سوالف للجميع - ((والله ما يسونك ))

رزونة

02-05-2004, 10:48 PM

قصة أعجبتني وحبيت انقلها لكم

الجزء الأول ((1))

في السيارة في الطريق لابوظبي...

العنود : حسافة والله كان ودي نتم كم من يوم بعد في دبي مع بيت عمي
بومحمد: اقول العنود حمدي ربج انج سرتي
العنود : وش قلت انا الحين ؟؟!!
ام محمد: لو ماوديناج ما نخلص منج ولو وديناج بعد مب خالصين.
مهرة : هيه والله ..
العنود: مهروه قولي كلمة خير ولا تمي ساكتة ابرك لج انزين
مهرة: لا فديتج الحق معاج تراهم يومين من العمر..
بو محمد: يالله ياالله ترانا وصلنا..

في حجرة العنود:
تسمع احد يدق الباب
العنود: ادخل ..
فاطمة : هلا عنودي اشحالج تولهت عليج
العنود : تولهتي علي .. امس كنا ويا بعضنا..
فاطمة : هذا بدل ما تقولين لي اشتاقت لج العافية حرمت اخوي ؟؟
العنود: لا ما بقول عشان تسيرين البيت قبلنا بيوم كامل مرة ثانية
فاطمة : الله يسامحج تدرين ودي كان ايلس معاكم بس خلودي
العنود: وش فيه ولدج ؟؟ كان مستانس وش حلاته يلعب
فاطمة : تدرين عنودي انه كان مريض.. خلاص عاد لا تمين زعلانة تراني بكبري ياية اسلم عليج
العنود: مسموحة بس لا تعاودينها..
فاطمة: خير انشالله .. يالله بخليج الحين بسيرصوب خالي ومرات خالي..

العنود هي اصغر عيال بو محمد .. عمرها 22 سنة تدرس في جامعة زايد ..جذابة شعرها اسود ناعم
طويل وعيونها سود وساع ..خجولة لكن مرحها وشقاوتها الزايدة ما تخلي احد يلاحظ خجلها .. ومع انها الصغيرة كل العيلة تحبها.. اختها مهرة تحب تسميها أمينه السر لان كل اللي في البيت يحبون ياخذون بشورها

فاطمة وهي طالعة من غرفة العنود لقت مهرة في ويهها

فاطمة: بســـم الله !!
مهرة : قولـــي والله .. اخرع انا لهذي الدرجة؟؟
فاطمة : هههههههه
مهرة : ولا عشان مسكتج متلبسة في الجريمة؟؟
فاطمة : اي جريمة ؟؟
مهرة : اونة ما تدري .. تونا داشين البيت وقبل لتسلمين على اي احد ركضتي صوب غرفة العنود حبيبتج.
فاطمة : هي حبيبتي بروحي ؟؟ تراها حبيبتنا كلنا، الله يحفظها
مهرة : تراني بعدني واقفة جدامج ..
فاطمة: الحين عن الغيرة، وانتي بعد من يستغني عنج ..
مهرة: انزين فطامي.. ادري اني ملقوفة بس خبريني.. وش صار امس يوم رديتوا للبيت؟؟
فاطمة : ولاشي... فديته خلودي حرارته كانت مرتفعه.. غيرت له وعشيته وخليته يرقد.. تصدقين ؟؟!! تميت سهرانه عداله لين رقدت من التعب ..
مهرة: الحين انا صدقتج
فاطمة: وليش ما تصدقيني؟
مهرة: تبين تقنعيني انج سرتي قبلنا بيوم كااااامل لبوظبي بــس عشان ترقدين خلودي وترقدين وياه ؟؟
ولا كنتي تبين الجو يفضى عشان تتذكرين ايام زمان انت ومحمد ؟؟
فاطمة: مهروه ويا ويهج انتي قلتيها ايام زمان يعني كبرنا على هالسوالف..
مهرة : الحيــن..
فاطمة ( تقطع كلام مهرة) : الحين خليني اسير اسلم على خالي وخالتي ياحلوة
مهرة (ترمس عمرها) : اللي يسمعج يا فطوم يقول عمرج امية سنة !! اوووونه البنية كبرت على هالسوالف..

مهرة .. عمرها 26 سنة .. اقل جاذبية من اختها العنود لكنها اكثر رزانة ورومانسية .. تحب تقرا الشعر وتكتبه وعادة تنسى عمرها بين الكتب ..تخرجت من كلية التقنية .. ما تحب تشتغل لانها عندها قناعة ان الحرمة مكانها البيت عشان تهتم بعمرها وباسرتها والاهم هواياتها .. كانسانة معروفة بالخيالية كانت تشعر بالتردد وعدم الثقة وهذا من السبب اللي خلاها ترفض كل اللي تقدموا لها..

في الميلس...

بو محمد : هلا ولدي شحالك؟؟
محمد (وهو يحب على يد ابوه) : يسرك الحال .. شحالج يالغالية؟؟
ام محمد : الله يبارك فيك، بخير وعافية دامكم بخير.
محمد : ربي يحفظج لنا..
وتدخل عليهم فاطمة..
ام محمد: هلا حبيبة قلبي شحالج ؟؟
فاطمة: تولهنا عليكم .. هو يوم واحد بس البيت ما كان له طعم من دونكم..
بو محمد: قلنا لج تمي معانا ماوافقتي..
ام محمد : فطوم تدور راحت ولدها قبل راحتها ودام ولدها كان تعبان من حقها ترد لبيتها ودور راحته.
بو محمد : ما تنلام والله .. بس وينه خلودي ..
فاطمة : ما صدق نش الصبح لقى نفسه فيه قوة سار يلعب في الحوش مع عبود ولد الجيران.. بسير اشوفه..
محمد ( تم يطالع فاطمة بنظرات غريبة)
ام محمد : مسكينة فطوم والله، ذابحة عمرها عشانك انت وولدك يا محمد.. الله يخليها لك
محمد: هاه؟؟
ام محمد : وش هو اللي هاه؟؟.. اقول لك الله يخلي لك حرمتك..
محمد : هيه انشالله انشالله .. اقول وينه مبارك وراشد عنكم ؟؟ ليش ما ردوا وياكم..
بو محمد: شباب دامهم مستانسين مع ربعهم خلهم يردون وقت ما يبون، دام مصالحهم مب متاخرة..
محمد : بس بكرة دوام ؟؟
بو محمد: مبارك قال بيسيرون للدوام الصبح من دبي..
تدخل عليهم العنود ومهرة ..
العنود تركض صوب بو محمد وتحضنه ..
العنود: فديت ابوي انا
بو محمد : هلا غناتي
العنود : فديتك دوم طلعنا شذي ترانا والله نمل من يلسة البيت.. والله حتى وناسة يوم نشوف بيت عمي
ام محمد: لحقتي تملين الحين تونا رادين..
مهرة: وبعدين وش سالفتك ويا بيت عمك؟؟ على حد علمي ما تدانين سلامة بنت عمج
( مهرة راحت تيلس عدال اخوها محمد )
العنود: تتحريني مثلج ما ادور الا مصلحتي؟؟ فديته عمي يلسته ما تنمل
مهرة: ما برد عليج
مهرة (بصوت واطي):علومك محمد؟؟
محمد: ابد والله العلوم من صوبج..
مهرة : احسك ضايق فيك شي؟؟
محمد: لا الغالية سلامتج..
مهرة : تخبي على مهروه يا محمد ما هقيتها منك ..
محمد (يطالع مهرة ويسكت)..

محمد اكبر عيال بو محمد .. ويد ابوه اليمين عمره 32 سنة متزوج من فاطمة بنت عمته من 7 سنين ..
تحلم فيه اي فتاه وتتمنى تحصل على ريل مثله.. يحب ولده خالد 4 سنين خاصة انه جه بعد رحلة علاج طويلة
وبعد ما فقد الامل ان فاطمة تقدر تجيب له طفل ..

في حديقة البيت..

فاطمة: خلــــودي..
خالد( وهو يركض): امااااايه..
فاطمة : شذي تركت ربيعك بروحه ناده اشوف..
خالد: عبووووود
فاطمة : هلا عبود اشحالك حبيبي ؟؟
عبود ( مستحي)...
فاطمة : انزين يا عبود انت وخالد مب بسكم لعب؟؟
خالد( قرب يصيح) : لا ابا العب بعد امايه...
فاطمة : انزين يا بعد عمر امايه .. بخلكم تلعبون كثر ما تبون .. بس تلعبوني وياكم..
خالد وعبدالله : هيه هيه ..
فاطمة وخالد وعبدالله : ههههههههه

فاطمة.. عمرها 28 .. جمالها وطبعها هادي.. عاشت حياة صعبة بعد وفات امها وهي صغيرة وبعد ما ابوها تخلى عنها .. بس خالها ما خلاها تحتاج شي واعتبرها مثل بناته واكثر.. كانت تعرف ان محمد هواللي بياخذها ففتحت عينيها عليه وعلى حبه... قلبها الابيض اللي ما يكره يتربع فيه ولدها خالد حلمها الوحيد..

في دبي ...

صوت المسجل في السيارة... من فينا هالليلة ينام والشوق صاحي ما ينام.........
راشد: صدق انك مب صاحي اونه من فينا هالليلة ينام ... شباب اقول انتوا متى بتفارقونا؟؟؟ نبا نرقد
الشباب : افــــــا.. تراها سيارة مبارك.. انت ما يخصك..
مبارك: يعني لازم يا راشد تيب لعمرك الرمسة هههه ؟؟
راشد : ابا ارقد يا عالم ارمس عربي تراني..

راشد عمره 25 سنه وهو اصغر الشباب في العيلة .. ويساعد والده في الشركة كثر ما يقدر ولكن كل تفكيره رايح صوب المزح والضحك وسوالف الشباب.. ومع هذي الصفات قلبه طيب وهو اكثر الاخوة المقربين لاخته العنود يمكن للتشابه الكبير في شخصياتهم ..

بعد ما ساروا الشباب عنهم..

راشد: واخيرا بنرقد..
مبارك: تدري بشو يالس افكر؟
راشد : خير؟؟
مبارك : ما بسير البيت
راشد (يقطع كلامه): طول عمري اقول لو مبارك فكر بتستوي مصيبة دخيلك سير البيت وريح لنا راسك من التفكير..
مبارك: صبرك بس .. خلني اكمل .. نحن بنسير البيت بس بيت..
راشد: لا تقول بيت عمي، سالم ما بيكون رقد للحين وبيستلمني
مبارك : لا بيت بوظبي
راشد: ينيت انت انا ابا ارقد..
مبارك : هههههههههه صدقني احسن عن ترقد الحين واصحيك من صباح الله خير وعلى الدوام مرة وحدة
يرن تليفون راشد..
راشد : وبعدين حشرتني هذي ما بترقد.. مابرد عليها ولا خلني ارد وافتك من صدعتها
راشد:هلا وغلا والله بغناتي
بنت : الحين غناتي ؟؟.. وايد عذبت عمرك ليش رديت علي..
وتم يسولف ومبارك يطالعه
راشد: باي
مبارك : من هذي؟
راشد : بنية متفيجة..
مبارك : الحين من اللي متفيق؟ مب عيب عليك هذي السوالف؟؟
راشد : ما حد ضربها على يدها .. الحين يلا ودينا بوظبي تراني تولهت على العنود..
مبارك: تتحراها بتكون بعدها واعيه تترياك للحين..
راشد : خلها ترقد عني تاخذ لي بحقي ..

في ابوظبي..
راشد ( يفتح باب السيارة وينزل بسرعة ويدخل البيت): تصبح على خير.
مبارك: راااااشد .. ويا ويهك..

مبارك 28 سنة مدير قسم في بنك ..اكثر اولاد بو محمد يهتم بعمره وفعلا يستحق فهو احلاهم.. مبارك شخصية مختلفة عنهم كلهم ثقته الزايدة واهتمامه بمظهره يخلي الناس تشعر انه مغرور.. مبارك تلقى فيه من كل شي .. متواضع ومغرور .. رومانسي وواقعي.. عقلاني ومجنون ..

بعد ما فضى مبارك سيارته من الاغراض جه يدخل البيت ..

ام محمد : مبارك ؟
مبارك : هلا الغالية( ويحب على يدها) ..
ام محمد : وش يابك مب قلت بتردون من دبي على الدوام ؟؟
مبارك : افا ام محمد ما تبيني ؟ وانا اللي ياي على سرعة ما ادري كم عسب اشوفج..
ام محمد: الله يهديك يا مبارك وش تقول ؟؟ معقول ياي بالظلام هذا وتسوق بسرعة .. وش وصيتي انا ؟؟
مبارك : لا تحاتين الغالية كلمتج ما عاش اللي ينزلها الارض .. اسمحيلي ابا اسير اصلي الفجر وارقد لي ساعتين بموت من التعب والله ..
ام محمد: سير الله يحفظك

يتبع,,,

رزونة

02-05-2004, 10:50 PM

الفصل الثاني

في حجرة الاكل ...

العنود تدخل الحجرة
العنود : صباح الخير .
الجميع: صباح النور
العنود: الله هذا خلودي بعد صاحي الصبح مثل الكبار
خالد: هيه انا ريال وكندورتي مثل كندورة اريايل..
الجميع : ههههههه
فاطمة : وش ياب طاري الكندورة الحين الله يهداك بس يا عمري .

ويدخل عليهم راشد..

العنود: فديييييتك رشود متى وصلت ؟
راشد : صباح الخير.. وصلنا امس عالفير .. خلوني اتريق يوعان مب كفاية ما رقدنا عدل..
مهرة : احد مانع عنك الاكل هذا هو جدامك .
العنود : بسم الله عليه وشفيج تهاوشينه الريال حليه تعبان ويبا يتريق .
مهرة : توني دريت انج المحامية مالته !!
العنود (وهي تبتسم بخبث ): مب كفاية انه بيوصلني بطريقه لليامعة ..
راشد : انت تامرين امر عنودي ..اقول وين محمد ؟؟
فاطمة : سار الشركة من وقت..
العنود: ومبارك ما بيسر البنك؟؟ يتحراه بنك ابوه هو يغيب ويتاخر على كيفه ؟؟
مهرة ( وهي تقلد العنود) : بسم الله عليه وشفيج عالريال تعبان وبيا يرقد
العنود: قولي والله وش يرقد ما يرقد ومصالح الناس و...
ويقطع كلامها ..
مبارك( وهو داخل للحجرة): انتي بس سكتي وكل شي بيكون بخير
مهرة:ههههههه تستاهلين عسب لا تتحشرين بشي مالج خص فيه.. اشحالك مبارك ؟
مبارك:ههههه بخير الله يسلمك ..
العنود : وش اللي يضحك الحين ؟
راشد : ما عليج منهم يالله قومي خلنا نسير
العنود : توك تقول يوعان ويعدين انا ما لحقت اتريق بعدني ..
راشد: قومي يالله
مبارك: حتى انا بترخص الحين تامر بشي ابوي ؟
بو محمد: ما بتتريق؟
مبارك : تأخرت والله ولازم اسير عندي مقابلة..
ام محمد : وهي الدنيا بتطير وش فيك ؟؟ ايلس ايلس تريق
بومحمد: طالع يا حرمة خليه يسير يشوف مصالح الناس وعن الدلع الزايد في عيالج .. الله الله على عمرك يا وليدي وسير الله معاك..
مبارك:ان شالله عن اذنكم ..

في سيارة راشد :

العنود: راشد.
راشد : هاااااه
العنود: ويا ويهك .. شخبارك؟؟
راشد : بخير دام انج بخير
العنود : ادري انك بخير بس اخبارك الثانية
راشد : لين وين تبين توصلين ؟
العنود: حبيبة قلبك اشحالها ؟
راشد: أفـــــــــــا ما دريتي ؟!
العنود: لااا وش صار؟
راشد: بكنسلها
العنود : معقـــــــــولة وانا اللي تحريتك تحبها قلت الولد الله هداه وبيعرس.
راشد : الا هي.. مينون انا اتزوجها؟
العنود: والحين بتيلس فاضي والا بتعرس ؟
راشد: اشفيج انتي ؟! طبعا مب راشد اللي ييلس فاضي .. بس تدرين الواحد يبا ياخذ له فترة نقاهة
العنود: انت تدري بغلاتك عندي بس يا راشد ما يجوز اللي تسويه هذا .. ترى بنات الناس مب لعبة
راشد : بنت الناس ما ترمس شباب يالعنود . وانا هب مينون اعرس على بنية تعرفني من وراى اهلها .
العنود: بس المفروض..
راشد( يقطع كلامها) : المفروض تنزلين يا عنودي ..
العنود (تفتح الباب وتنزل): باي.
راشد: ما شي مشكور ؟
العنود: لا ما شي.

ويفتح راشد المسجل ويحط مغنيه المفضل راشد الماجد :
حبيبتي ما عانقت واحد ابد بس النسيم اللي تجرى وضمها .. حبيبتي ما كلمت غيري احد وما باسها الا ابوها وأمها
يوم سمع راشد هالمقطع

مسك تليفونه وطرش مسج يقول:

وش قصتك ؟وش قصتك
وين ماأروح
وياي..زاحمت حتى الدم
داخل عروقي..

