هاتفك .. صح إنه متحرك........... لكنه يقيد حركتك!!

[مدردش متقاعد]

هل خطر في بال واحد منكم إنه في حد قاعد يمشي و راه أو يتجسس عليه؟


يمكن البعض بيقول نعم.. و البعض الآخر بيقول لا..

عن نفسي أنا دايما أحس إني مقيد و في حد يتبعني.. المشكلة إني أعرف منهو هذا الشخص.. بس ما أقدر أستغني عنه؟!!

لا تستغربون..و لا تندهشون.. ترى معظمكم وياه نفس الجاسوس ,, الي ما يقدر يطلع البيت من غيره.. و يحس إنه بدونه ناقص!!

كم واحد منكم ما عنده هاتف جوال!! أكيد معظمكم إذا مب كلكم.. شباب أو بنات...صغار أو كبار.. شواب أو عيايز:)

الكل عنده على الأقل واحد.. إذا ما صار اثنين!

بتسألوني كيف الجول صار يقيدني؟ أنا أقولكم.. الجوال يقيدني لأني غصبا عني أحمله رضيت و لا ما رضيت.. لأني ممكن أحتاجه إذا بغيت أتصل..و بعد الأهل بسيونلي مصيبة إذا ما خذيته.. رغم إني كنت أجاهد علشان الوالد يشتريلي بيجر.. و بصعوبة وافق:) طبعا هذا يوم كنت صغير:)

بس المصيبة يوم واحد يتصل فيك و إنت ما تريد ترد عليه يا لأانه إنسان ثقيل الدم و ما تستسيغه .. أو ما كان الوقت المناسب ترد عليه.. شو بتسوي؟

غصبا عنك ترد عليه.. أو إنك تكذب عليه .. و تتعذر بالأعذار المشهورة.. : كان على السايلانت (الوضع الصامت) .. تسكره و يوم تشوفه تقوله.. و الله البطارية كانت امفضية.. أو العذر الأشهر بينهم :


و الله كنت مشغول ......... و نســـــــــيت!!

فالحين إنت صرت بين نارين.. يا ترد بدون نفس.. و تحاول تخلص هذي المكالمة بسرعة.. لأأنك ما تطيق هذا الشخص.. أو إنك ما ترد من الأصل.. و تلجأ للكذب.. ال نهينا عنها...... ما حد يقولي كذب أبيض أو أسود... الكذب نوع واحد.. و لا حد يقص عليكم..


بتقولونلي... ليش معطيه رقمك من البداية..... أنا برد عليكم و بقول.. إنه يمكن ماخذ رقمي من شخص ثاني.. و النتيجة ابلشت فيه:)


http://www.harrythecat.com/graphics/k/phone7.gif

طبعا هذا تقييد من ناحية.,


الناحية الثانية.. احساسك بأنك غير طبيعي إذا رحت و انت ناسي جوالك..ما أدري.. يمكم هذا الشعور عندي أنا بروحي.. بس كثير من الشباب امأيديني في هذه النقطة.. ما أدري شو رايكم؟

و بعدينهذا غير اللهو في الأشياء التافهة .. غصبا عنك.. من أنواع الجوالات .. و شو الأحسن و شو الأجدد.. و شو احلى لون للغطاء... و شو أخف واحد.. و شو أحسن ماركة؟ نوكيا و لا اريكسون و لا سامسونج و لا ولا و لا... الكاتل.. حق الكادحين:)

أخيرا ما أنكر إنه للجوال فوايد..بس له أضرار بعد.. و هالأيام قالوا إنه له أضرار طبية.. و توني اليوم قاري في الجريدة إنه العلماء البريطانيين أثبتوا أن الهاند فري أو السماعات لها أضرار,, بس تعتمد على وضعيتها.. هل هي قريبة ولا لا!!

بس في مرات.. تكرهك في اليوم الي اشتريته فيه.. خاصة.. يوم الشركات و الناس الفاضيين يطلعون اسمك من الدليل و ييلسون على راسك.. الشركات تتصل عليك تعرض عليك أسعار فندقية خاصة!! و التافهين.. يدورون على حد يتسلى معاه!!

