مين صح انا والا ........................ابوي

[صغيرونه]

سلام للجميع

اخواني و خواتي انا تناقشت البارح مع ابوي ( الله يطول بعمره ) وقال لي ........

يا صغيرونه بلاش قعده على النت ايام الدراسه لما تجي نهاية الأسبوع اقعدي ( كم ساعه ).

بس اللي ما يعرفه ابوي انه عندي ادمان على النت يعني ما اقدر اكون بعيده عنه يوم على بعضه

ولكني عارفه مصلحتي زين يعني انا ثانويه عامه ولازم اشد حيلي عشان اجيب نسبه بس مايمنع اني اقعد ساعه كل يوم على النت .......صح والا لأ

وغير كذا انا مشتركه في منتدى ثاني غير سوالف واحبكم كلكم مووووووووووووت ومالي غنى عنكم

هذا الإسبوع الثاني من الدراسه والحمدالله منظمه نفسي
وابوي يحاول يقنعني اني ابطل قعده على النت .......اخر شي قلت له اشاور ربعي واشوف ايش يقولون

هاه وش قلتوا؟؟
بليييييييييييييييييييز عطوني رايكم مين صح انا والا ابوي؟؟

[بنت الأحزان]

هلا باختي صغيرونه..

شوفي.. هالمسألة هامة كثير وخصوصا لكم أقصد الثانوية العامة
وبقية الطلبة بشكل عام..
ما أقدر أقول لك ابتعدي عن الانترنت طول الأسبوع
لأنك تقولي انك مدمنه؟!! وهذا شيء مب في مصلحتك
وخصوصا وانك في بداية السنه.. يعني لازم تركزي من البداية
ولا شرايك؟؟؟

وبالنسبة لكلام الوالد..
أظنه من خوفه عليك قال هالكلام..
فلو تتفقي معاه انك تدخلي للنت كل يومين أومرتين في ايام الدراسة
وفي إجازة الأسبوع بعد ما تخلصي الدروس والتحضيرات
بــــــــــس بشرط.. انك تهتمي أكثر بالدروس
وتحاولي تخلصي كل أشغالك أول بأول..
وتوعديه وتوعدي نفسك قبل كل شيء..
إذا قصرتي في يوم .. انك تعاقبي نفسك بأنك ما تدخلي للنت لأسبووووووووع كاااامل!!!
صعبة هااه :)
أدري.. لكنه راح يكون حافز لك بأنك تخلصي دروسك أول بأول
وانك تحاولي ترفعي من قدراتك في التركيز والعطاء تحت ضغوطات الحياة..
يعني تعودي نفسك من الحين للصعاب :)
وحاولي معاه من جديد.. لكن مثل ما قلت..
مش كل يوم تدخلي للنت..

وشوفي البقية شو راح يقولوا لك :)
تحياتي

[MUSLIMAH]

أعاني من نفس المشكلة .. :( :( :(

[سردال]

السالفة مب منو اللي كلامه صح واللي كلامه خطأ، هذا الوالد وقال كلامه ورايه، وأنت قلتي رأيك وعليك ان توازني بين الرأين.

شخصياً أرى أن ساعة واحدة كل يوم كافية لقراءة المواضيع والرد عليها، وعليك إن أردت الكتابة موضوع في أحد المنتديات ان تقومي بتجهيزه قبل الاتصال بالإنترنت لكي توفري بعض الوقت. فكرة حلوه :p

وخلي مشاركتك في يوم الأربعاء والخميس عشان تقدرين تقرين الردود وأنتي في إجازة :)

أما إدمان الإنترنت فهذا أراه خطر على كل مدمن، خصوصاً أنا! :)

[الصديق العربي]

أختي الصغريونة أعتقد إنه كلام الوالد صح و لازم نهتم بمستقبلنا خاصة
إنها الثانوية العامة
فمعقولة جدا إنك تفتحي النت يوم أو يومين في الإسبوع تردي فيه و تقرأي فيه كل المواضيع إلي تريديها
هذا رأي بس و الباقي عليكي

