هذا ماخصل لي يوم طلعت للبر لا تفوتكم قصتي.. والله تحزن

[ملك المنجا]

هذه قصتي يوم طلعنا للبررررررررررررررر ويا ويل الي يبي يضحك..:D


انا اقولكم وش صار ... :mad:



تولمت أنا والزقرت لنقتحم البر ونكشت ... ( مصطحبين معنا.. أخوي عزوز الصغير)



حملنا الونيت بما لذ وطاب من المعدات البرية من خيمة + عدة طبخ + جراكل موية تكفي لـ100 سنة


+ حطب سمر وارطا


+ ثلاجة مليئة باللحم الملطوش من بيوتنا!!( بعض اللحم مادرت عنه أمي)


+ ماطور كهرب { أجل ماطور تلفون }


+ وخلافه... يعني اي شيء يخطر ببالك تلقاه معنا حتي المصاقيل؟؟!!
مابقى الا نجيب كورة بيسبول .. وكرتون(((منجا))):p



المهم انطلقنا من مكان تجمعنا الى البراري في حوالي الخامسة عصرا

وكانت هذي المشاهد لنا وحنا في السيارة :



ــ السواق مبتلش بشريط نشب بالمسجل ..

أضغط هنا تعرف وش كنا نبي نشغل!!! (http://www.yousefa.f2s.com/mjoody1.swf)

وساعة وهو يخنجر بالمسجل :D يبي يطلعه ولا قدر..0 يخنجر..بمعني( يحاول إخراجه)

ــ واحد جاي معنا غصب ...حاط يده على خده ويهش الذبان من ضيقة الصدر. :mad: أسمه الدحمي!!!!!

ـــ واحد يسولف معي وهو يقشم فصفص


والسواليف عن أحداث الحادي عشر من سبتمبر ويتخيل لو انه كان هناك بوقت الاتهيار ..


.وفجأة حول دفة الحوار وسألني وقال : أنت جددت رخصتك ؟؟

قلت : لا ليه ؟

قال : ورني اياها ..

طلعت له المحفظة ..ووريته الرخصة .
قال : انت فصيلة دمك -B؟
قلت وش دخل فصيلة دمي من تجديد الرخصة ؟؟
هات الرخصة اقول ..

فجأة
تحرك المغصوب على الكشتة


والتفت على السواق وقاله : وقف عند المحطة ؟
قال : السواق : ليه ؟


المغصوب : ابي اشتري جريدة


السواق على طول وقف علشان المغصوب لاتتعب نفسيته .
نزل المغصوب للبقالة .


طول علينا المغصوب بالبقالة
نزلت انا استعجله ..


ركبنا السيارة ..


كملنا طريقنا للبر ...

مشينا حوالي سبعين كيلو من البقالة الى مكان الكشتة ..

وصلنا مسيان الضعيف ..


نزلنا من السيارة كلنا الا المغصوب ( مسوي فيها زعلان):D


رحنا لصندوق الونيت علشان ننزل الاغراض ..

نزلنا الخيمة..وسألت الشباب( جبتوا الكتالوج) :D

( يو خكاريه)..لا بس تعرف نبي نركبها وحنا مرتاحين.. مانبي نتعب..:p



المهم قمنا نفكر.. ساعة لين عرفنا نركبها...!!!


وطقيناها ...
والماطور شغلناه و شبكنا اللمبات .. ( وطعلت الخيمة عررررس دواسر):D
وضبطنا مكان الطبخ داخل الخيمة ..

طبعا دخل صلاة المغرب بس صليناها جمع تاخير مع العشاء

و انا اصلي لمست مخباتي
ادور محفظتي مالقيتها . .

تخوبلت بصلاتي ونسيت وش قريت وبديت افكر بهالمحفظة :confused:


يوم خلصت الصلاة سألت الشباب عن المحفظة؟؟
قالوا ماشفناها ..



دورنا بمكاننا ودورت بالسيارة مالقيتها ..
قلت وين راحت وجع ؟؟
المشكلة فيها اوراق مهمة والا الدراهم مافيها الا طفسه .

تذكرت يوم خويي يقولي ورني الرخصة الظاهر اني حطيتها بحجري
وطاحت مني يوم نزلت للمحطة ..