و إذا تعمقت في الموضوع.. ما بخلص إلا بكرة:)

أترك لكم حرية التعليق :p


و تحياتي للجميع:)


http://www.harrythecat.com/graphics/k/phone9.gif

[سردال]

يا جماعة الخير توني أكلم مدردش على المسينجر!! :) وتوني أشوف الموضوع، والصراحة يا مدردش موضوعك رهيييييييب :)

أنت جبت الأسباب الي تخليني ما آخذ تليفون :)

يتصل عليك واحد ثقيل، وأنت تعرف أنه ثقيل قبل ما تشوف الرقم!! كيف؟؟؟ تعرفون كيف؟ التلفون نفسه يصير أثقل...ز لأنه واحد ثيل دش عليه :)

والتلفون يخليك مضطر أنك تكذب، والله مخلنه على السايلانت، أو أوه ما انتبهت تصدق!! حاط رنة خفيييييييفة! :) كان بعدي عني، والله مشغول مع الوالدة، أو مشغول مع أم العيال إذا كان متزوج (وتحصله توه متزوج ويسميها أم العيال!!! )

والتلفون ضروري، لكنه في بلادنا ما يستخدم صح، ألو كيف حالك، شو أخبارك شو احلى سيارة طلعت، عندك رنات جديدة، شو رايك نغير الكفر، طلع تلفون يديد اسمه محيوس...

وطلع تلفون ثاني اسمه الديك، وثاني اسمه دياية!! وطلع واحد اسمه مرفوس (حق يبين لك قوة تحمله :))

خسائر فلوس وخسارة ربع! وخسارة نفسك يوم تكذب :)

وأخس من هذا كله، يتصل واحد مغازلجي أو مغازلجيه!! ألوووووووههههههههه!! (شوية دلع لازم) كيف حالك.... يا أختي التلفون غلط، ما عليه مو مشكلة... تسلم لي حبيبي.... شو أسمك!! وين تسكن!! شو عندك من السيارات.... تقثدر تمر علي... (ما أسرع)

ولو عنده سيارة على قد الحال... أوفففف منك كيف تحاول تدنس شرف بنت الناس.... يا غبية لو إنتي بنت ناس ما تصلتي :)

[مدردش متقاعد]

أهليين سردال:)

بس المشكلة ياخوي.. إنه خلاص تعودنل عليه.. أنا يوم أكون في البلاد.. مستحيل أطلع من البيت من دون المتحرك.. و حتى هني في بريطانيا.. رغم إنه ما حد يعطيني ويه .. و كا حد يتصل... بس بعد.. متعلق فيه؟؟ظ

و الله هذا الي اخترعه.. بلشنا فيه:)

بس أنا أوف فوايده أكثر من أضراره.. و ما حد بيستخدمه في الشر إلا السفيه... الي ما عنده سالفة

و تحياتي لك

[مدردش متقاعد]

للرفع و تجديد النقاش:)

[aziz2000]

والله الجوال سالفته سالفة ..

إذا أخذته معي أحس إني مراقب مثل ماقلت يامدردش بالضبط .. وبعدين تجيك مكالمات مالها داعي ( مثلا تخيل يتصل عليك الفرزدق يبي يعطيك قصيدة جديدة .. وش تقول له ؟!! .. لازم أجاريه ولا أكسر بخاطره .. وفي الأخير أقول له هاها القصيدة حلوة .. يالله مع السلامة عندي إتصال ثاني ..:p .. طبعا هو مايصدق خبر ويروح لواحد ثاني يتصل عليه .. وإذا اتصل على النابغة .. عطاه النابغة الرأي الصحيح في وجهه .. :p .. النابغة ماعنده اسلوب مجاملات .. ) .. :p

أما مسألة نسيانه .. ياكثرها إللي صارت معي .. بس المشكلة إذا انسرق من واحد مثل ســردال .!!! وش تسوي معه ؟!! .. تتصل على الجوال .. ويرد عليك سردال .. ويدور الحوار التالي : ..