ويتذكر الموقف اللي صار قبل 3 اشهر..
هزاع: وقسم بالله ذبحتني هالبنية
سالم : اي بنية بعد؟؟
هزاع : هذا يا طويل العمرأنا و ثلاث من الربع وقع بيدنا رقم بنية...لعوزتنا لين قلنا بس وما طاعت ترابع احد منا..
راشد: ما حد غيري بيجيبها هههههههه..
هزاع : ههههه لا يا راشد مب انت اللي تقدر عليها .. هذي يبا لها سالم.
سالم : اترك سالم بروحه اللي عندي كفاية ازود عليهم وحدة بعد .. بيذبحوني.
راشد :اونة هذي يبا لها سالم ،ثمن رمستك قبل لترمس هذي ما تاخذ وياي يومين انزين.
هزاع : اتحداك اذا قدرت .
راشد : اعرف قدراتي عدل ما يحتاج اتحدى احد.
هزاع: انزين وافق واثبت لنا قدراتك ياراعيها .
راشد: انزين انا براويك عطني الرقم .
هزاع : وهذا هو رقمها ******

في جامعة العنود:

مريم: هلا والله العنود شحالج الغالية ؟؟
العنود: بخير..ولهت عليج
مريم: تشتاق لج العافية .. ليش تاخرتي.؟؟
العنود: لا مب متاخرة ، اليوم الكلاس مالي بعد ساعة
مريم : عيل خبريني وش اللي حصل معاج في دبي؟؟
العنود: ويا ويهج وين تبين توصلين ؟
مريم: يعني ما بتخبريني عن اللي استوى وياج بدبي؟
العنود: لانه ما استوى شي ولا بيستوي شي، تصدقين اني ما شفت سالم الا كم من مرة وبالصدفة ومن بعيد
مريم : معقولة ؟ كنتي مستانسة عسب بتسيرين لدبي توقعت يستوي شي .
العنود: ويا ويهه دوم يالس يحوط في الشوارع وش بيستوي منه يعني ؟ بيطلبني مثلا ؟؟
مريم : يا بعد عمري يالعنود والله اني خايفة عليج.
العنود: الحين ودرينا من سالفته ومن سيرة سالم كلها قبل ليتكدر خاطرية، وش استوى ويا العرب اللي طلبوا خدوجة اختج ؟
مريم : هيه اشوى اللي ذكرتيني ، وافقت خديجة عليه ويبون الملجة والدخلة نفس اليوم ، يالله لاتنسين تجهزين عمرج
العنود: صدج والله الف مبروك..
مريم( وهي تتطنز) : عقبالج ويا بعض الناس

ويدق تليفون مريم ويصلها مسج يقول:
" أكتب بدمي لهم .. هالرسالة بإسمهم .. حتى لوما جا جواب يكفي توصل عندهم.."

مريم .. عمرها 22 سنة ربيعة العنود المفضلة وهي تعتبر العنود مثل اختها ، مريم بنية جميلة وشخصيتها جذابة واحلى شي في شخصيتها ثقتها وتفكيرها اللي يسبق سنها بوايد.. مريم انسانة واقعية وما تحب تسوي اي خطوة بحياتها الا تكون واثقة من نتائجها.

أمام البنك..

بــــيـيـيـيـيـيـيـيـيـيـيـيـيـيــب
مبارك( وهو ينزل من سيارته معصب ): هييييييه انتي .. الغبي اللي عطاج رخصة ما علمج انج لا تسوين بريك فجأة ؟؟
رانيا: لا ما علمني انه في ناس تسوق بهالطريقة.
مبارك:تتطنزين حضرتك؟؟ بسبتك كانت بتخترب سيارتي لو دعمتيني .. تعلمي السواقة قبل لا تسوقين وتخربين سياير الخلق
رانيا: من امتى والسيارة اللي قدام تدعم اللي وراها؟؟.. هلا هذا كلام واحد يعرف يسوق بنظرك ؟
مبارك: سمعي ترى كله الا سواقتي .. شوفي عمرج وبعدين تعالي رمسي عن السواقة..
رانيا: انت من الصبح عم تغلط وانا ساكته لو سمحت ابعد عن طريقي انا مش فاضية ..( ودعست بنزين وحركت السيارة)
رانيا ( بينها وبين عمرها ): مغرور ..
مبارك :تتحرى ما احد غاوي مثلها والعالم بيركعون تحت ريولها ..

رانيا .. فلسطينية 25 سنة وحيدة اهلها معروفة بانها انسانة متواضعة جدا وجميلة بشكل كبير ويزيد جمالها عدم معرفتها بهذا الجمال اللي عندها .. شعرها بني طويل بيضاء البشرة رشيقة وعيونها عسلية.. مولودة في الامارات...

رزونة

02-05-2004, 10:53 PM

الشخصيات واهم الاحداث التي ظهرت للأن:
بومحمد وام محمد
وهم عندهم خمس عيال أكبرهم..

محمد
وهو لين الحين يظهر بشخصية مترددة ويبدو انه في شي بخاطره
وماحد عارف يوصل لهشي المكدر خاطره!!

فاطمة
زوجة محمدوبنت عمته عرفنا ان حياتها كانت صعبة وان كل اهتمامها كان في ولدها خالد اللي تعذبت لين الله رزقها فيه .

مبارك
ثاني عيال بومحمد عرفنا انه يشتغل في بنك وانه عنده ثقة في عمره وايد وهذا الشي كان واضح بالطريقة اللي تهاوش فيها مع البنت الفلسطينة ((رانيا)) يوم كان بيدعمها بسيارته ورغم غلطته كان مقتنع انها هي السبب في الحادث!!

مهرة
هي رقم 3 في عيال بو محمد وللحين ما كان في شي واضح في شخصيتها !!

راشد
الابن الرابع اللي شكله لعاب وايد وماله امان ويحب يلعب على البنات
وهذا الشي كان واضح بطريقة رمسته مع الشباب وتحديهم لبعضهم في الضحك على البنات وبعد الشي هذا كان واضح بطريقة رمسته مع اخته العنود عن علاقاته اللي ما يبا يتوب عنها.. بس في شي كان هب واضح ما فهمنا وش سالفة البنية اللي ارسل لها مسج واللي تحداه ربيعه من 3 شهور على انه يقدر يخليها ترابعه !!

العنود
هذي الصغيرة الدلوعة مالت العيلة واللي عرفنا وهي تكلم ربيعتها المقربة فطوم عن سرها بحبها لسالم !! اللي هو ولد عمها واللي سمعنا اسمه اكثر عن مرة مع راشد ومع العنود !! من سالم وهل بيكون له دور في القصة ما حد يدري!!

رزونة

02-05-2004, 10:54 PM

((الجزء الثالث))

في البنك
رانيا تنزل من سيارتها وتدخل للبنك..
يرن تليفونها..
رانيا : ألــو خدوجة.
خديجة: شو صار وياج ؟؟ انقبلتي ؟؟
رانيا : شكلك انتي انهبلتي .. خدوج لا توتريني حرام عليكي..
خديجة: ليش ؟؟ اللللللله يسامحج الحق علي اطمن عليج؟
رانيا : حبيبة قلبي سامحيني .. هلا دخلت البنك واعصابي تعبانة ومتوترة ..
خديجة: انزين موفقة ان شالله وش فيج ان شالله اذا الوظيفة فيها الخير لج بتكون من نصيبج .. طمنيني عليج يوم تخلصين انزين ؟
رانيا : اوكي ادعي لي يلا باي
خديجة : في امان الله ..
سألت رانيا عن الوظيفة الجديدة وسارت للحجرة وعبت الطلب ويلست تنتظر مع المتقدمات للوظيفة دورها في المقابلة...

في بيت بو محمد

مهرة: فطوم ..
فاطمة : هلا مهرة دخلي..
مهرة ( وهي تسكر الباب) : خلووووودي
خالد : روحي روووحي عني مااا احبش ماماااا
مهرة : ويا ويهك !! ما تحبني ؟
خالد : لا لالالا
مهرة : من تحب عيل يا استاذ؟
خالد : احب عنود
مهرة : طالعي طالعي ولدك تراه بيذبحني يا خسارة الهدايا اللي ايبها لك .
خالد ( يطالع لسانه لمهرة)
مهرة : انا براويك ..
خالد ( يركض ويطلع من الحجرة)
فاطمة:خااااااالد
مهرة ( وهي تبتسم) : هيه علميه الأدب وشلون يكلم الاكبر عنه
فاطمة: حبيبي انتبه على عمرك لتطيح من على السلم.
مهرة ( وهي تقلد فاطمة ) : انتبه على عمرك لا تطيح !! هذا اللي قدرتي عليه بدل ما تقومين تعلمينه الادب ؟!
فاطمة: ههههههه بتحطين عقلج بعقل ياهل يا حليله بعده صغير
مهرة: يا حليله يا حليله بتذبحيه بدلعك هذا كله فيه..
فاطمة : ولدي يا مهرة ولدي انا مب ولدج وحرة اسوي اللي اباه وياه..
مهرة : انزين لا تعصبين ..اباج بسالفة..
فاطمة: اي سالفة بعد ؟
مهرة : محمد..
فاطمة: وش فيه ريلي ؟؟
مهرة: بس ما تحسينه ضايق هاليومين ؟
فاطمة : هيه من الشغل
مهرة: فطوم السالفة مب سالفة شغل
فاطمة : وش بتكون السالفة يعني ؟؟ انتي من حبج له تخافين عليه لكن ما فيه الا العافية ان شالله ..

في البنك

يدخل مبارك على غرفة السكرتيرة..
رانيا( كانت تكلم البنات المتقدمات وفجاءة طالعت صوب الباب وتشوف مبارك وتنصدم)
مبارك: هدى شوالاخبار؟
هدى: كل حاجة جاهزة.. الاخ منصور ينتظرك في الغرفة عشان تبدأ معاه وتشوفوا المتقدمين
مبارك : خمس دقايق ودخلي اول وحدة..
دخل مبارك للمكتب

رانيا : لو سمحتي
هدى: ايوا؟؟
رانيا : من اللي دخل ..
هدى :مبارك مدير القسم ..
رانيا: المدير ؟؟
هدى : شفتي ازاي اصلا ايه اللي يخليه يشوف نفسه علينا حتى صباح الخير عنده شكلها بفلوس ربنا يعينا
تبتسم لها وترجع رانيا تيلس على كرسيها ..
رانيا(تكلم عمرها): راحت الوظيفة

ميلس بيت بو محمد بعد الغدا..

محمد: انزين بترخص منكم الحين بسير ارقد شوي.
الجميع : الله معاك.
محمد: أقول فاطمة تعالي اباج.
مهرة : محمد حتى انا اباك بسالفة بعدين.
محمد: عيل بناديج بعد شوي.
بو محمد : هاه العنود شخبار جامعتج اليوم..
العنود: والله ما شي بس سرت وحضرت المحاضرات، تذكرت.
مهرة : وش تذكرتي
العنود : مريم
ام محمد: ربيعتج ؟؟
العنود : هيه ، ترا اختها خديجة بتعرس.
مهرة: والله ؟ مبرروووك تستاهل خدوج
العنود: هيه خبرتني مريومة فديتها اليوم
ام محمد : يالله على خير الله يوفقها
فاطمة( تدخل الميلس وهي ماسكة خالد) : مهره محمد يباج سيري له .

في حجرة محمد:
محمد منسدح على الشبرية ويرمس عمره..
محمد: وبعدين معاج يا فاطمة ؟ شلون اخليج تحسين؟!
وصار يفكر بالي حصل بينه وبين فاطمة.
محمد: فطوم
فاطمة : خير محمد ..
محمد : هذا لج لحرمتي ام ولدي ..
فاطمة : يجنن يا محمد مشكور
محمد ( يحب على راسها ) : ومب بس شذي ترا اليوم بعزمج نتعشى برع وبروحنا بعد شقلتي؟
فاطمة : وتبا تعشيني بعد و ليش كل هذا ؟؟
محمد: واحد ويعزم حرمته فيها شي؟
فاطمة : لا ما فيها شي .. بس تدري ما اقدر اسير مكان خلني اتم مع خالد اخاف اخله بروحه..
محمد : بنخليه مع الوالدة..او بنرقده ونطلع نحن
فاطمة : لا لا ما شي داعي .. اسمع بسير انادي لك مهره قالت تباك الله يستر وش تبا منك بعد.
محمد: ليش تقولين شذي عنها حليلها مهرة ماشي احد بطيبتها
فاطمة : طيبتها شي وانها تدخل بكل صغيرة وكبيرة في حياتنا شي ثاني
ويقطع تفكيره
مهرة ( وهي تدق الباب ) : محمد ؟؟
محمد : هلا مهروه .
محمد: هاه خير ؟؟
مهرة: .....
محمد : شسالفة قولي؟؟
مهرة : من شهر ربيعاتي عطوني عنوان منتدى يكتبون فيه وانا دشيت المنتدى وتابعته
محمد: انزين وبعدين
مهرة : ودي اشارك معاهم في المنتدى واكتب اشعاري وخواطري تكفى ، انا ادري انكم معطينا ثقة وكان ممكن اشارك في المنتدى وما حد بيقول لي لا، بس انا حبيت اخذك بشورك قبل لاسوي اي شي عسب تكون على دراية باللي اسويه ..
محمد: والله يا مهروه انا ادري بك ماشاء الله عليج ما يطلع منج العيب.
مهرة: وتراه وعد اني ما برمس احد لا شباب ولا بنات ، اللهم بس اكتب واشارك، شقلت؟!
محمد: ما فيها شي دامه هالشي بيخليج تهتمين بموهبتج وما ظني وحدة بهدفج بتسوي شي غلط.... وبعدين تعرفين غلاتج عندي وانتي الوحيدة اللي ما ارفض لها طلب شلون برفض هالطلب وانا ادري باخلاقج والمنتديات فيها فايدة للي يبا يستفيد
مهره: تسلم يا بعد روحي انت. ( وجت تطلع من الحجرة)
محمد: مهروه
مهره: لبيه ؟
محمد: ..........لا ولا شي سلامتج

في البنك

رانيا( بعدها ترمس عمرها) : أنا كأني ما عرفت، وادخل واسوي نفسي متلبكة وخلاص .. لالالالا ليش اتلبك شو يعني مدير قسم اصلا لو هو ....
ويقطع تفكيرها
هدى: رانيـــا..
رانيا : ن ن ن نعم ؟
هدى : تفضلي دورك.
رانيا : دوري ؟؟
هدى : أيوه .
تقوم رانيا وتفتح باب المكتب وتدخل ..

وش بيحصل يا ترا ويا مبارك ورانيا داخل المكتب ؟؟

رزونة

02-05-2004, 10:55 PM

(( الجزء الرابع ))

في البنك
تدخل رانيا لمكتب المدير

رانيا : السلام عليكم
منصور : وعليكم السلاااام والرحمة . هلااا والله هلا تفضلي.
مبارك (وهو يرفع عينه ويناظر صوب الباب): وش اللي يابها هني ؟!
منصور : شحالج يا رانيا ؟
رانيا( وهي تبعد نظرها عن مبارك) : الحمد الله
منصور : إنزين وش رايج تخبرينا عن شهاداتج وخبراتج ؟؟
رانيا : انا خريجة جديدة من الجامعة الامريكية ادارة اعمال..
مبارك : يعني ماعندج خبرة؟؟
رانيا ( وهي تطالع منصور) : لا.. ماعندي
منصور: ههههه مب مشكلة ندري ان الاعلان للوظيفة ما اشترط وجود الخبرة..

وبعد عدة اسالة:

منصور : مشكووورة يا رانيا .. هاه مبارك تحب تزود شي؟؟
رانيا ( تناظر مبارك و تطيح عينه بعينها)
مبارك ( باسلوب متكبر) : اقول رانيا .. ليش يعني تبين تشتغلين وبراتب بعد؟؟ ليش ما دورتي لج وظيفة كمتدربة اقلها تكسبين خبرة وبعدين تحاولين فالوظايف السابتة.
رانيا ( وهي معصبة ) : من حقي ادور الفرص اللي تناسبني وتفتح لي المجال اني اعتمد على نفسي
مبارك : ههههه شلون الحين فهميني ؟؟ بدون خبرة وتبين الوظيفة تناسبج؟؟هه والله
رانيا ( تمت ساكتة والدمعة قريب بتنزل منها): .........
منصور: الله يهداك يا مبارك نسيت يوم ما اشترطنا الخبرة وش فيك
من حق البنية تقدم ومصافاتها جدا مناسبة انشالله اول ما نطلع القرار بنتصل فيج ونبلغج ولا يهمج..
مبارك:تقصد لو احتجنا لج بنتصل فيج . الله وياج.
رانيا : قبل لاطلع حابة احكي لك شكلك ما تتخيل انه في انسان غيرك عنده كرامة وهذا السبب الوحيد اللي يخليك تكلمني بهاالطريقة
مبارك ( وهو يكلم السكرتيرة) : خلي اللي بعدها تدخل..
( تخرج رانيا من المكتب)
منصور : وش هذا اللي سويته ينيت انت ؟
مبارك :ثمن رمستك قبل لا تتكلم
منصور: انا اللي اثمن رمستي؟؟ يا حليلها البنية ما سويت شي يا حليهلها شوي وكانت بتصيح والسبة انت.. وش مسوية لك عسب تطيح فيها شذي؟ انت ما عندك اسلوب احد يرمس بنية مثلها بطريقتك هذي
مبارك: هني مكان عمل هب مكان مغازل ..
منصور : ومكان العمل مفروض انك تخاف على سمعته هب تتكلم كنك واحد ياي من صوب الشارع.

في منزل رانيا
تدخل من باب الشقة وتركض صوب حجرتها

أم رانيا : رااااانيا
تسكر باب حجرتها وتعق عمرها على الشبرية وتصيح

أم رانيا ( وهي تدق الباب) : رانيا حبيبتي ؟؟ رااانيا..
رانيا:ماما حبيبتي سبيني لحالي شوي وبطلع..
أم رانيا: حاضر حبوبة بس طمنيني اذا في شي؟
رانيا : لا لا لا ما تخافي مضايقة شوي اول مااهدى انا حطلع لحالي.
وتتصل بخديجة وتخبرها باللي صار وياها

في سيارة مبارك ..
مبارك ( يتذكر) : رانيا : قبل لاطلع حابة احكي لك شكلك ما تتخيل انه في انسان غيرك عنده كرامة وهذا السبب الوحيد اللي يخليك تكلمني بهاالطريقة
مبارك : انا ما غلطت بشي هي اللي ما تعرف ترمس انا المدير وهي لازم تتحمل اي ضغط يقع عليها في المقابلة هب ترمسني بالهطريقة وتتحداني ..
ويتذكر رمست منصور
ومكان العمل مفروض انك تخاف على سمعته هب تتكلم كنك واحد ياي من صوب الشارع.
ماشي داعي اضايق ولا احط بخاطري انا هب غلطان ورمستي عادية اصلا وش فهمه منصور هذا هو اللي ما صدق شاف بنية غاوية وقام ما يعرف مصلحة العمل وين..

بيت بو محمد

العنود: رااااشد.. مسكتك وين تبا تسييير؟؟؟
راشد: وين بسير يعني ويا ربيعي .
العنود: وش هالحياة اللي مالها معنى ما تمل انت؟ اقول شفت مبارك؟
راشد: لا وش فيه؟
العنود: رد من الشغل ويوم كلمته صرخ في ويهي.
راشد: تعرفينه اخوج اكيد احد ضايق به، عن اذنج انا بسير...

وتسير العنود صوب اختها مهرة ..

