عندي مشكلة ومحتاجة مساعدتكم

[أدروميدا]

مرحبا
يمكن بعضكم يذكرني ، أنا اشتركت من زمان ولمدة بسيطة وبعدين طلعت عشان الدراسة وما قدرت أرجع مرة ثانية . اللي رجعني الحين مشكلة صارت لي وأنا كلي ثقة فيكم إنكم بتساعدوني فيها . مشكلتي هي صديقتي ، صديقة عزيزة علي وايد وأحترمها وأعزها وايد ويمكن هذي هي المشكلة ، لأن محبتي لها خلتني ما أشوف تصرفاتهاالسيئة ومعاملتها السيئة لغيري ، فكنت دايماً معاها وأساندها مع إن كل اللي كانت تسوي غلط لكن محبتي لها عمتني عن اني اشوف الغلط واعرفه . في مرة من المرات يلست افكر ، هل اللي يالسه تسويه ربيعتي صح ولا غلط ؟ واعتبرتها انسانة عادية ما بيني وبينها اي معرفة ولقيت ان كل اللي كانت تسويه واللي تقوله غلط لكن انا ما كنت شايفة هذا كله لأني كنت اعزها وايد . والحين مب عارفة شو اسوي ، هل اصارحها واقولها انها غلطانة ولازم تحسن من اخلاقها وتتعامل مع الغير بطريقة احسن ؟ أو أسكت وابعد نفسي عن مشاكلها ، أو إني استمر في الغلط معاها عشان ما أخليها تزعل ، أتمنى انكم تساعدوني في هالمشكلة وآسفة إذا طولت

[مدردش متقاعد]

مرحبا من جديد أختي الكريمة.. و حياك بن أخوانك و أخواتك في سوالف:)

قريت مشكلتج .. و أعتقد إن حبج لها المفروض ما كان يعميج ..

فعن النبي صلى الله عليه و سلم، قال: (( انصر أخاك ظالما أو مظلوما)) فقال رجل: يارسول الله! أنصره إذا كان مظلوما، أرأيت إن كان ظالما،كيف أنصره؟ قال: ((تحجزه أو تمنعه من الظلم، فإن ذلك نصره))
رواه البخاري.

فكان من المفروض تحكمين عقلج من الأول و تحطين عواطفج على صوب.. و لا تخلين حبج له يحق باطل أو يبطل حق.. فهذا منكر كبير و إتي ساعدتيه فيها..
غلى العموم أنا من وجهة نظري يا أختي الكريمة,,, إنج تبدين تلمحين لتصرفاتها الغير مقبولة منها.. تلميح عابر لا أكثر.. لعلها تلاحظ انزعاجك منها.. و تتعظ,, إذا لم تنفع... فاخذيها على انفراد و انصحيها,, و تأكدي أنك لم تجرحي مشاعرها أو أن أحد سمعك و أنت تنصحينها.. و إن شاء الله ستكف عم تصرفاتها,,

فقط عليك بإخلاص النية لله سبحانه و تعالى.. و اجعلي حبك لها في الله و ليس في الدنيا الزائلة..

و تحياتي لك

[صدى الحق]

أسئل الله أن يهدينا ويهديها إلى سواء السبيل .

أختي في الله ،

من أفضل الطرق لتنبيهها إلى ما هي فيه ، هو التحدث إليها بطريقة غير مباشرة ، فقد كان من هدي الرسول صلى الله عليه وسلم إذا أراد أن ينصح صحابته إذا أخطأ أحداً منهم ، هو التحدث إليهم من غير أن يوجه الكلام إلى الشخص الذي ارتكب الخطأ حتى لا يكابر وتأخذه العزة بالإثم فيصر على ما هو فيه .

هذا والله أعلم

[سنفور غبي]

يا هلا والله بأدروميدا:):):)

أنا من راي بعد ما قريت السالفة... انج تنصحينها... لكن بأسلوب حلو... يعني مب تصدمينها مره وحده... يعني مثل ما يسمونه أسلوب المخادعه... (ما أدري جي اسمه ولا أنا مألفتنه؟؟) انزين... وأنصحج أنج ما تسوين اللي هي تسوي دامج عارفه أنه شي غلط.. شو الفايدة يوم الكل بياخذ عنج فكره مب زينه؟؟؟؟؟

تحياتي لج.. :) (أنا بنيه)

ولا تنسين توصليلنا الأخبار.. وكل شي صار وياج:)

[بياع القلوب]

النصيحة ثم النصيحة
وترا هذا واجبك انك تنصحيها وما تتركيها على عماها
اذا انتي فعلا تعزيها وتحبيها خليا تغير من افكارها
وبالتوفيق

[دموع حائرة]

انا مع بياع .. لازم تنصحيها ..
وماتخليها تستمر على هذا الوضع ..

تحياتي :)

[دمعه]

انا من راي أخونا // صدى الحق ..
كلامه أهوى الصح .. يعني انصحيها وكأنك تنصحين غيرها ..
أو قوليلها قصة أنتي مألفتها عن وحدة تسوي مثلها وشو
صار فيها .. وبس .. أدري أن السالفة أكبر من هشكل اللي
هوه مكتوب أنا مريت مثلش في نفس الموقف .. والله كان عصيب
عصيب جدا

[أدروميدا]

شكرا لكم كلكم ، وانا بحاول اني المح لها مع اني عارفة انها ما بتقتنع بكلامي ، لكن اهم شي اني عرفت اني لازم ما اوقف معاها في كل شي ، ولازم افكر اذا هي كانت صح ولا غلط ، اشكركم مرة ثانية :)