عزيز : ألو .. ياخي ليه تسرق جوالي ؟ ..
سردال : هاه؟!! ومن قال لك تنساه ؟
عزيز: ياخي الله يرحم والديك رجع لي جوالي .. توني شاريه بـ 2500 ريال ..
سردال: خلاص راح عليك .. بتشوفه في سوق الحراج ..
عزيز( بكل براءه): طيب والشريحة ؟!!
سردال: ياغبي .. اتصل على شركة الهاتف ويقطعونه ..
عزيز(بفرح طفولي): لا ..والله؟؟ .. شكرا لك على كل جهد تبذله لأجل المواطن ..
سردال : العفو .. ولاتنسى جوالك مرة ثانية بارك الله فيك ..

بس على فكرة لايوجد لدينا دليل لأرقام الجوالات .. وإن شاء الله مايصدرونه ..

شكرا لك على تعاونك يا مدردش .. :)

ونأسف لكل الشخصيات التي ذكرت في الرد ..

وخلوا روحكم رياضية .. :):)

[مدردش متقاعد]

يا هلا ولى بعزيز2000:)

ياخي استحملنا شوي و اقرا:)
وش فيك اليوم على الفرزدق و سردال ها؟:)
لا تخليني أتحالف معاهم ضدك:)

و على فكرة.. شو نوع الجوال حقك؟ ليكون الكاتل :)

و تحياتي

[مدردش متقاعد]

لكن مع تجدد الأعضاء.. أحب أن أسمتع إلى رايهم في الموضوع!:)

و سامحوني:rolleyes: :rolleyes:

[سموحة]

بالعكس موضوع حلو مع انه مغبر اشوي

بالنسبة عني انا جوالي أو نقالي ما احس فيه بالمرة :p

تدري ليش

لانه ما يرن إلا اقل من اشوية بعد

يعني بتقول مين يتصل ... أنا اقولك

زوجي وولدي وسعات الاهل اذا بقو شي

يعني عدد الرنات عندي قليلة ومعدومة

لا وسعات اذا حبيت اطلع مع زوجي خليت جوالي بالبيت وحولته علي جواله :)

لاني اعرف انه ما راح يرن إلا نادراً

مسكين جوالي اطرش واظن انه بيجيم من قلة الاستعمال :cool:

[أمير أبوظبي]

كلام صحيح .

.الموبايل شي مهم في حياه الفرد خصوصا في دوله الامارات .. لانه كل حد هنيه عنده تلفون من الوزير حتى الفراش .

زمان كان الموبايل من علامات الكشخه ..والي عنده موبايل معناته شخص مهم أو رجل أعمال

.بس الحين الموبايل عند كل حد من الشيبه الي مايعرف يستخدمه حتى الطفل في الابتدائيه الي مشتريه له أبوه على شان الولد يلعب فيه لعبت السنيك ..


أنا عن نفسي أعتبر التلفون شي مهم .. وضروري مثله مثل أهميه السياره ,..وله نصيب من برنامجي اليومي بلاضافه الي انه يقرب المسافات .. ويوفر الجهد على .... ( خصوصا في المناسبات )


http://64.204.32.19/netfu/tmp10022/coollogo_com.8786518.gif

[زهرة الكركديه]

لكن ماحد يقدر يعيش في ها الزمن من دونه..التلفون صار ضرورة أساسية.....في الشغل في البيت في الشارع في السيارة ..
مثلا تعطلت عليك السيارة وانت رايح منطقة قفرة بعيدة (( مثل حتا وما بعد حتا ))...ولا لك أحد يساعدك منهو اللى بينقذك في ذاك الوقت ...طبعا جوالك....