العنود : مهرة وش تسوين على الكمبيوتر؟
مهرة : ولا شي سجلت في منتدى ويالس اشارك فيه.
العنود: وش هالعيلة كل واحد ميوله اغرب عن الثاني. الحمد والشكر لك يارب
مهرة : أقول تدرين ليش مبارك معصب؟
العنود: حتى انتِ لاحظتي ؟!
مهرة: طبعا هذا يوم يعصب البيت كله يهتز هههههه
العنود: ههههههه حشى كنه بركان ويوم يعصب ينفجر في ويوهنا نحن .
مهرة : وبالنهاية يطلع سبب تافه
العنود : صدجج والله .
مهرة : الا متى بيكون عرس خديجة؟؟
العنود : ما ادري قالت لي مريم انهم ما حددوا بعدهم، اللي ادريه إن الملكة والدخلة نفس الليلة
مهرة : وش بنلبس؟
العنود : صدقج والله لازم نفكر بالسالفة هذي من الحين..التفصيل يبا له وقت
مهرة : عرسج هو ولا عرس احد من عيلتج عسب تفصلين ؟! بنلبس عادي .
العنود : من اللي يلبس عادي ؟؟ حبيبتي مب العنود اللي ما تهتم باناقتها..ياويلهم مني بخرب عليهم كلهم في العرس
مهرة: وش هالتواضع اقول شرايك تخففين تواضعج شوي بتذبحينا
العنود : هذي يسمونها الثقة..
مهرة: الحمد والشكر لك يا رب.
العنود : لا تراني اتكلم صدج ليش ما نفصل انا بخبر ابوي وانشالله مايردنا
مهرة: خبريه وعقب بلغيني بالنتايج
العنود : راويني وش تكتبين
مهرة : هذي قصيدة كتبتها من فترة.
العنود: ويا ويهج والله انج فنانة ، من وين لج هالمواهب؟
مهرة : وايد يكتبن في هالمنتدى من ربيعاتي ، طالعي طالعي هالبنية.. تدرين من هي ؟
العنود : من ؟؟
مهرة : اليازية
العنود : خييييبة ماادانيها ، توني دريت انها ربيعتج
مهرة : مب ربيعتي ولاشي بس يوم خبروني ربيعاتي عن المنتدى كانت يالسة وعرفت انها تشارك .
العنود: اليازية طلعت كاتبة وانا مادري.
مهرة : يالجاهلة مب كل من كتب في المنتدى يعتبر كاتب اوشاعر.
العنود: والله لويكتبون شراتج الصراحة مافي احسن عن شذي.
مهرة: مب كلهن كتاباتهم حلوة، تلقين اللي فعلا تكتب مواضيع حلوة وتلقين اللي تدخل بس عسب تتسلى.
العنود : انا عني يوم املج بخليج تكتبين لي واطرش حق ريلي .
مهرة : وتقبلينها على عمرج ؟؟ احلى شي يوم تكتبين انتي الكلام من خاطرج وتهدينه له حتى لو ان الكلام هب حلو لذاك الصوب المهم انه منج انتي له ..
العنود: ايواااا ابتدينا دروس الرومانسية والكلام الفاضي مالج.
مهرة : انا تقولين عن كلامي فاضي؟
العنود: الافلام الهندية كلام فاضي وانت كلامج شرات كلام الافلام الهندية .. حبيبتي فارسج المنتظر ماشي منه في الواقع خاصة بشبابنا انسي كلهم سوالف شباب وبس ويوم يحبون ينقلون الكلام ويعطوه لحبيباتهم اونة هم اللي يكتبونه .. ونحن لازم نكلمهم بنفس اللغة اللي يفهموها ..
مهرة : انتي اللي كلامج فاضي هذا هب صحيح اللي تقولينه

في المقهى :
هزاع: حرقت تليفون اللي تطرش له مسجات كفاية.
راشد: مب شغلك
هزاع : والمصيبة ما ياك مسج واحد ليين الحين هههههههه
ويرن تليفون راشد
راشد : هلا مبارك
مبارك : وين انت ؟
راشد : ويا هزاع
مبارك : انزين ابا اخبرك بيت عمك بيجون عندنا يوم الاربع يقولون عندهم اشيا بيسونها في بوظبي
راشد : حياهم الله
مبارك: وسالم قال يبا يتاكد اذا بتكون فاضي ، انا قلت له اني ماعندي شي.
راشد: هههه طبعا فاضي
مبارك : زين بتبلغ الوالد ولا ابلغه انا ؟
راشد: بلغه انت .. سلام
راشد( وهو يكلم هزاع): استانس سالم يوم الاربع بيكون في بوظبي
هزاع : واللللللله؟؟ كشخة ... اقول راشد على طاري سالم وش حصل ويا البنية اللي عطيتك رقمها من كم من شهر.
راشد: هاه ؟؟ .. ما دقيت لها
هزاع: ههههههههههه اونة ما كلمتها ولا ما عطتك ويه هههههههه !
راشد : انا مادقيت لها اصلا .. اذا تبا تعتبرني خسرت برايك .. وغير هالسالفة

في بيت رانيا..

ام رانيا : والله عذبتني رانيا روح شوفها مالها..
ابو رانيا: ليش ؟
ام رانيا : من أول ما رجعت من البنك وهي زعلانة، لا تغدت ولا طلعت من غرفتها
ابو رانيا : يعني ما عارفة بنتك ؟؟ اكيد راحت منها الوظيفة وزعلانة..
ام رانيا : لا حول الله بتفكر العالم كله بيستناها تتخرج طبعا مش حيقبلوها
هذا من دلعك فيها بتفكر كل شي حيكون مثل ما بدها ..
ابو رانيا : لا تزوديها البنت ما شالله عليها وانا حروح اكلمها.

في حجرة رانياابو رانيا: رانيا ؟
رانيا : تفضل بابا
ابو رانيا: مين زعل حبيبتي ؟
رانيا : ما حدا
ابو رانيا : ليش ما تغديتي طيب؟
رانيا : الوظيفة راحت مني .
ابو رانيا : شو يعني وظيفة ؟ ولا يهمك نجيب لك عشرة غيرها كم رانيا عندي انا ؟
رانيا ( تبتسم ) : بس يا بابا
ابو رانيا : لا بس ولا غيره قومي وغيري ملابسك عازمك على اي مطعم انتي تختاريه .

يوم الاربعاء ، بيت بو محمد...

في الصالة
مهرة: وش تبين اسوي لج يعني ؟
العنود : انتي اشفيج ,, لازم نقرر وش بنلبس
مهرة : زين زين .. شرايج فطوم تساعدنا؟هي تعرف بهالسوالف والمصممين
العنود: هيه بسير لها ارمسها ..
وتدخل عليهم ام محمد
ام محمد : تعالي تعالي وين بتسيرين يلا جدامي انتوا الثنتين على المطبخ
العنود : ليش وش السالفة ؟؟
ام محمد : اونة ما تدري .. دار عمج بيون عندنا من دبي يلا قومي جدامي نحضر لهم الفوالة.
العنود : والله .. ليش ما خبرتوني؟
ام محمد: لو ما تعرفين الحين عرفتي يلا جدامي على المطبخ.
العنود ( ترمس عمرها ) : فديتك ياسالم توقعت يمر اكثر عن شهر لين اشوفك مرة ثانية.

في البنك

مبارك: شف منصور قلت رانيا هذي ما تصلح للوظيفة.
منصور: ليش ما تصلح ؟؟ اصلا ما حد غيرها يصلح.
مبارك: منصور خريجة يديدة وبدون خبرة وش بتصلح له هاذي.
منصور : مبارك يوم سوينا اعلان الوظيفة ما اشترطنا الخبرة صح ولا لا؟
مبارك : .........
منصور : وبعدين الباقيات عندهم خبرة لكن اللي متزوجة واللي ما ادري كم ياهل عندها.
مبارك: وش فيها بعد المتزوجة واللي عندها اولاد ؟؟ لا تكون تدور زوجة مب موظفة.
منصور: ترا المتزوجة يوم ولدي مرض ويوم ريلي هاوشني وهذا مب في مصلحة الشغل.
مبارك : رانيا مالتك مصيرها تعرس هي الثانية بعد .
منصور: يوم تعرس يستوي خير ، وبعدين لانها يديدة بتكون متحمسة لوظيفتها مب شرات اللي ياين طفرانين خلقة.
مبارك: هذي مب اسباب مقنعة، طالع ورق هذي احسن عن رانيا مالتك الف مرة.
منصور: ذبحتنا ، انا ماعيبني احد غير رانيا.
مبارك : قول شذي عايبتك ، عيل انابقبل باي وحدة الا رانيا هذي.
منصور: وش سوالف اليهال مالتك هذي ؟؟ نحن في شغل ولازم ندور مصلحته.
مبارك : منصور سير من ويهي ووظف اللي تباه الا رانيا
منصور: ومن قال لك اني ممكن اقبل بغيرها؟؟
مبارك : بسك عاد ارحمنا من الاول الاسبوع وانت حاشرنا برانيا هذي .. أقول .. ترا سالم بيكون هني اليوم تبا بتمر تشوفه ؟
منصور : سااااالم ؟؟ طبعا امر ونص بعد... اشتقنا لسوالفه ويا ويهه ههههههههه .. من بيكون فيه ؟
مبارك :ربعه راشد وهزاع طبعا ما يبا لها كلام ، ودامك موجود محمد اكيد بيكون موجود وانا وسالم..
منصور: خلاص تم .. الحين وش قلت؟
مبارك : وش بقول بعد ؟؟ حياك طبعا
منصور: لا اقصد عن رانيا
مبارك : اذرف عن ويهي احسن
لك ..
منصور : يا مبارك سمعني بس
مبارك: منصووور اطلع برع المكتب

يتبع,,,

أسير الليل

03-05-2004, 07:27 PM

أهلين أخت رزونه
الله يحيك معنا

صراحه أنا قريت الجزء الاول بس :) وما يخفاك الموضوع طويل
وقبل لا أحكم على بقية الاجزاء .. أعتبره شيق لانه يصور
هالجو الأسري الرائع .. وبأسلوبك البسيط بعيد عن أي كلفه :)

تحياتي

دانا

09-05-2004, 02:33 PM

السلام عليكم ورحمة الله وبركاته

قصة حلوة ما شاء الله .......

ومشكورة عليها

ونتريا التكملة في أقرب وقت :)

تحياتي

RED Chevy

09-05-2004, 03:06 PM

رد مقتبس من دانا
السلام عليكم ورحمة الله وبركاته

قصة حلوة ما شاء الله .......

ومشكورة عليها

ونتريا التكملة في أقرب وقت :)

تحياتي

رزونة

11-05-2004, 04:13 PM

والله انا ما عارفة اذا القصة عجباكم او لا
القصة شكلها بتكون طويلة كتير لان الكاتبة للان عم تنزل اجزاء
انا ما بعرف اذا حابين تكملوها للنهاية واذا بتقدروا تقروا اجزاء طويلة كتير
اذا بتحبوا انزل لكم الباقي احكوا لي واذا لا ما حدا يرد وخلاص

RED Chevy

12-05-2004, 03:52 AM

وشلون مانبي التكملة:D القصة وايد حلوة إستمري إختي بارك الله فيج..:)

دانا

12-05-2004, 05:00 AM

السلام عليكم ورحمة الله وبركاته

طبعا نبي التكملة ....:)

ونحن في انتظارك

تحياتي

عاشقة

12-05-2004, 05:11 AM

قصة رائعة .. وشيقة لأبعد الحدود ..

قرأت الأجزاء كلها .. وبكل حماس ..
بس لا تتأخري علينا في التكملة ..
بانتظر بفارغ الصبر ..:damp: ..

رزونة

12-05-2004, 05:16 PM

دام القصة عجبتكم ما عندي اختيار غير اكملها
لاني اصلا مش خسرانة انا حنقلها وبس
واحب اذكر انها منقوووووولة ومش تاليفي
عشان ما يصير مشاكل بعدين :D
واعتبروها عربون محبة من بينا:laugh:

رزونة

12-05-2004, 05:18 PM

الجزء الخامس

بيت بو محمد:

أم محمد : حيالله ام سالم شحالج الغالية؟؟ علومج؟؟
ام سالم : يسرج الحال العلوم من صوبج .
أم محمد : حيالله من جانا والله ..
سلامة : شحالج عمتي تولهنا عليج؟
أم محمد : هلا ببنيتي هلا والله
العنود ( ترمس مهرة وفاطمة بصوت واطي): اونة بنيتي الحين هذي العقربة اختنا.
مهرة( تقلد سلامة): شحالج عمتي ترا تولهنا عليج ... ويا الويه
فاطمة : طالعي طالعي عيونها الشريرة شلون تناظر
مهرة: تدور راشد ياقلبي عليك يا راشد
العنود: يا بعد عمري ياراشد الله يعينك البنية حاطة عينها عليك
مهرة : وما بيذبحني الا امج ، يالله شكثر تموت عليها وتحبها ههههههه شكلها تبا تدبس راشد المسكين فيها
فاطمة : يا حليلج يا خالتي من طيبتها ماتعرف تميز المنافقين من الاشرار.
مهرة: سكتي هذي هي ياية صوبنا.
سلامة:هلا والله ببنات عمي. اذا ما عندكم مانع حبيت ايلس وياكم
مهرة : حياج سلامة.
سلامة:شفيج العنود ؟؟ لا تكونين مضايقة من بنت عمج؟
العنود( بصوت واطي): للاسف انج بنت عمي
فاطمة: تخبط العنود عسب تعدل رمستها
العنود: لا انتي تشوفين في شي يضايق ابد تراني مستاااانسة وايد
فاطمة : ها سلامة خبرينا شو علوم دبي؟
سلامة : والله ما شي .. تدرين اني بروحي دام سالم دوم برع مالي غير ربيعاتي .. هذا هو سالم جه
مب لويبنا سيرت شي احسن كان ابرك لنا ؟؟
أم محمد : ادخل ادخل يا سالم حياك.
سالم : هلا عمتية شحالكم ؟
أم محمد: بخير الله يحفظك.. سير سلم على بنات عمك ..
سالم : حيالله مهرة شحالج ؟؟
مهرة: بخير الله يسلمك انت شحالك ؟
سالم : يسرج الحال .. شحال الصغيرونة مالت العيلة؟
العنود : من هذي الصغيرونة ..ما اشوف بينا يهال.
سالم : ترى انتي اخر العنقود وبتمين الصغيرة بنظري
العنود: بس احب اذكرك انه الفرق بيني وبينك بس سنتين. انا عمري 22
سالم : كبرتي يالعنود ماشالله .
سلامة: بالله عليك متى اخر مرة شفت بنات عمك؟
سالم : والله ما ادري عنهم ليش متخشين عني وما نشوفهم
العنود: الحين نحن اللي ما ننشاف؟
سالم: انزين السموووحة يا شيخة .
سالم : فاطمة شحالج وحال ريلك ؟؟ خلود وينه ما نشوفه؟
فاطمة : كلنا بخير الله يسلمك وخالد عند ابوه قلت خلنا نرتاح من المسؤولية شوي.
سالم : ياحبي له الله يحفظه لكم.
مهرة : يالله عقبال ما نشوف عيالك
سالم : هههههه لا بدري وش نبا بالسجن هذا من الحين .
العنود( انقهرت يوم سمعت رمسته) : الله يعينها عليك هالمسكينة اللي بتاخذك.
سالم : تبين الصدج .. تحمد ربها هي بس اني تزوجتها هذا لو فكرت اعرس هههه ..الحين باذنكم انا بسير وياالشباب.
ويروح عنهم سالم

في الميلس عن الشباب..

راشد : أفا افا يا منصور كله الا هذي ما بنمشيها لك ..
محمد : يعني يا راشد انت ما تدري بمنصور وسوالفه؟؟
ويدخل سالم
سالم: هلا والله بالربع زماااان عن سوالفكم والله..
هزاع : حي الله سالم.
منصور : والله يا سالم انتي اللي قاطعنا ومعدنا نشوفك.
سالم : والله الشغل ذابحني ما القى وقت ..
هزاع: طالع طالع اونة الشغل بذبحه ..
سالم : وش تقصد ؟
مبارك : وش بيقصد يعني غير البنات اللي تعرفهم
سالم : هيه هيه احسدوني بعد على الثلث اربع خمس بنات اللي اعرفهم.
محمد: ويا ويهك خمس بنات يا سالم ؟؟ وبتعرس على من منهم؟
راشد: خمسة هههههه انزين خله بس يدور عدل اخاف يكون نسى وحدة هني ولا هني.
سالم: وبعدين يا محمد وش تقول انت اي عرس واي خرابيط ..
منصور : معذور يا سالم تراه معذووور المسكين هوالوحيد فينا مسجوون هههههههه.
سالم يرن تليفونه ويستأذن منهم ويطلع يكلم برع الميلس
محمد : منصور ثمن رمستك.
منصور: وش فيك نتغشمر معاك ههههه.
محمد: ترى مزحك مثل ويهك ..
يرجع سالم يدخل الصالة
سالم : أقول الربع..بستأذن منكم ساعة وبرد
هزاع : ويا ويهك نحن ما صدقنا نشوفك.. وين بتودرنا وبتسير؟
سالم : والله مضطر .... شغل
راشد: يا شين الكذب يوم يكون واضح هههههه.
منصور : انتوا وش تبون فيه برايه خله يسير.
محمد : لا مب برايه .
مبارك : صدجك يا محمد ، ودر عنك سوالف المواعد وهالكلام الفاضي وايلس ويانا ابرك لك .
سالم : الحين خليتوني مواعد ؟ عند فيكم بسير يعني بسير.. بنشوفكم بعدين
ويطلع من الميلس..
منصور : محمد شف اخوك مبارك هذا بيذبحني
محمد : ليش وش مسوي مبارك..
منصور : تخيل يا محمد نحن بحاجة لموظفة في البنك كل تعاملها بيكون ويا العملاء وشي متقدمة للوظيفة وحدة وش حلاتــــــــها يا محمد جمال اخلاق ادب وش اقول بس ... والمينون اخوك ما يباها عسب تهاوش معاها .
مبارك : منصور جب مب عسب متهاوش معاها انت اللي تباها عسب سوالف المغازل والكلام الفاضي انا ادور مصلحة الشغل..
محمد : منصور مبارك معاه حق ما يجوز تخلط الامور ترا الشغل شغل.
منصور : طالع هذا .. أقول لك البنية ما تنعااااااب والله ما تنعااااب وبعدين عسب انها غاوية خلتوني اريد اطيح بها ؟؟ و مصلحة الشغل تقول الموظقة اللي تتعامل مع العملاء المفروض تكون حلوة مب متزوجة وما تداني الدنيا وتيجي الشغل وتعفس الدنيا جدام العملاء ..نحن نبي وحدة ذوق وجمال وعلم مب بس علم.
محمد : دامها شذي ليش ما تباها يا مبارك ؟
مبارك : ما عندها خبرة ..
منصور: ذبحتنا خبرة خبرة .. كم مرة اقول لك مب شرط الخبرة وبعدين الاعلااااان ما طلب خبرة
مبارك : انت ما بتسكت عن هالسالفة بتم تلاحقني فيها ؟
محمد: والله دام البنية يا مبارك ما تنعاب مب مشكلة الخبرة تكتسبها ومسكينة عطها فرصة .
مبارك : منصور ترى السالفة انتهت ، وعسب تتطمن اكثر تراني اخترت وبلغت السكرتيرة انها تتصل في باقي المتقدمات وتعتذر منهم .
منصور : اخترت رانيا قول اخترت رانيا
مبارك : لا مب رانيا الثانية ..
منصور: ويا ويهك شلون تسوي شذي؟
محمد : اشفيك معصب خلاص لعله خير ما يستاهل
منصور : لازم نتفق انا وهو هو مب بروحه .. انا مثلي مثله
مبارك : ترى رمستك زايدة والموضوع انتهى.

