفون بعض يطيحون فبعضهم تكفيخ وضرب وشتايم
الله يستر
اسفة كانى ما فدتك بشى وفزعتى ما كانت على شى
رمضان كريم
قوى موقفك افا عليك وانا اختك;) :p
الفقيرة لله
22-11-2001, 01:08 AM
بسم الله الرحمن الرحيم
أخي العزيز في اللبداية إنت لاتحكم وتتصرف بالسلوك فكر قبل لا تسوا أي شي وتأكد لو كانوا أصدقاؤك القدامى أصدقاء مثاليين لما طلبوا منك هذا الأمر وبعدين شوف يا خي أصدقاؤك الجدد إذا كانوا أخلاقيا ممتازين فما المانع من أن تتعامل معهم وتحتك أكثر وأكثر بهم
شوف أخي لاتغلط وتروح تنفصل عن ربعك الجدد وبعدين صلى إستخارة وشوف شو الخير بالضبط وسواه
وإذا أخي مو حافظ دعاء الإستخارة قوللي وبعطيك له
ترى مب عيب تسأل شي في الدين بالعكس شي طيب
لكن انتبه لا تنقطع عن ربعك
فوالله لو كانوا ربعك القدامى نخلصين ويحبوك وهم أخلاقياتهم حلوة لما طلبوا منك ذلك لأن أخلاقهم ما بتسمح لهم
عفوا ما قصدي الإساءة لهم والله
بس هذا هو المعروف في الحياة
واسمحني إذا ثقلت عليك :)
PT Cruiser
22-11-2001, 01:48 AM
هلا اختي : زهرة الكركديه
-
مشكوره وما قصرتي على ردك
هذا الخوف والله يا اختي انهم يطيحون ببعض
ولو سار الشي هذا
راح تكون مضره لي انا اول شي
لانهم بوجهي انا
مب بوجه احد ثاني
-----------------------------------
هلا اختي : الفقيره لله
الطرفين يا اختي اخلاقهم قدام عيني والا اشوفه منهم والا اسمعه عنهم ما فيها اي شي والحمد لله
المشكله اني واثق من ربعي القدامى
وواثق من اخلاصهم لي واخوتهم لي
لانها مب سنه ولا ثنتين ولا اربع
تقريبا 13 سنه مع بعض
يعني شي كبير مره
وعلاقتنا ما كانت بس بوسط المدرسه
لا كانت بداخل وخارج المدرسه
لدرجة اننا عرفنا اهلنا على بعض
الوالدة تكون عند والدة فلان
والوالد يكون عند والد فلان
وانا اكون مع عيالهم
اليوم كلمت اقرب واحد لي من ربعي القدامى
وقالي انه مو شرهان على باي شي
بس انه شويه عتبان
ودامني جيت وحكيت ظروفي هو لانه اعز واحد تفهمني وقدرني
وقالي انه راح يكلم الباقيين ويفهمهم كويس على الموضوع
-
والله كريم ان شاء الله
متشيم
22-11-2001, 02:04 AM
يــــــــــــــــــــــيه على شغلت الحرمات وأنا ما أشوف غير أخوات ردن عليك
أعرف شاب جارنا ، سافر يدرس في أمريكا وما تشاوفنا فترة سنتين وأول ما شفته قلت "أهلا خليفة كيف حالك؟" قال "أفا نسيتني واستويت ما تفرق بيني وبين أخوي" ... وضحكنا بكل بساطة
(( فوالله لو كانوا ربعك القدامى نخلصين ويحبوك وهم أخلاقياتهم حلوة لما طلبوا منك ذلك لأن أخلاقهم ما بتسمح لهم ))
رد ممتاز
طيب هم ليش ما سألوا عنك؟
أحيانا يتصل بي شخص ويبادر على طول بكلمة "وينك .. ما تتنزل تتصل .. شحقه شاري تلفون ... بس حق لمغازل ... عطنا ويه ... بنعطيك فلوس بدل اتصالك" وهذي نوع من الابتزاز وطبعا هذا النوع من الشباب اللي يبادرني بالعتاب فعلا ما أهتم به كثير.
يا أخي الفاضل ، أشرح موقفك لزملائك وإذا ما عجبهم ترى البلد فيها حيطان بالهبل ، يختارون حيطة يابسة يضربون راسهم فيها ، إذا كان زميل بيعاتبني وبيسويلي سالفة على أمر تافه مثل هذا بصراحة أشوف غيره ما يكثر عتاب على الأمور التافهة.
زهرة الكركديه
22-11-2001, 03:07 AM
واذا ما عيبهم ترى البلد فيها حيطان بالهبل ...........!!!!!!!
هههههههاهاهاهاااه
يا سلام اسميك نصحت والله .......
بس حلو الصديق يعاتبك واكيد لانه يحبك بيعاتبك عيل شو ....
انشالله يا .....الصراحة اسمك معقد
المهم
انشالله ربيعك بيصلح الامور واستغل اجواء رمضان
روح مثلا حق ربعك القدامى وكلمهم بالحسنى ووضح الامور وخبرهم سوالف طيبة صارت معاك ويا رباعتك اللى متعرف عليهم يديد واضحك وتغشمر وبعدين مهد شوى شوى واعزمهم زفة مثل ما يقولون ...يعنى كلهم مع بعض على العشا او الفطور في بيتكم...