زوجتك مخلينها في البيت في شهرها الاخير من الحمل ...وفاجأها المخاض ..طبعا على طول تدق حق زوجها بالتلفون ....(( راعى الفزعات والنجدات ))

أخوك يحدونه شباب من قوم أهالى راس الخيمة (( ويحدونه بالسجاجين والسيوف وأسلحة الليزر الا يخلصون عليه هو وربعه ))
طبعا سيدة يستنجد بأخوه ويمكن أحد يشوفهم ويدق على الشرطة ومكافحة الشغب والاسعاف والطوارىء..وهذا كله بالتلفون...

حرامى نط على الاهل ..وماحد ريال في البيت شو تتوقعون يسوون ..مباشرة على التلفون ..وهنا يمكن يخدمنا الجوال خدمة كبيرة اذ أن الحرامى يمكن يفكر يقطع سلك الهاتف من برع (( مثل الافلام المصرية ))...:cool:

.....سلبيات التلفون كثيرة..لكن ايجابياته بعد كثيرة ...
من فترة باع زوجى تلفونه ...وتم ثلاثة أيام متغير حاله ..وما يحس للحياة طعم شرات الاول ..ويقول انه مقطوع عن الناس....وأنا مجربة لما اخترب تلفون البيت عندى تميت مب على بعضى فقدت ارتباطى بالعالم الخارجى....:(
طبعا أنا ما عندى موبايل لكنى سأسعى بقوة للحصول عليه..؟؟؟
سبحان الله ماحد يدري الدنيا شو فيها..
تحياتى أخوى مدردش ونعتذر عن الاطالة والتطويل...

[مدردش متقاعد]

بداية أشكر ك كثيرا على تكرمك بالرد على هذا الموضوع المغبر:)

أنا للأسف عكسك تماما.. جوالي ما يسكت.. كل شوي يرن و يأذيني..بس الحمدلله.. أرد على الكل لأنه أغلب الي عندهم رقمي من ربعي.. بس مرات يدق علي ناس الله أعلم منو وين جابوا رقمي..بس في النهاية نصرفهم:)


الجوال نعمة.. لا تجعلوها نقمة:)

تحياتي لك

[سراب]

السلام عليكم ورحمة الله وبركاته

صبحكم الله بالخير

على طاري الموضوع المغبر تذكرت حامد راعي الكاريكاتير يوم يكون في إجازة ويكتبون: حامد في إجازة وهذا بعض من قديمه المتجدد:D :D

ندخل لصلب الموضوع:)

صراحة التلفون أو الموبايل اليوم ما عاد من الكماليات بل أراه من الضروريات، لا تستطيع الخروج من بيتك دون أن يكون برفقتك، أنا من الناس الذين لا يستطيعون التحرك دون موبايلي:) أحس شي ناقصني كما أني يوميا أتلقى عليه سيلا من المكالمات:) حتى يعلقون عليه ويقولون : عنبوه بداله:confused:

بس من ناحية أنه يقيد الحركة فهو فعلا كذلك، أحيانا أكون مشغولة أو طالعة فيأتيني اتصال من إحدى الصديقات تريد تسولف، فأحاول أن أجاريها قليلا في الكلام ثم اعتذر منها وأعدها بإعادة الاتصال لاحقا، ومن ذلك كثير.........

بس الله لا يحرمنا من تلفوناتنا، ويحنن اتصالات علينا:)

[دكتور_احمد]

السلام عليكم ورحمة الله وبركاته

اولا : انا عندي اثنين واحد لاتصالاتي داخل الكويت والثاني اذا كنت بره الكويت او اذا كنت ابي اتصل دولي

وثانيا ابي ارد علي قولك بس المصيبة يوم واحد يتصل فيك و إنت ما تريد ترد عليه يا لأانه إنسان ثقيل الدم و ما تستسيغه .. أو ما كان الوقت المناسب ترد عليه.. شو بتسوي؟ اناعندي خدمه اسمها حجب المكلامات هذي الخدمه تخولك من 10 الي 20 شخص مهم تريد التحدث معه واللي دمه ثقيل من اول مايدق تضغط علي (ON) يطلع لك خيار يس كول اور نو كول اطلب طبعا نو كول

يطلع له انسرمشين (المشترك لا يرغب في تلغي مكلامات حاليا) واهو بيعرف انه ضيف ثقيل دوم وبيستحي علي وجهه ومايدق :)
تحياتي لك

[مدردش متقاعد]

فعلا أصبح شي مهم جدا هالأيام.. و ما يقدر الواحد يستغني عنه.. و علشان الواحد يعرف أهميته .. لا يحمل موبايله مدة 24 ساعة بس.. و يجرب!

