عاصفة رملية مخيفة في دبي

[بنت الأحزان]

السلام عليكم ورحمة الله وبركاته..

والغريب في الأمر هطو زخات من المطر.. بحجم كبير نوعا!!

سبحان الله.. قبل لحظات كان الجو عادي!!
سباحنه مقلب الأحوال بلمح البصر

طمنوني شباب.. كيف أحوالكم؟؟

انشالله ماصارت أي حوادث؟؟


أنا ما أعرف شو أقول لكم..
يمكن البعض يشوف الموضوع تافه
بس حبيت أتطمن... !!


تحياتي لكم

[بوسناد]

^1

الحمدلله ... مرت بسلام

:)

لا و بشاره عندتا مطر خفيف

:)

اللهم اجعله مطر رحمة .... آآآآآآميييييين

[شمس الشموسة]

مرحبا اختي بنت الاحزان....
والله صدقج يالغالية..

يعني انا مت من الخوف من شفت هالهواء وهالجو.. اليه ما يتوصف... بس الاروع من كل هذا هو هطــــول المطر.. ولو بشكل خفيف..

ولكن لا يسعنا ان نقول غير الحمدلله على كل حال.. والله يرحمنا برحمته يارب...

اطمنج ترانا كلنا بخير وعافية ولله الحمد.. :)

[الروح]

هيه والله ...

كنا نتغدى بخيــــر وسهالة ما فينا شي ..

ومرررررررررررررة وحدة ..

طاااااخ طيييييييييييخ ... :(

خير إن شالله :)







تحياتي
أقول حزونة .. منى طلعت ..؟ :)

[الحفار]

يا اهل دار الحي

اي خدمات ترى مستعد


فيه عندي حصان ماعليه ما شيء حاله

هالحين امتطيه واجي اشوف اذا انتم محتاجين
:):)

[بنت الأحزان]

مساكم الله بالخير

بوسناد.. شمس الشموسه.. الروح.. الحفار.. مرحبا بكم


أقول يالروح.. بالعافية عليج..
بس شلون قدرتي تكملي الغدا والصريخ في كل مكان بالجامعه!! ;)

الحفار.. متى راح توصل لا تقول ع الموسم الجاي ؟؟;)


تحياتي

والحمدلله كل شيء انتهى على خير ..((تقريبا))

[mouza]

والله الموقف كان وايد مخيف والكل تحرا يانه غضب وتمينا ندعي بس الحمدلله الله طوف السالفه على خير

[جاسم]

هلا بنت الأحزان

اذا تبغين فزعه حاضرين

بالبحرين ولا ربع قطرة مطر

لكن الحمدلله في هواء وبارد

والحمدلله على كل حال

وبالتوفيق

[فتى دبي]

الحمد لله عاصفة ومرت على خير
الأمن مستتب .. والحالة كسيفة

[الزهراني العجماني]

بسم الله

حظكم يا اهل دبي ليش خايفين مفروض تستانسون ياكم مطر
ولو شوي نحن غبار وبس و حظي كنت واقف برع اتريا حد يمر
علي !!!
بس ان شاء الله بشاير خير نتمنى ذلك

[شوق الامارات]

أيه والله كان الجو غريب و مخيف

انا كنت عندكم ..

و بصراحه كان الجو مش طبيعي .. غبار ورياح قوية ..

و بعد الشارجة بس كان على خفيف ..

مع بعض المطر في مناطق الذيد .. كان شيء رائع ..

و الله وصار لنا فترة ما شفنا المطر ..

و ابشركم بعد كان هناك مطر في بعض مناطق العين ..

-------------------

ايه و بعد بوظبي مر عليها هذه الغبار و الجو العاصف

---------
اما المناطق الشرقية كان الجو فيها صافي .. يعني لا غبار و لاشيء .. و كان الجو حلو و درجات الحرارة معتدلة فيه
---
هذا حال الجو اليوم في الامارات ..

[الروح]

صباح الخير عزيزتي :)
ما سمعتي اللي يقول : عند البطون تعمى العيون ..؟؟ :) :) :)


والصراحة ..
مب أنا اللي ما كملت غدايه .. هاي ربيعتي .. يحليلها والله ..

[جاسم]

تغيرت عندنا الأجواء

عند الفجر اصباح هواء قوي

ورعد يقعد النايم من سابع نومه وامطار قويه

من كان أمس الهواء العليل

واللهم صيبا نافعا

وبالتوفيق

[Huda76]

صباح الورد للجميع :)

حزووووونة .. اليوم تذكرتك وتذكرت موضوعك اول ما صحيت من النوم :)

مثل ما قال اخوي جاسم الجو في البحرين اليوم برق ورعد ومطر ..

الحمدلله :)

تحياتي

[بنت الأحزان]

mouza.. جاسم.. فتى دبي.. الزهراني العجماني..
شوق الامارات.. الروح..هدى76..

يا هلا بكم..
والحمدلله اليوم الجو مافي أحسن منه.. ع الأقل للحين :)
وسبحانه مغير الأحوال!!
وانشالله يكون الخير مع المطر..

--------------
بقول لكم شي..!
بالأمس وانا أتكلم بسالفة الجو والتغير اللي صار مع الأهل
فكرنا وقلنا كأن السماء بكت شهداء فلسطين زالرياح غضبت من المسلمين والعرب!! :(

[زورو]

بصراحة و الله يوم شفنا الهواء جيه ..قلنا خلاص روحنا فيها زوبعة بصراحة هااااااااااااااااااااااائلة :)
و حليلهم العصافير ما يرومون يطيرون ..:( و الله انهم غمضونى :)

بس الحمد لله امطار خير ان شاء الله .^__^

[النعسانة]

في البحرين بعد يا حزووونة

والله احنا مستانسين ..:)

بس الشي الي يحزن الحوادث الي صارت
حدث حادث تقريبا سبع سياير دفعه واحدة انصدمت مع بعضعها البعض:(

[بنت الأحزان]

أهلين زورو..
أظنك بتشوف نفس المشهد اليوم بعد!!



النعسانة..
الله يزيدكم من رحمته ويبعد الحوادث عن الجميع..






[تم تعديل الموضوع بواسطة بنت الأحزان يوم 04-10-2000 في 01:56 PM]

[نملة]

والله كان شي مخيف...والله كان يوم غريب جدا

اتخيلوووووا...سوينا حادث يوم ردينا من المدرسة..يعني قبل الشي الغريب اللي صار...يعني الحمدلله الله ستر وما صار فينا شي...ولا كنتوا ما بتحصلونا معاكم...وكانت الضربة صوبي وصوب سوسو..ولو اخوي ما تفادى الموقف كنا نحن في خبر كان

وبس
تحياتي نملة