قلت للشباب لازم ارجع للمحطة ..
قالوا : يووووووووووو تروح سبعين كيلو
قلت : الشكوى لله اروح .. مابقى الا المحطة ادور فيها
المهم رحت وقعدوا الشباب يزهبون العشاء .
وطول الطريق ادعي الله اني القاها .

وصلت للمحطة وقعدت ادور بالمكان اللي وقفنا فيه ..مالقيت شي .

رحت لراعي المحطة وسألته : عن محفظة ضايعة ؟؟

قال : ايوووووه انت ملك المنجا؟؟؟!!!!

قلت وجع: وانت عضو في سوالف:D

قلت بسم الله على وش عرفه فيني؟؟!!!

قلت : اييييييييييييه( وانا مرتعش) انا هو انا ملك المنجا..من الفرحة تخربطت .


قال : فيه واحد لقاها ويقول انه يعرفك وراح يوصلها لك ..


قلت : من هو؟؟ ووين راح ؟؟ وش سيارته ؟؟ وشلون شكله ؟؟ وليه تخليه ياخذها ؟؟


قال : ياخي انا مالي شغل هو لقاها ..


وبعدين لو يبغى يسرقها كان ماجاء وقالي عن موضوعها .

قلت : والحل الحين وين القاه ذا ؟؟

قال : هو يقول انه يعرف مكانكم اللي تكشتوا فيه وانه راح يوصلها لك .
قلت : أكيد هالكلام .


قال : هذا اللي سمعته .

المهم اقفلت معي... :mad: ورحت للشلة..

اول ماوصلت سألت الشباب : ماجت المحفظة ؟؟

قعدوا يضحكون علي .. :D


قالوا وشلون تجي .. هي حمامة .. :D

فهمتهم القصة .


قالوا: يارجال ان شاء الله تجي مع الرجل المزعوم ..


تعشينا وانا مالي نفس بالأكل ... :(


كل شوي اناظر حولي ادور سيارة جاية

وجاء وقت النوم ..


ونامو الشباب الا انا اتقلب


ماغفا جفني ولا للنوم طاب


وكل ماسمعت صوت سيارة من بعيد نطيت من فراشي وطلعت من الخيمة
اشوف هالسيارة ..اغديه راعي المحفظة .


حتى تعبت ومليت الانتظار ونمت ..

وعلى هالحال 3 ايام ماتهنيت بالكشتة ولا جاء الرجل المزعوم اللي معه محفظتي ..

جاء وقت الرجعه .

فكينا الخيمة ..
تذكرون خوينا المغصوب
صارهو أنشط واحد فينا فك الخيمة لحاله وشال الماطور ومتحمس .. تدرون ليه ؟؟
لانه جاء وقت الرجعه .. :D

وانا صرت المغصوب على الرجعه ماودي يرجعون
لازال عندي أمل ترجع لي محفظتي ..

وحنا بطريق الرجعة قفلت معي وجاني احباط وبديت اكلم نفسي وأقول :
هالكشتة حوسة في حوسة
صدق انها كشتة زيود


كشتة زيوود


كشتة زيووووووووووووووووووووووووووود. :D


انتهت قصتي الخيالية .. :p


تبون القصة الحقيقية ...

أنا صار لي نفس هالموقف بالضبط بس يوم رجعت للمحطة وانا قاطع 70كيلو
لقيت المحفظة بمكانها لم تتحرك .. مع ان المحطة مليانه بالزباين ..
بس محفظتي حفظها الله سبحانه وتعالى من أعين الناس ..



وانصحكم ياأخوان بقراءة وردكم اليومي فهو حصن المسلم من كل شر .


ــ آية الكرسي
ــ آخر آيتين من البقرة .
ـــ { اعوذبكلمات الله التامات من شر ماخلق } 3 مرات
ـــ { بسم الله الذي لايضر مع اسمه شيء في الارض ولا في السماء وهو السميع العليم }3 مرات
وماتيسر لك من الأدعية ...

والله خيرا ً حافظ وهو أرحم الراحمين



وشكرا لكم.:p أضغط هنا تعرف وش كنا نبي نشغل!!! (http://www.yousefa.f2s.com/mjoody1.swf)