اغبياء بتفوق و حمقى مع مرتبة الشرف..!! (3)

[دمدم]

مرحبا..

شكرا لكم جميعا....


[] هذا حادث طريف في قصته،مأساوي في نهايته..
و ساورد بعض التفاصيل على شكل حوار وهمي و لكنه يصف ما جرى..

· العمليات تسال الضابط اللي مباشر حادث على احد طرق اريزونا السريعة : وش تقول انت يا جورج...انت صاحي..و الا فيك بلى ؟؟

· النقيب جورج : ايه و الله هذا اللي صاير..مثل ما قلت لك ، الحادث حادث سياره ، و لكن التصادم صار في الجو..و ما ندري وشلون صار..؟؟

· العمليات: طيب وش نوع السياره ؟؟

· النقيب جورج : ما ادري..؟؟

· العمليات: وشلون ما تدري ..!!

· النقيب جورج : السياره معدومه مررره و ما قدرنا نتعرف على نوعها ..بس اللي متاكدين منه انها سياره..؟؟

· العمليات: و ابو الشباب وينه و منهو ؟؟

· النقيب جورج : برضه ما ادري..؟؟

· العمليات: اوووووووه وشلون ما تدري ، وشو له حنا مرسلينك ؟؟

· النقيب جورج : الحين ما تعرفنا على السياره انت و " فيسك " تبينا نعرف منهو..؟؟

· العمليات:....... خلاص نبي نرسل لكم فريق متخصص يشوف لنا حل في هالمصيبه المهببه..؟؟

· النقيب جورج : و ياليت تجي تشوف بنفسك..!!

و بعد البحث المخبري تم بناء تفسير علمي لما حدث..

صاحب السياره حصل على JATO اي " Jet Assisted Take Off " و هو جهاز يحوي وقود صوايخ صلب يستخدم في مساعدة الطائرات الحربيه على الاقلاع في المسافات القصيره – كما في حاملة الطائرات-

الرجال ركب في سيارته هذا الجهاز، و مسك خط مستقيم و مستوي..و ثبت الجهاز على السياره و ركب وشغل سيارته و مشى وشغل جهاز JATO............و يا ليته ما اشتغل..

يقول التقرير ان المسافه بين الانطلاق و موقع الحادث حوالي 3 اميال ( 5 كيلو)، وهالجهاز يعطي طاقته القصوى خلال 5 ثوان،و استطاع ان يصل بسيارته الشيفروليه امبالا 1967 الى سرعة 350 ميل ( 560 كم ) في الساعة..

و استمر الجهاز يعمل بطاقته حوالي 25 الى 30 ثانيه،

بعد ميلين و شوي (3.5 كيلو ) انتبه السواق سابقا ، الطيار حاليا، انتبه للورطه اللي هو فيها، قام وضرب فرامل لعل وعسى..

طبعا الكفرات ما تحملت و انفجرت، ارتفعت السياره بالهواء و مشت لمسافة 1.4 ميل ( اكثر من 2 كم)

و من ثم ضربت بجبل على ارتفاع 125 قدم..

بعض اسنان وعظام و شعر المجهول تم التعرف عليها مخبريا من بين الحطام..

عموما ، الموقع و في نهاية القصه شكك في صحتها..- وش عقبه ، يوم ترجمتها وخلصت -، رغم ان احدهم ارسل للموقع مؤكدا انها حدثت في المكسيك..؟؟

لكن اللي نستفيده من هالقصه، هو ان لا احد يفكر مجرد تفكير بمحاولة تلافي الاخطاء اللي وقع فيها المرحوم..؟؟


[] يقول لك هذا ثرستون بول و خويه بيلي واليس راجعين من رحلة صيد،كانوا يتصيدون " ضفادع"..- هذي اول علامات الغباء - ..
المهم هم راجعين ليلة الاثنين بالليل...و طفت عليهم انوار السياره..

طبعا ما يقدرون يمشون في الليل بدون انوار..بدوا يدورون على مكان العطل ..

اكتشفوا ان السبب هو ان الفيوز احترقت،و لاحظ الاخ واليس ان طلقة المسدس عيار 22 اللي معة تركب مكان الفيز..و على طول قال لخويه اللي وافق بدون تفكير - كالعادة- على الفكره الجهنمية..