في حجرة العنود ...
مهرة : الحين كل هذا استوى وياج يا سلامة
سلامة : هيه تصدقين حتى كل البنات اللي في اليامعة اليوم ثاني لقيتهم يقلدوني
العنود: هيه يقلدوج صح.
سلامة : هههههه وبعدين تدرين يالعنود وش حصل؟
ام سالم( تنادي على سلامة) : سلامة تعالي اباج..
سلامة : يااااااااية.. لحظة العنود الحين بكملج السالفة بس اشوف اماية وش تبا..
وتقوم سلامة..
العنود: مهرة مهرة فديتج بسرعة .. سمعي دخيلج انا ابا ادق لمريومة لوسالتج سلامة عني قولي لها ياها تليفون وقولي لها ما في داعي تترياني تقدر تخلص سوالفها الماصخة قبل لارد ..
مهرة : ياسلام وانا اللي اتم وياها ؟
العنود : فديييييييتج. تكفين صدري ضايق منها
وتطلع العنود وهي تركض من الحجرة ..وتسير لحجرة التلفزيون

العنود(ترمس عمرها وهي تدور التليفون) : لا حووول وينه اختفى هذا الحين..
وتطالع صوب ميلس الريال جان تلقى التليفون على الطاولة اللي جدام باب الميلس بمسافة مب كبيرة..
العنود: والحيييين وش بسوي انا ؟! اكيد راشد ولا مبارك بيكونوا جدام الباب خلني اسير بسرعة بشل التليفون وما حد بينتبه لي .
وتحاول العنود تمشي بخطوات بطيئة عسب ما حد يلاحظها ويوم وصلت عدال التليفون تلقى ريال غير راشد يالس صوب الباب توترت وجان تبى تشل التليفون بسرعة وتركض الا وريلها تخبط بالسلك ويطيح التليفون على الارض ويسوي صوت ويناظرهزاع صوب الباب يبا يشوف وش هالصوت .. ويلاقيها وهي متعفسة بعمرها وتناظره ويوم
وقعت عينه بعينها خذت التليفون من الارض وركضت صوب حجرة التلفزيون ..

العنود: وش اللي سويته وش اللي سويته ..
وتدق رقم مريم
العنود : هلا ممكن اكلم مريم ؟
مريم : وياج اشفيج العنود ما عرفتيني؟
العنود : لحقيني دخيلج.
وتخبر مريم بالسالفة كلها
مريم : ههههههه يالغبية جان اول ما طاح التليفون ركضتي ما كان احد شافج.
العنود: ما قدرت اتخيل اني رادة بدون التليفون بعد كل هالحرب اللي سويتها .
مريم: انزين عادي صار خير . ههههه اتخيل شكلج وانتي تركضين هههههههه.
العنود : عن الطنازة الحييييين . (تسمع صوت الارسال مال موبايل مريم ) من بيدق لج ؟؟
مريم : لا هذي مسج.
العنود : راعي المسجات اكيد ..
مريم : لحظة بشوف .. هيه هو سمعي وش مطرش .." لو غاب عني منك حلو الرسايل.. عني ما غاب يا اطيب الناس طاريك"
العنود: والله انه مب صاحي.
مريم : ما ادري وش سالفته .. انا وايد غلطوا برقمي لكن مثل هذا مالقيت.. ولا عمره دق لي ولا حاول يتعرف علي..
العنود : ومن متى يراسلج؟
مريم: قريب ال3 شهور.
العنود: لاتكون وحدة ومن ربيعاتنا تلعب عليج.
مريم : الحين من المتفيجة بس تطرش لي ؟ وانا ما معبرتها من اول يوم طرشت فيه لين اليوم .. لو اي وحدة من ربيعاتنا كانت طفرت من وقت .هذا ريال انا متأكدة
العنود: انزين ليش ماتدقين له؟
مريم : ينتي انتي ؟
العنود: اقصد دقي ويوم يرد بندي التليفون بويهه،او دقي له من اي تليفون ثاني .
مريم : ما ادري ما اريد افتح على عمري بوابة مشاكل ..
العنود: صدقج ترا هالمواضيع مب لعبة .
مريم : اموت واعرف ليش يسوي شذي..
العنود : معقول واحد من قرايبج؟؟
مريم : والله احترت يالعنود فيه .
العنود : لو دق بتردين عليه؟
مريم : تصدقين .. ما ادري ..بس شعوري انه ما بيدق يخليني مافكر بهالسالفة.
العنود : ما ادري وش اقول لج .
مريم : خلينا من سالفته الحين .. دار عمج عندكم ؟
العنود: هيـــه عندنا .. وليتهم مب عندنا.
مريم : ليش بس؟
العنود: الشباب ويا بعضهم .. وعمي وعمتي وابوية وامايه وفطوم يالسين يسولفون .. وانا ومهرة محتشرين بسلامة ..
مريم : هههههه يا حليلها ..
العنود : كل ما استانس بشوف دار عمي .. ما اشوف غير ويهها
مريم : وش بتسوين لو عرستي على اخوها بتمها جدامج طوووول العمر..
العنود : اوووونة المشكلة بس هني اللي يسمعج يقول اخوها خلاص بيموت فيني ويترياني بس اوافق..
مريم: انا اقول تخيلي بس.
العنود : شذي شذي شكلها بتم بويهي .
مريم : شلون ؟
العنود: أمي تموت عليها .. وشكلها تباها لراشد..
مريم : وراشد يباها ؟
العنود : والله اللي اشوفه انه يحب سوالفها .. خاصة انها اربع وعشرين ساعة رامية عمرها عنده ..بس ارد واقول راشد هب صاحي تراه شرات الخبل اللي احبه
مريم : هي تحبه؟
العنود : اذا هو يحبها مرة هي تحبه الف وبعدين هاذي ما تستحي تناظره عيني عينك وتسال عنه ولايهمها احد..
مريم : معقولة..
العنود: عمي ما عنده غيرها هي واخوها عسب شذي الدلع ذابحهم ..
مريم: دام اخوج وامج والبنية مستانسين .. الله يوفقهم ..
العنود: ياحليلك ياراشد من بين البنات مالقى الاهذي يحبها ؟
مريم : هو قال لج انه يحبها ..
العنود : هو ما قال بس يوم ترمسه اشوفه يضحك ويستانس احس ويهه بيتشقق من السعادة.
مريم : هههههههههههه
العنود :مرة كنت اطنز عليها .. دافع عنها وتم يقول ياحليلها مسكينة ...
مريم : هذا شكله يحبها صدج اذا يدافع عنها .
العنود : ما ادري عنه .. وش هالذوق .. بس مثل ما قلت لج هالاشكال اللي مثل سالم وراشد ما يحبووووون
وتمت العنود ترمس ويا مريم ويوم بندت عنها طلعت ويلست في حديقة البيت تفكر بعلاقتها مع سالم ..ويوم تاخرت جتها مهرة ...
مهرة : العنود الله يسامحج انتي هني ؟
العنود : هاه ؟؟ مهرة ؟
مهرة : هيه مهرة .. شذي تسوين فيني ؟
العنود : سامحيني الغالية والله نسيتج ..
مهرة : نسيتيني ؟؟ وش يالسة تسوين هني بروحج ؟؟
العنود ( وهي تطالع مهرة ) : فيني ضيقة يا مهرة ..
مهرة : بسم الله عليج وشسالفتك ؟؟
العنود : ضايقة شوي ..
مهرة : مب العنود هذي اللي جدامي .. العنود دوم تضحك وما يهمها شي!!
العنود : هيه تضحك ..
مهرة : كل هذا عسب سالم ؟؟
العنود : وش تقولين ؟
مهرة : ترى عيونج تفضحج
العنود : هب صحيح اللي تقولينه
مهرة : العنود انا اختج واعرفج عدل انتي تحبين سالم صح؟
العنود: ما تفرق
مهرة : شلون ما تفرق دامه مكدر لج خاطرج ؟
العنود : ماتشوفينه شلون ما يحس ؟
مهرة : ماشي انسان ما يحس ..
العنود : ومن قال سالم انسان ..
مهرة: ههههههه ترى صدقيني الا بجيه يوم ويحس
العنود : بس انا ما اريده .. انا عمري ما عقيت نفسي على احد
كرهت نفسي والله كرهت نفسي يوم احاتيه ويوم احاول اشوف اخباره
وهو ما يحس ابد كل شي سويته له ما يحس فيه
مهرة:..........
العنود: تعرفين يوم البنية تكون عاقة عمرها؟ انا احس اني عاقة عمري
مهرة: لا انتي هب عاقة عمرج ولا شي .. اللي عاقة عمرها تكون مثل سلامة هب مثلج .. العنود نصيحة مني من أختج
كل ما يخطر ببالج انسيه لا تفكرين فيه اذا فكرتي بالسالفة ترا بيتكدر خاطرج انسيه ولا تحاتيه..واذا لج نصيب فيه بيكون نصيبج..
العنود : صدقج
مهرة : عيل يلا قومي وياي ندش داخل ترى الشباب ساروا ماتم غيرنا ودار عمج
العنود : بلحقج عقب شوي ..
مهرة : انزين نترياج انا وسلاااااامة هههههههه
العنود : هههههه لا خلاص غيرت راي ما بدخل..
وتسيرمهرة عنها
وبعد 3 دقايق يوصل سالم وينزل من سيارته وتنصدم العنود يوم تشوفه ..
العنود (ترمس عمرها) : أكيد بيرمسني وش اسوي .. ما دريت انه برع البيت ..
سالم : وش تسوين بروحك.
العنود( وهي متلبكة ): ولا شي
سالم : زين دخلي داخل ابرك لج.
وسار عنها
العنود: اونة بيرمسني هه .

يتبع,,,

رزونة

12-05-2004, 05:19 PM

الفصل السادس

صباح اليوم الثاني:

أم محمد : ميري الله يلعوزج وينج؟
ميري : ها ماما انا في موجود
أم محمد : وش قلت لج من ساعة ؟؟ ما اشوفج نقلتي شي على حجرة الاكل الناس تبى تتريق وش تترين حضرتج ؟
ميري : زين ماما زين انا في يودي.
مهرة : اشفيها اماية من مزعلها الغالية ؟
أم محمد : ما أحد فديتج قلتي للعنود ترتب الغرف؟
مهرة : هيه خبرتها..
أم سالم ( تدخل المطبخ) : صباح الخير..
مهرة : هلا والله هلا صباح النور..
أم محمد : هاه بشري ان شالله رقدتي عدل أمس
أم سالم :راقدة عند الغالين وش ابى احسن عن شذي ؟؟
أم محمد : تسلمين والله لاعدمناج
أم سالم : مهروه سلامة قامت من الرقاد ولا بعدها ، فشلتنا هالبنية عوض عن تقوم تساعد عمتها .
أم محمد :حليلها خليها ترقد مسكينة تعب طريق وسهر وسوالف طول أمس خلها ترتاح البنية .
مهرة : لا تراها نشت .

حجرة راشد
العنود : ما بقى الا هذي الغرفة
وتسير صوب الشبرية وتمسك اللحاف تبا تعدله
العنود : فديت اللي كان راقد هني .. سالم ريحة عطرك في كل صوب من الحجرة .
وتناظر شلون رامي كندورته في صوب وعقاله في صوب وشلون اغراضه في كل مكان من الحجرة وترتسم على ويهها ابتسامة .. وفجأة تطالع الطاولة ..
العنود : موبايله !! ( بدون ما تحس بعمرها سارت صوب الطاولة وتشل التليفون بين يدينها وتفتح على المسجات وتقرا)
العنود : عايشة: حبيبي سالم فديتك متولهة عليك ... دانة: حياتي سامحني ما اقدر اكلمك الحين انا ويا ربيعاتي .. ( وتعصب وتعق التليفون وتسير صوب باب الحجرة وفجأة توقف وترد تمسك التليفون وتفتح على الرسايل المرسلة )
العنود : احسد كل من يلس معاج احسد ربيعاتج واهلج احسد الهوا اللي تتنفسينه ..
وفجأة يدخل عليها سالم ..
وتعق التليفون على الطاولة وتحاول تسوي عمرها تنظف الطاولة .. بس نور الشاشة فضحها..
سالم (وهو عند الباب): وش كنتي تسوين؟
العنود : تريا لا تفهمني غلط انا ما سويت شي انزين ..
سالم ( يطالع التليفون وبعدين يطالعها ) : ما تسوين شي ؟؟ وبعدين
العنود : وش هو االلي وبعدين ما كنت اسوي شي يعني ما كنت اسوي شي انا مسكته ادري وضغطت زر بالغلط وهذا اللي حصل... صدقني
سالم ( سند عمره على اليدار وكتف يدينه ) : وتكذبين بعد ؟
العنود : شف سالم ترى مافي سبب حتى اني .. اصلا انا .. اسمع ترا لو اريد امسكه كان بندت الباب .. الحين ليش ادور في تليفونج ..
سالم : ...........
العنود : لا تم ساكت شذي صدقني انا ما اريد منك شي ولا من تليفونج
سالم : هيه وبعدين.
العنود : وبعدين ..( وتسكت و اسلوبه خلاها تحط يدينها علىويهاها وتصيح)
سالم : ( يقرب منها ) لا تصحين العنود...
العنود : انت وين ياي تريا .. تتحراني خايفة منك.. هيه مسكت تليفونك وفتحته مستانس ؟؟ لقافة وش فيك عمرك ما شفت بنية ملقوفة ولا تتحرى انك تعني لي شي ولا يصور لك غرورك هذا الشي ابد .. سير من ويهي ما كنت ادري انه عندي عيال عم مستواهم شذي اخاف تنسى اني بنت عمك ..

وتدير ظهرها تبا تطلع من الحجرة ..

سالم ( يشدها بقسوة من يدها ) : سمعي عدل .. للحين ما اتخلقت اللي تكلم سالم بهالطريقة ولو انا ما اميز بين بنات عيلتي والاشكال الثانية كان لي تصرف ثاني معاج بس انا بتركج عسب تعرفين شلون اميز ..
العنود ( تحاول تشد يدها منه ) : ودر يدي .. اتركني اتركني
سالم ( يفك يدها) : ....
العنود تركض صوب حجرتها وهي تصيح وتسكر على عمرها الباب وتيلس وراه على الارض وتمسك بيدها
العنود : أكرهك يا سالم وربي أكرهك من اليوم ما بقى منك شي فيني أكرهك أكرهك..

محمد وهو ينزل يبا يسير لحجرة الطعام :
يرن تليفونه ..
محمد : من هذا الرقم الغريب اللي يدق على الصبح؟ ... السلام عليكم ..
بنت : وعليكم السلام .. محمد ؟؟
محمد : هلا اختي .. وياج محمد
بنت : ما عرفتني ؟
محمد : من ؟
بنت : حنان ..
محمد : حنان !!
حنان: هيه حنان .. اعذرني على اتصالي بس ترا شوقي كان اقوى مني..
محمد : معقولة للحين ما نسيتيني؟
حنان : ومن ينسى اول نبضه ؟
محمد : يالله يا حنان .. تكفين كفاية لا تذكريني ..
حنان : الحين بخليك كنت اريد اسلم عليك هب اكثر
محمد : هذا رقمج؟
حنان : مممم لا هب رقمي ..
محمد : بتدقين لي مرة ثانية ؟؟
حنان : تأخر الوقت يا محمد ما عاد ينفع .. الزمن هب زمنا .. مع السلامة
محمد : مع السلامة..

وتروح ذاكرة محمد لسبع سنين قبل
محمد : ابوي انا موافق بعرس .
بو محمد : الحين انت ولدي ..
محمد : بس العروس
ام محمد: لا العروس تراها جاهزة فطوم ومن غيرها..
محمد : لا يا امايه انا ابا اخذ حنان بنت بو صالح.
بو محمد : ينيت انت شلون تبانى نسيب بنتنا ونزوجك لغيرها ؟
ام محمد : لا يا محمد ترى العرب كلهم يعرفون ان فاطمة لمحمد ومحمد لفاطمة من وانتم صغار..
محمد: بس انا يا امايه ما عدت صغير عسب اسكت على اللي تختاروه لي .. انا الحين ريال ومن حقي اختار ..
بو محمد : جب ولا كلمة والله لو ما ودرت افكارك هذي انت هب ولدي ولا اعرفك..