[يزيد]

والله انا اعتقد ان الكلام اللي قالته الاخت/ بنت الاحزان ، كلام واقعي وهذا هو الراي السليم واتمنى لك التوفيق بدراستك انشاالله

[تفاحة]

اختي صغيرونه // كلام الوالد عدل //
واحمدي الله على العافية
وترى النت ماهو كل حياتنا // الحياة اللي نعيشها
تتطلب منا اهتمام اكثر // علشان كذا
لابد إنك تخصصين وقت لدخول الانترنت
يعني في الاسبوع مره واحده كفاية // وكم ساعه بعد
وباقي اليوم خصصيه لمراجعة الدروس //
هذا رأي // وسلامتك //

[سنفور غبي]

الصراحة.. أنا ما بقول إني عندي نفس المشكله.. لأني أقدر أسوي اللي أنا أباه.. مثلا لو عندي شي أسويه حق المدرسه.. ما أشغل النت.. لأنه ما بيفيدني..:)

شو نسوي.. يوم الواحد يقص على عمره.. يسوي العجايب ولا شرايكم؟

[الاماراتي]

بصراحة انا ما ابي اقولج شي لاني عندي نفس المشكلة
بس انا مخلص من الثانوية وهذا هو الفرق فانا ما عندي شي اقوله
بس اكيد مادام انه ابوج قاله فكلامه على العين والراس وبعد هو عطاج حل فشوفي ودبري عمرج

[marwah]

اذا لقيتي الحل علميني ايش هوه :)

[صغيرونه]

سلام:)

اول شي .........انا مشتاقه لكم كثيييييييييييييييير:)

ثاني شي ........اشكر كل من رد وتكرم بنصحي:)

والحين برد على كل واحد..

حبيبتي ( بنت الأحزان ) شكرا لك وبيني وبينك العقاب مره صعب ...اسبوع يووووووووووووه كثير ;) الحين يومين وبالموت صبرت عاد كيف اسبوع:)
وانا اوعد نفسي واوعد ابوي وكل شخص يحبني اني اهتم بدروسي .

( مسلمه ) طيب وش بتسوين ؟؟ :)

( سردال ) حتى انت مدمن ؟! بس مو كثري:(
ايه حتى انا اقول ساعه كفايه وما تضرني ان شاءالله..وفكرتك حلوه

( الصديق العربي ) يوم!يومين ! والله قليل:(

( تفاحه ) يووووووووووووووووووووووووووم:(:(:(:(

عزيزتي ( سنفور غبي ) بس هذي ثانويه عامه يعني كل يوم عندنا شي نسويه:(

(الإماراتي) مخلص ثانويه عامه...يابختك;)عقبالي وصح كلام ابوي على العين والراس :(

( مروه ) يالله هذي الحلول قدامك تنقي :)

الشكر الجزييييييييييييييل لكل من تكرم ونصحني وانا ان شاء الله ماراح ادخل النت الا مرتين ايام الدراسه واحاول اني ابد مااطول
مع اني والله اشتقت لكم..........ماادري يمكن لأني احبكم حيل:)

[ريماز]

ياصغيروووونه انا اصغر منك هههههه
انا في ثاني ثانوي بس انا ما اقعد عند النت كثير يعني بالكثير ساعه
علشان مايأثر على مستواي الدراسي وهذي النصيحه اعضاء سوالف هم اللي عطونيها وانا الان اعمل بها اني ما اطول عند النت بس ساعه وفي نفس الوقت مايأثر على دراستي وانتي بعد لازم تسوين زيي علشان ما يأثر على دراستك

[LEENA]

كلام ابوك مثل كلام ابوي بالحرف الواحد

كل يوم محاضره بعنوان.."توك ماطلعتي من البيضه وش عرفك بالانتر نت"

بس انا اقولك اسمعي كلام ابوك

لاني بجد ندمت

[heartking]

اسمعي كلام بابا