مشوا حوالي 30 كيلو و قبل ما يعبرون جسر النهر الابيض، انفجرت الرصاصه اللي في الكبوت اللي كانت جمب عمود الدركسون " عمود المقود" ..
و النتيجه ، هي خروج السياره عن الشارع ثم صدموا بشجرة واقفه جمب الخط ..

بول ، صاحب السياره، اصيب بقطع و بخدوش ، اما بيلي فاصيب بكسر في الترقوه على ما اظن..

بيلي عقب الحادث قال : " فكنا الله، و الله لو كنا فوق الجسر يوم تنفجر الرصاصه ..كان صرنا في خبر كان.."

زوجة بول كانت قمة في التناحه هي الاخرى عندما سألت " كم ضفدعا جمعتم، و هل اتيتم بها من السياره " مع انها شايفه الوضع وش لون قايل..


[] ننتقل لروسيا و هذه الاقصوصه ...
اثنين سكيورتي ..يحرسون بنك

واحد منهم كان مرتفع شوي و كان لابس جاكيت او ستره ضد الرصاص، فمسكت معة انه يجربها و يشوف متانتها،و هل تحميه و الا لا ..؟؟

قال لخويه ابيك جيب السكين و تطعنني و انا لابس الجاكيت ..؟؟

خويه ذاك ما كذب خبر...جاب السكين و دففففففففف بالصدر ..

هذاك توكل على الله ، لان الستره ما حمته و الطعنة جايه في القلب..

اما خويه.. فما نقول الا: الله يخلف عليه من خوي..

[] هذا الله يسلمكم واحد ، فك – اشترى- جيب جراند شيروكي جديد باكثر من 30 الف دولار..و طبعا متحمس جدا للموتر،و مبسوط فيه على الاخر..

طبعا خويه يبي يقول وش ذا الجيب اللي ما يطاعس..
طلعنا فيه خل نشوف وشهو من موتر..

قال ابشر،و ليته ما قال..

زبطوا امورهم لرحلة صيد و لكن لصيد بط هالمره..و جهزوا العدة المكونه من : بنادق،و بيره،و ديناميت بفتيلة 40 ثانيه،و الكلب و الموتر الجديد..

الجو بارد جدا و البحيرات متجمدة ..و علشان تغري البط بالهبوط ...لازم يكون في البحيره ماء غير متجمد..
و هنا لزوم الديناميت...

في تفكير النوابغ اعلاه ما يلي:
1- اشعال الديناميت
2- رميه بعيدا عنهم،
3- ثم الانتظار 40 ثانيه حتى ينفجر
4- اصبح لديهم المكان اللازم لهبوط و صيد البط

الخطوه الاولى و الثانيه مشت تمام التمام، في الخطوه الثالثه تدخل الكلب..و بصراحه تدخل الكلب سليم...

لانه متعود ان كل ما رمى صاحبه شي...انطلق و جابه..

طبعا، الشباب يصارخون و يصايحون و يناقزون و الكلب راجع و الديناميت في فمه ، لا.. و يحسبهم مبسوطين منه...

شافوا ان ما فيه فايده و ان الكلب غبي و ما فهم وش يبون..

فجابوا السلاح و عبوه ثمان طلقات،و اطلقوها على الكلب و هو في نص الطريق...

الكلب وقف و يناظر فيهم : خير ان شاء الله...عسى ما شر..

يوم شافوه ما ترك اللي في فمه، اطلقوا عليه مره ثانيه..

الكلب وقف و يناظر فيهم مستغرب : وش اللي صاير...هذا و انتم ما شربتوا البيره بعد....الله يستر اجل..

يوم تبين ان الكلب لسه ما لقطها و هي طايره ، قاموا و حطوا رجليهم ...ركضوا لاي مكان ، بس يلحقون اعمارهم قبل لا ينفجر الديناميت..

انفجر الديناميت ،و مات الكلب الشجاع و غرق الجيب الجديد ،و تحولت الرحله الى ذكرى اليمة...

بعد كذا تذكر صاحب الشيروكي مسألة التامين، و راح للشركه و قال لهم عن اللي صار..
و كان الجواب بالامتناع عن الدفع...
و السبب هو ان استخدام المتفجرات غير مغطى بالتامين حتى تحت بند ما يسمى التصرفات الغبيه المعتادة من الزبائن..

اتمنى انكم قضيتوا وقت ممتع مع الاضافة..مع وعد بالمزيد في القريب باذن الله....