أربعة ساعة وعشرين

[E55]

:):)

تذكرت هالكلمة وأنا أفكر في لموضوع اللي بكتبه ، وهي وعلى ما أعتقد من مسرحية كويتية اسمها (لن أعيش في جلباب زوجتي)

المهم

لو طلبت من كل واحد (يحب يشارك في الموضوع) كم عدد الساعات اللي تقضيها مع أهلك (ابوك وامك واخوانك أو زوجتك اذا متزوج)

طبعاً أنا أقصد عدد الساعات اللي تقضيها معاهم بإختيارك ... يعني لا تحسب وقت الريوق والغدا والعشا

وياريت كل الشباب يشاركون لأنهم ما يقرون في البيت :):)

[سردال]

ممممممممم!!! سؤال محرج ومؤلم في نفس الوقت. تريد الصراحة أخوي E55 (بالمناسبة شو أسمك؟! :))

يمكن ما أكمل ساعة على بعضها، انا واحد أجلس في غرفتي كثير، سواء كنت على الإنترنت أو لا. وماني متزوج بعد، فيعني السؤال لي لازم يكون بالدقائق :)

[شرخشين2000]

الصراحة أهلي مساكين ،، ما أشوفهم الا على الغدا بسسسسسسسس

و العشا دايم برة أو مع الشباب ،، و المشكلة ان ما أشوف الوالد الا اذا كنت أبي فلوس :)

و الله حاجة مؤسفة لكن هذي هي الحال

تحياتـــــ للجميع ــــــي

[E55]

اخوي سردال
اسمي علي .... وإنت ؟ :):)
بالدقايق !! يا ساتر .... حرام عليك ياخي
وانا اللي كنت اعتقد اني أسوأ واحد ... طلعت أهون منك
أنا تقريباً أكمل ساعتين بدون أوقات الأكل
ومع هذا أحس إني مقصر ، لكن الوالد ما يخليني في حالي أيام الخميس والجمعه :) يحب يمشورني :)
تحياتي لك وشكراً على صراحتك :):)

شرخشين :):)
انت لازم ترضي أهلك هالأيام ... اعتقد تعرف ليش ;)
وبعدين ليش تتعشى بره ؟
لازم تراعي شعور الوالدة وتاكل من ايدها ... ولا شو رايك ؟
وبما إنك معترف إنها حاجة مؤسفة ... أكيد عندك نية لتغيرها ... صح ؟
شكراً لمشاركتك :)

[Huda76]

E55 هلا والله

عاش من شافك أخوي

سؤالك حلو والجواب عليه يخلي الواحد فينا يعيد حساباته شوي .. للأسف الشديد الوقت اللي أقضيه مع أهلي بسيط جدا مقارنة بالوقت اللي أقضيه في أمور أخرى

بالساعات كم .. مدري والله .. بس الأكيد انها ساعات قليلة جدا

بس ان شاء الله يا رب ان الأمور تتغير لأن فعلا الواحد لازم يقعد مع أهله ويسولف معاهم


تحياتي لك

[E55]

هلا اخت هدى (ما أدري شو لزمة الـ 76 هذي ؟ عرفنا إنك صغيرة:))

فعلاً ، لازم الواحد يقعد مع أهله

لأن (بعد عمر طويل ان شاء الله) يمكن الواحد فينا يندم على هالوقت اللي ضيعه وهو مب مع أهله

دام إن الفرصة موجودة الحين خلونا ننتهزها ، لن ما نعرف إذا كنا باكر من الحيين ولا من الميتين

[أدروميدا]

انا ما ايلس معاهم الا وقت الغدا واذا تعشيت لأني احيانا ما اتعشى وباقي الوقت ايلس في حجرتي ، ما ادري ليش لكني تعودت على العزلة

[سردال]

حياك الله أخي علي، أنا أسمي عبدالله، تردي ليش أسألك عن اسمك، يا أخي اسمك بالإنجليزي، وكل ما أريد أرد عليك أجلب للإنجليزي وبعدين أرجع للعربي، مرات ما يرجع أدق Esc وينمسح الدر....! :)

أنا اسمي عبدالله، والله أخوي أحتاج أراجع نفسي أحسن، لأني مقصر وراح أندم على هذا (مثل ما قلت :)).

[خله على كيفه]

:)
^1

صراحه سؤال عجبني وقمت احسب وانت تقول بدون الغدا

والله يا اخوي انا مع الغدا بس اقعد معاهم ساعه ويمكن اقل

الله كريم .

[بروكسي]

انا ماعرفهم :(

[شرخشين2000]

والله يا E55 ما أعتقد اني باكل من يد الوالدة ،،

لأنها ما تطبخ أصلاً ،،

:)