في الماسنجر:

اليازية says : لا يا فهد ترى كل هالمجموعة اللي ذكرتها ما يعجبوني ابد في المنتدى
فهد says : لا والله حرام عليج . اقول وش رايج في بنت القصيد ؟
اليازية says: اعرفها ربيعتي .
فهد says: قولي والله ؟
اليازية says : والله تدرس وياي في اليامعة .
فهد says: وربيعتج ربيعتج؟
اليازيةsays : لا انا عني ما احبها بس هي ربيعة ربيعاتي وما ادري ليش يحبونها
فهد says: قولي تغارين منها ؟
اليازيةsays: الاهي والله
فهدsays : تراها تستاهل اللي يغار منها ..
اليازيةsays : وليش تسال عنها انت ؟
فهد says: دامج تعرفينها بخبرج يمكن تساعدين بشي
اليازية says: اسمعك
فهد says : الصراحة اسلوبها لفت انتباهي وحاولت اتعرف عليها وسالتها عن ايميلها ما طاعت ولا ردت علي !
اليازية says : هههههه عيل انسى السالفة ابرك لك .
فهد says : ليش بعد ؟
اليازية says : تراها ما ترمس بنات عسب ترمس الريال ..
فهد says : شلون يعني .
اليازية says: ارمس عربي هذي شريفة مكة يعني حتى الماسنجر ما تدخله .
فهد says : عندها تليفون؟
اليازية says : فهد انت خبل ولا وش سالفتك ؟ اقول لك ما تستخدم الماسنجر بيكون عندها تليفون ؟؟
فهد says : والحل ؟
اليازية says : انسى يا شاطر
فهد says: بس انا اباها
اليازية says: إنسسسسى

رزونة

12-05-2004, 05:20 PM

الجزء السابع

بيت بو محمد :
العنود واقفة على شباك حجرتها تطالع جدام البيت وتسمع

بوسالم : مشكورين وايد وترى نترياكم تيون عندنا ..
أم محمد : اكيد بنمر عليكم بس انتوا لا تقطعون بعد ..
ام سالم : خير ان شالله مشكوورين وايد وما قصرتوا ..
وتدخل مهرة عليها:
مهرة : العنود انتي هني ؟ ويا ويهج دار عمج بيسيرون الحين سيري سلمي عليهم
العنود : .......
مهرة : عنود شفيج ؟؟
وتمسك العنود من كتفها وتدير لها ظهرها وتطالع ويهها
مهرة : وتصحين بعد ؟؟ العنود اشفيج ؟؟
في هالحظة العنود ما قدرت تمسك عمرها اكثر رمت عمرها في حضن اختها بدون ما تنطق حتى بكلمة ؟
العنود ( ترمس عمرها ) : وش اقولج يا مهرة اقولج اني ودي اعيش بدون قلب لان قلبي ما عرف يختار ؟؟ اقولج اني احب واحد ما يحس وش اقولج تكفين ؟؟ اقولج ان العنود اللي تعرفينها انها قوية طلعت اضعف من اي شي ممكن تتخيلينه.. اضعف من انها تخبركم باللي سواه سالم معاها عسب بس ما تسوي له مشاكل ...

جدام بيت مريم ربيعة العنود
رانيا في سيارتها ..
تطلع مريم من البيت ..
مريم : هلا والله رانيا اشحالج ؟
رانيا ( تنزل من سيارتها ) : أهلين مريومة كيفك حبيبتي ؟
مريم : بخير الله يسلمج
رانيا : طمنيني شو صار وافقت امك لخديجة تطلع معاي
مريم : هي هب مقتنعة بعدها بس شكله بتقتنع ما تبا تكسر بخاطر العروسة
رانيا : العروسة هههههههه عذبتنا هالعروسة معاها
مريم : قررتي وش بتلبسين في العرس؟
رانيا : ايوا اخترت وبتقدري تقولي خديجة اللي اختارت لي كل شي مش انا
مريم : وين تبون تسيرون الحين ؟
رانيا : للكوافير عشان ناكد عليها الساعة كم بتجي عندكم وحنسوي شوبنج خديجة بدها تشتري اشياء ناقصاها ... تحبي تيجي معانا مريومة ؟
مريم : لا والله مالي بارض..
وفي هالحظة وقفت خديجة عند باب بيتهم
خديجة : وافقت وافقت ثواني وبيج ترييني ..
مريم : عن إذنج رانيا انا بدخل الحين وهذي خديجة شوي وبتيج
رانيا : اوكي حبوبة خلينا نشوفك.. باي
وتدخل مريم لحجرتها وتشيك على تليفونها وتلقى مسج من راعي المسجات ..

غلاكم من غلا عيني
وفي قلبي محبتكم
يجيكم يوم وتنسوني
وطول العمر بذكركم

مريم : تراني زهقت زهقــــــــــــــــت منك.
وتسير صوب حجرة ابوها
مريم : أبوي
بو مريم : هلا بنيتي
مريم : ابا اغير رقمي تكفى
بو مريم : ليش وش فيه رقمج
مريم: ترا ( وجت تبا تخبر ابوها عن اللي يزعجها ومالقت عمرها الا وسكتت )
بومريم : هاه وش فيه رقمج؟
مريم : لا بس تراني مليته ووايد بنات يعرفونه ابا اغيره ضاق خلقي منه تكفى
بو مريم : بدليه ويا اخوج..
مريم : لا ابوي ابا رقم يديد وهذا ابا اقطعه.
بو مريم : الحين انا هب فاضي والله اول ما يخلص عرس اختج وبيصير خير ..
مريم : مشكور ابوي ما تقصر فديتك
وتطلع بسرعة من الحجرة
مريم ( ترمس عمرها) : ليش سكتي ليش ما قلتي له انه شي واحد يزعجج ليش يا مريم ؟؟ لا تكونين مستانسة وما تبين احد يوقفه عن حده ؟ ما اصدق اني ممكن اخاف على واحد من هالاشكال .. ليش يا مريم ليش؟!

في دبي جدام بيت بو سالم ..
ينزلون أهل سالم من السيارة
بو سالم : هيه انت ما بتنزل ؟
سالم : لا ابوي بسير عند ربعي
بو سالم : انت ما تتعب ولا تمل انت دوم تحوط ؟ تراك طفرت بنا
سالم : ابوي مواعدهم ما اقدر يتريوني تراهم..
بو سالم : سير سير خلنا نشوف وش هي اخرتها معاك
ويحرك السيارة ويطلع من بوابة البيت ..
سالم : العنود العنود .. ليش يت كلمتني ليش ؟ ليش تحاول تقرب مني ؟؟
ادري اني قسيت بس هي اللي ابتدت وياي ..
اشوفك يا سالم بديت تحن لها صحيح بنت عمك بس ترا البنات كلهم واحد
كلهم خاينات ولا نسيت الخاينة اللي خانتك بعد ما عطيتها وسلمتها قلبك
كل البنات عديمات احساس .. ادري انج تحبيني وادري انه مستحيل قلبي يصدق اي بنية بعد ذيج الليلة حتى لو كانت بنت عمي .. شكله دورج الحين يالعنود تتعذبين وياي..

بعد أيام ((عرس خديجة )):

بيت مريم :
رانيا : شو عم تعملي انتي ؟؟ بدك تطلعيني شبح؟؟ خففي المكياج
الكوافيرة : بس هيك لازم يكون مكياج ..
رانيا : شايفانا ما بنفهم؟؟مريم مرييييييم تعي شوفي .. شو رايك في الظلال مش كتير
مريم : هيه الله يهداج خففيه لها وش هذا ؟؟
خديجة : اقول سمعي اللي يقولونه لج ولا توتريني اكثر مني متوترة ..
الكوافيرة : حاضر.
الخدامة : ماما هذا كوافير تاني في يوصل..
رانيا : دخليها بسرعة ... أهلين معلج تري لين تخلص خديجة التسريحة
خديجة : رانيا طالعي من هالصوب هب جنه لازم ترفع هالخصلة ؟
رانيا : مممممم ايوا ارفعي لها شوي من هالمنطقة ..
مريم : رانيا انا خلصت التسريحة مالتي .. ما بتسوين شي ثاني في شعرج ؟
رانيا : لا كفاية اني سشورته بفكه وبس
مريم : ما شاء الله عليج لا تحتاجين مكياج ولا شي يا رانيا من دون شي ملكة جمال
الكوافيرة : رانيا شو نوع الظلال اللي بدك احطه ؟
خديجة : صدج شو تبين تحطين ؟
رانيا : فستاني اسود .. اعتقد بحط ظلال دخاني على عيوني .. بس مش تسويه ثقيل ..
الكوافيرة : اوكي
رانيا : لحظة لحظة لو سمحتي .. ( وتسير صوب الكوافيرة مالت خديجة )
رانيا : حبيبتي .. شو هذا هيك هالخصل كلها بتخرب على نهاية العرس لفي شعرها من هالناحية هيك عشان يحافظ على شكله حتى مع طرحتها..
خديجة: فديت روحج يا رانيا كل هذا اهتمام فيني.. عقبالج
رانيا : كم خديجة انا عندي اهتم فيها ؟

بيت بومحمد :
العنود : مهرة مهرة لحقيني ماشي احد يبا يوصلنا.
مهرة : وش تقولين ؟
فاطمة : ومحمد وينه ؟
العنود : محمد يقول وراه مشوار مهم
مهرة : ومبارك ؟؟ هو قال انه بياخذنا ..
العنود : طلع ويا محمد وقال لي خلي راشد يوصلكم.
فاطمة : عيل خبري راشد .
العنود : خبرته وهب طايع ..
مهرة : معقول بعد ما عدلنا اعمارنا ما نسير
العنود : شلون ما نسير هذا عرس اخت مريوم لازم نسيروالا مريوم بتزعل مني.
فاطمة : العنود راشد يحبج ترجيه شوي وبيوصلنا صدقيني ..
راشد : لا ما برضى صدقيني
فاطمة والعنود ومهرة: رااااااشد
العنود : راشد يابعد عمري تكفى تراها ربيعتي والله ربيعتي بتزعل
مهرة : يهون عليك اخواتج بعد كل هاللبس و التعديل في اعمارهم ما نسير؟
راشد : انزين بوديكم بس ترا هب انا للي بردكم للبيت
العنود : هيه هيه لا تخاف مبارك هو اللي بردنا للبيت هو قال لي ..
راشد : دام شذي جدامي على السيارة ..

في سيارة راشد :
راشد : لا حووول وش هالعنوان ما عرفنا ندله ..
العنود : يا ربي تاخرنا ..
راشد : انتي سكتي ... احد ياخذ العنوان بهالطريقة ؟؟
مهرة : والحين يعني ؟؟
خالد : ماما فتحي لي شكولاتة..
فاطمة : اندوك حبيبي..
العنود : ادق لمريم مع اني ادري انها مستحيل تشل رقم غريب بس عطني يا راشد تليفونك خلني احاول ..
راشد : هذا هو عندج..
العنود : ما ترد ..
راشد : لقيته خلاص هذا هي الخيمة .. تغشوا بسال هالريال.. لو سمحت اخوي وين خيمة الحريم ؟؟
الريال : هذي خيمة الحريم اخوي ..
راشد : مشكور ( ويسير يوقف جدام باب الخيمة مالت العرس)
راشد : هذي هي يلا نزلوا ومثل ما تفقتوا ويا مبارك هو اللي بي ياخذكم حسب الموعد المتفقين عليه تكونون جدام البوابة زين..
مهرة : زين راشد مشكور ..
وينزلن كلهن من السيارة ... وفي هالحظة يطالع راشد على باب الخيمة يلقى بنية تحاول تزيح الستار وتطالع الشارع .. وفجأة ترجع له العنود ..

العنود : راشد ... راااااااشد
راشد : هاه ؟؟
العنود : وش فيك اطرش ما تسمع ؟؟ عطني تليفونك ..
راشد : وش تبين فيه ؟
العنود : بس عطني ..
راشد : اندوج ..
العنود : مشكور بس محيت رقم ربيعتي ادري بك ما تصدق يقع بيدك رقم بنية وهذي ربيعتي واخاف عليها الصراحة..
راشد : سيري سيري من ويهي...

في العرس:
مريم : العنود العنود وينج ؟؟ تدرين من دق؟
العنود :وش هذا ما شاء الله عليج
مريم : سكتي بس الحين بصدق عمري وبعدين انتي بعد ما شاءالله عليج وين مخبيه هذا كله ؟؟ ومهرة بعد تصدقين ماعرفتج
مهرة : تراني ما احب المجاملات
مريم :اي مجاملات الله يهداج .. انتي والعنود ما عليكم كلام وهذا هب رأي بروحي
الحين كل الحريم بيسألون عنكم عسب ياخذوكم لعيالهم وبتشوفين ..
مهرة والعنود : قولي والله ..
مريم : صدق.. أقول ليش تاخرتوا ؟
العنود :ما دلينا العنوان .. وترا دقيت لج من تليفون راشد .. اي رقم عندج بدايته سبعة سبعة تراه رقم اخوي ..
مريم ( تمسك تليفونها ) : هذا رقم اخوج ؟؟
العنود : هيه اخوي راشد .
مريم ( تحاول تخفي صدمتها ) : تدرين وانا يلست افكر رقم منو رقم منو..
العنود : اعرفج تحاتين من اي شي انت ..
مريم : يالله يالله ترا العروس بتدخل .. نادي فطوم..
العنود : فطوم بتم ويا خالد.. يلا خلنا نسير نشوف العروس وخلينا نسلم على امج بعد.
وتدخل العروس والصالة كلها تنبهر بجمال العروس وخديجة كانت بتموت من المستحى ..
ويبدا العرس والصالة ماشاءالله متروسة ..
العنود : مهرة طالعي طالعي هناك ..
مهرة : وش فيه ..
العنود : طالعي البنية اللي لابسة فستان اسود ..
مهرة : الحلوة هذيج ؟
العنود : هيه صدق غاوية .
مهرة : هي حلوة بس تدرين ترا شفتها وهي داشة ويا العروس وكانت سايرة في الشارع بدون عباتها وشيلتها.
العنود : قولي والله ..شلون اهلها مخلينها ؟
مهرة : والله ما ادري؟؟
العنود : هذي مريوم بسالها عنها .. مريوووووم تعالي ..
مريم : هاه عنودي؟؟ خير ..
العنود : من هذي البنية اللي لابسة فستان أسود ولازقة في اختج رايحة رادة من عندها؟؟
مريم : ليش ؟؟ حلوة مب شذي؟
العنود : وايد من هذي قوم منو ؟
مريم : ههههههه هذي فلسطيينة ربيعة خديجة المقربة ..
مهرة : فلسطينية !! معقولة ؟؟
العنود : بلااااد الشام عسب شذي طالعة بدون عباة وشيلة..
مريم: لا حرام عليج لاتفهمينها غلط ترا عاداتهم تختلف بس اخلاقها ماشاء الله عليها..
العنود: اي عادات واي خرابيط هذا اسمه دين وكلنا مسلمين والحجاب علينا كلنا ..
مريم : هم اهلهم عندهم عادي وبعدين هي فستانها هب مفصخ وايد عسب تلبس عليه عباية .. أنا بعرفج عليها واذا ما حبيتيها ما يكون اسمي مريم تريني
وتسير مريم صوب رانيا وتناديها..
رانيا : مرحبا .. انتي العنود صح ؟؟
العنود : هيه انا ..
رانيا : عرفتك .. صحيح مريم دايما بتحكي عنك بس ما تخيلتك ابدا بهالحلاوة
العنود : تسلمين ربي يحفظج ..
رانيا : ممم و الاخت ؟؟
العنود: هذي مهرة أختي .
رانيا : أهلين مهرة .. كيفك ؟؟
مهرة : بخير الله يخليج ..
مريم : على فكرة مهرة ترا رانيا تقرا الشعر الشعبي وايد وتحبه يعني ممكن تتفقين معاها ..
مهرة : ومعقولة تفهمينه ؟؟
رانيا : حبيبة قلبي انا بالنسبة للوافدين بفهم كتييير منيح بس بيضل في كلمات ما افهمها بس مش كتير .. وعلى فكرة تراني اعرف ارمس شراتكم واقلدكم بعد في كل شي تراني مولودة هني ..
مريم : ههههههه وش رايكم ؟؟ هب عسل ؟
العنود :هيه والله .. طلعتي راعيتها يعني ..
رانيا : البركة في خديجة بس خلاص تزوجت حتنسانا .. مريم شو رايك ابدلها في مهرة مدام انا ومهرة لنا نفس الميول ..
مهرة : ههههه فكرة وليش لا نسوي خيانات دام البنية عرست ..
مريم والعنود : هههههههه ..
مهرة : تعالي بنعرفج على حرمة اخوي العود..
رانيا : والله وينها ؟
وتمت السوالف لين مر الوقت بدون ما احد يحس فيه وسوالف البنات ما تخلص
رانيا : مريم حبيبتي انا تاخرت اكتر من هيك ما بقدر اسوق لحالي في الليل اسمعي سلمي على خديجة..
مريم : ما بتسلمين عليها ؟؟
رانيا: لا ما حقدر لانها ما حتخليني اروح قبل العرس ما ينتهي وانا عن جد ما اقدر اتاخر
وتطلع رانيا من الصالة ..
فاطمة : نسينا اعمارنا نحن ؟؟ طالعوا الساعة
مهرة : اكيد مبارك وصل..
العنود : هيه يا ويلنا .. يالله يالله قوموا ... مريوم حبيبتي الف مبروك وعقبالج
مريم : تسلمين .. وان شالله بشوفج في اليامعة ..

برع الخيمة ...
مبارك : وش هذا ؟؟ سنة ؟ تراها اول واخر مرة اعطيكم ويه ..
العنود(وهي تركب):إنزين وش حصل يعني السالفة ما تستاهل كل هذا ..
مهرة ( بعدها واقفة برع السيارة ) : العنود طالعي هناك ... هب هذي رانيا
مبارك : اقول انتي وياها الحين اتركي لي رانيا وعايشة ويلا ركبي خلنا نسير البيت..
فاطمة: اصبر يامبارك وش فيك .. ترا البنية ياحليهلها وشكلها سيارتها فيها مشكلة خلنا نساعدها ..
مبارك : بعد تبوني اصلح لها سيارتها ..
مهرة : ما حد قال شذي لا تخاف ما حد بيخرب لك اناقتك.. انت تريا انا بس بسالها اذا شي مشكلة بسيارتها خلها تروح ويانا نحن بنوصلها..
العنود: هيه سيري سيري لها ..
فاطمة : تريني انا بي وياج .. هب معقولة نخلها بروحها في هالساعة..