بس السؤال هنا.. قبل اختراع الموبايل.. كيف كانت حياتنا.. و الحين كيف؟ ما توافقني الراي إنه الحياة كان سهلة و سلسلة بدون تعقيد؟

تحياتي لك

[مدردش متقاعد]

الحين رسامة كبيرة مثلج. و ما عندها موبايل؟ واااخجلاه.. و افضيحتااااه:D :D

صحيح إنه الموبايل مهم جدا.. بس مااعتقد ذيك الأهمية الي تخليه شي أساسي في حياتنا... و أكبر مثال على هالشي إنه (سردال) عايش لين الحين بدون موبايل ههههه..
و لو تأملنا في حياة أبانا و أجدادنا بنلاقيهم عاشوا مرتاحين بلا أية هموم بدون موبايل.. لأنه الحرمة منهم تدري وين زوجها يروح.. و متى يرد..و مع منو ييلس... و نفس الشي الريال يعرف حرمته إذا ظهرت من البيت وين بتروح.. و متى بترد.. و الفريج آمن.. فكانت الحياة سلسلة و طبيعية جدا.. بعكس التعقيد في هذه الأيام الي ما أنكر إنه يفرض بشدة علينا إنا نقتني موبايل...

لكن يبقى سردال حالة خاصة وسط هذا التعقيد الغريب في الحياة:)

و الله يرزقج بموبايل نوكيا 8310>>> قولي آمين :D :D :d


تحياتي لك

[زهرة الكركديه]

ولكن بما أن أمرى بيد زوجى...:) (( من دواعى فخري وسرورى )
فهو يقولى انى مب في حاجة للتلفون الجوال...مع انى بصراحة أحتاجه أحيانا ..لكن يمنعنى رد كلامه ...وكفاية انه اشترك في الانترنت على شان خاطرى..الله يجزيه عنى كل خير ويحفظه لنا ..

الاخ سردال سوالى صدمة (( مب منزل من زمان موضوع يتكلم فيه عن هذا الامر فى رأى الناس ))وبجد قلت يمكن انه يمزح أو يبالغ من يقدر يعيش بدون تلفون ..أمر صعب ..؟؟؟

أخى مدردش ..

:) شتان بين الماضى والحاضر ...وشكرا لك ...ومواضيعك رهيبة دائما كما عودتنا ..والسلام عليكم

[مدردش متقاعد]

^2

ههه حلوة المقارنة..مدردش في إجازة و هذا بعض قديمه المغبر:)

يعني إنتي تشوفين إنه الموبايل من الكماليات و ليس من الضروريات؟ أنا في رايي إنه في هالزمن صار من الضروريات حتى مع انتشار الهواتف العمومية و البطاقات المدفوعة.. بس سبحان الله الي يتعود على الموبايل ما يقدر يستغني عنه...
أتذكر إنه الوالد كان في فترة من الفترات معارض لفكرة إنه يحمل هاتف متحرك..و يتعذر إنه مرتاح بدونه .. فاضطريت إني أشتري له واحد على حسابي .. و من ذاك اليوم صار ما يقدر يستغني عنه! يعني لصقته فيه هههه

تحياتي لك

[أمير أبوظبي]

مدردش تحيه طيبه :)


الحياه في الماضي وفي الحاضر ماتغيرت تعقيداتها ..الحياه هيه مثل الاول ..بس يمكن أحنا الي تغيرنا وتغيرت مشاغلنا واصبحنا أكثر تعقيد وزادت احتياجاتنا

