السلام عليكم ورحمة الله وبركاته
يا شباب اذا افترضنا انو فيه سيارة نزلت بقير اوتو 4 نمر
السنة اللي بعدها نزلت بنفس المكينة بس القير صار 5 نمر
ايش الاشياء الايجابية؟؟
وهل هناك سلبيات
هل سيزيد تسارع السيارة أم لا؟؟
بالنسبة للسيارة اذا كانت جيب,, هل بيأثر هذا على قوتها بالبر والتطعيس؟؟
هل ستقل صرفيه البنزين؟؟
اللي اعرفه ان المكينة بترتاح في السرعات العالية لأن الـRPM بيكون اقل وهذا اقل صرفيه في الخطوط
الباقي لكم

الناس وصلت 7 و 8 تعاشيق

وش دخل التطعيس بالتعشيقة الخامسة

غالباً اذا زادوا نمرة بالقير تكون نسب التعشيق القديمة نفسها بس يضيفون نمرة زيادة عشان راحة السيارة .. الا لو كانت السيارة اصلاً خمس نسب وزادوها ستة فأتوقع بيقللون نسب تعيش القير كاملة ويصير القير يعشق اكثر بالنمر الثقيلة :smart:

ML 500 وصل 7 تغييرات ... :knight:

تصير السياره اقوى واوفر بنزين
لكن ملاحظ ان القير الاقل نمر يكون اعلى جودة وارخص سعر وتوضيب
مثل قير الكابرس القديم ابو 3 نمر ارخص واعلى جوده من قير ال700 ابو 4 نمر
وفي سيارات الدراق الملغمه كثير يحطون قير نمرتين :think:

كلامك صحيح نسبيا
بيكون ارخص في التصنيع و التوضيب


لكن مشكله قير ال700 ان مو اي واحد يوضبه و يزبط
يعني حق الوكاله ممكن يطول وياك 20 سنه لكن من توضبه عند ترايستار و شلتهم يخترب بعد ما ينتهي الضمان بيوم

و بالنسبه لعالم التعديل
اي قطعه يحطوا فيها ابحاث و فلوس ممكن يوصلوها للمستوى اللي يبغوه << و هذا الشي اللي يسووه اليابانيين و غيرهم فتلاقيهم جايبين فوق ال1000 حصان من محرك 4 سرندل قرمبع لو تشوفه و هو ستوك تقول احسن مكان له ميزان الحديد في القاصمه

بينما غيرهم يدور على القطع اللي تخدمه و تحقق غرضه بأقل قيمه و هذا الشي الي شافته الناس من قيور البورقلايد ابو نمرتين
و طبعا ما ننسى ان شركات التعديل لها يد في هالموضوع
لذلك تلاقي هالقير على كل السيارات من الشفر و الفورد و التيوتا و غيرهم

و بالتأكيد قير ابو نمرتين في الربع ميل افضل
يعني تعشق مره وحده بس و انت تمشي يوفر عليك اجزاء من الثانيه مقارنه بقير ابو 4 نمر اللي كل ثانيتين بتعشق

يا شباب
فيه احد جرب VX-R موديل 2003 و 2005؟؟
لأن الاول 4 نمر والثاني 5 نمر
ايش الاقوى قومة وخط وطعوس؟؟؟؟؟؟؟؟؟

شوف اخوي بعطيك اللي اعرفه عن خبرتي الصغيرة


بعطيك مثال

سيارتي الجير 4 نمرات تيبترونيك يكون نسبه أطول

1 ===============
2 ======================
3===========================
4 ===============================

والضغط على المكينة يكون اكبر شوي وعادة القومة تكون شوي بطيئة
9.2 واني يعني


الجير بو 5 نمرات عادي يكون نسبه اقل

1 ==========
2 =============
3 =================
4 ========================
5 ===============================


القومة تكون اقوى وضغط المكينة اخف
يعني الجير ذو نسب قصيرة يكون ممتاز حق القومة

اما الجير ذو النسب الطويلة فيكون يسحب سرعة اكبر



الجير اللي نسبه طويلة مثلا يسحب 209 كلم/س
الجير اللي نسبة قصيرة يسحب 200 كلم / س

هذا على النمرة الرابعة فقط

اما الجير العادي دائما يسحب اكثر عن الاوتو

يعني سيارتي اوتو 4 نسب تسحب 209 كلم/س
العادي 5 نسب تسحب 215 كلم / س


شفت الفرق


ان شاء الله افدتك


هذا اللي اعرفه والشباب ما بيقصرون معاك

شوكرن اخ خالد
وانتظر راي باقي الشباب