شوف وانشالله بيقبلون كلهم وبيمدون يديهم وبيتصافحون وبيتعرفون على بعضهم واهم وانت تضحكون والله كريم
واتمنى من كل قلبى انه يصير جذى
اصعب شىء على الانسان انه يطيح بين نارين ويقعد يختار بين ربيعه هذا والا الثانى
الله يوفقكم انشالله ويصلح ما بين المتخاصمين ويسعدك :p
الفقيرة لله
22-11-2001, 04:19 PM
أخي في الله 000 إسمك صعب ههههه
المهم الحمدلله
وإن شاء الله تنفك عقدتك وأزمتك ويارب ما تشوف منهم إلا الخير إن شاء الله بس تأكد أخي بما إنك واثق منهم وواثق إن علاقتكم ببعض كبيرة من قبل الطرفين راح مايصير إلا الخير وصدقني راح يرجعوا إن شاء الله مثل ما كانوا بس إنت اصبر وادع الله وأهم شي النية تكون طيبة والله ما يخذل عبده أبدا وربعك بيرجعولك إن شاء الله
أخ متشيم
ليش وشو فيها إذا الحريم ردن ليشيعني العقل في الرجال بس مو في الحريم لا يا أخي أحيانا تلاقي الحرمة تحكم عقلها أكثر من الريال
ومدام شايف إن الرد لحريم بس عيل وينكم من زمان عن تساعدوا أخوكم ؟
اللي طالب مساعدتكم لكن ولا حد رد عليه سوى الإخت جزاها الله خير هي أول من قامت بالرد زهرة الكركديه ويوم قريت العنوان قلت أكيد هذا في وهقة ولازم نقدم يد العون له
فالله في عون العبد ما كان العبد في عون أخيه
:o
بس على فكرة لا تعتقد إني زعلت لا بس حبيت أرد وأوضح لك نقطة .
تحياتي أختك00:eek:
PT Cruiser
22-11-2001, 11:53 PM
هلا اخوي متشيم
كيف الحال
-
ربعي القدامى سالوا عني
دقو على البيت وسالو عني بس الي كان يرد عليهم اخوي الي اصغر مني فما كان يهتم انه يقولي ان في احد اتصل وسال عني
بعدين ربعي ذول ما اقدر افرط فيهم
حتى لول كانوا هم غلطانين علىّ ابرجع لهم
واذا كنت انا غلطان لازم ارجع واصلح الامور
لانهم غاليين علىّ مره
وما اقدر افرط فيهم
ولا اقدر احصل احد مثلهم
والايام هذه يا دوب تحصل الصديق الي يعاونك بكل شي وتحصل من تشكي له همك ويشكي لك همه
:rolleyes:
اختي زهرة الكركديه
شكرا شكرا على تفعالك معاي بالموضوع
بالفعل الي قلتيه سويته
رحت لهم وسولفت لهم لطفت الجو شوي
اغلبهم تفهم الوضع مره ورجع كل شي مثل اول
والجزء الثاني منهم بالطريق ان شاء الله
:D
اختي الفقيره لله
مشكوره بعد على تفاعلك معاي بالموضوع
وكثر الله خيركم ما قصرتو واي شي يصير جديد راح تعرفونه
--
على فكره اسمي مب صعب
أفالون
اوكي
زهرة الكركديه
23-11-2001, 10:55 PM
المهم
والله اسعدتنى بها التجاوب
الله يديم المحبة والصحبة:)
PT Cruiser
24-11-2001, 04:04 AM
هلا اختي زهرة الكركديه
-
سببي اني اخترت اسم افالون - هو اسم سيارتي :P
والا معروف انا بالحب الخالد IMMORTAL_LOVE
--
والتجاوب الي سار بيني وبين الشباب
بفضل الله ثم فضل الي عاونوني على حل مشكلتي و انتي منهم
والله لا يجيب الزعل بيل كل الاحباب والاخوان
مرايا مبعثرة
24-11-2001, 04:17 AM
انا جيت ركض عشان اشوف وش السالفة
بس الحمدلله السالفة انحلت
بالتوفيق افالون ;) :)
PT Cruiser
24-11-2001, 04:28 AM
هلا اختي Oasis
-
الحمد لله السالفه شبه انحلت
ودامك دخلت ورديت
كثر الله خيرك
:)
---
;) عدلتها :D
مرايا مبعثرة
24-11-2001, 04:37 AM
تعديل بسيط : انا اختي مش اخوي :)
وجزاك الله خير ;) ;)
PT Cruiser
25-11-2001, 03:40 AM
:D :D :D :) :) :) :)
ابشركم اخواني واخواتي
الوضع رجع مثل اول
الشباب تفهموا وظعي كويس
الساعه الحين 3 الا ربع بتوقيت السعوديه
توني جاي من عندهم
وتسحرنا سوا
:)
:) :) :D :D
شوف حبيبي اصحابك واحبابك القدامى مهما كان مالك غنى عنهم
عشان كذا لا تفرط فيهم وحاول دائما ان تكون انت الأفضل خلقا ومعاملة بينهم حتى تكسب ودهم لكن حاول ان يردوا لك ولو بضعا من الجميل والمعروف والصحبة والاخوة
لذلك راجع نفسك جيدا وحاول ان توفق بين اصحابك القدامى والجدد ولاتكن مثل المثل الذي يقول ( من لقى احبابه نسي اصحابه)
ومثل ماقلت لك حتى ولو مكالمة تلفون والله انها تاثر كثير
تحياتي
PT Cruiser
25-11-2001, 03:28 PM
هلاs8
اكيد اصحباي القدامى مالي غنى عنهم
ولو اني ما اعزهم ولا اقدرهم وحاطهم فوق راسي واكثر من اخواني
ما كان رجعت لهم