قدمت استقالتي !!

[mouza]

اليوم كنت ملانه
دخلت حجرة الناظرة قلت بشوفها شو تسوي
دخلت والا اشوفها ترمس في التلفون مكالمه مهمه وفي ايدها قلم 000
سرت ويلست عندها واطالع الاوراق اللي على المكتب
شفت ورقه
استمارة طلب استقاله :):)

ما ادري كيف مديت ايدي للناظرة عشان تعطيني القلم 000

وقمت مليت البيانات الاستقاله 00
وكتبت الاسباب تعبت من التدريس اريد ارتاح
خلصت الناظرة مكالمتها

فقلت لها ابله علياء 00استقالتي

قالت شو تسوي انتي تلعبين :
هاي الورقه النموذج الوحيد عندي
شو تسوين!!! مثل اليهال تلعبين على الاوراق من شفتي ورقه كتبتي وخربطتي فيها
هاهاهاهااهها والله ضحكت من خاطري لاني كنت امزح بس
قلت لها الحين باييب مزيل وبمسح اللي كتبته
قالت يلا قومي بسرعه
والله ابااعرف انتي متى بتكبرين
انا الغلطانه مدلعتنج
لا تخافون كانت تضحك وياي
واخر شيء قالت لي تعالي في ورقه ثانيه ماله داعي للمزيل
هاهااهاهاههااهاها

[Huda76]

أختي موزة

هلا بك والله :)

ما صدقتي شفتي استمارة الاستقالة وعلى طول مليتيها :)

حلوة أسباب تقديم الاستقالة .. تصلح لكل شغل :

" تعبت من ..... وأبي أرتاح "

اي والله .. ما كذبتي :) :)

تحياتي لك

[mouza]

ههاهااههااهاهاهاهااهاههاها

مثل ما قالت الناظرة والله
انا وايد احب اشخبط

هاهاهاهاهاها

[اسير_الصمت]

تخيلي كان لها مده تبغي تطردك ..........؟؟؟ هههههههه :)


لكن ما كانت لاقيه الوقت المناسب وانتي بمرحك وهي تكون مفوته حبتين ههههههههههه وصدقت وفرحت وقالت موافقه هههههههههه



تبقى ليلتك سوده و غلطتي غلطة عمرك ... الناس تلعب في ورقة تشخبط في ورقة طلب إجازة نموذج تعديل أحوال موظف راتب شي هههههههههههههههههههههههه


لكن استقاله أول مره أشوف أحد يلعب فيها .....


يعني مثلا انا كنت معدي جنب سيارة مديري ومدير وقتها طالع من سيارته وحبيت ألعب في أنتل سيارته طبعا بعد ما طلع وقفل سيارته وأعطاني ظهره ومشي وانا حبيت أنتقم من الأنتل هههههههههههههههههههههه إلا ما ألاقي السيارة قامت تطووووووووووووووووووووت ؟؟؟؟؟؟ اشتغل جهاز الانذار هههههههههههههههه

طبعا ألتفت وقال كلمتين

لا حول ولا قوة الا بالله ما تبطل هالحركات يا نايف ههههههههه


وقفل الجهاز ومشي ....


طبعا انا كنت في موقف لا يحسد عليه ههههههههه :)


ومشي الحال والحمدلله :)




أخوكي

[مملوزي]

هلالالالالالا......
أبله شحالج......يعني ليش تخربطين في أوراق العالم...حشى..بس تصدقين ترا هالعادة السيئه فيني بموت واشخبط...يالله ما أعتقد في حد يقاوم يشوف الورقه والقلم وخاصه اذا كنتي في محاضرة مممله مثل محاضراتي..

[متشيم]

أهلا بالاستاذة موزة

لاحقه على الاستقالة ،،،

الحقيقة الوضع ما يسر ، المعلم شمعه تحرق نفسها ، في أبوظبي عندنا المعلم يستلم معاش معتبر ، يصل إلى 12 ألف درهم ,,, ومع ذلك يعاني من التالي:
1. روتين رتيب قاتل يلزم به.
2. قتل لكل فكرة إبداعية.
3. عدم تقدير لما يقوم به ولا ثناء ولا كلمة شكر.
4. يكد كد الوحوش ، تعب في النهار ومتابعة التصحيح في الليل.

الله يأجركم على صبركم وتحملكم ، وهو الصبر على تعليم البزران شوي ، بس من يغيلون في لاصف الواحد وده يصرخ صرخة طرزان ، بس ثاني يوم بيرمونه في مستشفى الأمراض العقلية ، يكفي غراش المخيس والدبابيس ورمي البطاشير.