عند سيارة رانيا

مهرة : رانيا .. في شي؟؟
رانيا : ما بعرف ليش السيارة ما عم تشتغل معي هاي اول مرة تخرب..
فاطمة : انزين سيري معانا نحن بنروخج ..
رانيا : لا لا مابدي ازعجكم ..
مهرة : لا لا تخافين ما فيها اي ازعاج وانتي الحين ربيعتنا ..يلا سيري ويانا اخوي بيوصلج
رانيا : اخوكي ؟
فاطمة : هيه حبيبتي بس ما يهمج نحن 3 حريم وياج ..
رانيا : لا ما قصدي بس الصراحة بخجل .. ممم خلاص بروح بتكسي..
مهرة : وش فيج يا رانيا تكسي هني في اخر الدنيا ؟؟ طبعا ما بتلقين وان لقيتي وبهالوقت وهالمكياج شلون تركبين معاه بروحج طبعا ما بنخليج .
رانيا : بدك الصراحة .. انا كمان كنت خايفة اسوق لحالي بالليل ولما السيارة ما رضيت تشتغل كنت بدي اعيط من الخوف..
فاطمة : هههههه يا حليلج
مهرة : عيل خلاص يا قومي ويانة ..
رانيا : بس...
مهرة وفاطمة : لا بس ولا غيره قومي قومي

رزونة

12-05-2004, 05:27 PM

أهم الشخصيات والأحداث التي حدثت للأن

أم محمد ..
إهتمامها المبالغ فيه في سلامة بنت عمهم يبين لنا انها تباها لابنها
راشد بس هل فعلا راشد يباها ويحبها ؟؟

محمد ..
مشكلته بدت توضح اكثر ولاحظنا ان مشكلته لها جذور قديمة
يوم دقت عليه البنية اللي اسمها حنان .. يظهر ان حنان هذي هي حب محمد الاول واللي ما صار لها نصيب معاه .. بس هل لها اي علاقة في مشكلته مع فاطمة ؟؟؟ ما حد يدري!!

مبارك ..
كل ردت فعل لمبارك تراوينا كثر كبريائه بعمره وهذا الشي كان واضح يوم قسى على رانيا ورفض انه يخليها تتوظف في الوظيفة وشفنا شلون مشى كلمته على ربيعه منصور اللي هو مدير قسم مثله مثل مبارك في البنك .. بس اللي ماعرفه مبارك ان رانيا اللي اخواته ساروا لها في العرس عسب يقولون لها تروح وياهم هي نفسها رانيا اللي ظلمها بقراره عليها .. يا ترى وش بيحصل يوم يشوفها ؟؟

مهرة ..
بعدنا للحين نجمع الاحداث القليلة اللي حصلت ويا مهرة ما قدرنا نعرف غير رومانسيتها واهتمامها بالشعر .. وما ننسى فهد اللي سأل عنها وهو مصر يبا يتعرف عليها بعد ما شارك معاها في المنتدى وشاف اسلوبها؟؟ هل فعلا بيقدر يوصل لها ؟؟ بعد ما احد منا يدري..

راشد ..
بعده راشد على سوالفه مع البنات وخاصة يوم تم يطالع مريم يوم شافها على باب الخيمة .. لكن هو نفسه ما يدري سبب اهتمامه الغريب بالبنت اللي يرسل لها المسجات واللي اكتشفنا انها مريم ... راشد بعده ما يعرف ان أخته العنود كشفته جدام مريم وان مريم عرفت انه هو من يرسل لها المسجات ؟؟ هل بييحصل شيء بينهم وشو بتكون ردت فعل مريم ان اخو ربيعتها يطرش لها مسجات .. وهل راشد بيعرف ان البنية اللي يالس يطرش لها هي نفس البنية الغاوية اللي هي ربيعة اخته المقربة ؟؟ بعد ما احد منا يدري..

العنود ..
قصتها صارت وايد واضحة .. وعرفنا شلون العنود تحب سالم ولد عمها وشلون سالم ما يحبها ولا يهتم فيها واالشي كان واضح من ردت فعله القاسية ومن رغبته اللي مالها داعي في تعذيبها معاه .. العنود تعرف انه ما يصلح لها .. بس هل هذا السبب بيكون كافي عسب تقدر تنساه وتشله من خاطرها ؟؟

كل هالاحداث والاستفسارات ان شالله بنعرف اجوبتها
ويا الاجزاء الياية ...

BMW540I

12-05-2004, 11:12 PM

الله يعطيج العافيه :) انا من شفت القصه قلت اكيد تصلح كمسلسل

:p

عاشقة

13-05-2004, 01:45 AM

ماأقدر أستنى أكتر من كده ..:cry:
بسرعة .. التكملة بليــــــــــــز ..:help: ..:cry:

دانا

13-05-2004, 05:35 AM

السلام عليكم ورحمة الله وبركاته

رووووووووووووعه ....

نتريا الباقي

RED Chevy

15-05-2004, 06:16 PM

رد مقتبس من BMW540I
الله يعطيج العافيه :) انا من شفت القصه قلت اكيد تصلح كمسلسل

:p

شعنونة سوالف

15-05-2004, 07:22 PM

يالاااا الباقي
بس اظن انه لازم تاخذي موافقه الكاتبه على النقل

كنت اطلع على منتدى تكتب فيه عضوه و كانت لا تقبل ابدا ان احد ينقل قصهصها حتى لو كتبت تحتها منقول
بس تاكدي علشان المؤلفه لا تزعل :)

رزونة

15-05-2004, 11:31 PM

BMW540I
عاشقة
دانا
RED Chevy
شعنونة سوالف
شكرا كتير كتير على الردود والجزء الجديد للأن لم ينزل ورح انزله لكم مباشرة بعد الكاتبة ما تنزله ..
شعنونة سوالف انا فعلا سجلت في المنتدى اللي تكتب فيه الكاتبة
على اساس استاذن منها وانا للان انتظر تفعيل الاشتراك عشان ابعت لها واسالها .. وان شالله ما تمنعنى من النقل ..
وشكرا كتير على متابعة القصة
باااااااااي

بشاير

15-05-2004, 11:52 PM

السلام عليكم ورحمة الله وبركاته

يعطيك العافية رزونه صراحه قصة مشوقة ... تسلم إيدك وإيد الكاتبة

نحن في انتظار البقية

BMW540I

16-05-2004, 12:16 AM

منها للاعلى :banana:

رزونة

17-05-2004, 03:06 PM

الجزء الثامن ..

عرس خديجة ..

رانيا ومهرة وفاطمة سايرين صوب سيارة مبارك ...
مبارك يطالعهم وهم يايين صوبه لكن شكل رانيا كان مختلف وايد عن الشكل اللي يعرفها فيه .. فما عرف يميزها وهي بعيدة ..

مبارك : دريول انا تخلوني اخر شي دريول حق ربيعاتكم ..
ويسكت فجأة يوم تقرب رانيا ويعرف ملامحها
مبارك : العنود وش قلتي البنية اسمها ؟؟
العنود : رانيا ..
مبارك : ربيعتج ؟؟ هب مواطنة ؟
العنود : لا فلسطينية..
وينفتح باب السيارة
فاطمة : ركبي ركبي يا رانيا ..
ويركبن البنات في السيارة ..
العنود يالسة جدام عدال مبارك وفاطمة ورا مبارك وبالنص مهرة واخيرا رانيا ورا العنود وخالد كان راقد فحملته فاطمة على حجرها ..
العنود تدير ظهرها وتكلم رانيا ..العنود : حياالله رانيا .. نورتي سيارة مبارك .. هيه اعرفج ترا هذا اخوي مبارك ...مبارك هذي رانيا تونا تعرفنا عليها في العرس ..
ورانيا يوم سمعت اسم مبارك رفعت راسها وطالعته ومبارك ما عرف وين يخش ويهه
بكل كبريائه ما عرف وش السبب الللي خلاه يتمنى الارض تنشق وتبلعه ..

رانيا ( بدون ما تحس بعمرها قالت ): مبارك !!
مبارك : هلا رانيا شحالج ؟؟
مهرة والعنود وفاطمة : تعرفون بعضكم ..
مبارك : هيه تراها زبونة عندنا في البنك ..
استغربت رانيا .. ليش قال مبارك انها زبونة عندهم وما قال الحقيقة ..
رانيا ( ترمس عمرها ) : فوق الغرور كمان كذاب ..
فاطمة : أفا يا مبارك زبونة ومعرفة وما ساعدتها ؟؟
رانيا : يساعدني ؟؟
فاطمة : هيه في الوظيفة ..
في هاللحظة مبارك قرب قلبه يطيح وشلون درت فاطمة عن سالفة الوظيفة .. ومعقولة كذبته انكشفت ..
مبارك ( يرمس عمره ) : ادري ان الكذب حبله قصير بس هب لهذي الدرجة عاد ..
وحاول يغير السالفة وسال رانيا عن عنوان بيتها لكن بعد ما رانيا قالت له العنوان ..ردت فاطمة تكمل رمستها ..
فاطمة : هاه مبارك ترا رانيا ما شاء الله عليها مواصفاتها وايد زينة وتراها تبا وظيفة..
العنود : هيه والله صدقج شلون غابت عن بالنا هالسالفة ؟؟ تدرين رانيا ترا مبارك
مدير قسم في البنك وعنده معااااااارف واااااايد وتقولين يخبي الوظايف عنده ..ههه اقول مبارك للحين كم واحد وظفت من ربعك ؟؟
مبارك : وش تقولين انتي ؟؟ طبعا هب شرات اللي تقولينه انا يوم القى شخص مناسب ادل الناس عليه وهذي كل السالفة انا ما اسوي واصطات ..
مهرة : ههههههه طالع التواضع عموما ...ههه ترا مواصفات مثل رانيا ما بتلقى ..
العنود : اشفيج رانيا ساكتة تكلمي قولي اي وظيفة تبين الواحد هب كل يوم يلقى واحد مثل مبارك يوظفه ههههههههه ..
مهرة وفاطمة : ههههههه
رانيا ( تضحك بدون نفس) : هههه معاكم حق عموما لا ما في داعي يعذب نفسه
فاطمة : اقول رانيا قلت لج ترانى استوينى ربع ما فيها شي يوم مبارك يساعدج عطي مبارك رقمج وان شالله بيلقى لج وظيفة ..
رانيا : لا لا فاطمة انا
مبارك : عطيني رقمج وان شالله بحاول اساعدج
العنود : وش تحاول ما تحاول نقول لك ربيعتنا يعني بتلقى لها وظيفة غصب عنك
رانيا ( تتكلم وهي في خاطرها تعق بعمرها من السيارة ): يا جماعة لا تكبرو المسألة .
مبارك : وانشالله بحاول القى لج وظيفة.. عطيني رقمج واذا هب واثقة تقدرين تعطيني رقم الوالد او رقم المنزل ..
رانيا : القصة هب قصة ثقة القصة ..
ويقاطعوها البنات ..

العنود ومهرة وفاطمة : يالله عاد عطيه الرقم .. يالله تراها فرصة ..
رانيا : طيب *******
العنود : خلاص الحين يا رانيا لا تحاتين موضوعج بايدي امينة تراه مباااااارك هب اي احد..
وبعدها تمن البنات يتكلمون عن العرس وغيرره مواضيع وما احد كان ملاحظ ان رانيا تحس ان جو السيارة بيخنقها ..
اما مبارك .. كان يبا الطريق يقصر يباها تنزل يبا يهاوش اخواته على الموقف هذا ..
مبارك ( يرمس عمره ) : ابا افهم من اللي يحطج بطريقي وش بسوي الحين والوظيفة اخذتها وحدة ثانية ؟؟
والله موقف للي حطوني فيه كل وحدة يالسة تمدح فيني وناسين اعمارهم من يتحروني عسب اوظف بكيفي !!

بيت بو محمد ..
راشد ( يدخل من برع ) : البنات ماردوا للحين ؟
بو محمد : لا .
راشد : لا يكون مبارك نساهم .. تبوني اسير ايبهم ؟
بو محمد : من متى كل هالشهامة على حد علمي ما كنت تبا تسير وياهم ؟
بو محمد : لا استريح ترا مبارك دق وقال انهم في الطريق
راشد : انزين انا حبيت اقدم خدماتي .. لانهم تاخروا ..يعني قلقت عليهم
ام محمد : تراهم وصلوا ربيعة العنود لبيتها عسب شذي تاخروا
راشد ( يرمس عمره ) : ويا الويه يا راشد .. اونة انا ما بروحكم البيت وش استفدت الحين ؟ هب لو سرت كان ابرك لك .. اكيد ربيعة العنود هي نفسها الغاوية اللي شفتها اكيد انها هي ربيعتها انا شفتها تاشر للعنوود يوم نزلت من السيارة مااحد غيرها بيكون ربيعتها !!
بومحمد : بسم الله وش فيك سكت ؟؟
راشد : لا ما شي ..
ويدخل محمد ..
محمد : شحالك راشد ؟
راشد : بخير .. من متى وانت في البيت ؟
محمد : من وقت .. مبارك راح صوب اخواتك وانا رديت للبيت .
ام محمد : هذا صوت السيارة .. شكلهم وصلوا ..
وبعد ما دشوا كلهم من برع
البنات كانوا يبون يسيرون صوب الصالة ..
مبارك : العنووود تعالي هني ..
العنود : وش فيك ؟
مبارك : وش اللي سويتيه هذا ؟؟ ترى سوالف الضحك والغشمرة شي والشغل شي ثاني انت وش لج تدخلين بلي مالج فيه ؟
مهرة : مبارك وليش تصارخ انت وش حصل .. من قرب صوب شغلك ؟
مبارك : تستهبلين انت ؟ اصلا الكلام لج ولها وانتوا الاثنين ما كان شي اي داعي للرمسة الماصخة مالتكم .. انا هب رئيس الدولة اوظف اللي اباه وقت ما ابا
فاطمة : مبارك لا تصارخ في اخواتك وترا لو عندك رمسة قولها لي انا لاني انا اللي فتحت السالفة ..
ويطلع بومحمد وام محمد ومحمد وراشد من الصالة يبون يشوفون وش السالفة ...
محمد : فاطمة وش اللي حصل ؟
وتقول فاطمة السالفة كلها حق ريلها والبقية ..
محمد : فاطمة .. وش هذا ؟؟ ترى ما يجوز اللي سويتيه .. شلون تورطين الريال مع البنية ؟؟
مهرة : لا يا محمد فاطمة ما يخصها هي قالت الكلام مزح ونحن اللي مسكنا بالسالفة
في هاللحظة فاطمة ورغم انها ما تحب مهرة وايد الا انها حبتها لانها كانت بتموت رعب من محمد خاصة انها حست عتابه لها ونظرته كان فيهم شي قاسي ما تعودت عليه ..العنود : اسمع مبارك انت قول انك ما تباها لانها ربيعتنا والا انت لو احد من ربعك ترا كان وظفته .. ولا سويت كل هالحشرة على سالفة ما تسوى وبعدين يا خي تقدر تنسى السالفة ولا تيب لها وظيفة ولا شي تراها هب من باقي اهلنا ..
راشد : لا لا العنود لا تقولين شذي تراها ربيعتج .. هب مشكلة بنشغلها ويانا في الشركة مالتنا ما حصل شي ..
بومحمد : طالع هذا !! بدون ما تعرف من هي وش دارسة على طول تباها في الشركة
الحين عرفت بعد موتي شلون بتمشون حياتكم .. واحد يهاوش على سالفة مامنها داعي والثاني يعاتب حرمته على شي ما يستاهل والثالث يحل مشكلة تافهة بحل اتفه عنها .. ويا ويهكم تصارخون ولا احد مسوي لي احترام هني اسمع مبارك .. لو مالقيت لها وظيفة تناسبها اعتذر وانتهت السالفة .. الله لا يبارك فيكم من عيال..
كل العيلة : بسم الله عليك ابوي .. الله يطول بعمرك ..
مبارك : السموحة ابوي والله ما عاش اللي ما يسوي لك احترام تراك على راسنا من فوق ( ويحب على ايد ابوه) .

وبعد فترة من الوقت
طلعوا كلهم يبون يرقدون ..

في حجرة العنود ومهرة ..
العنود : وهب بس شذي كنت ابا اذبحه عسب يعرف يرمس عدل مرة ثانية
مهرة: العنود حرام عليج حليله مبارك .. تبين الصدق هو احسن واحد من اخووانج
العنود : ادري ترا هو الوحيد اللي يخاف
على اهله وااااااايد
مهرة : وهب بس شذي الوحيد اللي ماله بسوالف المغازل والبنات .. انا اتمنى ريلي يكون شراته
العنود : بس بعد احسه وايد عملي وماله في الحركات اللي يحبونها البنات
مهرة : بالعكس ... هههه اساليني انا ترا هذا بتشوفينه يوم يعرس بيحب حرمته واااايد وبيذبحها بحبه بس اخوج ما يحب اي شي مب في مكانه هو بس ينتظر الوقت المناسب فهمتي ؟
العنود : مهرة وين بتسيرين ؟؟
مهرة : صوب الكمبيوتر .
العنود : ينيتي انتي ؟ ما فيج رقاد ..
مهرة : الا فيني وايد وبموت من التعب بس ترا مضى لي كم من يوم ما دشيت المنتدى ابا اشوف اخبارهم ..
العنود : برايج انا برقد ..

وتسير مهرة صوب الكمبيوتر وتفتح ا لمنتدى وتدخل باسمها
وتتفاجأ انه عندها 20 رسالة خاصة !!

مهرة : من المطرش لي كل هالرسايل ؟؟
وتفتح الرسايل وتلقى ان ال20 رسالة كلهم من عند واحد يكتب في المنتدى وعرفت ان اسمه فهد
وكلهم عبارة عن قصايد شعر ماعدا وحدة .. كتب لها فيها انه معجب باسلوبها وعجز يلقى طريقة يوصل لها ويكلمها لانها ما حاطة ايميلها ولا اي شي يخليه يقدر يكون على اتصال معاها !!

في هالحظة بعد ما مهرة قرت كل الرسايل بندت الكمبيوتر وجان تسير بسرعة صوب حجرتها ...

العنود ( تسكر عيونها وتسوي عمرها راقدة )[/[COLOR=DarkSlateBlue]COLOR]مهرة تدش الحجرة بسرعة وتسير صوب الشبرية وتلحف عمرها ..