ماعتقد ان الموبايل السبب وراء تعقيدات الحياه ... بلعكس هو سبب من الاسباب لتخفيف هذي التعقيدات

مثله مثل الاختراعات الي مانقدر نستغني عنها ونفس الوقت نخليها شماعه نعلق عليها أسباب التعقيدات في حياتنا ( السياره - الكمبيوتر....الخ )
تخيل ان الموبايل غير موجود في حياتنا !
تخيل ان السياره غير موجوده !
تخيل ان الكمبيوتر غير موجود !
الحياه بدون هذي الاختراعات بتكون أكثر تعقيد وبطأ :)

بصراحه أشوف الحياه الحين أكثر سهوله وأقل تعقيدا من الماضي

وعلى فكره ..احنا الموبايل لا نقدر أن نستغني عنه لاننا أصبحنا في عصر السرعه .....والموبايل وسيله تخلينا نجاري السرعه
واذا في يوم فقدنا الموبايل راودنا أحساس ان حياتنا بطيئه ..وحسينا انه فيه شي ناقصنا

تحـــــــــــــــــيــاتي ;) ;) ;) ;) ;) ;)

[مدردش متقاعد]

بداية حمدلله على السلامة.. و ما تشوف شر إن شاء الله:)

و الله ياخي أغبطكم على هالخدمة الموجودة عندكم.. شو رايك نتبادل؟:)

لأنه فعلا قد تتطلب منك الظروف أن تتجنب بعض الناس لأسباب كثيرة .. ممكن لانشغالك أو لعدم ميلك له..و المحبة من الله مو شرط الواحديحب الكل:)

فما بيكون فيه حل إلا التطنيش. أو إنك تكون لوح و تقوله ياخي لا تتصل.. بس عجبتني سالفة الآنسر مشين.. يعني تخلي الكمبيوتر يقوله: (قم بس قم.. ترى الرجال ما يبي يسولف معاك) و إنت تبري ذمتك ههههه

تحياتي لك

[مدردش متقاعد]

لا تستعيلين على رزقج.. مصيره اليوم الي بتشترين فيه موبايل بيي.. بس متى الله لأعلم... عندي تلفون كاتل لون أخضر تريدينه علشان أختصر عليج الطرق:)

بالنسبة لسردال.. فالحمدلله قدرت أقنعه إنه يدخل العالم المتحرك.. بس الحبيب قال يا تييب لي رقم حلو يا بلاش هههه ..
نعم شتان بين الماضي و الحاضر.. ففي حاضرنا هذا.. الموبايل أصبح من الضروريات:)


تحياتي لك

[زهرة الكركديه]

كاتل..وبعد لونه أخضر ...!!!!!!
مشكووووووووووووووووووووووووور وما تقصر....عيل عندى أختى وعرضت تعطينى تلفونها وببلاش ورقم ييين بعد لكنى رفضت.....!!!

عنبوه أصوم وأصوم وأفطر على بصلة (( أريد واحد يديد ))
تصدقون لو بقولكم انى لين ألحين ما أعرف كيف أفتح التلفون وأبنده
حتى أمى عندها ومرة انحرجت موووت واحنا فى عرس لما عطتنى تلفونها وقالتلى اتصلى بأخوج وخليه يجى ..
مسكت التلفون وقعدت أطالع ....وأنا أقول ياربى شو أسوى ..كيف أفتحه وشافتنى أمى ويت وهى تقول جدام الحريم ....يالله بالستر بنت شباب ما تعرف تفتح تلفون وأنا عيوز وأعرف (( صار ويهى مثل البطيخة مرة أخضر مرة أحمر ))
والحريم يضحكون....والله موضوعك هذا يا أخ مدردش يطلع سوالف وقصص..ومشكور مرة ثانية على العرض (( المغري ))
اشرايك تبيعه على سردال مبين عليه بايعنها..
تحياتى