بصاحة نحنن على أيامنا كنا طيبين:
1. كسر ثلاث زجاجات مخيس في الفصل في فسحة الصلاة.
2. سرقة المساحات وآخر شي اكتشفنا أن السارق كان يضعها في المكيف ، بعد فترة بدأ المكيف يثقل فاكتشفنا السر.
3. جمع طالب كمية معتبرة من بودرة الطباشير تملأ زجاجة الببسي وكبها في المكيف ، فأغلق الطلبة المكيف ، وحينما دخل المدرس بدأ الطلبة في الهف على الوجوههم بالدفاتر ، فقال الطالب للمدرس افتح المكيف... فرفض الطالب معللا ذلك بأن الفيشة ستصدمه بالكهرباء ، وأول ما أدار المدرس المكيف خرجت كمية معتبرة من الغبار ، مساكين الطلبة المقابلين للمدرس.
4. الدبابيس وما أدراك ما الدبابيس.

هل تعتقدون أن بعد كل هذا المدرس سيبقى عاقلا.

يعاني المدرسون من الطلبة غير المتربين في بيوتهم معاناة شديدة ، ولا يدري المدرس ، هل يكون مربيا أم مدرسا أم مصلحا اجتماعيا... فنسأل الله أن يثبت المدرسين ويأجرهم على جهودهم.

[cooki]

تصدقين اختي موزه..
انا ودي اقدم استقالتي ..واكسر وراها اقله.. ( مثل مايقولون)
بس انا متأكده انها بترفض..ودائما يقولون لي .. تو الناس ...الطريق قدامك طويل باقي لج...كذا سنه..
والله يعين .. مادري متى باتخذ هاذي الخطوه المصيريه..
بس لو احصل وظيفه افضل..جان من زمان...قايله لهم باي باي
الله يعين بس...

[شاهيناز]

موزه... ماقلتي كيف كان شعورك بعد ماكتبتي الاستقاله لان الكتابه كانت تعبير عن الذات ودئما الانسان يشعر براحه بعد مايعبر عن امنياته .....

[mouza]

ضحكتوني والله

اسمحولي والله ما رديت عليكم اول بأول شوي ظروفي ها اليومين مول ما تسمح بس ان شاء الله ارجع وياكم شرات قبل واحسن :)



شاهيناز والله راحه ما بعدها راحه

هااههاهاهاهاه



على فكرة اللي لاحظته الناظرة ما يخصها انا قدمت استقاله او لا
هي كان همهاالنموذج الوحيد لورقه الاستقاله اكثر

هاهاهااهاههااه

[سردال]

يعني ما همها أنك تقدمين استقالتك؟! والله حالة!!

خوفتيني يا شيخة! قلت الحرمة ملت من التدريس وتعبت وعلى آخر السنة قدمت استقالة عشان ما تتبهدل في الامتحانات والتعب! :) لكن طلعتي مشاغبة مع المديرة وتريدين ترجعين لأيام الدراسة! على أي حال سوي اللي يريحك لكن أنا مب مسؤول إن قالت لك المديرة: وجهك للجدار ورافعي إيديك ورجل! وأتمين على هذا الحال ويشوفن المدرسات هذا الوضع مع المعلمة المحترمة موزة :)...!

تحياتي لكرتون الموز كله!! قصدي لجميع المدرسين والمدرسات...

[أسير الليل]

يعطيك العافيه موزه..

انا ملاحظ انك متواجده باستمرار في غرفة المديرة..

اكيد تاخذين نصيبك من الشغلات الموجوده عندها...طبعا معروفين

المديرات..أشي صحن بقلاوة..وصحن تمريه..وترمس القهوه..

والا اكيد مخططه تسيرين مديره..وتحرقي اعصابها ويرتفع الضغط

عند المسيكينه..وتطوق وتموت..وانتي عاد المديره الجديده..

مبروك موزه..قدها وقدود..

تحياتي..

[نجمة المساء]

موزه الاستقاله شي خطير

لكن الاعم هي الصحه

[aziz2000]

أما لو المديرة على طول وقعتها :)

كان أبلة موزة في خبر كــان :) وجاية تبكي عندنا في سوالف وتقوول والله ماكاان قصدي :)

تحياتي لكيلو الموز :)

[mouza]

سردال 00انا اوقف بريل وحده هاهاهاهاهاهاههاها
ضحكتني


اسير الليل 00ادور على الامتياز



نجمة السماء اتصدقين كله اقول سماء وانتي المساء
صدقتي والله

اسكت يا عزيز 2000
صدق كنت بصيح

[نجمة المساء]

موزه الحلوه



مساء سماء كله واحد


ابله موزه ابي اخذ عندج درس خصوصي

[mouza]

حياج الله

بس كم بتدفعين على الحصه الوحده

هاهاهااهاااههااها