العنود : وش فيها مهرة ؟؟ اول مرة اشوفها مترددة ودي اكلمها بس مالي بارض الحين.. هه اكيد دام اني افكر بسالم اكييد بتم شذي مالي نفس ارمس احد ولا اكلم احد.. ما ادري متى بشله من خاطري هالمتوحش اللي ما يعرف حتى شلون يعامل البنات .. يا ويل حالي يا سالم لو انك تحس فيني ..
وجان تتذكر يوم كانت صغيرة ..العنود : هذي لعبتي .. ماما عطتني امس.. عشان انا سمعت كلامها
سلامة: عطيني انا بلعب فيها شوي وبردها لج..
العنود : خذيها ..
سلامة : ما بردها لج ..( وتمد لسانها )
العنود : عطيني لعبتيه .. مااااااامااااا
سلامة : سالم سالم .. طالع العنود تبا تاخذ عروستي..
العنود : والله انها مالتي سالم هب لعبتها.
سلامة : بس انا اباها سالم .
سالم : عنود .. خلاص اللعبة استوت مالت سلامة انتي مالج خص واذا خبرتي احد ترا بضربج..
العنود : ....
ويسيروا عنها سالم وسلامة وسلامة تمد لسانها للعنود ....وتم العنود تصيح وما تخبر امها ولا ابوها عسب ما يضربون سالم ولا يهاوشونه
بعد ما تذكرت العنود هالموقف ابتسمت وقالت ..
لعنود : ما كنت ادري اني من زمان اخاف ان ابلغ اهلي عنك عسب ما اسوي لك مشاااكل ..

أما في الصوب الثاني من الحجرة كانت مهرة ..
مهرة : العنود رقدتي ؟
العنود : ....
مهرة( ترمس عمرها ) : وش فيني بردانة وكل جسمي يرتعش..لا يكون بسبة فهد .. يالله اشكثر اسلوبه يجنن .. انا دوم اشوفه وهو يشارك ويعجبني كلامه بس ما تخيلت في يوم انه يحاول يكلمني... وبعدين ليش انا بالذات هو شاعر ومشهور وااايد في المنتدى والكل يحبه والف بنية تتمنى يرمسها في المنتدى وغير المنتدى.. ليش يبا يكلمني انا بالذات ؟؟

في الماسنجر:اليازية says : تراك ذبحتني ما بترقد انت ؟
فهد says : تكفين ياليازية انا ادري انك تعرفين تجيبين لي ايميلها بس انتي ما تبين..
اليازية says : انت وش تببا فيها ؟؟ اتركها بروحها ..
فهد says : إنزين خبريني عنها عن شخصيتها ..
اليازية says : وش تبا تعرف ؟
فهد says : وش اسمها الحقيقي.
اليازية says : مهرة
فهد says : مهرة حتى اسمها غاوي مثل اسلوبها
اليازية says : أنت بتم وايد تتغزل فيها ؟؟
فهد says : وربي وربي ياليازية بحياتي ما لقيت بنية اسلوبها مثلها .. كتاباتها كلها احساس وتحسينها تختار كل حرف بالكلمة اللي تكتبها ...
اليازية says : ازودك بعد تراها حالمة وااايد والرومانسية بتذبحها .. شلون ما تباها تكتب هالشكل وهي اربع وعشرين ساعة تحلم بالحصان والفارس الابيض وخرابيط البنات
فهد says : خرابيط والله ما حد غيرج اللي خرابيط .. اهي مخلصة دراسة ؟
اليازية says : مخلصة الجامعة واربع وعشرين ساعة في بيت اهلها لا تبا تشتغل ولا تحب تقضي وايد وقت مع ربيعاتها .. بس مرات تمر علينا بالجامعة
فهد says : اكيد شي احد يبا ياخذها عسب شذي
اليازية says : حسب كلام ربيعاتي وايدين يبوها .. بس هي ترفض لانها تدور على واحد مثل اللي في خيالها ..
فهد says : فديتها والله ..
اليازية says : سير من ويهي انا برقد ..

ويسير فهد ويطرش لمهرة رسالة خاصة في المنتدى ..

ليه يا نبض الوهم تقسى عليه
شنو هو ذنبي الارتكبته
غير دمعٍ بغيابك كم سكبته
غلط قلبي عليكي وقال أحبّك
وأعذرني
لو قسى نبضي عليك.. وردد إسمك
و اغفر لي.. زلّة عيونٍ تمنت إنها بلحظة تشوفك
أرحلي عني بعيد ولا يهمك .. اتركني في مهب الريح اعاني
وعذبيني كل ماقرّبت يمك
وأطعنَيني ألف طعنة
وكل ما لمحتيني بطيفك أصرخي وقولي كرهتك
و لا يهمك اتركيني
بين موت النبض بيه وبين حبّك
بس لو غلط فكرك مرة وجاني
لو سمحتي أصرخي وقولي أحبك ..

يتبع,,,

عاشقة

18-05-2004, 12:28 AM

ياويلي .. القصة بتزداد تشويق ..:blink:
في انتظار التكملة ....:blink:

رزونة

18-05-2004, 06:22 PM

الجزء التاسع..

في بيت بو محمد..

فاطمة : صليت ؟؟
محمد : هيه الحمد الله..
فاطمة : ترا مهرة غامضتني من امس
محمد : وش سوت لج المسكينة بعد ؟؟
فاطمة : تراها ما تحبني يا محمد صدقني ... طول امس في العرس وهي ما تباني ايلس معاها ويا العنود ...
محمد : زين
فاطمة : وش اللي زين ترا انا حرمتك خلها تحترمني شوي ..
محمد : زين..
فاطمة : وش هو اللي زين زين زين ... رمسني شرات الناس..
محمد : وشلون تشوفيني ارمسج شرات شو ؟؟
فاطمة : من يوم دار عمك ساروا عنا وانت متغير واسلوبك وياي متغير وش سالفتك ؟؟
محمد : وش تبين اسوي لج ؟؟
فاطمة : ما ادري عنك .. ما شفت عمرك امس شلون قربت تطيح فيني يوم عاتبتني على اللي استوى ويا مبارك .. ولا راعيت احساسي جدامهم كلهم ؟؟
محمد : ومهرة اللي ما تحبينها هي اللي دافعت عنج ..
فاطمة : شف يا محمد انت تعرف وانا اعرف ان مهرة الوحيدة اللي ما كانت موافقة انك تتزوجني وانا للحين ما حاسبتها على هالسالفة .. وش كانت تقصد اني ما استاهلك لاني ما لي اهل؟؟
محمد : لا طبعا ما كانت تقصد شذي فاطمة الله يهداج .. ذاك الوقت كان في مشاكل وايد انتي ما تعرفينها وهذا السبب اللي خلى مهرة ماتباج تكونين حرمتيه..
فاطمة : ولين متى ما بعرف وش هي هالظروف ؟؟
محمد : قلت لج ماله داعي ..
فاطمة : ليش ماله داعي ؟؟ انت وش فيك تعاملني شذي هب كفاية اللي اسويه معاك كل شي جاهز لك ولولدك ودوم اهتم فيكم..
محمد : فاطمة انتي اللي اشفيج ياية تهاوشين من صباح الله خير؟؟
فاطمة : قولها في ويهي يا محمد .. قول انك ما تحبني .. وانك تزوجتني غصب ..
محمد : لا يا فاطمة وربي اني احبج واحبج وايد .. ويوم قلت اباج انا اللي وافقت لاني احبج .. فاطمة انا احتاجج تكوني عدالي اكثر ..
فاطمة : انا ما مقصرة بشي وياك يا محمد ؟!
محمد : يا فاطمة افهميني
تسمع صوت خالد يناديها ..
خالد: ماااااااامااااااا
فاطمة : خالد نش .. ( وتطلع من الحجرة )
محمد ( يضرب يدينه بقوة ويحط يده على راسه ) : خالد خالد خالد ..كل شي خالد ..

الطابق الأول :

العنود ( وهي نازلة تركض على الدرج وتدخل صوب حجرة الافطار ): راااااشد قوم قوم وصلني تاخرت ..
راشد : وش فيها هذي؟؟؟
العنود ( وهي تاخذ قطعة خبز وجبن من الطاولة ) : قوووووووم تاخرت قم وصلنيييييييي ..
راشد : ما اريد بتريق سيري ويا الدريول .. ( ويتذكر ربيعة العنود)
العنود : ياللللله قوم والله تاخرت ..
راشد : زين زين يلا بنسير.
العنود ( تركض صوب الباب وفجأة ترد وتحب على راس ابوها وامها ) : نسيت اقول صباحكم خير ..
بومحمد : فديت بنيتي انا سيري الله يوفقج..
ام محمد : لا عدمناها هالعنود.. هي اللي مسوية لنا جو في البيت
محمد : يالله أنا بسير الحين ..
خالد : بابا انا بعد بثير وياك الشكرة.
محمد : انت الشركة واللي يشتغلون بالشركة تحت امرك .. بس انت اشرب الحليب مالك عسب تصير كبير وااااايد وباخذك وياي زين؟؟
خالد : حاااضر بثربه كله كله .. ويوم اثير كبير مثلك بابا بثير وياك..
محمد : اتفقنا ..

في سيارة راشد..
العنود : راااااشد بسرعة .. دوس دوس بنزين
راشد : زين زين ... العنود خبريني عن العرس وشلون كان ومن كان موجود ؟؟
العنود : كان حلو ..
راشد (يرمس عمره ): ويا ويهج وبعدين كملي ؟؟ قولي شي عن ربيعتج ..
راشد : يعني استانستي انتي وربيعاتج ..
العنود ( وهي فاتحة المراية الصغيرة اللي جدامها ): شوووو هذي؟؟
راشد : من ؟؟ احد ضايقج من ربيعاتج ؟
العنود : شو هذي الحبة اللي طلعت في ويهي ؟! أقول وقف وقف هني عند هذي البوابة..
وتنزل العنود .. وبعد نص ساعة انتظار عند الجامعة يمل راشد ويحرك سيارته..

في شركة بو محمد

محمد(يالس سرحان على مكتبه وفاتح تليفون المكتب على السبيكر ويضغط رقم ويطلع له الجهاز يقول ..
الجهاز : إن الهاتف المتحرك الذي طلبته مغلق او خارج نطاق الخدمة حاليا شكرا ..
ويرجع يعيد الرقم ويرد عليه الجهاز في كل مرة ..
وويدخل عليه راشد ..
راشد: هلا محمد ..
محمد ( يسكر التليفون ) : توالناس وينك انت ؟؟
راشد : اسكت يا محمد .. اللي فيني كافيني ..
محمد : وش اللي اسكت صار لي ساعة اترياك ..عطني المفاتيح ابا اطلع الاوراق من هذيج الخزنة ويا ويهك .. معطلنا ومعطل كل الشغل ..
راشد : اندوج هذي المفاتيح..
محمد : راشد ترا الشركة تحتاجك ..
راشد : وش تشوفني ما اشتغل ؟؟ انا كل يوم امر على الشركة .
محمد : الشركة تحتاج تيلس فيها هب تمر عليها وخلاص .. ياخي هذا حلالك لازم تشوف مالك ومصالحك
راشد : الخير والبركة فيك انت .
محمد : بس انا احتاجك ما اقدر اسوي كل شي بروحي.
راشد : خلاص ولا يهمك انت تامر ..
محمد : بنشوف..
راشد : بسير لمكتبي تبا شي؟
محمد : خذ المفاتيح اخذت الاوراق اللي اباها ..
راشد : اشوفك عقب .. سلاااام.

بيت بو محمد ..
في حجرة مهرة ..
ام محمد : قومي يابنيتي بسم الله عليج وش حصل لج ؟
مهرة : اماية ما اقدر فيني دوخة والله ما اقدر اقوم وتطيح على الارض)
ام محمد: احد يجي يساعدني ويييينكم ..
ويدخل مبارك ..
مبارك : وش السالفة ..
ام محمد : مبارك .. الحقني ياوليدي شف اختك وش فيها ..
مبارك : مهرة .. مهرة هذي ما ترد تلبسي امايه بناخذها المستشفى
ويحمل مهرة ويسيرون للمستشفى

شركة بو محمد
ويرجع محمد لمكتبه .. وبعد ساعة من الشغل والاوراق
يمسك التليفون ويدق حق البيت ..
محمد : هلا فطوم اشحالج ؟؟ شو علوم البيت ؟
فاطمة : بخير محمد بخير تحتاج شي ؟؟ قول بسرعة خالد بروحه في الحمام يالسة اسبحه .. في شي مهم ؟؟
محمد : لا سلامتج بس بغيت اطمن ... في امان الله ...
ويبند السماعة ويرجع يفتحها .. ويضرب رقم موبايل لكن هالمرة يرن الخط .. طوووط طوووط ..
حنان : ألو ؟
محمد : حنان ؟؟
حنان : محمد ؟؟ وجت تبا تبند التليفون ..
محمد : لا تبندين احتاجج والله احتاجج ..
حنان ( ما عرفت شو تسوي ؟ تحس قلبها بيطلع من بين ضلوعها وهي تسمع صوته يستنجد فيها .. تحسه فعلا محتاج لها .. والشعور الاقوى انها هي بعد محتاجة له ...))
حنان : محمد لا تخلني اندم اني دقيت لك محمد ليش دقيت على الرقم قلت لك هب رقمي..
محمد : اعرفج يا حنان اكثر من اني اعرف عمري اعرفج واعرف ان هذا رقمج وانج كنتي تبيني اتصل بج ..
حنان : (ما توقعت انه يكون عارف شوقها له توقعته يعرفها قوية ما تحركها مشاعرها )
محمد : حنان اسمعيني ..
حنان : والحين يا محمد للمرة الالف اقول لك الزمن الحين مب زمنى والوقت وقتنا يا محمد .. كل اللي بنسويه بيزيد حياتنا مشاكل نحن في غنى عنها ..
محمد : حنان ابا اشوفج .
حنان ( ترمس عمرها ) : وانا بعد !!
محمد : تكفين لا تمين ساكتة قولي اللي بخاطرج اريدج احتاج لج ولشوفتج .. لا ترديني ..
حنان : موافقة ..
محمد : صدج تقولين ؟؟
حنان : هيه موافقة .. بس بشرط
محمد : ادري بمكان عام .. ولا يهمج انا موافق طبعا
حنان : لا في سيارتك ...
محمد ( انصدم من جراءتها وش هالشرط الغريب ): حنان ما ارضاها لج شلون ترضيها لعمرج؟
حنان : شف يا محمد نحن هب صغار شرات اول وانا اعرفك عدل وانت تعرفني بس الصراحة انا ما اقدر اقابلك في مكان عام لو احد شافني وش بيقول عني ..
محمد : مثل ما تبين ..
وبعد ما اتفقوا على كل شي .. بند محمد التليفون عنها وتم يفكر..
محمد : اش فيني .. المفروض اكون مستانس ... بتواعد حبيبة قلبك الاولى .. ليش مضايق ؟؟

يتبع,,

دانا

19-05-2004, 10:12 AM

السلام عليكم ورحمة الله وبركاته

مشكورة على الجزء الحلو ......

بس اللي قاهرتني فطوم هذي اللي ما تحس :mad:

تحياتي

شعنونة سوالف

22-05-2004, 08:40 AM

منتظرين

اش رايكم اكمل انا تأليف القصه؟ :laugh:

ماض على الطريق

22-05-2004, 09:03 AM

السلام عليكم ورحمة الله وبركاته

القصة جميلة

ننتظر البقية

عاشقة

25-05-2004, 12:58 AM

مازلنا في الانتظار ..:cry: ..:cry:

رزونة

25-05-2004, 11:34 AM

اسفة تاخرت عليكم
بس ما انتبهت ان الكاتبة نزلت جزء جديد

الجزء العاشر..

في جامعة العنود …

العنود : أقول مريومة وش سالفتك اليوم هب على بعضج ؟؟
مريم : أبد ما فيني شي..
العنود : عيل سمعي انا بسير الكفيتريا تراي بموت من اليوع بسير اخذ لي شي ..
( وتسير عن مريم )
مريم ( ترمس عمرها ): يالله اخبرها ولا لا ؟؟ اقول لها ان اخوها هو الشاب اللي يطرش لي مسجات؟!

في المستشفى..

مبارك (يصارخ): انتي بتدخلينا ولا لا ؟؟
الممرضة : لازم تستنى الدور
مبارك : مينونة انتي اشفيج ما تشوفين حالتها ..
الممرضة : هذي القوانين ..
مبارك : انتي تبين تقهرني؟؟ والله اراويج .. يا تنعدلين ولا وربي ما خليج في وظيفتيج يوم واحد .. ترا نحن اللي ندفع يالله يالله دخليها..
ام محمد : وش فيك يا ولدي .. هذي هب رمسة ولد ناس ما يجوز !!
مبارك : انا وش فيني ؟؟ تراها مهرة .. تبيني اصبر لين تروح منا
مهرة ( وهي تعبانة): مبارك لا تهاوش انابخير تريا انت بس عليها .. أماية بطني بطني يعورني..
ام محمد : بسم الله عليج مهروه حبيبتي
مبارك : والله لولا انها اقرب مستشفى كان ما دشيت عندكم انا براويكم شلون تشوفون شغلكم ..

بيت بو محمد ..
محمد : شلون ما تخبريني ان اهلي في المستشفى؟
فاطمة : كنت بخبرك
محمد : متى كنتي تبين تخبريني ؟؟ هاه قولي متى ؟؟
فاطمة : محمد !! ما صار شي؟
محمد: انتي جب .. ما توقعت كرهج لمهرة يوصلج لهذي الدرجة
ويطلع من الحجرة
فاطمة: معقولة يا محمد ؟؟ وش تشوفني قلبي حجر .. انا احب مهرة بس هي اللي تكرهني .. معقولة تتحراني اكرها واتمنى لها الشر؟! والله ما بغيت اشغل لك بالك .. ( وتصيح)

في سيارة راشد..جدام جامعة العنود
العنود ( تركب السيارة ): مرحباااااا رشووود
راشد : يالله بسرعة بنسير المستشفى . كل اهلج هناك .
العنود : مستشفى وش السالفة ؟
راشد ( وهو يسوق بسرعة ): مهرة بتسوي عملية .
العنود ( تشهق) : عملية ؟؟ عملية شو ؟ وش السالفة ؟ خبرني ؟ وش فيها مهرة ؟
راشد : بتسوي الزايدة ويقولون ان زايدتها ملتهبة وانها لازم تسوي العملية بسرعة قبل لا تنفجر ..
العنود : ياويل حالي عليج يا مهروووه ! عملية توني تركتها الصبح كانت ماعليها شر.. مهرة بخير يا راشد قول انها بخير تكفى
راشد : انشالله تكون بخير ... العنود وش فيج الله يهداج ماعليها الا كل خير لا تصيحين.. انتي بس ادعي لها

في دبي..

بوسالم : أم سالم سلامة ..
ام سالم : خير اشفيك ؟
بو سالم : مهرة بتسوي عملية ..
ام سالم : بسم الله عليها وش حصل..
سلامة : مهررررة ؟؟
بو سالم : وينه اخوج .. خله يوديكم عندهم
ام سالم : لا سلامة ما بتسير .. عندها امتحان .. دقي لاخوج خليه ياخذني انا لصوب دار عمج بسرعة ..
سلامة : ليش بس اماية ابا اسير انا بعد صوب دار عمي..
ام سالم : قلت لا يعني لا .. يلا سيري دقي لاخوج..

على التليفون ..
سلامة : انت قصر على صوت المسجلة اللي عندك وبتسمعني عدل
سالم : هاه نعم وش تبين ؟
سلامة : عق ربعك في اقرب مكان وتعال شل امك ودها بوظبي صوب دار عمك .. بنت عمك بتسوي عملية .
سالم : العنود؟؟ وش فيها ؟؟
سلامة : مهرة مهرة اللي بتسوي العملية .. يلا بسرعة لا تبطي ..

في المستشفى .. مهرة في غرفة العمليات :
بو محمد : العنود يابنيتي وش فيج .. بسج صياح تراج تلعوزين امج هالشكل..
العنود تسكت شوي بس تتذكر ان اختها داخل الحجرة ما تدري عنها شي وتزيد صياحها اكثر من قبل..
ام محمد يالسة تقرا قرآن وتدعي لبنتها..مبارك ( يسير صوب امه ويحب راسها) : لا تخافين ولا تحاتين يالغالية ... ما عليها الا العافية ..
راشد : وش فيج ؟؟ العنود استهدي بالله تراج يالسة توترين الجو ..
العنود ( وهي تشهق ) : والله هب بيدي ما سمعت الدكتور يوم قال ا نها يت متاخرة .. وانها لازم تسوي العمليية بسرعة والا .. والا... ( وتصيح) ترا مالي غيرها تراها اختي الوحيدة..
فاطمة ( تحضنها ) : بس يابعد عمري تراج شذي تفاولين عليها وهي تراها باذن ربج ما بيكون عليها الا العافية ..
خالد : ماما .. خاتو بتموت ؟
فاطمة : لا وش تقول انت ؟
محمد : انتي لا تصارخين عليه تراه ما يفهم .. حتى ولدج قمتي ما تعرفين تعاملينه؟!
حست فاطمة ان كلام ريلها وياها متغير وااايد والحين عرفت انه في انتظارها مشكلة كبيرة .. بعدها ماعرفت وش سبببها ..وجه محمد وشل خالد عنها .. وقتها فاطمة حست انها صغيرة وتافهة والسبة من ريلها اللي ما احترمها جدام اهله..
وتدخل عليهم ام سالم وسالم ..
ام سالم : خير طمنوونا وش حالها الغالية ..
ام محمد : والله ما ندري ما ندري عنها ادعي لها يا ام سالم ..
سالم يطالع العنود وهي تصيح بحرقة ..
سالم ( يرمس عمره ) : معقولة ياسالم معقولة تقسى على هالطفلة .. وش حلاتها تصيح مثل اليهال ..
فعلا العنود كانت مثل الصغارية .. تصيح وهي هب منتبهة لعمرها
ولا حاسة بنفسها وهي شلون تمسح دموعها اللي تنزل بسرعة ورا بعضها بكل عفووية..
سالم باللحظة هذي حس انه وده ياخذ العنود بحضنه ويعتذر لها على كل شي سواه في حقها ... حسها ضعيفة وااايد اكثر مما كان يتخيل ..

بعد أسبوع..

مهرة سوت العملية .. بس لان عمليتها كانت متاخرة كان لازم تتم فترة اطول في المستشفى عسب يتاكدون من ان جرحها وكل شي بيكون تمام ..

في الرسبشن مال المستشفى ..
العنود : مشكورة وايد على الزيارة مريومة ..
مريم : سكتي الحين بتحراج وحدة توني متعرفة عليها .. هب نحن ربع وش الكلام اللي تقولينه اونة مشكورة على الزيارة وكلام فاضي..
العنود : يعني لازم اشكرج وبعدين هب لانج ربيعتي يعني ما احترمج!
مريم : وينه هالدريول الله يغربله هب جنه تاخر وايد ؟
العنود : وانتي ليش زعلانة هذا نحن نسولف ... ومهرة مرت عمي يالسة صوبها ..
مريم : كان ودي اسلم على امج .. بس فرصة ثانية ..
العنود : الحمد الله اللي طاعت تسير البيت من اول يوم مهرة سوت فيه العملية وهي هب طايعة تفارقها ..
ويدخل سالم من باب المستشفى ..
ويوم شاف العنود استانس وراح صوبها.. ويوم اقترب انتبه ان ربيعتها كانت وياها بس ما قدر يتراجع لانه كان واضح انه بيسير لهم..

العنود : مريم سالم ياي صوبنا..
سالم : السلام عليكم ..
العنود : .......
سالم : ترا السلام لله .. اشحالها مهرة ؟
العنود : زينة.
سالم ( حس باحراج وانه ما كان من المفروض يعبرها ): ترا انا ياي اخذ الوالدة عسب نرد لدبي .. عن اذنكم بسير ازقرها ..
وفي هالحظة مريم قالت للعنود ..
مريم : انتي خبلة ؟؟ شلون تردين عليه شذي ؟
العنود : وش تبين اسوي له بعد ؟؟ ارقص له
مريم : وتتحرين بحبج وانتي ترمسينه هالشكل .. اللي يسمع رمستج يقول ما تدانيه ..
العنود : وانا فعلا ما ادانيه ولا ابا اسمع سيرته ..
مريم : وش اللي تقولينه ؟؟ اعرفج تموتين عليه ..
العنود : عفته ..(وتتذكر شلون مسك يدها وشلون عاملها بقسوة وتقول في خاطرها )
العنود : اعذريني يا مريم ترا هذي اول مرة اخبي شي عنج..
مريم ( وهي تبتعد عن العنود ) : العنود انا بسير الدريول وصل .. دقي لي بعدين ..
وجان تلف وهي ياية تعدل غشوتها جان تخبط في راشد اللي كان توه داخل من الباب .. هي طاح ويهها وما عرفت ان هذا هو راشد اخو ربيعتها .. اما هو فعرفها عرف الويه اللي بعمره ما شاف ويه مثله .. عرفها وعرف انها هي البنية اللي من يوم شافها وهو ينتظر اللحظة اللي يقدر يشوفها فيها مرة ثانية !!
راشد : اعذريني يا شيخة ..
مريم ( تطالعه وتموت من الخجل وتنزل راسها وتركض برع المستشفى)
العنود : وش سويت في ربيعتي ..
راشد : ......
العنود : أعمى ما تشوف ؟! طالع وش حليلها مريوم ويهها استوى طماط..
راشد ( يقول لعمره ): مريم يعلني فدوة هالاسم ولعيون راعية الاسم ..

في الماسنجر ..
فهد says : تكفين تقولين لي باي مستشفى والله ما عاد فيني صبر!!
اليازية says : انت وش لك اقول لك باي مستشفى ؟؟ قلت لك البنية بالف خير وعافية ما فيها شي .. ليش بتموت شذي
فهد says : تكفين لا تزودينها خبريني باي مستشفى ؟؟
اليازية says : لا تحلم اخبرك .. اخاف تطب لها هناك ..
فهد says : لا لا تخافين بس ابى اطمن عليها ..
اليازية says :وانا وش بستفيد ..
فهد says : اللي بغتيه بيكون لج ..
اليازية says : تحط لي رصيد ..
فهد says : زين اللي تبيه قلت لج يالله بعطيني اسم المستشفى ولا لا ؟؟
اليازية says : بعطيك ..

حجرة مهرة في المستشفى ..
ام سالم : يالله الحين يا بنيتي يا مهرة دام انج استويتي بخير انا صار لازم ارد لدبي..
ويدخل مبارك ..
مبارك : وش هذا اتت الشياطين ذهبت الملائكة ؟؟
ام سالم : بسم الله عليك .. ما عاش اللي يقول عنك شذي ..ربي يحفظك لاهلك ويرزقك بالحرمة الصالحة اللي تستاهل ريال شراتك .. والله يا ولدي يا مبارك التعب اللي تعبته ويا اهلك هاليومين .. ما شي ريال يقدر يسويه ..
مهرة : صدقج يا عمتي ترا والله طول عمري اقول ان مبارك ما يرضى على اهله الا الخير .. وكل ما كنت اشوف خوفه علي ونظرته لي احس الالم اللي فيني كله يختفي واستانس لاني عندي اخ شراته يحاتي علي وعلى مصلحتي ..
مبارك : الا هي مهرة وحدة اللي عندنا ما تبين اهتم واحاتي عليها ؟!
العنود ( جان تقول بكل دلع ): ياااا سلام .. وانا هب اختج ؟
في هاللحظة سالم اللي كان منزل راسه ويطالع الارض رفع نظره وطالع العنود بطرف عينه .. ووقعت عينه بعينها ..
العنود ( ترمس عمرها ): ويا ويهي وش اللي قلته خلاه يطالعني هالشكل .. شل عينك عني احسك نظراتك بتحرقني .. بتفضحني .. وبتقرا كل شي فيني ..
وبعد ساعة كان وقت نوم مهرة حسب تعليمات الدكتورة ..
عسب شذي الكل كان لازم يسير عنها ولكن العنود اصرت انها تتم معاها ..بس مهرة قالت لها ..
مهرة : حبيبتي انتي سيري تراج وراج يامعة وانا الحين استويت بعافية وان شالله لو اتحجت شي بدق للنيرس وهي بتيبه لي وترا كلها يوم وانا بي عندكم للبيت فالسالفة ما تستاهل تتمين هني.. اذا ما بغيتي تزعليني سيري وياهم للبيت ..
العنود : زين ان شالله .. مثل ما تبين ..
وودعوها كلهم وساروا عنها ولان مهرة كانت تدري ان موعد الزيارة انتهى وانه الاحسن لها انها ترقد لانها فعلا كانت تعبانة والاحسن لها تسمع كلام دكتورتها ..حطت راسها وبخمس دقايق كانت راقدة ..
بس اللي ما كانت تعرفه مهرة ان فهد ما يهمه مواعيد الزيارة وانه يقدر يدخل في اي وقت يشوفه مناسب ..وفعلا دخل فهد على حجرتها ومهرة كانت راقدة شرات الملائكة على سريرها .. وما حست فيه وحط لها بوكيه ورد .. وجان يبا يطلع من الحجرة طالعها مرة ثانية بويهها وشعرها وانوثتها ومسك ورقة وقلم وكتب لها

أبيج تكونين بروحج وانتي تقرين هالرساله.....
وأهم شي أبيج توقفين مع نفسج وقفة صراحه

سلامي على اللي نظرته للنظر خطاف
فرق بالحسن بد العرب زين الاوصافي
علامك توارى من عيوني ولا تنشاف
وتقطع نظرها من هدب عينك الزافي
انا ما هقيت ان المحبة معك تنعاف
لو ابتليت بصدك الشين ياكافي
اذا جيت ابا اقول ان الهوى من حياتي طاف
تذكرتك وضيعت حسن التصرافي
يقولون درب الحب يخلي الشجاع يخاف
ويزري بحاله عقب ماكان متعافي
وانا اقول وين اهل النصايح قبل الاتلاف
ومن قبل لا يحوس الهوى وقتي الصافي
ومدام شوفك حصل ما علي اخلاف
بداوي جروحي يا سبب جرحي الخافي.
فهد..

وجا فهد يحط الورقة بين الورد بس تذكر انه ممكن احد من اهلها يدخل عندها ويشوفها جان يطويها ويخليها صغيرة وبكل هدوء يحطها بيدها .. ويطلع من الغرفة ... ويوم سكر الباب مهرة حست بحركة وفتحت عنيها بس التعب خلالها تبندهم مرة ثانية بس الفرق انها ضغطت على الورقة اللي بين يدينها بدون ما تحس ..

بيت رانيا ..
رانيا : يالللله على الملل .. خديجة اشتقت لك !!
يرن تليفونها
رانيا (تشل تليفونها بسرعة ): ألو ..لا لا أختي الرقم غلط ..
رانيا : يالله ليش انتظر تليفونه ؟؟ انا بحاجة للوظيفة لاني فعلا ملانة الايام هاي .. ليش رفضت الوظيفة اللي بابا جابها الي ؟؟ ليش عم بستنى رد مبارك وانا عارفة انه مش حيعبرني ؟! لا لا اذا كان في ليش فالسؤال لازم يكون ليش يا مبارك ما بدك تتصل ؟! مش مهم لو اتصلت وحكيت لي ما في وظيفة بس اتصل ..!!!

بيت بومحمد :
فاطمة ( سايرة صوب سريرها )
محمد : وبعد ما تبين تسالين عن حال اختي ؟
فاطمة : ......
محمد : والله برايج .. تمي شذي لين تملين بس لا تحلمين في يوم افضل حرمتي على أهلي..
فاطمة (وهي معطته ظهرها ودمعتها تنزل تقول لعمرها ): وش اللي علمك القسوة يا محمد ؟؟ ليش تقسى علي ؟
محمد : ما تبين تردين برايج .
فاطمة : ابا ارقد ..
محمد : طالع شلون ترمس؟!
فاطمة : وشلون تباني ارمس بعد .. طالع رمستك انت في الاول ..
محمد : ردينا لرمستي .. وش فيها رمستي ؟
فاطمة : داخل ياي تبا تهاوش .. بس الغلطة هب غلطتك تراها غلطة اللي مالها اهل يسألون عليها اللي تسكت لك على كل شي تسويه فيها ..
محمد : حشرتينا مالي اهل مالي اهل ما احد غيرج ماتت امه؟؟ وبعدين وش تبين اسوي لج دام ابوج تخلى عنج ؟..
وقتها سكت محمد وعرف انه هالمرة زودها وايد بكلامه عرف انه ما يجوز يعايرها بشي هي مالها ذنب فيه .. واما هي وقفت مصدومة ما عرفت وش تقول ؟ لغاية ما رن تليفونه وشل محمد عمره من الحجرة ..
محمد : هلا والله بحنان وش هالمفاجأة الحلوة يا بعد عمري ؟
حنان : بعد عمرك ؟ أنا تتركني اترياك لمدة ساعة ؟؟ ولا حتى تفكر تدق تعتذر لي ؟؟ مر يوم واثنين وثلاث ولا دقيت ولا اعتذرت ؟
محمد : أوووووف نسييت موعدنا..
حنان : نسيت ؟! زين خلك ناسي .. باي..
محمد : لا يا قلبي تري بس افهمج ..
حنان : وش تبا تفهمني ؟ انك نسيتني خلاص؟ ما عدت حنان الاولية اللي تحبها ؟
محمد : لا يا بعد عمري وروحي ترا والله اني ما نسيتج .. بس في هذاك اليوم اختي ودوها المستشفى وسوا لها عملية ..ووقتها ما كنت عارف حتى اشوف اللي جدامي
محمد كان مضايق اكيد حنان مثل باقي الحريم مثل حرمته ما بتسكت له وبتم تعاتبه وهو هب قادر يفهمها .. محمد يحس انه تعب من هالكلام كله ومن المجاملات يبا انسانة تفهمه لكن حنان كان ردها مفاجأة له يوم قالت له :
حنان : يا بعد روحي ليتني كنت انا اللي مكانها ولا انه ينشغل بالك على اهلك .. جعلني ربي فدوة لك ولعيلتك يا عمري..سامحني دخيلك هالمرة اني عاتبتك والله ما دريت انه عندك مشاكل ..
محمد ما عرف وش يقول لها .. حس انها تفهمه وانها قريبة منه حس انها الانسانة اللي يحتاج لها اللي تطول بالها وما تزعل من اي شي .. هي حنان وحدها اللي تفهمه وتقدره ..
محمد : من سماج حنان ؟
حنان : أمي ؟! ليش؟
محمد : أشكر فنها تراج انتي الحنان كله..
محمد وحنان : ههههههههه

يتبع,,,

عاشقة

26-05-2004, 01:03 AM

:glasses:

ماض على الطريق

26-05-2004, 02:42 AM

السلام عليكم ورحمة الله وبركاته

ننتظر البقية ..

شعنونة سوالف

26-05-2004, 11:18 AM

طيب اعطينا رابط المنتدى :(

دانا

28-05-2004, 03:50 PM

السلام عليكم ورحمة الله وبركاته

ننتظر الباقي ......

:(

RED Chevy

29-05-2004, 06:24 PM

رد مقتبس من دانا
السلام عليكم ورحمة الله وبركاته

ننتظر الباقي ......

:(

رزونة

29-05-2004, 08:50 PM

والله اني مني ناسية انقل لكم الاجزاء
بس كمان لغاية الان الكاتبة لم تنزل شي جديد..
وصدقوني اني ما حتاخر عليكم ابدا..

شعنونة سوالف

31-05-2004, 12:59 AM

طيب اعطينا الرابط
و اكملي وضع الاجزاء هنا
بس ممكن بالمنتدى اجد قصص اخرى :)

رجاااااااااء تثبيت الموضوع علشان لا نبحث عنه :)

رزونة

01-06-2004, 11:29 PM

شعنونة سوالف
على فكرة انتي احرجتيني لاني لو حطيت الرابط ما حدا حيرد علي هون
بس يالله مش مشكلة انا ححط لكم الرابد وانتوا تابعوا القصة لحالكم وكونوا على اتصال مع الكاتبة نفسها وحتوقف انا عن تنزيل الاجزاء هنا لانه حيصير بدون داعي .. على اي حال هو اريح لي ولكم الصراحة ..
وهذا الرابط

http://www.alamuae.com/vb/showthread.php?t=71877

شعنونة سوالف

02-06-2004, 09:03 AM

انا مافكرت فيها بهذه الطريقه :think:
بس بدي اشوف اذا في قصص ثانيه اقدر اقرئها
على كل حال نزلي الاجزاء هون و ببقى ارد عليك :)

رزونة

02-06-2004, 05:06 PM

لا حبيبتي ما عندي مشكلة انا ما زعلت ..
تقدري تشاركي مع الكاتبة الحقيقة انا حكيت لك انه كمان اريح لالي من اني انقل الاجزاء..
باي حبوبة

شعنونة سوالف

02-06-2004, 05:15 PM

لااااااا

بدك تنقليهم :)
لما انت تنقليهم بيكون لهم طعم تاني :)
و بعدين بدي اتعبك :laugh: